Matai 19 - Ngudradreadrekadhane Ka Sisiu 魯凱語聖經

Sabulrwane patharukai ki piasadra ki taelrelreini ka ababai

¹ Ku Yesu sa maka kawrivanga kilakikai, la katwase Galrilri, si siwlri mwa balrealreanane kadravane Yuredange talikai ki swa Yuda.

² Ku lamapapangale la tupapalra iniane, ku Yesu la ikai kwini pawdringai ki lamacaeme.

³ Yakai ku la swa Palrisai ku kaiyanganai mwa ki Yesu, kiasanu tulisilisi iniane, la kivaga iniane, “Kai hulriceta palraingi ki taelrelre ka sawvalai arakai sanaka maneemane pakipisadra ki taelrelreini ka ababai, pacengecenge?”

⁴ Ku Yesu la tubalre iya kai, “Kainu sialrigwana kikai pacase ki Sisiu? ‘Sakapathagilane, ku Twaumase wabekace ki sawvalai la bekace ki ababai.’ Ku Twaumase la iya kai,

⁵ ‘Ngwalai kikai, kai umawmase lri katwase kitukudha ki marudrawdrange, si maelre ki taelrelreini, kai tadrusa lai avaevanga ka kinawmasane.’

⁶ Sanaka miyaiya kikai, kudra ladrusa kaika tadrusanga ka umawmase, vaevanga ka kinawmasane. Lakamani, ku pasudalepe paelre ki Twaumase, ku umawmase kai lri maka apauvagai.”

⁷ La kivaga ku swa Palrisai iniane iya kai, “Ku Musi lani baai naiane ku sivale ka padradrekase, ku taelrelre ka sawvalai lu baai ku pacase ku sapisadrane lri kai katumane lu pisadra si cilri iniane ani iya?”

⁸ Ku Yesu la tubalre, “Ku paubangalre ki Musi pakipisadra ki taelrelreini ka ababai, amani sa kakawlukulu turamuru kwi kidremedreme numi; ai sakapathagilane ki tabekacane kaika ngimiyaiya kikai.

⁹ Nau pelaela numiane, kathane luka kai ngwakai ki padralra ku taelrelre, sanaka aneanenga ku piasadra cilri ki taelrelreini ka ababai, si peelanga mwa ki drumane ki ababai karudrange, amani ku pasalriwnga pasudringai.”

¹⁰ La iya kai ku lasitu, “Kudra lukamiyaiya kai ku tamangangimiane ki matataelrelre, maesaesai kai karudrange.”

¹¹ Ku Yesu la iya kai tubalre, “Kudra miyaiya kai ku sabulrwane kaika atarumarane sanaka umawmase, kathane kudra kiapawkalrivili kibaai ki Twaumase ku migemi ku umawmase ka lri dulru tarumara.

¹² Asi lwiyane ku tangukaiyane kai karudrange ki umawmase taikalraane: Yakai ku la sakitulalake kaika swadalepe karudrange; yakai ku umawmase ku yakai ku tangukaiyane si kai dulru karudrange; la ikaiyana ku laumawmase ku ngwalai ki kuni subelebelenge si kai karudrange. Ku wadulru tarumara ki kikai sabulrwane tarumara!”

Swabulrubulru ki lavavalake

¹³ Yakai ku laumawmase ku waililuku ki lavavalake kainganai mwa ki Yesu, pakai ku answane inulri pasikai liniane; ai ku lasitu maelaela kwini ki laumawmase.

¹⁴ Ai ku Yesu amia kai, “Bwala pakainganadha ki lavavalake pwakai nakwane, madha teletelenge liniane, asi lwiyane ku kawkawlu ki kuni subelebelenge ala ngimiyaiya liniane.”

¹⁵ Samia kwini, ku Yesu la ansu liniane, si katwase ki kwini.

Langukathabarane ka satacekecekelanane

¹⁶ Yakai saka nikingivalane, la ikai ku tangea ku umawmase ku wakela mwa ki Yesu, si iya kai, “Sinsi, lri piaku ku manemane ku mathariri ala dulru malra ku palralrawthu ka niake?”

¹⁷ Ku Yesu la tubalre, “Asu kivaga nakwane ku ngwakai ki ‘makalecege’? Tangeangeea ku makalecege. Alaiyasi nau malra iyasu ku palralrawthu ka niake, pangimia ku padradrekase.”

¹⁸ Kwi lasu la kivaga iya kai, “Amani kiinu kudra la padradrekase?” Ku Yesu la iya kai, “Madha papacapacai ki umawmase; madha sudringai pasudringai; madha kupawpa; Madha draedrangelre kawriva ku kaika patengane;

¹⁹ usakena ki marudrawdrangesu; kilibaka ki pasiagiagisisu, mia lu ngikakilibakesu.”

²⁰ Kwini langukathabarane la tubalre, “Kikai padradrekase patuelre pangiamianga naku paluludu, manemaneana ku apiane?”

²¹ Ku Yesu la iya kai, “Alaiyasi nau kitulrepenge iyasu, lu katwasa si la kilangai patueelre ku tacekecekelanesu, la alra kwini paisu si arakai pakubulu ki matiakukuru ka umawmase, lri dulrusu rubu ku tacekecekelane pikai belenge; ala kainganadha tupapalra nakwane.”

²² Kwini langukathabarane sa kilalra kikai vaga, la kasalivaalrau kasuulringa katwase, asi lwiyane kwi lasu satacekecekelane turamuru.

²³ Ala kamani, ku Yesu pelaela ki lasituini, “Nau pudriadriingai pelaela numiane, ku sapaiswane ku umawmase nau akawkawlu ki kuni subelebelenge lu iya ala makucingalre.

²⁴ Nau peelana pelaela numiane, ku sapaiswane ku umawmase nau akawkawlu ki kuni ki Twaumase lu iya, makuciacingalreana ki lrakeda lu ngulratuku ki maca ki inamai.”

²⁵ Sakilalra ku lasitu kikai vaga, masamali turamuru, si kivaga iya kai, “Lwiyane kai, laika aneane ku lri maka dulru kipalribulu?”

²⁶ Ku Yesu la drele liniane, la iya kai, “Ku umawmase kai lri dulru; ai ikai ki Twaumase, sanaka manemane wadulru patuelre.”

²⁷ Ki kikai, ku Pitiru la iya kai, “Drela, wacilringa nai patuelre si kainganai tupapalranga muswane, lrika manemane ku amalrane nai?”

²⁸ Ku Yesu la iya kai liniane, “Nau pelaela numiane, ikai lukabibilrili ki bavane ka zidai, ku Lalake ki Umawmase lu nene ikai ki lrigu ka taetalaneini, kunumi ka twapapapalra nakwane ka umawmase lri nene numi ikai ki tai 12 ka taetalane, si saibange ki swa Iseraylri ka tai 12 ka zuku.

²⁹ Adravane ka aneane, kudra ngwalai nakwane si cilringa ku daaneini, si labetakaneini ka sawvalai si labaibai, tamaini si tinaini, lalalakeini, si laumawmaini, lri tara maalra ku walriibate ku sangwa idai ku sapawlrawlravane, si lri malra ku palralrawthu ka niake.

³⁰ Ai, yakai ku takaalra ku athamadalane, lai abiilrilinga, ku naabilrili, lai lri athamadalanenga.”