Matai 10 - Ngudradreadrekadhane Ka Sisiu 魯凱語聖經

Ta 12 ka lasitu

¹ Ku Yesu la sarubu ki ta 12 ka lasituini, la baai liniane ku puku ku adulrwane pakatwase ki aidridringane si apawdringadhane ki lacaemane.

² Ala kai nagane ki ta 12 ka lanisikawlane: ku aswalaalanga yai Simune (kiapasi Pitiru), si betakaneini ka Anederiu, lalake ki Zibidi ka Yakubu si betakane ki Yakubu ka Yuhani,

³ Pilripi, Barethulumiu, Tumase, tarakikaziluzilu ka Matai, lalake ki Alepaiuse ka Yakubu, Tadai,

⁴ Cicintu ka Simune, la ikaiyana kudra kialangai ki Yesu ka swa Isekaliwte ka Yuda.

Awngane ki ta 12 ka lasitu

⁵ Ku Yesu siakawlu pakatwase kai ki ta 12 ka lanisikawlane, si pelaela liniane iya kai: “Madha mwamwa talikai ki sakamaelanane ka umawmase, la madha mudadaane ki cekele ki swa Samaria.

⁶ Lri mwa numi tali Iseraylri ki sakawlrawlrau ka lakiu.

⁷ Sanaka tamuane numi pelaela iya kai, ‘Ku kuni belenge padethenga!’

⁸ Lri pawdringai numi ki macaeme, si pasielane papanianiake ki wapacai ka umawmase, si pawdringai pakabula ki maraibiu kacaeme, la pakatwase ki aidridringane. Lri kalavuthaane numi tarumara, lai lri kalavuthaane numi baai.

⁹ Madha ililuku pikai ki tapaiswane ku kingi, ku gingi, si lriwlu ka paisu;

¹⁰ lu mubabadhane numi madha ililuku ku samubababadhanane ku kadrai si taidrusane ku sapakadriadringane ka laimai, la madha ililuku ku kece si ukudru. Asi lwiyane ku tarakawaungu lu kipatarumara naika akipangimiane.

¹¹ “Lu mwanga numi inu ki cekele, paswala madu kivavaga luka aneane ku mwabangalre tarumara pasudalru numiane, wamwa madu ki daane lini, pakeela ku takatwasane numi kwini.

¹² Lu mudaane numi kudra ki daane, amia madu kai, ‘Anu kasulivaliivate.’

¹³ Alaiyasi la kiraragai kidredresenge numiane kikai wacekecekele, kudra pasikai numi liniane kitubi ku sulivatane lri mulebe mwa kikai ki wacekecekele. Alaiyasi ka kaika kiararagai kidredresenge numiane, lri kungusawlri numi ku subulrubulru numi.

¹⁴ Kudra kai kiadredresenge kiragai numiane la kai kilalra ku vaga numi kwini wacekecekele kwini cekele, kunumi katwasa kwini, si visivisi kwi thuvugu ki drapale numi.

¹⁵ Nau pudriadriingai pelaela numiane, ikai ki tasaibangane ka vai, ku takipathavungane ki swa Sudume si swa Gumura lrika maliapapaiyana ku takipathavungane kwini ki swakai kwini!”

Hakegai lukabibilrili

¹⁶ “Dradreela! Lri sikawlaku numiane pakatwase, mia kudra ki lri kisatedre pwa ki taikaikaiyane ki tawpungu ubulane ka kiu. Kunumi yai ngialrava ki sulrau kalrigili, la ngialrau ki tavagu kasulrapele.

¹⁷ Dradreela, yakai ku umawmase ku lri pwalra numiane, si iluku numiane putasaibaibangane, lalri ikai ki rarubwane lini ka swa Yuda lrumai numiane.

¹⁸ Ngwalai nakwane, lri kiiluku numi si kisaibange icucubungu ki talialalai si tararathudu, si papia liniane si sakamaelanane ka umawmase akasi ki hukuingi.

¹⁹ Lu kisaibaibange numi yai, madha kakalikalithi ku aiyane ku vaga si ku apangimiane tubalre; lukamaninga kwidra, ku Twaumase lri pelaela ku lrika aiyane numi avavaga.

²⁰ Asi lwiyane ku avavaga numi, kaika vaga numi, amani ku Ri ki Tama numi ka yabelenge ka pangwakai numiane avavaga.

²¹ “Ku betakane lri kilangai ki betakane, si palraingi papacai liniane; ku tama lai lri mialri pia kai ki lalalake; ku lalalake lri kiecebe ki marudrawdrange, si lai lri papacai liniane.

²² Ngwalai nakwane kai laumawmase lri kalisi numiane; ai kudra maka kiadili patulrepenge ku umawmase lri tara kipalribulu.

²³ Kwi lalasu alaiyasi hakegai numiane ikai kai ki cekele, mubera mwa ki vaeva ka cekele. Nau pelaela numiane, lu kai numi dadavaceana salraelre ki lacekele ki swa Iseraylri, lri kelaanga ulebe ku Lalake ki Umawmase.

²⁴ “Ku situ kai lri dulru kasabebelenge ki sinsi, ku sasiakawlu kai lri dulru kasabebelenge ki tawki.

²⁵ Ngwalai kikai, ku takipadradresengane ki situ lu mararamau ki sinsi, ku takipadradresengane ki sasiakawlu lu mararamau ki tawki, nai ngulwadhanenga. Alaiyasi ku tawki ki daane lu kipasi Belezebulu ka talialalai ki aidridringane, kwini daane ku drumane ka umawmase kai lrika madradrau ku kitusinalremeane?”

Aneane ku aukuludrane

²⁶ “Lakamani, madha mukuludru ki umawmase, sanaka nisekeseketane patuelre lri tara kiputaluvaivai kimatikai, kudra kaika nithingathingalane lri kiputaluvaivai kithingale.

²⁷ Ku ikaili kadradridrimitane pelaela numiane, kunumi ikaiya ki kalealedrane kawriva; ku kilalra numi ku nimatetetengeane ku vaga, mialria matikai ikai ki mapapangale.

²⁸ Kudra wadulru papacai ki kinawmasane sikakathane, lai kai lri dulru papacai ki abake, madha mukulukuludru; ku amukuludrane amani ku Twaumase, kathane ku lri dulru alra ki beate si abake cilri pwa swadriadringi.

²⁹ Ku drusa ku rulungu wadulru madu arakai ku vaeva ka paisu langai, ai ku Tama numi ka yabelenge alaiyasi kai palraingi, adravane ka vaeva kai lri mucilri mucakena.

³⁰ Ala kunumi, adravane ka isiu numi niasipaneenga.

³¹ Lakamani, kunumi madha mukuludru, kunumi makuciacingalre numi turamuru ki thathatha ka rulungu!”

Wathingale ki Kirisitu

³² “Kudra yacucubungu ki umawmase si wathingalaku iya nakwane, lri icucubungaku ki Tama ka yabelenge mialriaku wathingalaku iniane iya.

³³ Kudra yacucubungu ki umawmase si kainaku wathingale iya nakwane, lri icucubungaku ki Tama ka yabelenge mialri kainaku wathingale iniane iya.”

Kaika amakadawdalrwane amasidramudramwane

³⁴ “Alau mailuku ku amakadawdalrwane mwa kai kawmasane madha iyaiya nakwane; kainaku ka wakela iluku ku amakadawdalrwane, amanilringa ku dramu kamani.

³⁵ Ku kelali lri baebalre ki tamaini ku lalake, ku lalake ka ababai lai baebalre ki tinaini, ku kiathareve lai baebalre ki tina ki tawaneini.

³⁶ Ku badha ki umawmase amani kwini wacekecekeleini.

³⁷ “Kudra kialibake ki marudrawdrange ka silrialribate ku takilibakane nakwane, kai swadalepe tupapalra nakwane; si kudra kialibake ki lalalake ka silrialribate ku takilibakane nakwane, kai swadalepe tupapalra nakwane.

³⁸ Kudra kai mwabangalre angeale ku ziwzikaini si tupapalra ku tapudrapalaneli, mialri kai sudalepe tupapalra nakwane.

³⁹ Kudra kiadremedreme ngitataulrawlra ku niakeini, lri ngibaalrelringa si kamudu ku niakeini; ala ku pasiakai nakwane si kai taulra ku niakeini, lri ngibaalrelringa si kaamani ku tarwamara ku niake.”

Matiakai ki pakalreva

⁴⁰ “Ku tarwamara pasudalru numiane amani ku tarwamara pasudalru nakwane; ku tarwamara pasudalru nakwane amani ku tarwamara pasudalru kudra ki amani ku siakawlu nakwane.

⁴¹ Kudra ngwalai ki umawmase ka sasiakawlu ki Twaumase si tarumara pasudalru iniane, lri tara kisupilri ku kipakalreva ki sasiakawlu; kudra ngwalai ki madringelrese ka umawmase si tarumara pasudalru iniane, lai lri mialri tara kisupilri ku pakalreva ki madringelrese ka umawmase.

⁴² Nau pudriadringai pelaela numiane, sanaka aneaneanenga, adravane malra ku akuvaeva ki kupu ku marenge si baai ki situ kudra ki titikianenga, lri ngwalai kwini ki umawmase saka situli, lai lri tara maalra ku pakalreva.”