Matai 13 - Ngudradreadrekadhane Ka Sisiu 魯凱語聖經

Pathalrilriku ka wasabulu ku sapaivai

¹ Ivaivaiyane, ku Yesu matwase ki daane si mwa babiabila ki baiyu, la nene ikai kwini.

² Kudra la takaalra ka laumawmase la irubu mucucubungu ki Yesu, lakamani ku mubelengeini ki vaeva ka varukuru, la nene; ku lamapapangale la acegecege ikai babiabila ki baiyu.

³ Ku Yesu la arakai ku pathalrilriku swacenge bulru liniane ku makalra ku awngane. Kwi lasu amia kai, “Yakai kudra tangea ku tarasabwabulu ku sapaivai.

⁴ Kwi lasu sa sabulu, yakai ku lasapaivai ku makakai ki kadalranane sigingane, la kela ku laadhadhame si kane.

⁵ La ikai ku druma ku sapaivai ku makakai ki takalubirane ka dae, amani sa kalubiri kwini dae, la padaalru mudrata;

⁶ ai, salrau ku vai, kwini mwadrata makakaai kalraici; asi lwiyane ku balace kai mwaadringi balace, la karudame.

⁷ La ikai ku la mwaruru makakai ki cecenekane ka angatu, kwini cecenekane ka angatu la kadrau, si amenge ki mwadratadrata.

⁸ Ku drumane la ikai ku sapaivai ku mwaruru makakai ki takatharirane ka dae, la cebe kadrau si pumadru, sa kitaleke yakai ku twa idai, twa manemele, la ikai ku twa matulrulu.”

⁹ Ala iya kai ku Yesu, “Ku yakai ku calringa, makitu kilalra!”

Pacugane ki pathalrilriku

¹⁰ Ku lasitu la kela kikawriva ki Yesu, si kivaga iniane iya kai, “Lu kawrivasu ki mapapangale asu arakaai kai pathalrilriku?”

¹¹ Ku Yesu la tubalre iya kai: “Kudra patharukai ki kuni subelebelenge ku kaika athingalane ka matiasamaimali wabaainga naku numiane, kainaku wabaai liniane.

¹² Asi lwiyane kudra yakainga, lri baaiyana iniane pakakaakalra, lani kakalra si ikai ku tedrane; kudra pakakadrwa, adravane ka sakathathaane ka pikaini patuelre, lri kimalra ribici.

¹³ Ngwalai kikai, la arakaiyaku ku pathalrilriku kawriva liniane; asi lwiyane kwi lalasu lri drele ai kailri maka cege, kialalra ai kailri maka pucalringane, si kai maka pulringalringau.

¹⁴ Kikai yai ngiamianga ikai ki kinawmasane lini ku tayugingane ki Isaiya; kwi lasu amia kai: Kikai laumawmase kialalralalra, ai kai maka pwalringalringau; la dredrele, ai kai maka wacege.

¹⁵ Asi lwiyane ku takidremedremane kiacelrepe, la celrepe ki calringa, la memecane ku maca. Ana kai pia kwini, kwi maca lini nai dulru drele, ku calringa la nai dulru kilalra, si pulringau kidremedreme, la nai ngibangulu ku kidremedreme lini, si la nai pawdringadhaku liniane.

¹⁶ “Ai amani numi ku yakai ku akaesadhane! Asi lwiyane kwini maca numi wadulru drele, kwini calringa numi wadulru kilalra.

¹⁷ Nau kapatengatengane pelaela numiane, yakai ku takaalra ku layuginsia si madringelrese ka umawmase ku kiasanu drele ku drelenga numi, ai kai maka wadrele; kiasanu kilalra ku kilalranga numi, ai kai maka kialalra.”

Palalrwai ku pathalrilriku ki wasabulu ku sapaivai

¹⁸ “Lakamani, kunumi pulringalringava ku pacugane kikai pathalrilriku ki wasabulu ku sapaivai.

¹⁹ Kudra kialalra ku vaga ki kuni subelebelenge si la kai pulringalringau ka umawmase, mararamau kudra ki wasabulu ku sapaivai la makakai ki thili kadalranane, ku Akema lu kela, lri malra ribici kudra nisabulane pikai ki kidremedremeini ku vaga ki Twaumase.

²⁰ Kudra nisabulane pikai ki lralrenegane ka sapaivai yai amani ki umawmase sa kilalra ku vaga ki Twaumase, la makakaai kiraragai tarumara,

²¹ ai kai mwadringi ku tabalacane, kailri tarathainu, sana ngwalai ki vaga ki Twaumase si kipadradresenge ku akwalriane ki hakegai, lri makakaai cilri.

²² Kudra nisabulane makakai ki cecenekane ka angatu ka sapaivai, amani ki umawmase samaka kilalranga ku vaga ki Twaumase, kudra thekelrane ki tacekecekelane si salrilrigilane ki acekecekelane pakasemete kai ki vaga ki Twaumase ku apanianiakane, la kai maka pumadru.

²³ Kudra nisabulane makakai ki mathariri ka dae ka sapaivai amani ki laumawmase sa kilalranga ku vaga ki Twaumase, la pulringalringau tarumara; kwini lasu la pumadru, sa kitaleke yakai ku twa idai, yakai ku twa manemele, yakai ku twa matulrulu.”

Ngimumugi ka pathalrilriku

²⁴ Ku Yesu papia liniane pelaela ku maelanenga ka pathalrilriku, “Kai kuni subelebelenge maru amaninga kudra umawmase ku wamalra ku mathariri ku sapaivai si sabulu pikai ki umawma.

²⁵ Saapecenga makanaelre, la kela ku badha, la malra ku ngimumugi si sabulu pikai ki mamugimugi, ala katwase.

²⁶ Sakadrawnga ku mugi si pumadrumadrunga, la mialri utaluvaivai adrelane kwini ngimumugi.

²⁷ Kwini sasiakawlu ki piumawmane la kainganai si iya kai, ‘Tawki, kudra sabulusu pikai ki umawma ku mathariri ka sapaivai, kilakikai ngimumugi twalainu kela?’

²⁸ Kwi lasu la tubalre iya kai, ‘Kikai yai pia ki badha.’ Kwi lalasu la kivaga iya kai, ‘Ani akucu kai ki ngimumugi amiasu naiane?’

²⁹ La iya kai kwini lasu, ‘Palrainga! Asi lwiyane lu akucu numi kwini ngimumugi, amani lu paelre numi akucu kwini mugi.

³⁰ Pataelrea pakadrau kwini mugi si ngimumugi; lu ketaketabenga, lri kawrivaku ki lri ketabe paswala akucu ki ngimumugi, la erece, si cilri pwa ki apwi, ala malra rubu kwini mugi si katheme pwa ki drawsululi iya.’ ”

Masetarade ka pathalrilriku

³¹ Ku Yesu kawariva liniane ku maelane ka pathalrilriku iya kai, “Ku kuni subelebelenge maru amaaninga kwidra beraberathane ka sapaivai ka masetarade, ku umawmase la malra si paivai pwa ki umawma.

³² Kikai sapaivai titikiyanenga ki sanaka sapaivai, sa kadrawnga laka madradrawnga ki sanaka laacenge; avaeva ka angatu, adravane ka laadhadhame la ikai tulisisuku ibelenge ki ricingini.”

Sapawsemasemakane ka pathalrilriku

³³ Ku Yesu la iyanga ku taingeane ku pathalrilriku iya kai, “Ku kuni subelebelenge maru amaninga kwidra sapawsemasemakane, ku tangea ka ababai ku wamalra pwadringi ki masupatele ka kunsenge ki milrikinku, la pawsemake patueelre ki milrikinku.”

Arakai ku pathalrilriku

³⁴ Ku Yesu arakai ku pathalrilriku pelaela ki mapapangale kikai patueelre; kathane lu arakai ku pathalrilriku, kwi lasu kai kawariva liniane ku manemane.

³⁵ Ku tapianeini kikai ngiamia ku nataiyane ki yuginsia iya kai, “Lri arakaiyaku ku pathalrilriku papia liniane kawriva, pelaela liniane kudra satau bekace pakela kaikameane ku lanibalabaladhane.”

Palalrwai ku pathalrilriku ka ngimumugi

³⁶ Ku Yesu matwase ki mapapangale, si mudaane. Ku lasitu la kivaaganga iniane iya kai, “Ala pelaela naiane, manemane ka pacugane kwini yakai ki umawma ka ngimumugi ka pathalrilriku?”

³⁷ La iya kai ku Yesu, “Kudra wasabulu ku mathariri ka sapaivai yai Lalake ki Umawmase;

³⁸ kwini umawma lakamani kai kawmasane; ku mathariri ka sapaivai swakaiyane ki kuni subelebelenge ka umawmase; ku ngimumugi laka swakaiyane kudra ki ngialisiane ka umawmase;

³⁹ kudra badha ka wasabulu ku ngimumugi Akema; lu ketaketabenga amani luka taalikaiyanenga ku vai kai kawmasane; ku wakela ketabe sasiakawlu subelebelenge.

⁴⁰ Lu kelanga ku taalikaiyane ki vai, ku tarakanganganga ka umawmase lri mia ki ngimumugi kiakucu, si kicilri pwa ki apwi si kulama.

⁴¹ Ku Lalake ki Umawmase lri sikawlu ki sasiakawlu subelebelenge, lai malra ruthuku kudra ki iya kai ki kunini kudra ki latarapapasalrisalriu ki umawmase si sanaka paiyaiya ku ngialisiane ka umawmase.

⁴² Lai cilri pwadringi ki madrareange ka apwi. Ikai kwini, kwi lalasu lai lri tubitubi, si apararitaitaiti.

⁴³ Lukamaninga kwidra, ku madringelrese ka umawmase ikai ki kuni ki Tama ka yasubelebelenge, lri mianga ki vai pathelare ku ledra. Ku yakai ku calringa, makitu kilalra!”

Patharukai ki tinukucingalrane ka lawbubulu ka pathalrilriku

⁴⁴ “Kai kuni subelebelenge maru amaaninga kudra makucingalre ka zaisange ka nibaladhane pikai ki umawma. La ikai ku umawmase ku kiadringai, la subusubu paidringi, ala katwase kiraraagai si kilangai ku lamanemaneini patueelre, si katwase langai kwini ki umawma.”

Pathalrilriku ka patharukai ki tinukucingalrane ka silu

⁴⁵ “Kai kuni subelebelenge laka maru amaaninga kudra tarasiwbawbai ka umawmase ka wasilasilape ku tinukucingalrane ka silu.

⁴⁶ Kwini lasu sa kidringai ku vaeva ka tinukucingalrane ka silu, la katwase kilangai ku lamanemaneini patuelre, si kainganai langai kwini silu.”

Waarai ka pathalrilriku

⁴⁷ “Kai kuni subelebelenge laka maru amaaninga kai arai ki kange ka waarai pikai ki baiyu, la malra ku makaelaela ku kange.

⁴⁸ Sa sueete ki arai, ku taratukakange la alra bilibili pubabiabila, si takaenene, la pilri ku mathariri si pwa ki bakicu, la pwa cilri ku malisi.

⁴⁹ Miyaiya kikai ku apalikaiyane ku vai; ku sasiakawlu subelebelenge lri kela, si patwalai ki mathariri ka umawmase patukudha kudra ki malisi ka umawmase.

⁵⁰ Lai lri cilri pwadringi ki madrareange ka apwi. Ikai kwini, kwi lalasu lri tubitubi, si apararitaitaiti.”

Bavane si supilri ka sabulrwane

⁵¹ Ku Yesu kiavaga liniane iya kai, “Kilakikai vaga wathingale numi patueelre?” La tubalre iya kai kwini lalasu, “Wathingale nai kai patueelre.”

⁵² Ku Yesu la iya kai, “Lu ngimiya kwini, lu asitu ki kuni subelebelenge makanaelre ku tarabulrubulru ki Sisiu, ngimiyaiya ki tamatama ki tacekecekelane, ka patwalai ki drawsuluini malra salri ku bavane si supilri ka lamanemane.”

Ku Yesu yakai Nazarethe kikavalracevace

⁵³ Ku Yesu sa maka iyanga kilakikai pathalrilriku, la katwase ki kwini,

⁵⁴ si siwlri mwa ki cekeleini. Kwi lasu la ikai rarubwane ki swa Yuda bulrubulru ki laumawmase; ku kialalra ku laumawmase la kasamali turamuru, si iya kai, “Kai lasu twalainu malra kai miyaiyakai ku lrigilane? Kai lasu la piana ku pinangu Twaumasane ka puku!

⁵⁵ Kikai lasu kaika amani kudra lalake ki daikusange ki angatu? Ku tinaini kaika Malria? Ku Yakubu, Yusepe, Simune, si Yuda kaika lagini?

⁵⁶ Kai lagini ka labaibai kai yakai mitane kai makanaelre? Kai tadulrwaneini patueelre patwalainu kai lasu?”

⁵⁷ Lakamani kwini lalasu kavalracevace iniane. Ku Yesu la iya kai liniane, “Kai paelre ki cekeleini kai yuginsia kadrwa ku kaika takiusakenaneini.”

⁵⁸ Asi lwiyane kwi lalasu kai masalru, ku Yesu ikai kwini kai makalra ku piaini ku pinangu Twaumasane ka puku.