Matai 16 - Ngudradreadrekadhane Ka Sisiu 魯凱語聖經

Kiatubi ku pinangu Twaumasane ka puku

¹ Yakai ku tapiya ku swa Palrisai si swa Sadukise ku wakela kikawriva ki Yesu, kiasanu tulisilisi iniane, lakamani ku kitubi iniane ku apadrelane ku pinangu Twaumasane ka puku, sapelaelane ku piaini ala ka twalai ki Twaumase.

² Ku Yesu la kawriva, “Luka miauawbu, amia numi kai, ‘Luiya lri tara ngulralrivadhane, asi lwiyane maduli ka belenge.’

³ Luka mialrealre, la iya numi kai, ‘Kaikameane lri valrigi si udale, asi lwiyane ka belenge madradrimiti ku takaduliane’. Malrigili numi drele ku tangimiamiane belenge, ai kai numi wathingale drele ku angimiane kai zidai!

⁴ Kikai zidai kai umawmase ala ngialisianenga turamuru, wacapangenga ki sawvalai si ababai! Lri kitubi numi ku pinangu Twaumasane ka puku? Kathaane ku pinangu Twaumasane ka puku ki Yuna, lri kai numi maka drelenga ku drumane ku pinangu Twaumasane ka puku.” Sa maka kawrivanga ku Yesu, la katwase liniane.

Sapawsemasemakane ki swa Palrisai si swa Sadukise ka umawmase

⁵ Ku lasitu matwase talubalre mubalrealreanane, la karimuru iluku ku pange.

⁶ Ku Yesu la pelaela liniane iya kai, “Kunumi dradreela, ngipapalakeba ki sapawsemasemakane ki swa Palrisai si swa Sadukise ka umawmase!”

⁷ Ku lasitu la matetetenge mapelaela iya kai, “Kai taiyaneini yai amani sa kaita iluku ku pange.”

⁸ Ku Yesu wathingale ala ka manemane ku kidredredreme lini, la kivaga liniane, “Anu mapelaelaela ku kaika tailukane numi ku pange? Ala tikiyane kwi salrwane numi!

⁹ Pakelanga kaiasasane la kai numi maka thingaleana! Bekace numi kariimurunga ku natapavalavalaneli ku lrima ka pange si baai pakane pakabucuku ku ta 5,000 ku laumawmase? Sakamani kwidra piana ki karadrare ku lapapithingane ku tedrane?

¹⁰ Yakaiyana kudra pitu ka pange wapakane pakabucuku ki ta 4,000 ka laumawmase, kudra sarubu numi ku lapapithingane ku tedrane laka akupia ki karadrare?

¹¹ Anu kai pulringalringawana ala ka kainaku ka matiakaikai pangukai ki pange numiane? Kunumi la ngipapalakeba ki sapawsemasemakane ki swa Palrisai si swa Sadukise ka umawmase!”

¹² Kikai ku lasitu ala tau pulringau, ku Yesu ala ka kaika ngipapalakeba ki sapawsemasemakane ki pange iya, ngipapalakeba ki sabulrwane ki swa Palrisai si swa Sadukise ka umawmase ala ka amia.

Ku Pitiru wathingale ala ka Kirisitu ku Yesu

¹³ Ku Yesu sa kela darurunga ki swa Kaisaria Pilripi; ikai kwini la kivaga ki lasitu iya kai, “Kai laumawmase aneane amiamia ki Lalake ki Umawmase?”

¹⁴ Kwi lalasu la tubalre, “Yakai ku tarapabanau ka Yuhani amia; yakai ku Ilria amia, la ikai ku Yerimia amia, ka tangea ikai ki layuginsia amia.”

¹⁵ Ku Yesu kiavaga liniane iya kai, “Laka aneane amia numi nakwane?”

¹⁶ Ku Simune Pitiru la tubalre iya kai, “Kirisitusu, ka Lalake ki palralrawthu panianiake ka Twaumase.”

¹⁷ Ku Yesu la iya kai, “Lalake ki Yuhani ka Simune, patengatenganesu ka yakai ku amuesadhane; asi lwiyane kikai patengane ka sabulrwane, kaika umawmase ka wabulru muswane, amani kai Ama ka yasubelebelenge ka peaelaela muswane.

¹⁸ Nau pelaela muswane, sia Pitirusu, ka alrisapesape; ikai kai ki alrisapesape belenge, lri cegecegaku ku kiwkaili, adravane ka puku ki apacadhane lri kai maka sabelenge iniane.

¹⁹ Lri baadhaku muswane ku sukusuku ki kuni subelebelenge, ku pakaicilrisu ikai kawmasane, ikai subelebelenge lri mialri pakaicilri; ku palraingisu ikai kawmasane, ikai subelebelenge lri mialri palraingi.”

²⁰ Lakamani, Ku Yesu wacunu ki lasitu madha pelaelaela sanaka aneaneaneanenga ala ka Kirisituaku iya.

Ku Yesu wayugingi ku akwalriane si apacadhaneini

²¹ Twalainga kwini, ku Yesu pwadriadringai pelaela ki lasitu, iya kai, “Lri tara mwaku Yerusalrime, si kipadradresenge ku makalra ku akipakwalriane ikai ki alrima ki laciwru, ki lamarudrange ki labarakalai, si latarabulrubulru ki Sisiu, si kipapacai, ai luka samakatulrulu lai sielane panianiake.”

²² Ku Pitiru la bilibili ki Yesu puthili, si kaelaela iniane, iya kai, “Ini, Tamatama, lutuumane kikai miyaiyakai lri kai maka ngimia ikai muswane!”

²³ Ku Yesu la ngibangulu iya kai ki Pitiru, “Satange, lu katwasa! Amanisu ku lri pawcucusu nakwane; asi lwiyane ku takidremedremanesu kaika kidremedreme ki Twaumase, kidremedreme ki umawmase!”

²⁴ Lakamani, ku Yesu la iya kai ki lasitu, “Alaiyasi ikai ku nau tupapalra amia nakwane, lri ngicacilri si angeale ku ziwzikaini la kainganai tupapalra nakwane.

²⁵ Asi lwiyane kudra kiasanu ngipapalribulu ku niake, lri ngicacilri ku niake; kudra pasiakai nakwane si cilri ku niakeini, lri tarumaaralringa ku niake.

²⁶ Ku tangea ku umawmase adravane malra kai kawmasane, lalri tusabalrithane ku niakeini, manemane ku amuesadhane?

²⁷ Ku Lalake ki Umawmase lubibilrili lri ikai ki lrigu ki Tamaini, si karededele ki sasiakawluini subelebelenge kainganai. Lu kamani kwidra, kwi lasu lri singikai ki kakwakudhane ki tangeea pangibilri iniane.

²⁸ Nau pudriadriingai pelaela numiane, ku acegecege ikai kai ku umawmase, yakai kai lu kaiyana pacai lri dreleana ki Lalake ki Umawmase lu mulebe mwa liniane si magagemegeme ku puku.”