Maruku 4 - Ngudradreadrekadhane Ka Sisiu 魯凱語聖經

Pathalrilriku ki wasabulu ku sapaivai

¹ Ku Yesu la ikaainga babiabila ki baiyu Galrilri bulrubulru ki laumawmase. Asi lwiyane ku yarubu ikai iniane ku laumawmase madrikidrikisi turamuru, ku Yesu la mubelenge ki vaeva ka varukuru, la nene. Ku varukuru yakai ki baiyu, ku lamapapangale la acegecege ikai babiabila ki baiyu.

² Ku Yesu la arakai ku pathalrilriku bulru liniane ku makalra ku awngane, si iya kai liniane:

³ “Kicacaligira kilalra! Yakai ku tangea ku tarasabwabulu ku sapaivai ku matwase sabulu.

⁴ Sa sabulu kwini lasu, la ikai ku sapaivai ku makakai ki babiabila ki kadalranane, la kela ku laadhadhame si kane.

⁵ La ikai ku druma ku sapaivai ku makakai ki takalubirane ka dae, ku sapaivai la padaalru mudrata, asi lwiyane kwidra dae kai makudremelre,

⁶ salrau ku vai, kwini mwadrata la makakaai kalraici karudame, asi lwiyane ku balace kai mwaadringi balace.

⁷ La ikai ku la mwaruru makakai ki cecenekane ka angatu, kwini cecenekane ka angatu la kadrau, si amenge ki mwadratadrata, la kai maka pumadrunga.

⁸ La ikai ku sapaivai ku mwaruru makakai ki takatharirane ka dae, la cebe kaadrau si ngiesadhane, la pumadru si kitaleke, yakai ku twa matulrulu, yakai ku twa manemele, yakai ku twa idai.”

⁹ Ku Yesu la iya kai, “Ku yakai ku calringa, makitu kilalra!”

Pacugane ki pathalrilriku

¹⁰ Sa tangeangea ku Yesu, yakai kwidra la kialalranga ku tabulrwane ki Yesu ku laumawmase, kaiyanganai tupapalra ki ta 12 ka sasiakawlu kikawriva iniane, si kitubi iniane ku akipalalrwadhane ku pacugane kai ki pathalrilriku.

¹¹ Ku Yesu amia kai: “Kudra patharukai ki kaika athingalane ka matiasamaimali ka kuni ki Twaumase wabaainga numiane; ala kwidra yalatadre ka umawmase, kwidra kilalra lini sanaka maneemane pangwakai ki pathalrilriku pelaela.

¹² Mia ki taiyane ki Sisiu: Kwi lalasu lri drele, ai kailri maka cege, kialalralalra, ai kailri maka pulringalringau; ana kai ngimia kwini, nai ngibanguluunga kwi kidremedreme lini, ku Twaumase la nai pacepe liniane.”

Palalrwai ku pathalrilriku ki wasabulu

¹³ Ku Yesu la kivaaganga liniane: “Kunumi kainu pwalringalringau kikai pathalrilriku? Luiyasi ka ngiamia kwini, lai tumane numi thingale kwidra ki drumane ka pathalrilriku?

¹⁴ Kwini tarasabwabulu ku sapaivai ka umawmase kudra sabwabuluini vaga ki Twaumase.

¹⁵ Yakai ku laumawmase ku mia ki sapaivai ka mwacilri makakai ki babiabila ki kadadalranane; kikai lalasu sa kilalra ku vaga ki Twaumase, ku Satange makakaai kela, si malra patwalai ki kidremedreme lini kwidra kilalranga lini ku vaga ki Twaumase.

¹⁶ Yakai ku drumane ku laumawmase ku mia ki makakai ki lralrenegane ka sapaivai; kwini lalasu sa kilalra ku vaga ki Twaumase la makakaai kiraragai tarumara,

¹⁷ ai kwini vaga ki Twaumase ikai ki kidremedreme lini kai mwadringi ku tabalacane, kailri tarathainu, sana ngwalai ki vaga ki Twaumase si kipadradresenge ku akwalriane ki hakegai, lri makakaai cilri.

¹⁸ Yakaiana ku drumane ku laumawmase ku mia ki makakai ki cecenekane ka angatu ka sapaivai; kwini lalasu sa kilalranga ku vaga ki Twaumase,

¹⁹ ai kudra thekelrane ki tacekecekelane si salrilrigilane ki acekecekelane, si kudra ladrumane ku urikaikai ki kidremedreme ki ngwakawmasane madredresenge kela, si pakasemete kikai vaga ki Twaumase ku apanianiakane, la kai maka pumadru,

²⁰ Ai, yakaai ku laumawmase ku maru amaninga ka makakai ki mathariri ka dae ka sapaivai; kwini lalasu sa kilalranga ku vaga ki Twaumase, la pulringalringau tarumara, la pumadru, sa kitaleke yakai ku twa matulrulu, yakai ku twa manemele, yakai ku twa idai.”

Kiakabungu ki balrungubungu ka tinaki

²¹ La iyanga kai ku Yesu, “Yakaiyaini ku padalai ku tinaki, si maalralringa pwadringi ki balrungubungu si vincengane? Kwini lasu kai lri ka wamalra si pikaai ki tatinakiane?

²² Sanaka nisekeseketane patuelre lri tara kimapelaela, ku niseketane sanaka maneemane lri tara mutaluvaivai.

²³ Ku yakai ku calringa, makitu kilalra!”

²⁴ La pelaelana liniane, “Dradreela kai kilalra numi! Lu arakai numi ku manemane aceacepange ki umawmase, ku Twaumase mialri arakai ku tapangimiane numi ki umawmase si aceacepange numiane, si lrika paraawramuru ku tapangimiane numiane.

²⁵ Kudra pakayakai, lri baaiyana iniane pakakaakalra; ku pakakadrwa, adravane ka sakathathaane ka pikaini patuelre lri kimalra ribici.”

Pathalrilriku ki wacebe kadrau ka sapaivai

²⁶ Ku Yesu la pacungulu kawriva, “Ku kuni ki Twaumase maru amaaninga kudra tangea ka umawmase ku wasabulu ku sapaivai pikadaengane.

²⁷ Sakamaungu la apece kwini lasu, sakavaiyane la ngidrakale, kwini sapaivai ala ceebenga kadrau, ngiatumanaini la iya kwini lasu, la kai maka thingale ku tangimiamiane.

²⁸ Kai kadaengane ngiamiya ku adulrwane pacebe ki sanaka ceebe, si papumadru, paswala rigarigi; ala vwavwake, ala puberathe.

²⁹ Lu kabeanga kwini lataleke, la malra ku rigai si kitaleke, asi lwiyane wadarurunga kudra kalakitalekane ka vai.”

Pathalrilriku ki masetarade ka sapaivai

³⁰ Ku Yesu la kivaga, “Ku kuni ki Twaumase ngiamia ki manemane amia ta? Lri arakaita ku manemane ku pathalrilriku si pakalalrwai pelaela?

³¹ Ku kuni ki Twaumase maru amaninga kwidra beraberathane ka sapaivai ka masetarade, ka titikiyanenga ki sanaka sapaivai kai kawmasane. La ikai ku umawmase ku paivai pwa ki dae.

³² La kai tarathainu, la cebe kadrau, ka madradrawnga ki sanaka laacenge; la puricingi kaadrau, ku laadhadhame la ikai tulisisuku itailebeane ki lrilriane.”

³³ Ku Yesu arakai ku makaalra ku thadaalrane ka lapathalrilriku bulru ki mapapangale, si singikai ku amaka thingalane lini bulru liniane.

³⁴ Kwi lasu tara arakai ku pathalrilriku pelaela liniane; ai lu idredrepele taelre ki lasituini, waswacenge pelaela patuelre liniane.

Payadrengere ku Yesu ki valrigi si bikabiki

³⁵ Kudra sakamaungu, ku Yesu la kawriva ki lasitu iya kai, “Ila tatalubalre kai ki baiyu mubalrealreanane kai ki baiyu.”

³⁶ La katwase kitukudha ki mapapangale. Ku Yesu la ibelengenga ki varukuru mukalavalava, la mubelenge ku lasituini ki varukuru si iluku iniane katwase; la ikaiyana ku drumane ku varukuru ku kiaredelane katwase.

³⁷ Ala kiriimu pangitutuluku pangicaeme valrigi ikai kwini ki baiyu, si bikabiki pangicaeme, ku bikabiki la mudaane ki varukuru, si kisanu suetetenga ku acilai.

³⁸ Kudra la icengecenge itali tawtawthu ki varukuru ku Yesu si sutalu sitawlrwane kasipelrenge. Ku lasitu la aceace iniane, si iya kai, “Sinsi, kai lri pacaita! Kaisu twamanemane?”

³⁹ La ngidrakale ku Yesu si drekase ki valrigi, “Isadra!” La kawriva ki bikabiki, “Idrengera!” La isadra ku valrigi, si idrengerenga ku baiyu.

⁴⁰ Ku Yesu la iya kai ki situini, “Asingithaanga mia kikai mukuludru, kadrwana ku salrwane numi?”

⁴¹ La makitu mukuludru kwini lalasu si makitu iya kai, “Kikai umawmase kai aneane, adravane ka valrigi ka bikabiki kialalra iniane!”