Matai 22 - Ngudradreadrekadhane Ka Sisiu 魯凱語聖經

Ngiakanekaneane ki marudrarudrange ka pathalrilriku

¹ Ku Yesu la peelanga arakai ku pathalrilriku iya kai liniane,

² “Kai kuni subelebelenge maru amaaninga kudra tangea ka talialalai ka pasiakai ki akarudrangane ki lalakeini padulru ku angiakaneanane.

³ Kwi lasu la sikawlu ki lasasiakawlu pakatwase pakisamula kudra ki nidawlane ku badhabadha ku akelane kipaelre ngiakaneane ki marudrawdrange, ai kwini lalasu kai mwabangalre kainganai.

⁴ Kwi lasu la peelanga sikawlu ku drumane ku sasiakawlu pakatwase, si cunu liniane ku apelaelane lini ki badhabadha iya kai, ‘Kai apangiakaneananeli nipadulrwanenga, la ka niculwanenga kai sawvalai ka lwange si la tariicucuru ka waudriwdripi, nipadulrwanenga patuelre, bwala kela kipaelre ngiakaneane.’

⁵ Ai, kwini lanidawlane ku badhabadha la kai tuthengete, maupupupungu ku awngane lini sikakathane: Ku tangea matwase ngudalrane, ku tangea matwase drele ku siwbaini.

⁶ Kudra drumane la ruthuku kwini ki lasasiakawlu, si lrumai tatetere, la papacai liniane.

⁷ Kwini talialalai la kalisi turamuru, si pakatwase ku kwapingi papacai kwini ki latanganganga, la lama ki cekele lini.

⁸ Kwini lasu ala kirimu iya kai ki sasiakawlu, ‘Kai angiakaneanane maka padulrunga naku, ai kudra nipaswalane dawlu ku laumawmase kai swadalepenga kisupilri.

⁹ Kaiasasane lu mwa kadalranane ki cekele, ku kipadradresenge numi ku umawmase la dawla liniane pakainganai ngiakaneane.’ ”

¹⁰ Lakamani ku lasasiakawlu la katwase mwa kadalranane ki cekele, ku dreele lini ku umawmase, kai susu ka mathariri ka manganga ka umawmase wa dawlu patueelre, la suete nene ku labadhabadha kwini ki ngiakaneane ki takarudrarudrangane.

¹¹ “Ku talialalai sa kainganai kikawriva ki badhabadha, la drele ku tangeea ku kai ngiaragelane,

¹² la kivaga iniane iya kai, ‘Talragi, ku takelanesu mwa kikai asu kai ngiragelane?’ Kwini umawmase la kai tubalre ku naniakuvalanenga.

¹³ Ku talialalai la kawriva ki sasiakawlu iya kai, ‘Alra kerenga kwini alrima si drapaleini, la cilri pulatadre kadradridrimitane. Ikai kwini, kwi lasu lri tubitubi, si apararitaitaiti.’ ”

¹⁴ Ku bibiilrilinga, ku Yesu amia kai, “Ku kiadawlu ku umawmase takaalra, ai ku nipilriane ku umawmase tabeekele!”

Patharwakai ki wakazilu baai ki tinuhika ki swa Ruma ka mundai

¹⁵ Ku swa Palrisai matwase, si madrekadrekase ku lrika apangimiane patwalai ki vaga ki Yesu kidringai ku atakaiyane tulisi iniane.

¹⁶ Kwi lalasu siakawlu ki lasitu lini, si madredresenge kielrelreane ki la swa Hiruditu si katwase kikawriva ki Yesu, si kivaga iniane, “Sinsi, wathingale nai amanisu ku twakapatengatengane ka umawmase; kai tuthengete ku takidremedremane ki umawmase, tara pangiamiyasu ku vaga ki Twaumase si bulru ki umawmase, asi lwiyane kaisu wadrele ku tangimiane ki umawmase.

¹⁷ Ala pelaela naiane ku kidremedremesu, lu kazilwane baai ki tinuhika ki swa Ruma kaika wabaebalrenga ki hulriceta?”

¹⁸ Ku Yesu wathingale ka ngialisiane ku takidremedremane lini, la iya kai, “Tara ngikathaithaithariri ka umawmase, anu kisanu tulisiliisi nakwane?

¹⁹ Malra ku vaeva ku sarakaikaiyane kazilu ka paisu padrele nakwane!” Kwi lalasu la baai iniane ku vaeva ku paisu.

²⁰ Ku Yesu la kivaga liniane, “Kikai belenge kai nituumawmasane si kai nagane aneanane?”

²¹ La tubalre kwini lalasu, “Tinuhika ki swa Rumane” iya. Lakamani ku Yesu iya kai liniane, “Lakamani ku tinuhika ki swa Rumane ku lamanemane baadha ki tinuhika ki swa Ruma, ku lamanemane ki Twaumase la baadha ki Twaumase.”

²² Kwini lalasu sa kilalra kai vaga, la kasamaali turamuru, la kidaili iniane si katuasenga.

Patharwakai ki siela panianiake ka mundai

²³ Thadaalrane ka vai, la ikai kudra kai masalru ku patharwakai ki wapacai si siela panianiake ka la swa Sadukise kaiyanganai kikawriva ki Yesu, la kivaga iniane iya kai,

²⁴ “Sinsi, ku Musi wabulru naiane, yakai ku tangea ku wapacainga ku umawmase, la kakadrwa ku lalake, ku agini la musururu sitaelrelre ki sakadaneini, lri pasikai ki takaini tulalake ku lri ucungulu.

²⁵ Kunadruma, ikai naiane yakai ku tapitu ku lamatakataka ka lasawvalai, ku takataakanga la karudrange, si pacai, ka kadrwa ku lalake, la suru kwini ki walibakane baai ki agini;

²⁶ ku mwasaka drusa, mwasaka tulru laka miyaiya kikai, pakeela ki mwasaka pitu, maramaraamau ku tangimiane.

²⁷ Ku bibiilrilinga, kwini alisu la mialri pacai.

²⁸ Nai kivaga, Sanaka siataelrelrenga iniane kwini lalasu, ikai ki tasielane ka vai, kwini alisu lai lrika taelrelre ki aneane? Kwini lalasu marudrangenga mwa iniane makanaelre!”

²⁹ Ku Yesu la tubalre liniane, “Pasalriu numi! Kai numi pwalringalringau ki Sisiu, la kai numi thingale ku puku ki Twaumase.

³⁰ Ikai ki tasielane panianiake ki wapacai ku umawmase, kwini lalasu lri mia ki sasiakawlu ka belenge, kai lri karudrangenga kai lri kitharevenga.

³¹ Pangukai ki siaelane panianiake ku wapacainga, kai numi sialrigwana ku pelaela numiane ki Twaumase ku vaga?

³² Amia kai ku Twaumase, ‘Amaniaku ku Twaumase ki Aberahame, Twaumase ki Isake, Twaumase ki Yakubu.’ Ku pacugane kikai amia kai, ku Twaumase yai Twaumase ki panianianiake ka umawmase, kaika Twaumase ki wapacai ka umawmase.”

³³ Ku mapapangale sa kilalra kikai miyaiya kai ka sabulrwane, masamali turamuru.

Madraadrawnga ka padradrekase

³⁴ Ku swa Palrisai sa kilalra ki Yesu ka pakametemete ku ngudui ki swa Sadukise, kiarimu yelrelre irubu.

³⁵ Ikai kwini la ikai ku tangeea ku tarabulrubulru ki hulrice ku kiasanu arakai ku taingeane ka mundai tulisi ki Yesu.

³⁶ Kwini lasu la kivaga iniane iya kai, “Sinsi, ikai ki hulrice ki Musi, laka mwasakapia ku padradrekase ku makuciaciingalrenga?”

³⁷ Ku Yesu la iya kai, “ ‘Kusu arakaiya patueelre ku takidremedremanesu, ku kalithanesu, ku lrigilanesu kilibake ki Tamatama ka Twaumasesu.’

³⁸ Amani kai kudra aswalaalanga ka makuciaciingalrenga ka padradrekase.

³⁹ Ku mwasakadrusa la ka mialri kakucingalre, ‘Kusu kialibake madu ki pasiagiagisi, mia lu ngikakilibaakane.’

⁴⁰ Ku hulrice ki Musi patueelre si sabulrwane ki yuginsia siatangadrane patueelre kai ki drusa ka padradrekase.”

Patharwakai ki Kirisitu

⁴¹ Ku swa Palrisai sa irubu taelre, kiavaga ku Yesu liniane iya kai,

⁴² “Ngitwatumane ku tadrelane numi ki Kirisitu? Kwi lasu mwabaibalrithi ki aneane?” Kwini lalasu la tubalre iya kai, “Kwi lasu mwabaibalrithi ki Davidi.”

⁴³ Ku Yesu la iya kai, “Ku Siri ani kandu ki Davidi ‘Tamatama’ iya iniane? Amia kai ku Davidi:

⁴⁴ Ku Tamatama amia kai ki Tamatamali: Nenea ikai ki tali vanaleli, si ukalava nakwane ku lrika amalebeane ki badhasu ikai tailebeane ki drapalesu.

⁴⁵ Alaiyasi ku Davidi la pasudalepe iniane ka ‘Tamatama’, ku Kirisitu ara kiriimu ka mwabaibalrithi ki Davidi?”

⁴⁶ Laka kadrwa ku umawmase ku wadulru akuvale tubalre ku kivagavaga ki Yesu. Twalainga kwini ki vai, kadruanga ku umawmase ku wathuru peela kivaga iniane ku makucingalre ku mundai.