Matai 24 - Ngudradreadrekadhane Ka Sisiu 魯凱語聖經

Wayugingi ku lrika akamudane ku daane ki Twaumase

¹ Sa twalai ki daane ki Twaumase mulatadre ku Yesu, si lri katwasenga, ku lasitu wakela mucucubungu iniane, si drukange padrele ku tapangimiane tudaane ku daane ki Twaumase.

² Ku Yesu la iya kai liniane, “Kunumi kainu ka wadrelenga patuelre kilakikai tatudaanane? Nau pudriadriingai pelaela numiane, kai lalrenege kikai lri kiburuku patuelre, kadrwa ku navaevanga ku lrenege ku lrika sakamiyana ka raedrane.”

La amatikurwane si hakegai

³ Ku Yesu wanene ikai lregelrege Ulrive; ku lasitu la kibubuli kivaga iniane iya kai, “Ala pelaela naiane, kilakikai lri ngimia lwigane? Ku akelanesu si ku apalikaiyane kawmasane manemane ku sasakaladhane?”

⁴ Ku Yesu la tubalre iya kai, “Kunumi dradreela, madha kilrilrilrigili ki umawmase.

⁵ Asi lwiyane lri takaalra ku umawmase ku lri draedrangelre sinagane ku naganeli, si iya kai, ‘Amaniaku ku Kirisitu’ iya, lai ngwalai kwini si pamamama ki takaalra ku umawmase.

⁶ Lri kilalra numi ku makarururuburu ku adeethe si adaili. Madha mukuludru, kilakikai yai lri tara ka angimiane paswala, ai kikai kaika sapelaelane ka wadarurunga kudra alikaiyane ku vai.

⁷ Ku taingeane ka minzuku lri makakaruburu ki maelane ka minzuku, ku taingeane ka kuni lai kikaruburu ki maelane ka kuni; ikai kidruanga lai lri ikai ku silravane si lingilingi.

⁸ Kilakikai patuelre ku angimiane lri mararaamau lu pathagili kiangeange ki atulalakane ki tawbaliri.

⁹ “Lukamaninga kwidra, lri kipwalra numi, si kipathavungu pakiangeange, la kipapacai. Ngwalai nakwane, kai yakawmasane kai umawmase lri makitu kalisi numiane makanaelre.

¹⁰ Lri takaalra ku umawmase ku lri cilri ku salrwane lini, si lri makilangalangai, makababadha;

¹¹ lri takaalra ku kaika patengane ka yuginsia ku lri utaluvaivai, si pamama ki kidremedreme ki umawmase.

¹² Asi lwiyane lri sarawnga ku ngialisiane, lai takaalra ku umawmase ku lri aru kangangerece ku sakialibake ku kidremedreme.

¹³ Ai, ku maka kiadili patulrepenge ku umawmase lri tara kipalribulu.

¹⁴ Ku hukuingi ki kuni belenge lri paswalana pasalraelre kawmasane, si akasi papia ki sanaka umawmase, ala lri kela ku apalikaiyane kawmasane.”

Maadrau ka akipakwalriane

¹⁵ “Wadrele numi ki yuginsia ka Daniele ku taiyane kudra ‘Matiavalracevace ka lri pakamudu ka lamanemane’ acegecegenga ikai ki saniange turamuru (ku sialrigu tara pulringava ku pacugane kikai ki vaga),

¹⁶ ku yakai talikai Yuda, nai mubere kilepenge mulregelrege;

¹⁷ ku yakai ki cavalri, madha mulebenga si mudaane malra ku lamanemane;

¹⁸ ku yakai ki umawma, la mialri madha mubalribalriu malra ku sapakabelengane ku laimai.

¹⁹ Ikai kwini ki lavai, ku tawbaliri si pathuthuthwana ki lrulai ka tina lri kwalri!

²⁰ Kunumi kitubia ki Twaumase ku kaika angimiane kilakikai ikai ki kalakecelrane ku Taisadrasadrane ka vai;

²¹ asi lwiyane kwini ki la amatikurwane ka vai yai twalai ki tabekacane kawmasane pakeela kaikameane kadrwana ku miyaiya, lubibilrili lutuumane lai kai lri ikainga.

²² Alaiyasi ku Twaumase la kai aru tuedrekane kwini ki amatikurwane ka lavai, kadrwa ku umawmase ku lri dulru panianiake. Ai lri ngwalai kudra ki nipilriane ka lakawkawluini, ku Twaumase lri aru tuedrekane kwini lavai.

²³ “Alaiyasi ikai ku umawmase ku amia kai numiane, ‘Drela, yakai kikai kai Kirisitu! Drela yakai kavai ka Kirisitu!’ Madha kipawtengatenga iniane.

²⁴ Asi lwiyane kudra kaika patengane ka Kirisitu si kaika patengane ka yuginsia lri mutaluvaivai, kwini lalasu lri pia ku maadrau ku matiasamali ka awngane pamama ki umawmase; luka adulrwane la lri pakeela ki pamama ku nipilriane ki Twaumase ka lakawkawlu.

²⁵ Pulringava! Paswalanga naku pakipapawlringau numiane.

²⁶ “Alaiyasi ikai ku umawmase ku peaelaela numiane iya kai, ‘Drela! Yacalragulragu ka Kirisitu!’ Amia numiane, kunumi madha katwatwase; la ikai ku amia kai, ‘Drela! Kwi Kirisitu yadaane!’ Kunumi la madha kasalrusalru.

²⁷ Asi lwiyane lu kela ku Lalake ki Umawmase lri mia ki lrikace, lri yasasaane, twalai talrawane pakela talriwgane salraelre kai subelebelenge.

²⁸ “Luka taikaiyane ki wapacai ka kinawmasane, ku kwau lri ikaai kwini irurubu.”

Akelane ki Lalake ki Umawmase

²⁹ “Kwini la amatikurwane ka lavai sana ngilribatenga, ku vai lri kadradrimiti, ku dramare lai kai ledranga, ku tariau lri twalai belenge mucilri, kai subelebelenge ku tangidarepane patuelre lai lri ngivelevele.

³⁰ Lukamaninga kwidra, ku sapatuthingalane ku akelane ki Lalake ki Umawmase lri adrelane ikai belenge. Kai kawmasane sanaka zuku si umawmase lri tubi makanaelre; kwini lalasu lri drele ki Lalake ki Umawmase ku kiasuete ki puku si lrigu la ngukaikai ki ememe mulebe.

³¹ Ku lingau ki rapa lri kwadrau elraelrange, kwini lasu lri sikawlu ki sasiakawlu belenge pamwa sanaka ininunga, lri patwalai ki talrawane kai kawmasane pakela ki talriwgane kai kawmasane, si sarubu ku pilrini ka laumawmase.”

Sabulrwane patwalai ki icizike ka angatu

³² “Kunumi patwaladha ki icizike ka angatu kibulru ku sabulrwane. Lu rigarigi si puvasawnga ku ricingi wathingale numi ala ka padethenga ki kaladralrangedrangane.

³³ Laka thadaalrane, lu drele numi kikai tangimiyaiyane patuelre lri thingale numi ala ka lri kelanga ku vai, yakainga ki lrawlrawdru.

³⁴ Kunumi pulringalringava: Kai zidai kai ku laumawmase lu kaiyana pacai makanaelre, lri ngimia kikai patueelre.

³⁵ Kai subelebelenge kai kawmasane lri kamudu kawlrau, ai kai vagali kai lri kamudu palralrawthu.”

Kudra vai si kudra zikange kadrwa ku umawmase ku wathingale

³⁶ “Ala kudra akelane ki vai si zikange, kadrwa ku umawmase ku wathingale; adravane ku sasiakawlu ka belenge kai wathingale, kai Lalake la mialri kai thingale, kathane ku Tama ka wathingale.

³⁷ Ku akelane ki Lalake ki Umawmase lrika ngimiyaiya ki zidai ki Nua.

³⁸ Sakaiyana kela ku telebe, ku umawmase paiya ku tapiapiane kanekane ungungulu karudrarudrange, pakeela kudra sa mudaane ki varukuru ku Nua ku vai.

³⁹ Kwini lalasu ngalradangadangade, ala keela ku telebe, la aludru liniane. Ku akelane ki Lalake ki Umawmase lrika miyaiya kikai.

⁴⁰ Lukamaninga kwidra, ku tadrusa ku umawmase ikai ki angangade kawaungu, lri kimalra ku tangea, lai asuru ku tangea;

⁴¹ ku tadrusa ku ababai yakai pasilribulribu, ku tangea lai kimalra, ku tangea lai asuru.

⁴² Lakamani kwidra, kasimeameaca kipapawlringalringau, asi lwiyane kainu wathingale lukamani ki inu ku vai ku akelane ki Tamatama.

⁴³ Pulringava kikai: Kudra tamatama ki daane alaiyasi thingale lukamaungu luka amani lwigane ku akelane ki tarakupawpa, kwini lasu lri tara kasimeameace pulringalringau, si kai pawdaane ki tarakupawpa.

⁴⁴ Lakamani kwidra, kunumi la mialri katangipapadulrwana, asi lwiyane ku Lalake ki Umawmase lu kai numi pulringalringau lri pangitutuluku kela.”

Asudralrwalrwane si kaika asudralrwalrwane ka sasiakawlu

⁴⁵ “Laka miyaiyakai, laka aneane ku asudralrwalrwane ku malrigili ka sasiakawlu? Amani kudra kiasudralru ki tawki kela marasikai ki drumane ki lasasiakawlu, si singikai ki zikange apakelrekelrete ku taleke kwini umawmase.

⁴⁶ Lu kelanga kudra tawki, la drele kai ki sasiakawlu ku takapatenganane si pangimia ki awnganeini, kikai sasiakawlu lri kaesailriinga turamuru!

⁴⁷ Nau pudriadriingai pelaela numiane, kwini tawki lri sikawlu iniane marasikai ki tacekecekelaneini patuelre.

⁴⁸ Ai, kwini lasu alaiyasi ka manganga ka sasiakawlu, lri pikidremedreme kisaisange, ‘Alau lri kai sarakela ku tawki’,

⁴⁹ lakamani ku pwalrima lrumai ki drumane ka papalraini, si taelre ki tarakabusubusuku ungungulu si kanekane kiraragai.

⁵⁰ Ai ikai kudra ki kaika tapulringalringavaneini ka vai, ikai ki kaika thingathingaleini ka zikange, ala keela ku tawki.

⁵¹ Kudra tawki lri pakilriingau kaelaela lrumai iniane, lai lri kipakaredele ki tarangikathaithaithariri ka umawmase kipathavungu; ikai kwini, kwini lasu lai tubitubi, si apararitaitaiti.”