Maruku 9 - Ngudradreadrekadhane Ka Sisiu 魯凱語聖經

¹ Ku Yesu la kawrivanga liniane, “Nau pudriadriingai pelaela numiane, ku acegecege ikai kai ku umawmase, yakai kai lu kaiyana pacai lri dreleana ku puku ki Twaumase lu mailuku ku puku mutaluvayvai.”

Akabalrithi ku tangimiamiane

² Sa makanemelenga ka vai, ku Yesu wailuku ki Pitiru, Yakubu, si Yuhani, pangwa kibubuuli mwa kwidra ki abelenge ka vaeva ka lregelrege. Ikai cucubungu liniane, ku Yesu la akabalrithi ku tangimiamianeini,

³ ku laimaini mialri akabalrithi kapuli si ledra; kai kawmasane kadrwa ku umawmase ku lri dulru pangimia ku takaparamiane ku takapuliane.

⁴ Kwini tatulru ka lasitu ala kiriimu drele ki Ilria si Musi kikawrivariva ki Yesu.

⁵ Ku Pitiru la iya kai ki Yesu, “Sinsi, kai taikaiyaneta kikai mathariri turamuru! Ala nai tudaane tutulru ku balrawbau, anika muswane ku vaeva, anika Musiane ku vaeva, anika Ilriane ku vaeva.”

⁶ Kai Pitiru si drumane ka laumawmase makitwa mukuludru makanaelre, si la kai thingale ku aiyane lini avavaga.

⁷ La ikai ku vaeva ku ememe ku wakabungu liniane. Ala kiriimu, ikai ku twalai ki ememe ku lingau ku amia kai, “Kikai kathalraili ka Lalakeli, kunumi kilalra si pasalaladha iniane!”

⁸ Kwi lalasu la kisaswarau masiasirare, laka kadrwa ku drele lini ku drumane ku umawmase, kathane ku Yesu ka yakai taelre liniane.

⁹ Kwi lalasu sa mulrawlrawdrunga ki lregelrege, ku Yesu la pelaela liniane, “Kai Lalake ki Umawmase sakaiyana siela panianiake twalai ki wapacai, maadha pelaelaela ki naneaneanenga ku tadrelane numi.”

¹⁰ Kai lalasu kialalra paluludu ku takawrivane ki Yesu, la takumapelaelaela iya kai, “Kwini twalai ki wapacai si sielane manemane ku pacugane?”

¹¹ Kai lalasu la kivagana ki Yesu, “Ani iya kai ku latarabulrubulru ki Sisiu lri tara aswala ku Ilria kela?”

¹² La tubalre ku Yesu, “Ku Ilria patengane ka amani ku lri aswala kela padulru sanaka manemane; ai, ikai ki Sisiu ani iya kikai ku Lalake ki Umawmase lri tara tarumara ku akipakwalriane si kikalrase kicilri?

¹³ Nau pelaela numiane, ku Ilria wakelanga, ai kwi lalasu ala ngilralraingi ku nau pia iya lini iniane, mararamau ku tamatikaiyane ki Sisiu iniane ku vaga.”

Pawadringai ki kiaikai ki aidridringane ka vavalake

¹⁴ Kwi lalasu sa siwlri mwa ki drumane ka lasitu, la drele ku takaalra ku umawmase ku ngiathalringulu liniane, la ikai ku latarabulrubulru ki Sisiu icengecenge madradrikidrikisi ku vaga ki lasitu ki Yesu.

¹⁵ Kwi lamapapangale sadrele ki Yesu la makitu kasamali ngituluku; si katwase lailai kidredresenge iniane makanaelre.

¹⁶ Ku Yesu la kivaga ki lasituini, “Manemane kai madradrikidrikisi numi ku vaga liniane?”

¹⁷ Ikai ki laumawmase la ikai ku tangea ku amia kai, “Sinsi, wailukaku ki lalakeli si kela drele muswane; asi lwiyane kiaikai ki menemenene ka aidridringane, la kai dulru kawriva.

¹⁸ Sana kela kwini aidridringane tusinalrelreme iniane, la patubakebake iniane pudaedae, la tulrawlrawlrapucu ku ngudwini, si pararitaitaiti ku valisi, tukulusane ku kinawmasane. Kiatubinga naku ki lasitusu ku apakatwasane ki aidridringane, ai kwi lalasu kai maka watumane.”

¹⁹ Ku Yesu la iya kai liniane, “Kunumi ka zidai kikai ka laumawmase ala kadrwa ku salrwane numi! Lri tarathainwanaku ikai numiane? Lri kiadiliana naku tarathainu numiane? Malra iluka ki vavalake mwa kai nakwane!”

²⁰ Kwini lalasu la malra iluku iniane kainganai. Kwini aidridringane sadreele ki Yesu, la makakaai pangicaeme pangikekele kwini ki vavalake, la tubakebake icakena si ngibalrwalrutai, si tulrawlrawlrapucu ku ngudui.

²¹ La kivaga ku Yesu ki tamaini, “Tarathainunga ku takipucaemananeini?” Kwini lasu la tubalre, “Singika vavalake ikai.

²² Kwini aidridringane sangwakalrale pasanu papacai iniane, si malra iniane pwa ki apwi, lrudrulrudrulu pwa ki acilai. Alaiyasi lri dulrusu pia ku namanemanenga, kiatubi nai muswane kakurua naiane, paralubu naiane!”

²³ Ku Yesu la iya kai, “Unu, alaiyasi lri dulrusu! Ku yakai ku salrwane ku umawmase, sanaka maneemanenga lri tara ngimiya patuelre!”

²⁴ Kwini tama ki vavalake la makakaai akwadrau tawtau, “Masalrwaku, ai kai makakelrete kai salrwaneli, paralubaili!”

²⁵ Ku Yesu la drele kwini ki laumawmase sa makitu kainganai lritungu ngithalringulu, la kaelaela kwini ki aidridringane, “Kusu ka celecele ka menemenene ka aidridringane, lri drekasaku muswane katwasa twalai kai ki kinawmasane ki vavalake, madha nguselaelanga mwadringi!”

²⁶ Kwini aidridringane la karaleale kingivaale, si la alra pangicaeme pangikekele pangiteretere kwini ki vavalake, ala katwase. Kwini vavalake la mia ki wapaacainga, la makitu iya makanaelre, “Wapacainga kai lasu!”

²⁷ Ai ku Yesu la taalrima bilibili iniane, si drakale iniane, kwini lasu la kirimu acegecege.

²⁸ Ku Yesu sa mudaane, ku lasitu la kibubuli kivaga iniane, “Anai kai maka dulru pakatwase kwini ki aidridringane?”

²⁹ Ku Yesu la iya kai, “Kathaane lu pangu inulriane ka lri dulru pakatwase ki miyaiya kai ka aidridringane, kathane kikai kadrwa ku drumane ku apangimiane.”

Ku Yesu peaeelanga pakanaswala pelaela ku apacadhaneini

³⁰ Kai lalasu la katwase kikwini, si ngukakai Galrilri, ku Yesu la kai apipathingale ki naneaneanenga ku tapapianeini,

³¹ asi lwiyane ku Yesu yacengeecenge bulrubulru ki lasitu. La iya kai, “Ku Lalake ki Umawmase lri kipatarumara pikai ki alrima ki umawmase; kwi lalasu lri papacai iniane, lu makatulrulunga ku tapacadhane, kwi lasu lri siela panianiake.”

³² Ai kwi lalasu kai pwalringalringau kikai vaga ku pacugane, la mukuludru kai maka kivaga iniane.

Aneane ku sanianiangenga

³³ Kai lalasu la kela Kaperenawme, sa mudaanenga ku Yesu la kivaga ki situini, “Sa ikadalranane numi manemane ku la madrikidrikidrikisi numi?”

³⁴ Kwi lalasu la kai avavaga makanaelre, asi lwiyane kwi lalasu sa ikadalranane takumadrikidrikidrikisi lukaaneane ku sanianiangenga.

³⁵ Ku Yesu la nene, si dawlu kwini ki ta 12 ka situ pucucubungu iniane si iya kai liniane, “Lukaaneane ku nau atamatama amia, lrika amani kudra salrilrilrikudrunga, si lri asasiakawlu ki mapapangale.”

³⁶ Samia kwini kwi lasu la silape ku tangea ku vavalake, si pacegecege iniane pikai kabicelrakane liniane, la kebere iniane, si iya kai liniane,

³⁷ “Ku pasiakai nakwane si pasudalru ki miyaiya kai ka vavalake, amani ku paswadalru nakwane. Kudra paswadalru nakwane, kaika paswadaalru nakwane sikakathane, mialri ka paswadalru kwidra ki amani ku siakawlu nakwane.”

Wabaebalre si palraingi

³⁸ Ku Yuhani la iya kai ki Yesu, “Sinsi, wadrele nai ku umawmase ku pangwakai ku naganesu si pakatwase ki aidridringane, la paisadra nai iniane, asi lwiyane kwini lasu kaika rededelaneta.”

³⁹ Ku Yesu la iya kai, “Madha pakaicicilri iniane; asi lwiyane kadrwa ku umawmase ku lri pangukai ki naganeli si pia ku pinangu Twaumasane ka puku, si la makakaai ngibangulu kawriva ku malisi ka vaga kiecebe nakwane.

⁴⁰ Asi lwiyane kudra kai wabaebalre mitane, amaani ku palrainginga mitane.

⁴¹ Nau pudriadringai pelaela numiane, ka aneaneanenga, kudra ngwalai saka talikai numi ki Kirisitu si la pawngulu numiane ku akuvaeva ki kupu ka acilai, lri tara maalra ku pakalreva.”

Madha kibilibilibili ki pasalrivane

⁴² Ku Yesu amia kai, “Sanaka aneane ikai ki sinzia la malra ki tangea ka kaika sapatumatumane ka umawmase si pakidaili cilri nakwane, maesaesai arakai ku madrau ka tapasilribulribwane ka lrenege si pakerenge ki lreini, si malra iniane pawrenere ki laveke.

⁴³ Alaiyasi papasalriu muswane kwi vaeva ka alrimasu, malra ngetele! Ku thithili ku alrima la malra ku palralrawthu ka niake, mathaithaaririana paraamuru kudra ki malrepenge ku alrima la muswadriadringi si mucilri mwa ki kai maedredrepe ka apwi.

⁴⁵ Alaiyasi papasalriu muswane kwi vaeva ka drapalesu, malra ngetele! Ku thithili ku drapale la malra ku palralrawthu ka niake, mathaithaaririana paraamuru kudra ki malrepenge ku drapale la kicilri puswadriadringi.

⁴⁷ Alaiyasi papasalriu muswane kwini vaeva ku macasu, malra batwathe mwalra! Ku thithili ku maca la mudaane ki kuni ki Twaumase, mathaithariri turamuru kwini ki malrepenge ku maca ala kicilri puswadriadringi.

⁴⁸ Ikai kwini, yakai ku lubalubai ku kai wapacapacai, kwidra madrareange ku apwi kai maedredrepe.

⁴⁹ “Sanaka umawmase lri kiarakai ku apwi thalethale, mia lu arakai ku timu dawngu.

⁵⁰ Kai timu mathariri, ai kai timu alaiyasi ngwalrane ku tasangutimwane, lri dulrwanata peela pasangutimu? Kunumi pikaiya ku tasangutimwane, la makadawdalru makathaithaithariri.”