Maruku 6 - Ngudradreadrekadhane Ka Sisiu 魯凱語聖經

Ku swa Nazarethe mavalracevace ki Yesu

¹ Ku Yesu la katwase ki kwini, si siwlri mwa ki cekeleini; ku situini la tupapalra iniane karededele kainganai.

² Sa daruru ki Taisadrasadrane ka vai, la ikai rarubwane ki swa Yuda bulrubulru ki laumawmase. La takaalra ku laumawmase sa kilalra ku vagaini la makitu kasamaali, si iya kai, “Kikai lasu patwalai inu tarumara kikai thingalaneini? Aneane ku wabaai ku miyaiyakai ku lrigilane? Ani maka duulru pia kai pinangu Twaumasane ka puku!

³ Kai lasu kaika amani kudra tangea ka daikusange ki angatu? Kai ka lalake ki Malria, ka taka ki Yakubu, Yusepe, Yuda, si Simune, kai lagini kai labaibai kai yakai mitane kai makanaelre?” Lakamani kwini lalasu kavalracevace iniane.

⁴ Ku Yesu la iya kai liniane, “Ku yuginsia lu ikai ki cekeleini, ki zukuini, ki daaneini kadrwa ku takimusakenane ki umawmase.”

⁵ Ngwalai kikai, ku Yesu ikai ki cekeleini kai lri maka pia ku pinangu Twaumasane ka puku, kathane ku taanswane ki lamacaeme, si pawdringai liniane.

⁶ Pangukai ku kai kasalru kai ki laumawmase, masamali turamuru. Ku Yesu la pacungulu ikai ki ngwadadethe ka cekele bulrubulru ki laumawmase.

Ku Yesu siakawlu ki ta 12 ka situ

⁷ La sarubu ki ta 12 ka lasitu, si sikawlu liniane pakatwase patarudradrusadrusa. La baai liniane ku puku ku adulrwane pakatwase ki aidridringane,

⁸ la takucunu liniane iya kai, “Lu mubabadhane numi kathane ku vaeva ka ukudru, sanaka manemane madha ililuku; madha ililuku ku akaneane, madha ililuku ku samubababadhanane ka kadrai, ku thuthubungu madha pikaikai ku paisu,

⁹ sikecea sikakathane, la madha ngudrusadrusa ku sapakadriadringane ku laimai.”

¹⁰ La iyana kai liniane, “Lu mwanga numi inu, ku mwabangalre tarumara numiane pasudalru, wamwa madu ikai, pakeela ku takatwasane numi kwini.

¹¹ Ani mwa numi inu, alaiyasi kai tarumara numiane pasudalru, ku swakai kwini ku laumawmase, la kai kilalra ku vaga numi, wavisivisi madu ku thuvugu ki drapale numi, si katwase kwini ki cekele, tusapakipapawlringavane liniane.”

¹² Kwini lalasu la katwase dindu, pasapukwane ki laumawmase pakidaili ki pasalrivane.

¹³ Kwini lalasu la pakatwase ki laaidridringane, la arakai ku lawlau padelreme ki lamacaeme, si pawdringainga ki lacaemane lini.

Tapacadhane ki tarapabanau ka Yuhani

¹⁴ Ku Hirudi ka talialalai kialalranga ku patharukai ki Yesu patuelre, asi lwiyane ku nagane ki Yesu salraelrenga ikai kidruanga. Yakai ku umawmase ku amia kai, “Kwini lasu amani ku tarapabanau ka Yuhani ka siaela panianiake, lakamani ku sapukwaneini pia ku pinangu Twaumasane ka puku.”

¹⁵ Yakai ku umawmase ku amia kai, “Ilria amia iniane.” La ikai ku amia kikai, “Yuginsia amia iniane, mia kudra ki sidrumane ka tangea ka yuginsia.”

¹⁶ Ku Hirudi sa kilalra kikai lavaga, la iya kai, “Kwini lasu amani kwidra kia pakavathale nakwane ku awlru ka tarapabanau ka Yuhani, kwini lasu sielanenga panianiake!”

¹⁷ Kai Hirudi nawadrekase papwalra ki Yuhani, la kerenge iniane, si ruvu putaememengane. Kudra pia kikai ki Hirudi pakai ku akikiragadhane ki Hirudia, asi lwiyane kai Hirudi sia taelrelre ki Hirudia ka taelrelre ki betakaneini ka Pilripi.

¹⁸ Ku Yuhani kingikalrale kaelaela iniane iya kai, “Pasalriwsu kwi ribicisu ki taelrelre ki betakanesu!”.

¹⁹ Ngwalai kikai ku Hirudia laka takagirimucane pikidremedreme ki Yuhani, kisanu papacai iniane, ai kai maka pangiamia.

²⁰ Ku Hirudi mwakuludru ki Yuhani, wathingale iniane ka makalecege ka mabula ku takaumawmasane, la palakebe iniane, ku Hirudi lu kilalra ku tabulrwane ki Yuhani, kai matharithariri ku takidremedremane, ai sakamia kadalame kilalra ku sabulrwaneini.

²¹ Kudra Hirudia ku kidredredremeini nau pia kwini iya wadarurunga ku apikakwaneini takai. Saka takitulalakane ki Hirudi ku vai, la twadrau pangiakaneane si dawlu ki latabebelenge ki swa kunkwane, si lakwapingi si latamatama ki cekele ki swa Galrilri.

²² Sa icengecenge ngiakanekaneane. Ku lalake ki Hirudia ka ababai la kainganai dralradralrai, ku Hirudi si labadhabadhaini la kiragai si mukidremedremane liniane. La kirimu kwini talialalai kawriva ki alisu, “Adravane kitubisu nakwane ku manemane, lri tara baadhaku muswane.”.

²³ La pacungulwana kiketekete iya kai, “Adravane kitubisu ku manemane, anika apararamau kai kunili, lri tara baadhaku muswane!”.

²⁴ Kwini alisu la katwase kivaga ki tinaini, “Manemane ku naika akitubianeli?” Kwini tinaini la tubalre, “Amani ku awlru ki tarapabanau ka Yuhani.”

²⁵ Kwini alisu la makakaai kela siwlri kikawriva ki talialalai, si kitubi iya kai, “Kiatubiaku ki talialalai makakaiya alra ku awlru ki tarapabanau ka Yuhani si pikai ki usara baai nakwane!”

²⁶ Ku talialalai sa kilalra kikai nikitubiane, la kwalri kidremedreme turamuru; ai kudra yakainga cucubungu ki badhabadha kiketekete, kai maka palraingi kai tarumara ku takitubiane kwini ki alisu.

²⁷ Ngwalai kikai kwi lasu la makakaai drekase ki tarakadrekadrenge ka kwapingi lu malra ku awlru ki Yuhani si kainganai iya. Ku kwapingi la katwase, mutaememengane, si vathale ku awlru ki Yuhani.

²⁸ La pikai ki usara, si iluku baai ki lalake ki Hirudia; kwini alisu la katwase baai ki tinaini.

²⁹ Ku lasitu ki Yuhani sa kilalra ku patharukai kwini, la kainganai malra kwini kinawmasane ki Yuhani katwase, si dralreke pitadralredralrekane.

Ku Yesu pakabucuku ki ta 5,000 ka umawmase

³⁰ Ku lanisikawlane siaulri kainganai mwa ki Yesu, si pelaela patuelre ku takaungane si tadindwane lini.

³¹ Ngwalai ki tatapangalane ki masasawlri ku laumawmase, ku Yesu si situini adravane ka akaneane laka kadrwa ku zikange, lakamani ku kawriva ki Yesu liniane iya kai, “Kunumi bwala tupapalraili, bwala takisalrili mutakasepelane si isadra padaalru.”

³² La iya kwini si mubelenge ki varukuru kwini lalasu, si kibubuli mwa kisalrili ki takasepelane.

³³ Ai, sakatwatwase takaalra ku laumawmase ku wadrele liniane, la makakaai thingale liniane. Ku laumawmase la twalai ki lacekele kainganai kisaswarau, si aswala ki Yesu si lasitu daruru kwini.

³⁴ Sa mubila mukameamealane ku Yesu, wa drele kai ki tathathatha ka laumawmase, la kainganai ku kalithane ki kidremedreme, asi lwiyane, kwini lalasu mia kudra ki kadrwa ku taraagwagu ka lakiu, la pathagili arakai ku makaalra ku laawngane bulru liniane.

³⁵ Saka miauawbunga, ku lasitu la kela kikawriva iniane, si iya kai iniane, “Maungunga, la ikaita ki ta adailane ki lacekele kikai,

³⁶ ala pasawvagavagadha ki laumawmase, lani ngikakamani katwase mwa kai ki ngwadadethe ki cekele si langai ku akaneane si kane.”

³⁷ Ku Yesu la iya kai, “Asalu pakane numi liniane.” Kai lalasu la kivaga, “Ani arakai ku 200 ka gingi langai ku pange si pakane liniane amiasu?”

³⁸ Ku Yesu la iya kai liniane, “Lu drela luka thaininu ku pikai numi ku pange?” Kwini lalasu sakatwasenga drele la iya kai, “Lrima ku pange si drusa ku kange.”

³⁹ Ku Yesu la kawriva ki lasitu, panenea tukumikumi kai ki laumawmase, nene ikai cakena ki la ubulu iya.

⁴⁰ La nenenga makanaelre, yakai ku taidai ku kumiane, yakai ku tamalrimale ku kumiane.

⁴¹ Ku Yesu la malra kwidra lrima ka pange si drusa ku kange, la paswabelenge, kiaseasene ki Twaumase, ala apapipithingi kwini pange, si baai ki lasitu, ku lasitu ala apavavala baai ki laumawmase. La tuthadaalrane malra kwini drusa ku kange si apavalavala.

⁴² La kane makanaelre si kabucuku.

⁴³ Ku lasitu la malra sarubu ku latedrane ku pange si kange, la pasuete ki aku 12 ka karadrare.

⁴⁴ Ku wakane si kabucuku, lu asipane ku sawvalai sikakathane ta 5,000.

Ku Yesu ngwababelenge ki acilai dadavace

⁴⁵ Sangilribatenga kikai, ku Yesu la pakirarimu ki lasituini pamubelenge ki varukuru, si paswalala pamwa balrealreanane Bithesaida, la asurwana si pawvagavagaiyana ki laumawmase.

⁴⁶ Sa pakatwasenga liniane la mulregelrege inulri.

⁴⁷ Saka miauawbunga, kudra varukuru la darurunga kabicelrakane ki baiyu, ku Yesu la tangeangea asurwana ikai babiabila.

⁴⁸ La drele ki lasitu ku kwalrialrialri kadrakadrau ikai ki varukuru, asi lwiyane ku takatwatwasane lini kiadresedresenge ki saseverane. Sakalialiarenga, ku Yesu la ngubabelebelenge ki baiyu kaingananganai papia ki lasitu, kisanu nguthathili lribate liniane.

⁴⁹ Kwini lalasu la drele iniane sa dadadavace ibelenge ki acilai, alau galrale la iya, si makitu karaleale;

⁵⁰ asi lwiyane kwini lalasu sadrele iniane, ngiatuluku turamuru si mukuludru. Ku Yesu la makakaai kawriva liniane, “Madha kidremedreme, amaniaku, madha mukuludru!”

⁵¹ Ala mubelenge ki varukuru, si taelre liniane, ku saseverane la idrengere, ku lasitu la kasamali mukuludru kai thingale ku tangimiamiane,

⁵² asi lwiyane kwini lalasu kaina pwalringalringau ku pacugane ku tapavalavalane ku pange; kudra kidremedreme lini makulrungwana.

Pawadringai ki macaeme ka swa Genisarete

⁵³ Kwi lalasu matwase talubalre ki baiyu, la ikai Genisarete ubila mukameamealane, si pakerenge kwini varukuru.

⁵⁴ Kwini lalasu satwalai ki varukuru kainganai, ku laumawmase makakaai thingale ala ka Yesu.

⁵⁵ Lakamani kwini lalasu la katwase dadavace salraelre talikai kwini, lu kilalra luka yakai inu ku Yesu, ku laumawmase la kela iluku mabulribulri ki lamacaeme mwa ki Yesu.

⁵⁶ Ku Yesu adravane mwa ki tikithane ka cekele, ki maadrau ka cekele, ku laumawmase tara wamalra ki macaeme pukadadalranane ki cekele, si kitubi ki Yesu ku akirecengane ki lamacaeme pababiabila ki sapakabelebelengane ki laimaini; sanaka kiarecenge ku laumawmase mwadriingai makanaelre.