Matai 1 - Ngudradreadrekadhane Ka Sisiu 魯凱語聖經

Tamasakaikaiyane ki cucungulane ki Yesu Kirisitu

¹ Ku tamacucungulane ngukai ki Yesu miyaiya kikai: Kai Yesu Kirisitu yai agagane ki Davidi, kai Davidi la ka agagane ki Aberahame.

² Ku Aberahame twalalake ki Isake, ku Isake twalalake ki Yakubu, ku Yakubu twalalake ki Yuda si labetakaneini.

³ Ku Yuda si Tamare twalalake ki Pereze si Zera, ku Pereze twalalake ki Hezerunge, ku Hezerunge twalalake ki Arame,

⁴ Ku Arame twalalake ki Aminadabe, ku Aminadabe twalalake ki Nahasunge, ku Nahasunge twalalake ki Salemune,

⁵ ku Salemune si Rahabe twalalake ki Buaze, ku Buaze si Ruthe twalalake ki Ubide, ku Ubide twalalake ki Yesi.

⁶ Ku Yesi twalalake ki talialalai ka Davidi. Ku Davidi si taelrelre ki Uria twalalake ki Sulumungu,

⁷ ku Sulumungu twalalake ki Rihubuame, ku Rihubuame twalalake ki Abiya, ku Abiya twalalake ki Asa,

⁸ ku Asa twalalake ki Yehusapate, ku Yehusapate twalalake ki Yehurame, ku Yehurame twalalake ki Uzia,

⁹ ku Uzia twalalake ki Yuthame, ku Yuthame twalalake ki Ahaze, ku Ahaze twalalake ki Hezekia,

¹⁰ ku Hezekia twalalake ki Manase, ku Manase twalalake ki Amune, ku Amune twalalake ki Yusia.

¹¹ Kudra saka takiravasane mwa Babilunia ki swa Iseraylri, ku Yusia twalalake ki Yehuiacingi si labetakaneini.

¹² Sa kiravasenga mwa Babilunia, ku Yehuiacingi twalalake ki Saletile, ku Saletile twalalake ki Zerubabele,

¹³ ku Zerubabele twalalake ki Abiude, ku Abiude twalalake ki Iliakime, ku Iliakime twalalake ki Azure,

¹⁴ ku Azure twalalake ki Zaduke, ku Zaduke twalalake ki Akime, ku Aikime twalalake ki Ilriude,

¹⁵ ku Ilriude twalalake ki Ilriazare, ku Ilriazare twalalake ki Mathange, ku Mathange twalalake ki Yakubu,

¹⁶ ku Yakubu twalalake ki Yusepe, ka amani ku taelrelre ki Malria. Kudra nipasudalepane ka Yesu Kirisitu yai twalai ki Malria kitulalake.

¹⁷ Lu singikaiyane kai asipi, twalai ki Aberahame pakela ki Davidi 14 ku tamacucungulane, twalai ki Davidi pakela sa kiravase mu Babilunia ku swa Iseraylri la miaalri ka 14 ku tamacucungulane, twalai sa kiravasenga pakela ku tawlebeane kitulalake ki Kirisitu la ka 14 ku tamacucungulane.

Takitulalakane ki Yesu Kirisitu

¹⁸ Miyaiya kai ku tangilribatane sa kitulalake ku Yesu Kirisitu: Ku tinaini ka Malria kiatusiasilanganenga ki Yusepe, ai sakaiyana karudrange, ku Malria ngiathathingaleenga ka tawbaliri patwalai ki Siri.

¹⁹ Kwini lrika tawane ki alisu ka sia Yusepe makalecege ku takaumawmasane, ai kai walreme pakiarubwane iniane, la ikai ku takidremedremaneini kisanu kibubuuli tuthingale.

²⁰ Kai lasu saicengecenge kidremedremedreme ki kikai, ku sasiakawlu ki Tamatama yakai ki sipi kikawriva iniane, iya kai, “Agagane ki Davidi ka Yusepe, madha mukuludru, malra si sitaelrelre ki Malria sikakathane, asi lwiyane kwi alisu twalai ki Siri katawbaliri.

²¹ Kwi alisu lri tulalake ku sawvalai, sunagananga pasi Yesu, asi lwiyane lrika amani ku lri palribulu ki laumawmaseini pakidaili ki pasalrivane lini.”

²² Ku lrika angimiane kikai patueelre lri ngimia ku tapangukaiyane ki yuginsia ki Tamatama kawriva iya kai,

²³ “Yakai ku tawvailekete ku lri katawbaliri si tulalake ku sawvalai, ku naganeini lri si Imanuilri.” (“Imanuilri” luiya ku pacugane, “Ku Twaumase yakai tapalra mitane” amia.)

²⁴ Ku Yusepe la pacunu, si singikaai pangimia ku tapelaelane ki sasiakawlu ki Tamatama, mamamwa ki Malria karudrange;

²⁵ ai sakaiyana tulalake kwini alisu kai tadrusa itapeapecane. Sa kitulaalakenga kwini vavalake, ku Yusepe la sunagane iniane pasi Yesu.