Matai 2 - Ngudradreadrekadhane Ka Sisiu 魯凱語聖經

Twalai tali talrawane ka wakela lrikape ka badhabadha

¹ Saka talialalai ku Hirudi, kiatulalake ikai Yuda ka cekele Bithelrihime ku Yesu. La ikai ku latarakinkinkiu pangukai ki tariau ku twalai tali talrawane si kela mu Yerusalrime;

² kwini lalasu la kivaga iya kai, “Yainu kitulalake kudra lri atalialalai ki swa Yuda? Wadrele nai ku tariauini ikai tali talrawane, lakamani ku tukucingalre nai si kela sukubu iniane.”

³ Ku Hirudi ka talialalai sa kilalra kwini vaga, la kawpungu si kai kasulivate ku kidremedreme; ku laumawmase makanaelre ki swa Yerusalrime la mialri kai kasulivate.

⁴ Ku Hirudi la sarubu ki sanaka marudrange ki barakalai si latarabulrubulru ki Sisiu, si kivaga liniane iya kai, “Lri kitulalake ikai inu ku Kirisitu?”

⁵ Kwini lalasu la tubalre iya kai: “Yakai Yuda ka Bithelrihime, asi lwiyane nawapacase iya kai ku yuginsia:

⁶ Swa tali Yuda ka Bithelrihime, ikaisu ki laceekele ki swa Yuda, kaisu ka titikiyanenga; asi lwiyane yakai ku tangea ku lrika Tamatama ka tarasangililuku lri twalai muswane ngibwale, lri lapu ki laumawmaseli ka swa Iseraylri.”

⁷ Ku Hirudi la kibubuuli dawlu si kikawriva kwini ki la twalai tali talrawane ka tarakinkinkiu ki tariau, si kivaga liniane, kudra vaailringa ki tautaluvaivadhane kwini ki tariau.

⁸ Ala kawriva liniane si pakatwase papia Bithelrihime, la iya kai, “Lu mwa, si pudriadriingai silape kwini ki lrulai, lu kidringainga numi la kela si pelaela nakwane, lanau mialri mwa sukubu iniane.”

⁹ Sa kilalranga kikai vaga, kwi lalasu la katwase. Kudra drele lini ikai tali talrawane kwidra tariau la adrelanenga, si ikai cucubungu ka aswalalala liniane, pakeela sa mwa taibelenge kudra ki taikaiyane kwini ki lrulai ala idrengere.

¹⁰ Kwi lalasu sadrele kwini ki tariau, kiararaagai turamuru.

¹¹ Kwi lalasu la mudaane, si la drele ki lrulai si tinaini ka Malria, la pidruru sukubu kwini ki lrulai, la mucaebe kudra tinukucingaalrane ka lrulrui, si malra kudra acebe lini ku kingi, sapasangulrelremane, sasulravane ka lasaceacebe si patarumara kwini ki lrulai.

¹² Ikai ki sipi lini, ku Twaumase peaelaela liniane madha siwlriwlringa kidrele ki Hirudi, kwi lalasu la ngukai talidrumane ki kadalranane si katuasenga mwa ki cekele lini.

Mwabere mu Izipiti

¹³ Kwi lalasu sa katwasenga, ku sasiakawlu ki Tamatama piakai ki sipi pelaela ki Yusepe, iya kai, “Ngidrakala! La iluku ki lrulai si tinaini papia Izipiti mubere, si ikai kwini, pakeela ku katwasa taiyaaneli muswane; asi lwiyane ku Hirudi wasilasilape kai ki lrulai, lri papacai iniane.”

¹⁴ Ku Yusepe la katwase, takamaungane mailuku ki lamatina mwa Izipiti mubere, si ikai kwini,

¹⁵ pakeela ku tapacadhane ki Hirudi. Kikai ngiamianga ku tapangukaiyane ki Tamatama ki yuginsia kawriva iya kai, “Patwaladhaku Izipiti dawlu ki Lalakeli.”

Papacai ki lalrulai

¹⁶ Ku Hirudi sa thingale ka kiatavuvulrucu ki latarakinkinkiu pangukai ki tariau, maliisi turamuru, la singikaai ku takilalraneini ki latarakinkinkiu pangukai ki tariau ku tapathingalane kwini vaivai, la sikawlu ki umawmase papacai ki swa Bithelrihime si ngwadadethe ka lacekele, kudra tara drusanga ka caili papulelebe sanaka sawvalai ka lrulai.

¹⁷ Ki kikai ngiamianga ku taiyane kawriva ki Yerimia ka yuginsia:

¹⁸ Ikai Rama akilalrane ku lingau ku watubitubi karalealeale. Ku Rakile watubitubi ki lalalake. Kai ubangalre kisasa, asi lwiyane wapaacainga makanaelre.

Twalai Izipiti kainganai

¹⁹ Ku Hirudi sapacainga, ikai Izipiti, ku sasiakawlu ki Tamatama pathingalane ikai ki sipi ki Yusepe,

²⁰ iya kai, “Ngidrakala! La iluku ki lamatina siwlri mu Iseraylri, asi lwiyane kudra la kiasanu papacapacai kai ki vavalake wapacainga.”

²¹ Ku Yusepe la katwase, mailuku ki lamatina siwlri mu Iseraylri.

²² Ku Yusepe ngwalai ku takilalraneini ku Arekilause mwacungulu ki tamaini ka Hirudi atalialalai ki swa Yuda iya, la pathimithimi mwa kwini. Sakabilrilinga, ku Twaumase la pikaainga ki sipi ki Yusepe pathingalane iniane, kwi lasu la katwase kiwlrau mwa Galrilri,

²³ si ikaainga sutelrai ikai Nazarethe ka cekele. Ki kikai ngiamianga ku taiyane ki yuginsia kawriva iya kai, “Kai lasu lri kipasudalepe ka swa Nazarethenga ka umawmase.”