Maruku 7 - Ngudradreadrekadhane Ka Sisiu 魯凱語聖經

Kakwakudhane ki cucungulane

¹ Ku swa Palrisai si twalai Yerusalrime ku tapiya ka tarabulrubulru ki Sisiu karededele kainganai kikawriva ki Yesu.

² Kai lalasu wadrele ki lasitu ki Yesu ku yakai ku arakai ku kaika mabula ku alrima kane ku aga, kai ngiamia ki swa Palrisai paswalana tawlrima.

³ Kudra tangimiamiane, kai swa Palrisai si la swa Yuda ka umawmase pangiamiamia makanaelre kudra kakudhane, lu kaina paswalana tawlrima kai lri kane ku aga.

⁴ Ku nipatwaladhane ki siwbai langai ku lamanemane lu kai paswala sinau lri kai kane. La kakaalrana ku drumane ku palululudu lini ku nitukakudhanane ki cucungulane, marwamaaninga kikai watumane madu lu sinavane ku kupu, lu sinavane ku palungu, lu sinavane ku bulavane si tapeapecane kudra la miyaiya kwini.

⁵ Lakamani kwidra kai swa Palrisai si latarabulrubulru ki Sisiu kiavaga ki Yesu, “Asi kai lasitusu kai paluludu ku sabulrwane ki cucungulaneta, la thuru arakai ku kaika mabula ku alrima kane ku aga?”

⁶ Ku Yesu la kawriva: “Ku Isaiya ku tapapiane numiane ka langiakathaithaitharirane ka laumawmase ku tayugingane pacengecenge; kwi lasu amia kai: Ku Twaumase amia kikai kawriva: Kikai laumawmase arakai ku bibiane lini musakene nakwane, ai ku kidremedreme lini wadailinga nakwane.

⁷ Kikai lalasu la maalralringa ku tukakudhane ki umawmase si drekaseini iya nakwane; kwini lalasu lu sukusukubu nakwane kadrwa ku paluludane!”

⁸ La iya kai ku Yesu, “Kunumi paluludu numi ku sabulrwane ki sidrumane ki umawmase, la cilri numi ku drekase ki Twaumase.”

⁹ Kwi lasu la iyana kai, “Kunumi malrigili numi pasiwlri si kai tarumara ku padradrekase ki Twaumase, pakai ku apaluludane ki nakakwakudhane.

¹⁰ Ku Musi wadrekase numiane, ‘Musakena ki tamasu si tinasu,’ si la tukakudhane, ‘Ku wapusu kaelaela ki tamaini si tinaini, lri kipathavungu kipapacai.’

¹¹ La iyalringa numi kikai, alaiyasi ikai ku umawmase ku wamalra ku salapwane ki marudrawdrange ku lamanemane si tu ‘Kurebane’ (ku pacugane yai sapatarumarane ki Twaumase ka lataleke),

¹² kwi lasu lri kai lapunga ki marudrawdrange la iya numi.

¹³ Kunumi lu pia numi kikai maru wamalranga numi kudra bulru numi ki palrapalra ku sidrwadrumane ka kakwakudhane arakai amudu ku vaga ki Twaumase. Kunumi la kakalrana ku piapia numi ku thadalrane kikai.”

Ku lri kai pakabula ki umawmase ku lamanemane

¹⁴ Ku Yesu la peelana sarubu ki mapapangale pucucubungu iniane, si iya kai liniane, “Kunumi makanaelre makitu kilalra kai vagali, si pulringalringava.

¹⁵ Kudra twalai latadre si mwadringi ki umawmase kai lri pakakudrulru ki umawmase; ngiabaalrelringa kamani, kudra twalai adringi ki umawmase ngibwale ala amani ku lri pakakudrulru ki umawmase.”

¹⁷ Ku Yesu sa katwase ki laumawmase si mudaanenga, ku situ la kivaga iniane ku pacugane kikai sapathalrilrikwane.

¹⁸ Ku Yesu la iya kai liniane, “Kunumi laka mararamau numi liniane ka kai pulringalringau? Kai numi wathingale? Kudra twalai latadre si mwadringi ki umawmase kai lri pakakudrulru iniane;

¹⁹ asi lwiyane ku twalai latadre si mwadringi kai ka wamwa ki kidremedremeini, wamwa ki barangeini, si pakatwase.” (Ku taiyane kikai ki Yesu ku pacugane yai, papia ki sanaka akaneane mabula patueelre iya.)

²⁰ La pacuungulu iya kai, “Kudra lri kai paalrivilrivi ki umawmase amani kwidra twalai adringi ki umawmase kainganai.

²¹ Asi lwiyane ku twalai adringi, amani kudra twalai ki kidremedreme ki umawmase kainganai ka makaelaela ku ngilisianane ku takidremedremane; kilakikai ngialisiane ka takidremedremane lri papasalriu iniane ki padralra, ki kwaupa, ki papacai,

²² pasalriu ki sawvalai si ababai, ki marau, ki ngilisiane, ki draedrangelre, ki ngilralrailrailraingi, ki pathalra, ki twalilisi, ki ngiakamiane, ki ngiakasanianiange ka lamiyaiya kai ka lapasalrivane.

²³ Kikai ngialisiane patuelre twalai adringi ki umawmase kainganai ka patengatengane ka kai pakabula ki umawmase.”

Salrwane ki tangea ka ababai

²⁴ Ku Yesu la katwase kwini, si mwa kwini ki ngwadeethe ki Tayre ka cekele. La mudaane ki vaeva ka wacekecekele, si kai apipathingale ki umawmase, ai kai maka aseketane.

²⁵ La makakai, ikai ku tangea ku ababai, ku lalakeini ka ababai kiaikai ki aidridringane, sakilalra ku ngwakai ki Yesu la makakaai kainganai drele iniane, si pidruru icucubungu ki drapaleini.

²⁶ Kikai ababai sakamaelanane ka kuni, kiatulalake ikai Puinicia ka Siria. Kai alisu kiatubi ki Yesu ku apakatwasane ki aidridringane patwalai ki kinawmasane ki lalakeini.

²⁷ Ku Yesu la tubalre iniane, “Paswalana pakane pakabucuku ki lalalake. Kudra wamalra ku akaneane ki lalalake si cilri pakane ki kukulu ka tawpungu kai pacengecenge.”

²⁸ Kwini ababai la tubalre, “Unu, Tamatama, ai ku yatailebeane ki cukwi ku kukulu ka tawpungu wakaane ku dukace.”

²⁹ Ku Yesu la iya kai kwini ki alisu, “Ngwalai kikai ki vagasu, lu mutavanaananga; kudra aidridringane twalainga ki kinawmasane ki lalakesu katwase!”

³⁰ Kwini ababai la katwase mutavanane, la drele ki lalakeini la apecenga ikai tapeapecane; kudra aidridringane la katwasenga kidaili iniane.

Ku Yesu pawadringai ki tangea ka macele si kamenene ka umawmase

³¹ Ku Yesu la katwase kwini talikai Tayre, si lribate ka Sidune la twalai pagisane ka Dikapulrise siwlri mwa ka baiyu Galrilri.

³² Yakai ku waililuku ku tangea ku macele si ka mamenene mwa ki Yesu cucubungu, si ani pawdringai iya ki Yesu iniane.

³³ Ku Yesu la patwalai ki laumawmase iluku iniane, si puthili, la arakai ku dadiputhaneini pwadringi kwini ki calringa ki lasu, la arakai ku ngalrai sakidri ki lridame ki lasu.

³⁴ Ku Yesu la paswabelenge si kiaseasene, la kawriva kwini ki umawmase, “Ipatha!” Kwidra pacugane kwi taiyane yai, “Manunganga!” amia.

³⁵ Kwidra calringa kwini ki umawmase la makakaai nguelebane, ku lridameini la kalralrukanga, si kawrivanga, kakadruanga ku pakakucingalreini.

³⁶ Ku Yesu la pelaela cunu liniane makanaelre madha matikaikai kikai si pelaela ki palrapalra; ai lu aru iya kwini, kwini lalasu arwa pelaela pasalraelre.

³⁷ Kudra lakialalra makanaelre ku umawmase la kasamali; si iya kikai, “Kudra tapianeini mathariri turamuru! Pakialalra ki macele, pakawarivanga ki mamenene!”