Maruku 15 - Ngudradreadrekadhane Ka Sisiu 魯凱語聖經

Yacucubungu ki Pilatu kisaibange

¹ Sakakaiyane ngulalaakese, kwidra marudrange ki barakalai, si laciwru, latarabulrubulru ki Sisiu, si swa gikai makanaelre, la siracangane madrekadrekase, sakarathudunga ku apangimiane lini, ala malra kerenge ki Yesu si iluku baai ki Pilatu.

² Ku Pilatu la kivaga iniane, “Kusu yai talialalaisu ki swa Yuda?” Ku Yesu la tubalre, “Kikai yai ngiamia ku taiyanesu.”

³ Ku lamarudrange ki barakalai makaalra ku kukusu lini ki Yesu,

⁴ lakamani ku peela ki Pilatu kivaga ki Yesu iya kai, “Drela, kai kukusu lini muswane kai makaalra ka pasalrivane, kaisu lri tubalre?”

⁵ Ku Yesu laka sakamiya kai tubalre ku niakuvalanenga; la kasamali turamuru ku Pilatu.

Kiatupasalrivane ku akipapacadhane

⁶ Sanaka tatulrisilrisiane ki Takilragavane ka lrisi, ku Pilatu tara singiakai ku kitubi ki mapapangale pulatadre ku tangea ku kiaemenge.

⁷ La icengecenge ikai ku tangea ku sia Barabase, taelre kiemenge kudra ki wathurikici ki cekele si papacai ki umawmase.

⁸ Sa irubu ku mapapangale, kiatubi ki Pilatu ku asingikaiyane ki kakwakudhane lu kipuawngane kikai,

⁹ ku Pilatu la kivaga liniane, “Kunumi ani pulatadre kwini ki talialalai ki swa Yuda amia numi nakwane?”

¹⁰ Ku patengatengane kai Pilatu wathingale, kwini lamarudrange ki barakalai ala ka ngwalai ki pathalrane lini, ala kamani ku iluku lini ki Yesu baai iniane.

¹¹ Ai ku lamarudrange ki barakalai patata ki mapapangale ku apulatadrane ki Barabase.

¹² Ku Pilatu la peelana kivagana ki mapapangale, “Kwini talialalai ki swa Yuda iya numi kwini umawmase, lri pangitumanaku?”

¹³ Kwini lalasu la mariariange iya kai, “Pakedrekedra iniane pwa ki ziwzika!”

¹⁴ Ku Pilatu la kivaga, “Manemane ku piaini ku ngialisiane?” Kwini lalasu la aru riariangelringa, “Pakedrekedra iniane pwa ki ziwzika!”

¹⁵ Ku Pilatu la ngwalai ku akikadalamane ki mapapangale, la pulatadre ki Barabase baai liniane, la drekase si lrumai ki Yesu, ala patarumara ki umawmase katwase kedrekedre pwa ki ziwzika.

Twasinalrelreme ki Yesu ku lakwapingi

¹⁶ Ku lakwapingi la iluku ki Yesu mukalatadrane ki sutuke, la sarubu kwidra ki lakwapingi makanaelre.

¹⁷ Kwini lalasu la pasilaimai ki Yesu ku thilalatadhane ka laimai, la arakai ku cecenekane ka angatu tutawpu si pasitawpu iniane,

¹⁸ ala papia iniane sukubu si iya kai, “Talialalai ki swa Yuda banzai!”

¹⁹ Kai lalasu la arakai ku uvai lrumai ki awlruini, si sungaluthu iniane, la pidruru sukubu iniane.

²⁰ Samaka tusinalrelremenga, la mwalra kwini thilalatadhane ka laimai, la sawlri pasilaimai ku laimaini, ala iluku iniane katwase pakedrekedre pwa ki ziwzika.

Ku Yesu kiapakedrekedre ikai ki ziwzika

²¹ Sa ikadadalranane, kwini lalasu kiapadradresenge ku tangea ka umawmase, ka sia Simune, ka twalai tali lregelrege ka lri mupairange, kai lalasu la vuutha iniane mwa ubalrithi ki Yesu angeale ku ziwzika (kai Simune swa Kurini, ka tama ki Alikesangeda si Ruhu).

²² Kai lalasu la mailuku ki Yesu mwa kudra ki sia Gulugutha, ku pacugane yai “Awlru ka lrelrelrege”.

²³ Ikai kwini, kwi lalasu la malra kudra bava ka nipaibwane ku sasulravane si pawngulu ki Yesu, ai kai mwabangalre ungulu ku Yesu.

²⁴ Lakamani kwini lalasu alra ki Yesu kedrekedre pibelenge ki ziwzika, la kuzibiki, mavalavala ku laimaini.

²⁵ Sakamialrealre ka bangate ki tuki, kai lalasu wakedrekedre ki Yesu piziwzika.

²⁶ Ku kitupasalrivaneini nipacasane, “Talialalai ki swa Yuda”.

²⁷ Yakai ku tadrusa ku sadre ku pinakisilangane ki Yesu pakedrekedre pikai ki ziwzika, ku tangea pia tali vanale, ku tangea pia tali viri iniane.

²⁹ Ku ngwakai kwini lribate ku laumawmase twasinalrelreme ki Yesu, si veteevete ku awlru iya kai, “Henge, kusu ka nau buruku ku daane ki Twaumase, si lai maka tutulrulu tupela tudaane!

³⁰ Kaiasasane twaladha ki ziwzika mulebe, la ngipapalribulu!”

³¹ Ku lamarudrange ki barakalai si latarabulrubulru ki Sisiu la mialri ulralrakai iniane, si makitu iya kai, “Kai lasu palribulu ki umawmase, la kai maka ngipapalribulu!

³² Kirisitu, ka talialalai ki swa Iseraylri, kaiasasane mulebea twaladha ki ziwzika, lanai dredrele, si la nai kasalru!” Kudra palraini kikedrekedre ku umawmase la mialri tusinalrelreme iniane.

Tapacadhane ki Yesu

³³ Saka mwalringedele, la kadradrimiti kai kawmasane, lri ikai ku ngwatulru ki tuki.

³⁴ Saka miawbu ki tulru ki tuki, ku Yesu la akwadrau karaleale, “Ilui, Ilui, lramasapaketani?” Kwini pacugane amia kai, “Twaumaseli, Twaumaseli, asu ciilri nakwane?”

³⁵ Kudra yathili acegecege ku laumawmase yakai ku kialalra, la iya kai, “Kilalalra, wadawdawlu ki Ilria!”

³⁶ La ikai ku tangea ku matwase mwa lailai, la malra ku nitaburane pwa ki maalriu ka bava ku pelrece si pakerenge pwa ki uvai, la puthili ki ngudui ki Yesu, si iya kai, “Dredrela, tadrele ki Ilria lulri pulebe iniane lutumane!”

³⁷ Ku Yesu la akwadrau karaleale ala nguniakane si pacai.

³⁸ Kudra nipakelradhane ikai ki daane ki Twaumase ku make, la twalai belenge mulebe kathurilace mawdrusa.

³⁹ Kwini acegecege icucubungu ki ziwzika ka abelenge ki kwapingi, la drele ku tangimiane ki Yesu sa karaleale si pacai, la iya kai, “Kikai umawmase kai, patengatengane ka Lalake ki Twaumase!”

⁴⁰ La ikaiyana ku lalabaibai ku sadaaili dredredrele; ikai kwini yakai ku Magedaleni ka Malria, la ikai ku tina ki agiagi ka Yakubu si Yusepe ka Malria, si Salumi.

⁴¹ Ku Yesu sa ikai Galrilri kai lalisu twapapalra iniane, si pasikaikai iniane. La ikaiyana ku takaalra ku lalabaibai ka twapapapalra ki Yesu karededele kainganai mu Yerusalrime.

Takidralrekane ki Yesu

^42-43 Sakadradrimidrimiti, wakela ku swa Arimatai ka Yusepe; kai lasu kiamusakene ki umawmase ka gingi, ka mwakalavalava ku autaluvaivadhane ku kuni ki Twaumase. Kwini saka tapadulrudulwane ka vai (amani kwidra aswala ki Taisadrasadrane ka vai). Ku Yusepe la pagagarangane katwase kikawriva ki Pilatu, si kitubi iniane ku amalrane ku kinawmasane ki Yesu si katheme.

⁴⁴ Ku Pilatu sa kilalra ala ka wapacainga ku Yesu, la kirimu kasamali. La dawlu kudra ki mabelenge ki kwapingi, si kivaga iniane luka maulainga ku tapacadhane ki Yesu.

⁴⁵ Sakipelaelanga ki mabelenge ki kwapingi, ku Pilatu wabaai ki Yusepe ku kinawmasane ki Yesu.

⁴⁶ Ku Yusepe walangai ku lalasare ka kaimadhane, la malra pulebe ku kinawmasane ki Yesu, si lripucu ara lalasare ka kaimadhane, la pasutelrai pikai ki vaeva ka tinutadralredralrekane pikai ki alrisapesape, la balrutai ku vaeva ka lrenege, si celrepe ki lrawlrawdru ki tadralredralrekane.

⁴⁷ Ku Magedaleni ka Malria si tina ki Yusepe ka Malria yakai ki tapikaiyane pasutelrai ki Yesu drangalrungalru.