Matai 21 - Ngudradreadrekadhane Ka Sisiu 魯凱語聖經

Masasialrigu mudaane Yerusalrime

¹ Kwi lalasu sa padeethenga Yerusalrime, si darurunga tali Ulrive ka lregelrege ka sia Bithepagi. Ku Yesu la sikawlu ki tadrusa ka situ katwase aswalaala,

² si pelaela liniane iya kai, “Lu katwasa mwa kavai cucubungu ka cekele. Lri makakaai numi drele ku nikerengane patadrusa ku vaeva ka ruba si vaeva ka lrulai ka ruba; waalra madu liniane mukerenge, si kainganai iluku baai nakwane.

³ Alaiyasi ikai ku kawariva numiane ku manemanenga, peaelaela madu iniane iya kai, ‘Lri arakai iniane ku Tamatama’; kwi lasu lri makakaai pailuku numiane kainganai.”

⁴ Ki kikai yai lri pangimia ku taiyane ki yuginsia:

⁵ Lu pelaela ki lalalake ki cekele Ziyungu: Drela, wakelanga ka talialalai numi! Kwi lasu ngiatatualebe si ngurigi ibelenge ki ruba, ngwarigi ikai ki lrulai ka ruba.

⁶ Kwi tadrusa ka situ la singikai ku taiyane ki Yesu si pangimia.

⁷ Kwi lalasu la malra iluku kwini ruba si lrulai ka ruba, la malra ku laimai lini si sapa pikai ki drelreke ki ruba, ala paubelenge ki Yesu.

⁸ Kudra tapaangale ka laumawmase la malra ku laimai lini, si sapa pikadalranane, la ikai ku laumawmase ku wathiabe ku ricingi ki angatu si sapa pikadalranane.

⁹ Kudra la twapapapalra ku laumawmase la akwadrau matawtawtau iya kai, “Ku sadrengedrengerane ani papia ki Lalake ki Davidi! Ku Twaumase ani subulrubulru si baai kudra ki nipangukaiyane ku nagane ki Tamatama kela! Ku sadrengedrengerane, ani papia ki Abebeelengenga ka Twaumase!”

¹⁰ Ku Yesu sadarurunga Yerusalrime kwidra, la kathurivulu ku kinawacekelane. La ikai ku umawmase ku kiavaga iya kai, “Kikai umawmase kai aneane?”

¹¹ Ku mapapangale la tubalre iya kai, “Kai lasu yuginsia ka Yesu ka swa tali Galrilri ka Nazarethe.”

Ku Yesu wabula ki daane ki Twaumase

¹² Sa mudaane ki daane ki Twaumase ku Yesu, pakatwase makanaelre ku yakai ki daane ki Twaumase siwbawbai ka laumawmase. Wakadrulu ku cukui ki tara balribalrithi ki paisu si kudra lataetale ki kialangalangai ku tavagu ka umawmase.

¹³ La iya kai liniane, “Ikai ki Sisiu wapacase iya kai, amia kai ku Twaumase, ‘Kai daaneli lrika tainulrinulriane ka daane’, la maalralringa numi tudaane ki sadre!”

¹⁴ Yakai ku mukimukici si mapiapilai ku drapale ku wamwa ki daane ki Twaumase silape ki Yesu; ku Yesu la pawdringai liniane.

¹⁵ Ku marudrange ki barakalai si tarabulrubulru ki Sisiu sadrele ku tapiane ki Yesu ku makaalra ku pinangu Twaumasane ka puku, si kilalra ku yakai ki daane ki Twaumase ku lavavalake ku matatawtawtau iya kai, “Ku sadrengedrengerane ani papia ki Lalake ki Davidi!” La kagirimucu turamuru.

¹⁶ Kwi lalasu la kivaga ki Yesu iya kai, “Kialalrasu liniane luka tumana amiamia tawtau karariau?” Ku Yesu la tubalre iya kai, “Kialalraku. Ku taiyane ki Sisiu, ‘Patwalaisu ki lavavalake si lrulai pakainganai ku kiatulrepenge ku sadrengedrengerane’ kikai vaga, bekace numi kaiyana silrigu?”

¹⁷ Ku Yesu ala katwase liniane, mulatadre ki cekele si mwa Bithani, ikai kwini sulai.

Wapusu ki icizike ka angatu

¹⁸ Sakakaiyane ki mialrealre, sa siwlriwlri mucekele ikadalranane, la kasilrawnga ku Yesu.

¹⁹ Kwi lasu la drele ku yathili ki kadalranane ku vaeva ka icizike ka angatu, la katwase mwa, ai kadrwa ku kidringaini ku madru, kathane ku vasau. Ngwalai kikai la iya kai kwini ki angatu, “Lri kaisu pumadrunga palralrawthu!” Kwini icizike ka angatu la makakaai karudame.

²⁰ Ku lasitu sadrele kai tangimiane, la kasamali turamuru. Kwi lalasu la kivaga, “Kikai icizike ka angatu ani makakaai kavulru si pacai?”

²¹ Ku Yesu la tubalre, “Nau pudriadriingai pelaela numiane, alaiyasi kasalru numi kai kalrilriki, kikai tapianeli kai ki icizike ka angatu, kunumi lri mia numi dulru pia. La kaika miyaiya kikai sikakathane, adravane lridulru numi iya kai ki lregelrege, ‘Ngidrakala, la katwase mwa ki laveke!’ Lri tara ngimiya.

²² Sanaka yakai ku salrwane, ikai ki tainulriane numi ku kitubi numi patuelre lri dulru numi tarumara.”

Kiavaga ku puku ki Yesu

²³ Ku Yesu mwadaane ki daane ki Twaumase, saicengecenge bulrubulru ki laumawmase, ku marudrange ki labarakalai si laciwru ki swa Yuda la kainganai kikawriva iniane, si kivaga iniane, “Kusu yai satalusu ki manemane ka puku si pia kilakikai? Aneane ku wabaai muswane kikai puku?”

²⁴ Ku Yesu la tubalre liniane, “Nau paswalana kivaga numiane ku niakuvaalane, alaiyasi tubalre numi nakwane, la nau pelaela numiane luka satalwaku ki manemane ka puku pia kilakikai.

²⁵ Ku sapabanavane ki Yuhani ku puku yai twalai inu? Twalai ki Twaumase twalai ki umawmase?” Kwini lalasu la pathagilinga madrikidrikisi ku vaga, si iya kai, “Lri tumanaiyata tubalre? Alaiyasi iyata kai, ‘Twalai ki Twaumase kainganai’, kwini lasu lri iya kai, ‘Lanu kai kasalru ki Yuhani?’

²⁶ Alaiyasi iyata kai, ‘Twalai ki umawmase’ iya, alau lri kiecebe mitane kai mapapangale, asi lwiyane kai lalasu makitwa kasalru ki Yuhani ka yuginsia.”

²⁷ Ala kamani kwini lalasu tubalre ki Yesu iya kai, “Kai nai wathingale”. Ku Yesu la iya kai liniane, “Lukamiyaiya kai, lri kainaku pelaela numiane luka satalwaku ki puku ki manemane pia kilakikai.”

Tadrusa ka lalake ka pathalrilriku

²⁸ Ku Yesu la iya kai, “Yakaiyana ku vaeva ku pathalrilriku, apiathingalaku ku tapangimiane numi drele. Yakai kudra umawmase ku pasangwa drusa ku lalake, kwini lasu la iya kai ki takataka, ‘Lalake, kaikameane lu mwa babudwane kaungu.’

²⁹ Kwini lasu la tubalre iya kai, ‘Kainaku lri mwa.’ Ai sakabilrilane akabalrithi ku takidremedremane, si la katwase mwa.

³⁰ Kwini tatama la kawriva ki agiagi ku thadaalrane ka vaga. Kwini agiagi la tubalre, ‘Unu, ama, lri mwaku’ la iya. Ai kai wamua.

³¹ Kai tadrusa ka lalake aneane ku pangiamia ku takidremedremane ki tama lini?” Kwini lalasu la iya kai, “Amani kwini takataka ka lalake.” Ku Yesu la iya kai, “Nau pelaela numiane, ku tarakikaziluzilu si pairairange lri aswala numiane aumawmase ki kuni ka subelebelenge.

³² Asi lwiyane wakela ku tarapabanau ka Yuhani, la pelaela numiane ku angukaiyane katwase ku pacengecenge ku kadalranane, la kai numi kasalru iniane; ai kai tarakikaziluzilu si pairairange ngiabaalrelringa si kasalru iniane. Sa drelenga numi, laka thadaalraneana kai akabalrithi ku takidremedremane, kaiyana kasalru iniane.”

Pathalrilriku ki manganga ka tarakawaungu

³³ Ku Yesu la iyanga kai, “Kunumi kilalraana ku taingeane ka pathalrilriku! Yakai ku tawki ku twaumawma tubabudwane, la pangithalringulu ravadre, ikai babudwane adringi la lruku ku taluvaale ku tapepeane tubava, si tudaane ku vaeva ku tadrangalrungalrwane, ala pakisalru kwini babudwane ki tarakawaungu, si katwase mubabadhane kivavange.

³⁴ Sa kelanga ku kalalremane ki budu, la sikawlu ki sasiakawlu katwase mwa kwini ki tarakawaungu malra ku naika amalraane ku drulruini ku paisu.

³⁵ Kwini tarakawaungu la alra ruthuku kwini ki sasiakawlu, si lrumai ki tangea, la papacai ki tangea, la arakai ku lrenege dukulru ki tangea.

³⁶ Kwini piumawmane la sikawlunga ki drumane ka sasiakawluini pamwa, ku tataruthane takaakalra ki aswalaala; kudra tarakawaungu la piyana kudra tapangimiane lini.

³⁷ Ku bibiilrilinga, kwini piumawmane la sikawlu ki lalakeini pamwa, si pukidremedreme iya kai, ‘Kwini lalasu lri tara usaakene ki lalakeli.’

³⁸ Ai kwini latarakawaungu sadrele kwini ki lalake, mapeaelaela iya kai, ‘Kikai umawmase amani ku lri mucungulu ki tawki ki umawma, bwala, tapapacai iniane, si malra ribici kikai lrika aucungulaneini’

³⁹ Lakamani kwini lalasu alra ruthuku iniane, si lrudrulu pulatadre ki babudwane, si papacai.

⁴⁰ “Luka miyaiyakai, kwini tawki ki babudwane lukelanga, lri pangitumane kwini ki latarakawaungu?”

⁴¹ Kwini lalasu la iya kai, “Kwini lasu lri tara papaacai kwidra ki lamanganga ka laumawmase, si malra kwini babudwane pakisalru ki lri dulru pangimia baai ku sakisalrwane ku paisu ka drumane ki latarakawaungu.”

⁴² Ku Yesu la iya kai liniane: “Kudra vaga ki Sisiu kai numi sialrigwana? Kikai lrenege ka cilri ki taratudadaane akabalrithinga si kaamaninga kudra makuciaciingalrenga ka karwalai ka lrenege. Kikai yai takaungane ki Tamatama, ikai ki tadrelaneta matiasamali turamuru!”

⁴³ Ku Yesu la iyana kai, “Lakamani, nau pelaela numiane, ku Twaumase lri malra ku kunini patwalai numiane ribici, lai baai kudra ki maka wadulru pumadru ka umawmase. [

⁴⁴ Sana ka aneanenga ku mwacilri makakai kai ki lrenege, lri tara kababurau ku kinawmasane; kikai lrenege ku tamucilriane makakai ki aneanenga, lri mialri kipakababurau ku aneanenga.”]

⁴⁵ Kudra lamarudrange ki barakalai si la swa Palrisai sa kilalra ku matikai ki Yesu kikai lapathalrilriku, wathingale ki Yesu ka amanimani liniane kawriva.

⁴⁶ La kisanu pwalra iniane. Ai kwini lalasu mwakuludru ki mapapangale, asi lwiyane ku mapapangale paswadalepe ki Yesu ala ka yuginsia.