Maruku 2 - Ngudradreadrekadhane Ka Sisiu 魯凱語聖經

Pawadringai ku Yesu ki malruingi

¹ Sangilribatenga ku minakapialane, ku Yesu la siwlri mwa cekele Kaperenawme; ku taikaiyaneini ki daane la kimathingathingalenga si saraunga.

² La makitu irubu mwa kwini ku tapaangale ku laumawmase, si sutenga ki daane ku laumawmase, adravane ka kalatadrane kadrwanga ku taikaiyane. Ku Yesu sa bulrubulru liniane,

³ yakai ku tasupate ku wakela mabulribulri ki macaeme kalrunai wakela padrele ki Yesu.

⁴ Amani sa takalra turamuru ku umawmase, kwini lalasu la kai maka dulru mabulribulri iniane pucucubungu ki Yesu. Lakamani ku pangukai cavalri ki taibelenge ki Yesu mwalibi, ala malra kwini ki macaeme, si paelre kwini babulriane surusuru pulebe iniane.

⁵ La drele ku Yesu kudra salrwane kwini ki lalasu, la iya kai kwini ki macaeme, “Lalake, kwi pasalrivanesu kiapacepenga.”

⁶ Yakai ku tapiya ku tarabulrubulru ki Sisiu nene ikai kwini, si pikidremedreme iyaiya kikai,

⁷ “Kikai lasu ani thuru puvaga ku ngikarakacanane ku vaga? Kathane ku Twaumase, aneane ku yakai ku puku dulru pacepe ki pasalrivane!”

⁸ Ku Yesu la makakaai drele kwini takidremedremane lini ka tumana amiamia, la iya kai liniane, “Kunumi anu pikai ku miyaiya kikai ku takidremedremane?

⁹ Saininu ku madwadwai lu kawrivane kwini ki macaeme pelaela, ‘Kiapacepenga kwi pasalrivanesu’ si ku ‘Ngidrakala, la malra kwi sapasu si dadavace’ iya?

¹⁰ Lri padrelaku numiane ala ka yakai ku puku pacepe ki pasalrivane ku Lalake ki Umawmase ikai kawmasane.” Sa iya kwini la iya kai kwini ki macaeme kalrunai,

¹¹ “Lri kawrivaku muswane, ngidrakala, si la malra kikai sakibulrianesu, la katwasa mutavanane!”

¹² Kwini lasu la ngidrakale, si yasasane malra kwini babulriane, sa dredredrele makanaelre la katwase mulatadre. La kasamali makanaelre, si makitu drengedrengere ki Twaumase iya kai, “Kaita wadreleana ku miyaiya kai!”

Ku Yesu wadawlu ki Lrivi

¹³ Ku Yesu la nguseelanga mwa babiabila ki baiyu Galrilri, la tapaangale ku laumawmase ku yarubu mwa iniane, ku Yesu la bulru liniane.

¹⁴ Kwi lasu sa arwacucubungwana dadavace kwidra, la drele ku tangea ku taramalramalra ku kazilu, ka lalake ki Alepaiuse ka Lrivi, wanene ikai ki takikaziluzilwane. Ku Yesu la iya kai iniane, “Bwala tupapalraili!” Ku Lrivi la ngidrakale, si tupapalranga ki Yesu.

¹⁵ Sangilribatenga kwidra ku Yesu yakai ki tai Lrivi kanekane ku aga, takaalra ku twapapalra iniane ku latarakikaziluzilu si latangangangace ka umawmase; ku yakai kwini takaalra ku kialringulu ki Yesu si lasituini kanekane ku aga.

¹⁶ La ikai kwidra latarabulrubulru ki Sisiu si la swa Palrisai wadrele ki Yesu sa kilringulringulu ki latarakikaziluzilu si latangangangace ka umawmase, la kivaga ki situ ki Yesu, “Ka Yesu ani kilringulringulu ki latarakikaziluzilu si latangangangace ka umawmase?”

¹⁷ Ku Yesu sakilalra, la kawriva iya kai, “Ku mwadringadringai ku umawmase kai lri murikai ki tarasulrasulrau, luka yakaai ku caemane ku umawmase lri murikaai. Ku takelaneli ku pacugane kainaku pakai ku adawlane ki makalecege ka umawmase, pakai ku adawlane ki manganga ka umawmase.”

Patharwakai ki walaisi

¹⁸ Yakai saka kiningivalane, kwidra lasitu ki tarapabanau ka Yuhani si la swa Palrisai sa icengecenge lailaisi. Yakai ku umawmase ku wakela kivaga ki Yesu, “Ani lailaisi kai lasitu ki Yuhani si la swa Palrisai, la kai lailaisi kai lasitusu?”

¹⁹ Ku Yesu la tubalre, “Kudra marudrarudrange ku sawvalai lu ikaiyana ki ngiakanekaneane, kwidra badhabadha lri laisi? Sana taelreana liniane ku marudrarudrange, kai lri laisi.

²⁰ Ai lri kela kwini vai, kwini marudrarudrange ka sawvalai lri twalai liniane kiiluku, lu kamaninga kwini vai kwi lalasu ala lri makitu laisinga.

²¹ “Kadrwa ku umawmase ku arakai ku bavane ka makalrilau si cakupu ki supilringa ka laimai, alaiyasi pia kwini, kudra tacakupane ka bavane lri pakapurici ki supilri ka laimai, lai aru kadrau ku takapuricane.

²² Laka kadrwa ku umawmase ku wamalra ku bavane ka bava si pasaela pwa ki supilri ka lrangici ka tabavane, lu pia kikai, kwini bavane ka bava lri pakabulrutu kwini ki supilri ka lrangici ka tabavane, ku bava si lrangici ka tabavane lri tara kaliisi. Lakamani kwidra, ku bavane ku bava lri pasaela pwa ki bavane ka lrangici ka tabavane!”

Patharwakai ki Taisadrasadrane ka vai

²³ Yakai saka Taisadrasadrane ka vai, ku Yesu la ngukakai ki mamugimugi. Ku situini la tupapalra iniane; sakatwase la takutheretheredre ku madru ki mugi.

²⁴ Lakamani ku swa Palrisai la iya kai ki Yesu, “Drela, ka situsu paiya ku kaika pinalraingane pia ikai ki Taisadrasadrane ka vai!”

²⁵ Ku Yesu la tubalre, “Ku Davidi sa muriakanekaneane watumane, kai numi sialrigwana? Kwi lasu si kudra latwapapapalra iniane masilrau,

²⁶ la mudaane ki daane ki Twaumase, si kane ku nipatarumaranenga ki Twaumase ku pange. Kikai amani sa icengecenge ka abebeelengenga ki barakalai ku Abiathare. Singikai ki hulriceta, kathane ku barakalai ku lri maka dulru kane kikai pange; ai ku Davidi ngiakakamani kane, si la apavalavala pakane ki latwapapalra iniane.”

²⁷ La iyana kai ku Yesu, “Kai Taisadrasadrane ka vai nipasikaiyane ki umawmase pikai cegecege; kai umawmase kaika pasiakai ki Taisadrasadrane ka vai kitulalake.

²⁸ Lakamani, kai Lalake ki Umawmase mialri ka Tamatama ki Taisadrasadrane ka vai.”