Matai 20 - Ngudradreadrekadhane Ka Sisiu 魯凱語聖經

Pathalrilriku ki tarakawaungu ki babudwane ka umawmase

¹ “Kai kuni subelebelenge maru amaninga kikai lebe ka abulru: Yakai ku tangea ku tawki ki babudwane, sakamialrealre ngwalalaakese katwase, silape ku lri kaungu mwa ki babudwaneini.

² La kelreteenga si singikai ku tapiapiane ki vaivai baai liniane ku vaeva ka gingi ka paisu, ala pakatwase pakaungu liniane mwa ki babudwaneini.

³ Saka mialrealre ikai kau bangate ki tuki, kwi lasu la nguseelanga mwa ki tamalangalangadhane, la drele kudra laumawmase ku acegecege ikai kwini, kadrwa ku tumatumane,

⁴ la iya kai liniane, ‘Lu mwa ki babudwaneli kaungu; lri baadhaku pangimia ku sapawlrawlravane.’

⁵ Kwi lalasu la katwase. Sakabilrilinga, sa ulringedele ka 12 ki tuki si sa makaulringedele ka tulru ki tuki, kwi lasu la katuasenga, la pangimia dawlu kudra la tarakawaungu.

⁶ Samaka ulringedele sa lrika lrimanga ki tuki, kwi lasu la muanga ki tamalangalangadhane, la drele la ikaiyana ku la acegecege ikai kwini, la kivaga liniane iya kai, ‘Anu turakete acegecege ikai kai, ka kadrwa ku tumatumane?’ Kwi lalasu la iya kai tubalre,

⁷ ‘Kadrua ku wadawlu pakaungu naiane.’ Kwi lasu la iya kai, ‘Ani lu mwa midra ki babudwaneli kaungu.’

⁸ “Saka miauawbu, ku tawki la kawriva ki maililuku kaungu iya kai, ‘Dawla pwakai ki wakaungu, si apavalavala baai ku kaungu lini ku paisu, la paswala baai kudra ki abibiilrilinga kela kaungu, singikai baai pakela ki aswalaalanga kela kaungu.’

⁹ Kudra wakela saka lrimanga ki tuki kaungu, wamalra savavaeva ku gingi ka paisu.

¹⁰ Sa lri kamaninga ku lri kipaisu kudra ngulaelaakesenga kela kaungu, kwi lalasu lri tara ngukaalrata la iya kidremedreme, ai savavaeva ku paisu ka gingi ku alra lini.

¹¹ Kwi lalasu sa malranga, la kalisi ki tawki iya kai,

¹² ‘Kilakikai abibiilrilinga kela ngusivavale ki tuki kaungu, la awngu nai ku vai si kwalri, la apararaamawsu ku baaisu liniane si baaisu naiane!’

¹³ Kwi tawki la tubalre liniane ki tangea iya kai, ‘Lala, kainaku pawalisi muswane. Asu palraaingi ku vaeva ka gingi ku paisu ku sapawlrawlravane?

¹⁴ Alra kwi paisusu la katwase ubalriu! Lri baadhaku apararaamau muswane kudra ki abibiilrilinga kela,

¹⁵ Bekacaku ka kadrwa ku puku arakai ku paisuli? Ngwalai ku takatwabakaneli ki umawmase, si la pathalrasu?’ ”

¹⁶ Ala iya kai ku Yesu, “Lu ngimia kikai, kudra la naabilrili, lri athamadalanenga; kudra athamadalane, lai lri abilrilinga.”

Saka kingitulrulu ki Yesu yugingi ku apacadhaneini

¹⁷ Ku Yesu sa mudradha mu Yerusalrime kwidra, la iluku puthili ki ta 12 ka lasituini, la takudadadavace si pelaelaela liniane iya kai,

¹⁸ “Kunumi thingala, kaiasasane lri katwaseta mudradha mu Yerusalrime, kai Lalake ki Umawmase lri kikilangai baai ki marudrange ki barakalai si tarabulrubulru ki Sisiu. Kwi lalasu lri tupasalrivane ku apapacadhane iniane,

¹⁹ ala lri alra iniane baai patarumara ki sakamaelanane ka umawmase. Kwi lalasu lai lri tusinalrelreme sivavangane iniane, lai lrumai iniane, si alra iniane kedrekedre pwa ki ziwzika; ai luka samakatulrulu ku vai, kwi lasu lri siela panianiake.”

Kitubi ki tiatina

²⁰ Ku taelrelre ki Zibidi mailuku ki tadrusa ka lalakeini si kainganai mwa ki Yesu, la sukubu iniane, si kitubi ku taingeane.

²¹ Ku Yesu la kivaga iniane, “Manemane ku murikaisu?” Kwi alisu la tubalre, “Lri kitubiaku ku apalrainganesu, lu atalialalaingasu, kai tadrusa kai lalalakeli, ku tangea ani nene ikai tali vanalesu, ku tangea ani nene ikai tali virisu.”

²² Ku Yesu la iya kai, “Kunumi kai numi wathingale ku kitubitubi numi lukamanemane. Kudra lrika awngulaneli ku mapalili ku yakupwane, lri dulru numi ungulu?” Kwi lalasu la tubalre iya kai, “Lri dulru nai!”

²³ Ku Yesu la pelaela liniane iya kai, “Adravane numi maka ungulu ku mapalili ku kupuli, ai kadrwa ku pukuli kelrete ku lrika aneane ku lri ikai ki vanale si virili. Kilakikai taetalane, ku pinasikaiyane ki Ama padulru ki aneane lrika aneanane.”

²⁴ Kudra drumane ka tamangeale ka lasitu sakilalra kikai takitubiane, la kagirimucu kwini ki lamataka.

²⁵ Ku Yesu la dawlu liniane pucucubungu, si iya kai liniane, “Wathingale numi, kai umawmase kawmasane yakai ku swa sihu ku marasiakaikai kadrenge liniane, yakai kudra taramasasangililuku kadrenge apadrekadrekase liniane.

²⁶ Ai, kai numi ka ngimiyaiya kikai. Ikai numiane ku nau ka sanianiangenga amia, lrika amaani kudra lri asasiakawlu numiane;

²⁷ Lukaaneane ku nau atamatama amia, lri kamani kudra lrika sasiakawlu numi.

²⁸ Mararaamau ki Lalake ki Umawmase, kwi lasu kaika wakela kipasikai ki umawmase, pakai ku apasikaiyane ki umawmase kamani, si pakai ku apalribulane ki laumawmase la patarumara ku niakeini.”

Pawadringai ki tadrusa ka mamukici

²⁹ Kwi lalasu sakatwasenga Yeriku kikwidra, ku twaredededele ku laumawmase twapapalra ki Yesu katwase.

³⁰ Yakai ku tadrusa ku mamukici ku wanene ikai thili ki kadadalranane, sakilalra ka walribalribate ku Yesu, la akwadrau tawtau iya kai, “Tamatama, Lalake ki Davidi, kakuruua naiane!”

³¹ Ku lamapapangale la kaelaela liniane, si pakaicilri liniane avavaga; ai kwini lalasu arwakwadrawlringa tawtau iya kai, “Tamatama, Lalake ki Davidi, kakurua naiane!”

³² Ku Yesu la idrengere, si dawlu pakainganai liniane, la kivaga iya kai, “Anitumane naiane amia numi nakwane?”

³³ Kwi lalasu la tubalre iya kai, “Tamatama, padrela kai maca nai!”.

³⁴ Ku Yesu la kainganai ku kalithane ki kidremedreme, si sulrape ki maca lini; kwi lalasu la makakaai dulru drele, si katwasenga tupapalra ki Yesu.