Maruku 14 - Ngudradreadrekadhane Ka Sisiu 魯凱語聖經

Tamadrekadrekasane ku apapacadhane ki Yesu

¹ Salri makapusalenga si ka Takilragavane ka lrisi si Tamwalrane ku sapawsemakane ka lrisi, ku marudrange ki barakalai si tarabulrubulru ki Sisiu madrekadrekase ku akibubuliane pwalra ki Yesu, si papacai iniane.

² Kwi lalasu la iya kai, “Takai pikai ki kalalrisiane pwalra, amani lu pangiracuku ku akathurikicane ki lamapapangale.”

Ku Yesu yakai Bithani kipulawlau

³ Ku Yesu yakai Bithani ki daane ki kiapucaemane ki raibiu ka Simune. Saicengecenge kanekane, yakai ku tangea ka ababai ku wailuku ku vaeva ku mathaariri ka didilrungu, ikai adringi la pasuete ku tinukucingalrane ka lawlau. La cwake kwini mathaariri ka didilrungu, si gugu ku sangwalreme ka lawlau pwa ki awlru ki Yesu.

⁴ Yakai ku la wanene ku umawmase ku kai kiaragai, la makawrivariva iya kai, “Lu pia kai pasawlra kai lawlau manemane ku pacugane?

⁵ Kikai sangwalreme ka lawlau lri dulru madu kilangai tu 300 pulrabale ka gingi, lu alrane kikai paisu si palribulu ki matiakukuru nai kathaariri!” Ngwalai kikai, kai lalasu la kalisi kwini ki ababai.

⁶ Ai ku Yesu amia kai, “Singikaiya iniane! Asingithanga pakwalri iniane? Kai alisu pasiakainga nakwane pia ku taingeane ku mathariri ka awngane.

⁷ Kunumi tataelreane numi ki matiakukuru, lu palraingi numi lri dulru numi ngisasingikai ku apalribulane liniane, ai kainaku lrika taikaiyane taelre numiane.

⁸ Kai alisu pakanaelre ku adulrwaneini pia; kikai guguini ka sangwalreme ka lawlau pikai ki kinawmasaneli padulru pasikai ku akidralrekaneli.

⁹ Nau pudriadringai pelaela numiane, kai kiacaebe ki belenge, sanaka tadarurane kikai hukuingi, sanaka umawmase lri pelaelaela kikai tapiane ki alisu, si ngulringalringau iniane.”

Ku Yuda kialangai ki Yesu

¹⁰ Ikai ki ta 12 ka lasitu ki Yesu, yakai ku tangea ka sia Yuda ka swa Isekaliwte, kwini lasu matwase kikawriva ki marudrange ki barakalai, lri kilangai ki Yesu baai liniane.

¹¹ Kwi lalasu sa kilalra ku taiyane ki Yuda, la kiraragai, la palraingi ku wabaai ku paisu iniane. Twalainga kwini, ku Yuda la siasiasilapenga ku akilangadhane ki Yesu.

Ku Yesu si lasitu malringulu ku kwaubu ki Takilragavane ka lrisi

¹² Saka aswalaalanga ka vai ki Tamwalrane ku sapawsemakane ka lrisi, ka amani ku taculuculwane ku kiu ki atulrisiane ki Takilragavane ka lrisi ka vai, ku lasitu kaiyanganai kivaga ki Yesu, “Ani ikai inu amiasu naiane padulru pasikai muswane ku kwaubu ki Takilragavane ka lrisi?”

¹³ Lakamani, ku Yesu siakawlu ki tadrusa ka situ, si cunu pelaela liniane iya kai, “Lu mucekela, lri kipadradresenge numi ku tangea ku wailuku ku yadilrungane ku acilai, kunumi la tupapalra iniane.

¹⁴ Sanaka tawdaananeini, mwanga kivaga kwidra ki tawki ki daane iya kai, ‘Ku Sinsi amia kai, yakainu kwidra daane ku ataelreaneli ki lasituli kane ku kwaubu ki Takilragavane ka lrisi?’

¹⁵ Kwini lasu lri ililuku numiane mwa drele ki nikai ki daane padrele ku pinadulrwanenga ku taluvaale ka swaadrau ka taikaikaiyane; lai lri ikai numi kwini pasikai mitane padulru.”

¹⁶ Ku tadrusa ka situ la katwase, si mucekelenga, ku kipadradresenge lini la ngiamia ku tapelaelane ki Yesu liniane patuelre; kwini lalasu la ikai kwini padulru ku kwaubu ki Takilragavane ka lrisi.

¹⁷ Sakamiauawbunga, ku Yesu si ta 12 ka lasitu la kelanga.

¹⁸ Sa nenenga si kanekane, ku Yesu la iya kai, “Nau pelaela numiane, ikai numiane, ka kialringulringulu nakwane, yakai ku tangea ku lri kilangai nakwane.”

¹⁹ Kwi lalasu la makitu kwalri ku kidremedreme lini turamuru, si tarungangea kivaga iniane, “Bekacaku kamani?”

²⁰ Ku Yesu la tubalre, “Tangea ka yakai numiane ka ta 12; ala kikai kiasilange nakwane ikai ki usara malramalra kikai pange si kane amani.

²¹ Mia ku taiyane ki Sisiu, ku Lalake ki Umawmase lai lri kitulisi; ai kwidra kialangai ki Lalake ki Umawmase yakai ku amatikurwane! Naika maesaesai ana kai kitulalake kwini lasu!”

Kwaubu ki Tamatama

²² Kai lalasu sa kanekanenga, ku Yesu wamalra ku pange, la paswala inulri kiaseasene, ala apapipithingi ku pange, si baai apavalavala ki situ, si iya kai, “Kunumi kanea; kikai yai kinawmasaneli.”

²³ La malra ku kupu, sa kiaseasenenga ki Twaumase la baai liniane; la ungulu makanaelre.

²⁴ Ku Yesu la iya kai, “Kikai yai eraili, ka sapatuthingalane ka sakiketeketane ki Twaumase si umawmase ka erai, ka pasikai ki takaalra ki umawmase tueraerai.

²⁵ Nau pelaela numiane, kainaku lri ungulunga kikai budu ka bava, pakeela ku aikaiyane ki kuni ki Twaumase ungulu ku bavane ka bava ka vai.”

²⁶ Kai lalasu la senai asivaeva ku senai, la mulatadre, si papia Ulrive lregelrege.

Pakanaswala pelaela ku angikawlrawlravane iniane ki Pitiru

²⁷ Ku Yesu kawariva liniane iya kai, “Lri cilri numi nakwane makanaelre, asi lwiyane ku Sisiu amia kai, ‘Ku Twaumase lri papacai ki taraagu ka umawmase, ku lakiu lai masawvagavagai.’

²⁸ Ai lu sielanga naku panianiake, lri aswalaku numiane mwa ka Galrilri.”

²⁹ Ku Pitiru la iya kai, “Adravane cilri muswane ku palrapalra, lri kainaku cilri muswane lutuumane!”

³⁰ Ku Yesu la iya kai ki Pitiru, “Nau pudriadringai pelaela muswane, kai maungu lu kaina akupusale kuka, lri kingitulrulusu ngikawlrawlravane nakwane.”

³¹ Ku Pitiru la aru keceengane avavaga iya kai, “Adravane kalri tara tupalraku muswane pacai, kainaku lri dulru ngikawlrawlravane lutuumane!” Kudra drumane ka lasitu la mialri makitu iya kikai makanaelre.

Inulri ikai Gesimani

³² Kwini lalasu wakela mwa kudra ki taingeane, ka sia Gesimani; ku Yesu la iya kai ki lasitu, “Kunumi ikaikaiya kai nene, mukalavalavaaili nau mwana inulri.”

³³ Lakamani ku ilukuini ki Pitiru, Yakubu, si Yuhani karededele katwase. Kwi lasu la pathagili kateelrege ku kidremedreme,

³⁴ la iya kai liniane, “Kwalri turamuru kai kidremedremeli, kisanu pacapaacainga. Kunumi ikaikaiya kai asuru, si kasimeameace!”

³⁵ La arwacucubungu dadavace, si pidruru guruthungane idaedae, la kitubi ki Twaumase iya kai, luiyasi ka adulrudulrwane, lani kai kipadradresenge kikai akwalriane.

³⁶ La kitubiana iya kai, “Ama ka Tamali, wadulrusu sanaka manemane; kiatubiaku muswane, kai akwalriane ka kupu pataluela! Ai, madha singikaikai ki kidremedremeli, singikaiya ki kidremedremesu.”

³⁷ Ku Yesu la kainganai siwlri, la drele ki tatulru ka lasitu kasipeelrengenga makanaelre; la iya kai ki Pitiru, “Simune, masipelrengesu? Kaisu maka kasimeameace ku navaevanga ki tuki?”

³⁸ La iyana kai, “Kasimeameaca inulri, amani lu ulrabuku numi ki salrilrigilane. Kwini kidremedreme numi adravane palraingi, kwi kinawmasane numi twaramuru.”

³⁹ Ala katuasenga ngusela, la arakai ku thadaalrane ku vaga inulri.

⁴⁰ Ala siwlringa mwa ki lasitu ku Yesu, la drele liniane la kasipelrengeana. Kwini lalasu kai maka manwamaca ku maca lini, la kaithingale ku aiyane kawriva iniane.

⁴¹ Ku Yesu saka ngusitulrulu siwlri, la iya kai liniane, “Masipeelrengeana numi, si isaadrana numi? Drela, wakelanga ku zikange, kai Lalake ki Umawmase lri kikilangai ikai ki alrima ki mapasaisalriu ka umawmase!

⁴² Ngidrakala, ila ta katwase! Drela, ka kialangai nakwane ka umawmase wakelaanga!”

Ku Yesu kiapwalra

⁴³ Ku Yesu sakawrivariva, ku tangea kikwini ki ta 12 ka situ ka Yuda wakelanga. Ku laumawmase la mailuku ku lrabu si angatu kainganai tupapalra iniane; kwini lalasu yai, sikawlu ki marudrange ki barakalai, tarabulrubulru ki Sisiu, si ciwru.

⁴⁴ Kudra kialangai ki Yesu paswalanga pelaela liniane ku vaeva ka sapatuthingalane, iya kai, “Ku mwali uma, amani ku lrika amalrane numi ka umawmase. Kunumi la pwalranga iniane, si kipapawlringavane kadrenge, si malra ililuku iniane.”

⁴⁵ Ku Yuda sakela, la makakai mucucubungu ki Yesu, si kawriva, “Sinsi!” La uma iniane.

⁴⁶ Lakamani kwi lalasu pwalra ruthuku ki Yesu.

⁴⁷ Ikai kwidra ki acegecege ithili ka laumawmase, yakai ku tangea ku wasudru ku lrabu la papia ki sasiakawlu ki abebeelengenga ki barakalai thiabe, si lradipi ku thili ku calringaini.

⁴⁸ Ku Yesu la iya kai liniane, “Kai iluku numi kai lrabu si angatu kainganai pwalra nakwane, twasadre numi nakwane?

⁴⁹ Lukakaiya yakaiyaku ki daane ki Twaumase si bulrubulru ki umawmase, si apalralrawthu taelre numiane, la kai numi pwalralra nakwane. Ai kai vaga ki Sisiu lri tara ngimiya.”

⁵⁰ Sakamani kwidra, ku lasitu la makitu cilri iniane si mawbebere.

⁵¹ Yakai ku tangea ka ngwakathabarane siapalimemelre ku kaimadhane ka makalrilau si kakathane, la kabibibilrili ki Yesu. Kwini lalasu pwalra iniane,

⁵² ai kwi lasu wacilri kwi kaimadhane ka makalrilau si vilralrakane katwase lailai ubere.

Kiasaibange ikai ki takaigigiane

⁵³ Kwini lalasu wailuku ki Yesu mwa ki daane ki abebeelengenga ki barakalai; ikai kwini, ku lamarudrange ki barakalai makanaelre, laciwru, si tarabulrubulru ki Sisiu yaelrelre makanaelre.

⁵⁴ Ku Pitiru la sadaaili kabibibilrili ki Yesu, pakela ki kalatadrane ki abebeelengenga ki barakalai, la mwa kiibu nene ki tarakadrekadrenge si idididiu.

⁵⁵ Ku marudrange ki labarakalai si ku swa gikai makanaelre la kidremedreme silape ku atakaiyane kukusu ki Yesu, ku lrika apapacadhane iniane, ai kai maka kiadringai ku navaevanga ku siwmi.

⁵⁶ Takaalra ku umawmase ku kaiyanganai capange kukusu iniane, ai kwi taiyane lini ku vaga kai mamwamwamwa patuelre.

⁵⁷ Sakabilrilanenga la ikai ku tapiya ku laumawmase ku acegecege si draedrangelre kawriva ku asulisiane ki Yesu, amia kai,

⁵⁸ “Kialalra nai sa iya kai kwi lasu, ‘Lri burukaku kikai niaralrimane ki umawmase tudaane kai daane ki Twaumase, ki minakatulrulane ka vai la tudaane ku kaika niarakaiyane ku alrima ki umawmase tudaane ka daane ki Twaumase.’ ”

⁵⁹ Adravane kikai sakukusane kai mamwamwa ki taiyane lini.

⁶⁰ Lakamani ku abebeelengenga ki barakalai la acegecege icucubungu ki laumawmase, si kivaga ki Yesu, “Kai kukukusu muswane kai ki lalasu, kadruua ku satubalreanesu?”

⁶¹ Ku Yesu la icelrebe, kai avavaga. Ku abebeelengenga ki barakalai la pelana kivaga iniane, “Amanisu kwidra Kirisitu, ka Lalake kwidra ki niwsakesakenane ka Twaumase?”

⁶² Ku Yesu la tubalre, “Amaniaku! Lri drele numi makanaelre ku Lalake ki Umawmase wanene ivanale ki sapupukuanenga, si ngukakai ki ememe mulebe!”

⁶³ Ku abebeelengenga ki barakalai la thurilace ku laimaini si iya kai, “Kaita mwarikainga ku wasiwmi ku umawmase!

⁶⁴ Kialalranga numi ku tatusinalrelremeaneini ki Twaumase. Kunumi ala pelaela ani pangitumane amia numi?” Kwini lalasu makanaelre la tupasalrivane iniane makanaelre, si lri papacai.

⁶⁵ La ikai ku laumawmase ku swangalruthu iniane, si tamenge ki macaini, la pwalrima iniane, si kivaga iniane, “Ala pelaelaa, laka aneane kai walrumai muswane?” Kudra latarakadrekadrenge la mialri bilibili, si camilrigi iniane.

Ku Pitiru ngiakawlrawlravane ki Yesu

⁶⁶ Sakamani kwidra, ku Pitiru asurwana ikai kalatadrane. La kainganai ku tangea ku ababai ka sasiakawlu ki abebeelengenga ki barakalai,

⁶⁷ la drele ki Pitiru sa idididiu, la lengethe iniane, si iya kai, “Mialrisu ka papapalra ki swa Nazarethe ka Yesu.”

⁶⁸ Ku Pitiru la kithungu iya kai, “Kainaku wathingale, kainaku pwalringalringau kwi kawrivarivasu lukamanemane.” Sa iya kwini la mubere mwa cucubungu kalatadrane. Sakamani kwidra la kuka.

⁶⁹ La kai tarathainu, kwini sasiakawlu ka ababai la dreelenga iniane, la kawrivana ki yathili acegecege ka laumawmase iya kai, “Kai lasu papapalra liniane!”

⁷⁰ Kai Pitiru la kithungwana. La kai tarathainu, ku la acegecege ithili ku umawmase la peelanga papia ki Pitiru kawriva, “Kaisu lri maka kithungu kaika papapalrali liniane iya, asi lwiyane mialrisu ka swa Galrilri!”

⁷¹ Ku Pitiru la pusu kiketekete iya kai, “Kainaku wathingale kwi iyaiya numi kwini umawmase! Alaiyasi kaika patengatengane kai taiyaneli, ku Twaumase lri pathavungu nakwane!”

⁷² Ikai kikai kwidra, ku kuka lakuka ku saka kingipusale; ku Pitiru ala ngulringau ku taiyane iniane ki Yesu, “Lu kaiyana kingipusale kuka, lri kingitulrulusu ngikawlrawlravane nakwane.” Ku Pitiru la kai beserenga si tubi.