Matai 17 - Ngudradreadrekadhane Ka Sisiu 魯凱語聖經

Akabalrithi ku tangimiamiane

¹ Samaka nemelenga ka vai, ku Yesu wailuku ki Pitiru si lamataka ka Yakubu si Yuhani pangwa kibubuuli mwa kwidra ki abelenge ka vaeva ka lregelrege.

² Ikai cucubungu liniane, ku Yesu la akabalrithi ku tangimiamianeini: Ku lringawini mia ki vai ku taledrane, ku laimai ku takapuliane mia ki ledra.

³ Ala kiriimu, kwini tatulru ka lasitu ala drele ki Musi si Ilria kikawrivariva ki Yesu.

⁴ Ku Pitiru la iya kai ki Yesu, “Tamatama, kai taikaiyaneta kikai mathariri turamuru! Lu palraingisu, nau pikai kai tudaane tutulru ku balrawbau, ku vaeva anika muswane, ku vaeva anika Musiane, ku vaeva anika Ilriane.”

⁵ Sa kawrivariva icengecenge ku Pitiru, ku vaeva ka thelare ka ememe la kabungu liniane; la ikai ku lingau ku twalai ki ememe kainganai iya kai, “Kikai yai kathalraili ka lalake, madalamaku iniane, la kilalra pasalaladha iniane!”

⁶ Ku lasitu sa kilalra kwini lingau, la ukuludru turamuru, si pidruru guruthungane ikai ki daedae.

⁷ Ku Yesu la kainganai, si tapetape liniane, iya kai, “Ngidrakala, madha ukuludru!”

⁸ Kwi lalasu la tangerarane drele, la kakathaanenga ku Yesu, kadrwanga ku drumane ku umawmase.

⁹ Kwi lalasu sa mulrawlrawdrunga ki lregelrege, ku Yesu la pelaela liniane, “Kai Lalake ki Umawmase sakaiyana siela panianiake twalai ki wapacai, maadha pelaelaela ki naneaneanenga ku tadrele numi ku maburusi.”

¹⁰ Lakamani ku lasitu la kivaga ki Yesu, “Ani iya kai ku latarabulrubulru ki Sisiu lri tara aswala ku Ilria kela?”

¹¹ La tubalre ku Yesu, “Ku Ilria amani ku lri aswala kela padulrudulru sanaka manemane.

¹² Ai nau pelaela numiane, ku Ilria wakelanga, ai kai umawmase lakai thingale iniane, ngiabalrelringa ku nau pia iya lini iniane. La kathadaalrane, ku Lalake ki Umawmase lai lri kitudreadrekase ki lalasu.”

¹³ Ku lasitu ala thingale ka amanimani ki tarapabanau ka Yuhani ku iyaiya ki Yesu.

Pawadringai ku kiaikai ki aidridringane ka vavalake

¹⁴ Kwi lalasu sa siwlri mwa kikwini ki mapapangale, yakai ku tangea ku umawmase ku kaiyanganai, si pidruru icucubungu ki Yesu,

¹⁵ iya kai, “Tamatama, kiatubiaku muswane kakuruua ki lalakeli ka sawvalai! Macaeme ka mwabebeke, la kwalrialri turamuru, kai watelrai ngwadreke mwa ki apwi si acilai.

¹⁶ La ilukaku iniane mwa ki lasitusu, ai kwi lalasu kai maka wadulru pawdringai iniane.”

¹⁷ La iya kai ku Yesu, “Kunumi ka zidai kikai ka laumawmase ala kadrwa ku salrwane numi turamuru! Ka ngialisianenga turamuru! Lri tarathainwanaku ikai numiane? Lri kiadiliana naku tarathainu numiane? Malra iluka ki vavalake mwa kai!”

¹⁸ Lakamani ku Yesu kaelaela kwini ki aidridringane; kwi aidridringane la katwase, kudra caemane ki vavalake la makakaai udringai.

¹⁹ Sangilribatenga kikai, ku lasitu la tetenge kivaga ki Yesu iya kai, “Anai kai maka dulru pakatwase kwini ki aidridringane?”

²⁰ La tubalre ku Yesu iya kai, “Asi lwiyane kaina makakelrete ku salrwane numi. Nau tukapatengatengane pelaela numiane, alaiyasi pikai numi ku paramia ki berathe ka masetarade ku takathane ku salrwane, adravane ka kawrivasu kai ki lregelrege iya kai, ‘Twaladha kai si taluela mwa kavai!’ Lri dulru katwase taluela. Kadrwa ku namanemanenga ku kaika adulrwane numi pia.”

Peaeelanga yugingi ku apacadhaneini ku Yesu

²² Sa yelrelre ikai Galrilri ku lasitu, ku Yesu amia kai liniane, “Ku Lalake ki Umawmase lri kipatarumara pikai ki alrima ki umawmase,

²³ kwi lalasu lri papacai iniane; ai luka samakatulrulu kwi lasu lri siela panianiake.” Ku lasitu sa kilalra la katelrege turamuru ku kidremedreme.

Wabaai ku kazilu ki daanane ki Twaumase

²⁴ Ku Yesu si lasitu sakela mu Kaperenawme, yakai ku tapiya ka taramalramalra ku kazilu ki daane ki Twaumase, wakela kikawriva ki Pitiru, kiavaga iniane, “Ka sinsi numi wababaai ku kazilu ki daane ki Twaumase?”

²⁵ Ku Pitiru la tubalre iya kai, “Laikisumaali, lri tara baai.” Sa udaane ku Pitiru, la aswala kivaga ku Yesu iya kai, “Simune, aneane ku papia kai ki talialalai ki kawmasane baai ku salribatane ki umawmasane ku kazilu, amani kai mapapangale tini? Amani ku badhabadha? Tumana amia ku kidremedremesu?”

²⁶ Ku Pitiru la iya kai, “Swa maelane ka kuni ka umawmase!” Ku Yesu la iya kai, “Lukamiyaiya kwini, ku umawmase kai ki kuni, lri dulru kai baai ku padulru.

²⁷ Ai takai pasalriu kai ki laumawmase. Lu mwa ki baiyu lrakwili, la malra iluku ku aswalaalanga kipulrakwilane ku kange, la panunganga ku ngudwini, lri drelesu ku vaeva ka paisu; kwini paisu lri makakelrete ka kaziluta ki daane ki Twaumase, malranga si baai liniane.”