Matai 14 - Ngudradreadrekadhane Ka Sisiu 魯凱語聖經

Tapacadhane ki tarapabanau ka Yuhani

¹ Sakamani kwidra, ku Hirudi ka talialalai ki swa Galrilri kialalra ku ngwakai ki Yesu,

² la iya kai ki lakiacapili, “Kikai umawmase amani kudra tarapabanau ka Yuhani ka siaela panianiake, alakamani ku ikai ku puku pia ku pinangu Twaumasane ka puku.”

³ Ku pathagilane, ku Hirudi ngwalai ki Hirudia ka taelrelre ki betakaneini ka Pilripi si drekase pwalra ki Yuhani iya, la kerenge iniane si emenge putaememengane.

⁴ Asi lwiyane ku Yuhani kingikalrale kaelaela ki Hirudi iya kai, “Lri kaisu maka sitaelrelre ki Hirudia!”

⁵ Ku Hirudi la kisanu papacai iniane, ai makiwcu ki laumawmase, asi lwiyane kwi laumawmase lu kidremedreme yuginsia amia ki Yuhani.

⁶ Saka takitulalakane ki Hirudi ku vai, ku lalake ki Hirudia ka ababai la ikai cucubungu ki labadhabadha dralradralrai, la kikiragai ki Hirudi turamuru.

⁷ Ku Hirudi la kiketekete kwini ki alisu iya kai, “Adravane kitubisu ku manemane, lri tara baadhaku muswane.”

⁸ Kwini lalake ka ababai kiacunu ki tinaini, si kitubi iya kai, “Makakaiya alra ku awlru ki tarapabanau ka Yuhani si pikai ki usara baai nakwane!”

⁹ Ku talialalai la kwalri kidremedreme turamuru, ai kudra yakainga cucubungu ki badhabadha kiketekete, la kiriimunga drekase singikai ku takitubiane kwini ki alisu si baai iniane.

¹⁰ Ngwalai kikai ku Hirudi la sikawlu ki umawmase katwase mutaememengane, si vathale ku awlru ki Yuhani,

¹¹ la pikai ki usara, si baai ki lalake ki Hirudia; kwini alisu la baai ki tinaini.

¹² Ku lasitu ki Yuhani la kela, malra kwini kinawmasane katwase, si dralreke, ala pelaela ki Yesu ku tangimiane.

Pakabucuku ki ta 5,000 ka umawmase

¹³ Ku Yesu sa kilalra kikai, matwase ubelenge ki varukuru, si tarungeangea mwa ki lrilringulu. Ku lamapapangale la thingale, si twalai ki lacekele dadavace tupapalra iniane.

¹⁴ Ku Yesu la ukameamealane si drele kai ki laumawmase, la kirimu kakuru liniane, si pawdringai ku caemane lini.

¹⁵ Saka miauawbunga, ku lasitu la kela kikawriva ki Yesu, si iya kai iniane, “Maungunga, la ikaita ki ta adailane ki lacekele kikai, ala pasawvagavagadha ki laumawmase, lani ngikakamani katwase mwa ki ngwadadethe ki cekele si langai ku akaneane.”

¹⁶ Ku Yesu la tubalre iya kai, “Madha pasawvagavagai liniane, kunumi pakana liniane.”

¹⁷ Kai lasitu la iya kai, “Kai yakai naiane kai lrialriima kai pange laka drwadrusa kai kange.”

¹⁸ Ku Yesu la iya kai, “Ta baadhaili.”

¹⁹ Ala kawriva ki mapapangale si panene, ala malra kwini lrima ka pange si drusa ka kange, la drele paswabelenge, si kiaseasene ki Twaumase, ala apapipithingi kwini pange, si baai apavalavala ki lasitu, ku lasitu la baai ki mapapangale.

²⁰ La kane makanaelre, si kabucukunga. Ku lasitu la malra sarubu ku la tedrane ka la papithipithingane, la pasuete ki 12 ka karadrare.

²¹ Ku wakane ku umawmase, kai paelre ki labaibai si lavavalake, lri ikai ku ta 5,000 ku umawmase.

Ku Yesu ngwababelenge ki acilai dadavace

²² Sangilribatenga kwini, ku Yesu pakaracange ki lasitu paubelenge ki varukuru, si paswalala talubalre mubalrealreanane, la pasawvagavagadhana ki mapapangale.

²³ Ku mapapangale sa mawvagavagainga, ku Yesu la tarungeangea mulregelrege inulri; pakela sakamaungu la asurwana ikai kwini.

²⁴ Ikai kikai, kudra varukuru wadailinga kameamealane, la kipadradresenge ki valrigi, si bikabiki.

²⁵ Sa lri padalrunga si kaliare, ku Yesu la ikai belenge ki baiyu dadadavace, papiapia ki lasituini.

²⁶ Ku lasitu sadrele iniane sa ibelenge ki laveke dadadavace, la kakiwcu turamuru, si iya kai, “Galrale!” Kwi lalasu la karaleale ki kiwcane lini.

²⁷ Ku Yesu la makakai iya kai liniane, “Madha mukuludru, amaniaku!”

²⁸ Ku Pitiru la iya kai, “Tamatama, alaiyasi ka amanisu, padadavacaili pangubabelenge ki acilai, mwa muswane kwini!”

²⁹ Ku Yesu la iya kai, “Bwala!” Ku Pitiru la twalai ki varukuru ulebe, si dadavace ibelenge ki acilai papia ki Yesu.

³⁰ Ai sadrele ki valrigi sa pakilringalringau makiwcu ku kidremedreme, ala murenere, la karaleale iya kai, “Tamatama, palribulaili!”

³¹ Ku Yesu la makakai taale ku alrimaini si bilibili iniane, si iya kai, “Aningithanga ka tikiyane kai salrwanesu, asi kalrikiilriki?”

³² Ku Yesu si Pitiru sa mubelengenga ki varukuru, la idrengere ku valrigi.

³³ Ku yabelenge ki varukuru ku lasitu la sukubu iniane, si iya kai, “Patengatenganelringasu ka Lalake ki Twaumase.”

Ku Yesu yakai Genisarete pawdringai ki macaeme

³⁴ Kwi lalasu matwase talubalre ki baiyu, la ikai Genisarete ubila mukameamealane.

³⁵ Kwi swakai kwini ku laumawmase makakaai thingale ala ka Yesu, la sikawlu ki umawmase, si mwa malra iluku ku ngwadadethe kwini ku lamacaeme pucucubungu ki Yesu.

³⁶ Kwi lalasu la kitubi ki Yesu ku akirecengane ki lamacaeme pababiabila ki sapakabelebelengane ki laimaini; sanaka kiarecenge ku laumawmase mwadriingai makanaelre.