Maruku 3 - Ngudradreadrekadhane Ka Sisiu 魯凱語聖經

Pawadringai ki malrunai ku alrima ka umawmase

¹ Ku Yesu la mudaanenga ki rarubwane ki swa Yuda, ikai kwini la ikai ku tangea ku umawmase, malrunai ku vaeva ku alrimaini.

² La ikai ku laumawmase ku walelelepenge, lri dredrele ki Yesu lu ikai ki Taisadrasadrane ka vai sulrau lulri kai sulrau kwini ki lasu, si taesai ku akukuswane iniane.

³ Ku Yesu la kawriva kwini ki macaeme kalrunai ku alrima ka umawmase, “Bwala mucucubunga acegecege!”

⁴ Ala kivaga ki laumawmase, “Patharukai ki Taisadrasadrane ka vai, kwidra hulriceta watumane ku tatukakudhanane? Pia ku mathariri amia? Pia ku malisi amia? Palribula ki niake amia? Kabebetetha ki niake amia?” Ku mapapangale laka kadrwa ku avavaga.

⁵ Ku Yesu masasiaelathane drele pangithalringulu, la tubi turamuru kwidra kidremedremeini, asi lwiyane makawlukulu turamuru kwidra la kidremedreme lini. Lakamani kwini lasu la iya kai kwini ki macaeme, “Sega kwi alrimasu!” Kwi lasu sasege ku alrima, la mudringainga kwini alrima.

⁶ Kudra la swa Palrisai sa mulatadrenga ki rarubwane ki swa Yuda, la makakaai taelre ki swa Hiruditu ka laumawmase madrekadrekase ku lrika apangimiane kiecebe ki Yesu, si apapacadhane iniane.

Yababiabila ki baiyu ka laumawmase

⁷ Ku Yesu si lasitu la katwase kwini si mwa babiabila ki baiyu Galrilri, la takaalra ku laumawmase ku twapapapalra iniane. Kwini laumawmase laka twalai Galrilri si Yuda,

⁸ Yerusalrime, Idumia si balrealreanane kadravane Yuredange si kwidra ngwadadeethe Tayre si Sidune ka cekele kela kwini. Kwidra takelane kikwini ki laumawmase kipasilape ki Yesu yai, ngwalai kwidra ki takilalrane lini ku patharukai ku takipuawnganane ki Yesu patuelre.

⁹ Takalra turamuru kwidra laumawmase, ku Yesu la sikawlu ki lasituini pasikai iniane padulru ku vaeva ku tikiyane ka varukuru, paakai ku kaika akidrikisaneini ki laumawmase.

¹⁰ Asi lwiyane ngwalai ku tapawdringadhaneini ki takaalra ki macaeme ka laumawmase, ku lamacaeme makanaelre la kainganai madrikidrikisi papucucubungu, ku asulrapane iniane.

¹¹ Kwidra kiaikai ki aidridringane ka laumawmase sadrele iniane makakaai gurapangane icucubungu iniane si tawtau iya kai, “Kusu yai Lalakesu ki Twaumase!”

¹² Ku Yesu akwacaeme cunu liniane madha pelaelaela aneane ka lasu iya.

Ku Yesu wapilri ku ta 12 ka nisikawlane

¹³ Ku Yesu la mwa ki vaeva ka lregelrege, si sarubu pucucubungu iniane kwidra murikaini ka laumawmase. Kwini lalasu la kainganai,

¹⁴ Ku Yesu la pilri ku ta 12 ka laumawmase, si nisikawlane iya liniane, la iya kai liniane, “Wapilriaku numiane, ku lrika ataelreane numi nakwane palralrawthu, si lai sikawlaku numiane katwase dindu;

¹⁵ lai lri ikai ku puku numi pakatwase ki aidridringane.”

¹⁶ Kwini pilri ki Yesu ku ta 12 ka umawmase: Simune (ku Yesu la pasi nagane iniane pasi Pitiru),

¹⁷ lalalake ki Zibidi ka Yakubu si agi ki Yakubu ka Yuhani (ku Yesu la pasinagane liniane pasi Bwaneregi, ku pacugane “Ku takaumawmasane mia ki dreredrere amia”),

¹⁸ Anederiu, Pilripi, Barethulumiu, Matai, Tumase, lalake ki Alepaiuse ka Yakubu, Tadai, Cicintu ka Simune,

¹⁹ si sakabilrilane kwidra kialangai ki Yesu ka swa Isekaliwte ka Yuda.

Yesu si Belezebulu

²⁰ Ku Yesu sa siwlri mutavanane, la kela ku tapangale ku umawmase irubu mwa liniane, si kwidra naika akaneane lini ku aga ki Yesu si situini laka kadrwanga ku zikange.

²¹ Ku wacekecekele ki Yesu sathingale ki kwini tangimiamiane, la mulatadre si lri telenge iniane, asi lwiyane yakai kwidra laumawmase ku amia kai, “Amamama kai lasu!”

²² La ikai ku twalai Yerusalrime kela, ka tarabulrubulru ki Sisiu la iya kai, “Kikai lasu kiaikai ki Belezebulu! Satalutalu kai lasu ki talialalai ki aidridringane si pakatwase ki laaidridringane!”

²³ Ku Yesu la dawlu kai ki laumawmase pucucubungu, si arakai ku pathalrilriku iya kai liniane, “Ku Satange ara duulru pakatwase ki Satange?

²⁴ Ku taingeane ka kuni lu makalilisi, kwini kuni kai lri maka acegecege;

²⁵ kudra wacekecekele lu makarivurivu, kwini wacekecekele lri tara kasuuburu.

²⁶ Lukamiyaiya kwini, kudra kuni ki Satange la makakarivurivu, lri kai maka dulru acegecege, lri tara kamudu.

²⁷ “Kadrwa ku umawmase ku wadulru mudaane ki daane ki tamagarange, si ravase ku lawbubuluini; lu paswalana kerenge ki tamagarange, lri maka dulru malra demedeme kwini ki tacekecekelaneini.

²⁸ “Nau pudriadringai pelaela numiane, ku pasalriu ki umawmase patuelre si taiyane tulilisi ku vaga patuelre lri dulru kipacepe;

²⁹ ai kudra twadreadrekase ki Siri ku umawmase kailri maka dulrunga kipacepe pakela apalralrawlrawthu, asi lwiyane kwini pasalriuini lrika palralrawthunga ka pasalrivane.”

³⁰ (Ku taiyane kwini ki Yesu amani sa ikai ku umawmase ku kawariva iya kai, “Kai lasu kiaikai ki aidridringane.”)

Tina ki Yesu si labetakaneini

³¹ Kikai kwidra, ku tina ki Yesu si labetakaneini wakela; la acegecege ikai latadre, la sikawlu ki umawmase pelaela ki Yesu, pelaela kwini lalasu kisanu kikawriva iniane iya.

³² Yakai ku laumawmase ku ngiathalringulu nene ki Yesu; kwini lalasu peaelaela iniane: “Wi, ka tinasu si betakanesu yalatadre, kisilasilape muswane!”

³³ Ku Yesu la iya kai, “Aneane ku ina? Aneane ku labetakaneli?”

³⁴ La drele kwini ki ngiathalringulu iniane nene ka laumawmase, si iya kai, “Kunumi drela, kikai laumawmase ala amani ku ina si labetakaneli!

³⁵ Sanaka pangiamiamia ku takidremedremane ki Twaumase ka laumawmase ala amaninga ku labetakaneli si ina.”