Maruku 13 - Ngudradreadrekadhane Ka Sisiu 魯凱語聖經

Pakanaswala pelaela ku akamudane ku daane ki Twaumase

¹ Sa twalai ki daane ki Twaumase mulatadre ku Yesu, ku tangea ku situini amia kai iniane, “Sinsi, drela, kikai adravane kai lrenege, ala matisamaliane turamuru kai tatudaanane!”

² Ku Yesu la iya kai, “Kunumi siavava numi kikai lamatiasamali ka tatudaanane? Kai lalrenege kikai lri kiburuku patuelre, kadrwa ku navaevanga ku lrenege ku lrika sakamiyana ka raedrane.”

Amatikurwane si hakegai

³ Ku Yesu yakai lregelrege Ulrive, si nene papucucubungu ki daane ki Twaumase. Ku Pitiru, Yakubu, Yuhani si Anederiu la kibubuli kivaga iniane,

⁴ “Ala pelaela naiane, lri ngimia lwigane kilakikai? Kikai patuelre lu lri ngimianga lri ikai ku manemane ku sasakaladhane?”

⁵ Ku Yesu la pelaela liniane iya kai, “Kunumi dradreela, madha kilrilrilrigili ki umawmase.

⁶ Lri takaalra ku umawmase ku lri draedrangelre sinagane ku naganeli, si iya kai, ‘Amaniaku ku Kirisitu’ iya, lai ngwalai kwini si pamamama ki takaalra ku umawmase.

⁷ Madha ngwalalai ku kilalra numi ku makarururuburu ku adeethe si adaaili si kathathiburu. Kilakikai yai lri tara ka angimiane; ai kikai kaika sapelaelane ka wadarurunga kudra alikaiyane ku vai.

⁸ Ku taingeane ka minzuku lri makakaruburu ki maelane ka minzuku; ku taingeane ka kuni lai lri kikaruburu ki maelane ka kuni; ikai kidruanga lai lri ikai ku lingilingi si silravane. Kilakikai ku angimiane lri mararaamau lu pathagili kiangeange ki atulalakane ki tawbaliri.

⁹ “Kunumi dradreela, asi lwiyane ku palrapalra ku lri pwalra numiane, si baai putasaibaibangane; lalri ikai numi ki rarubwane ki swa Yuda kilrumai. Ngwalai nakwane, lri acegecege numi icucubungu ki tararathudu si talialalai, pasikai ki hukuingi akasi.

¹⁰ Ai kai hukuingi lri tara paswalana pelaela padaruru ki sanaka umawmase.

¹¹ Lu pwalra numiane kwini lalasu, si iluku numiane putasaibaibangane yai, madha paswalala kidredredreme kakalikalithi ku aiyane ku vaga, lu utakelanenga kamani kwidra, ku tapelaelane ki Twaumase ku manemane, kunumi avavaga ku manemane; asi lwiyane ku avavaga numi kaika vaga numi, Siri ka pangwakai numiane avavaga.

¹² Lukamaninga kwidra, ku umawmase lri kilangai ki betakane, si palraingi papacai liniane, ku tama lai lri mialri pia kai ki lalalake; ku lalalake lri kiecebe ki marudrawdrange, si palraingi papacai liniane.

¹³ La lri ngwalai nakwane, ku laumawmase lri kalisi numiane. Ai kudra maka kiadili patulrepenge ku umawmase lri tara kipalribulu.”

Maadrau ka amatikurwane

¹⁴ “Lri drele numi kudra ‘Matiavalracevace ka lri pakamudu ka lamanemane’ acegecege ikai ki nai kaika aikaiyaneini acegecege” (ku sialrigu tara pulringava ku pacugane kikai ki vaga). Lukamaninga kwidra, ku yakai Yuda, nai mubere kilepenge mulregelrege;

¹⁵ ku yakai cavalri, madha mulebelebe, la madha mudadaane malra sanaka manemanenga;

¹⁶ ku yakai umawma, la mialri madha mubalribalriu malra ku sapakabelengane ku laimai.

¹⁷ Ki kwini lavai, ku tawbaliri si pathuthuthwana ki lrulai ka tina lri kwalri!

¹⁸ Kunumi kitubia ki Twaumase ku kaika angimiane kilakikai ikai ki kalakecelrane.

¹⁹ Asi lwiyane kwini la amatikurwane ka vai yai twalai ku tabekacane kawmasane ki Twaumase pakeela kaikameane kadrwana ku miyaiya, lubibilrili lai kai lri ikainga.

²⁰ Alaiyasi ku Tamatama la aru tuedrekane kwini ki amatikurwane ka lavai, kadrwa ku umawmase ku lri dulru panianiake. Ai, lri ngwalai kudra ki nipilriane ka lakawkawluini, kwi lasu twaedrekanenga kwini lavai.

²¹ “Alaiyasi ikai ku umawmase ku amia kai numiane, ‘Drela, kai Kirisitu yakai kikai! Kai Kirisitu yakai kavai!’ Madha kipawtengatenga iniane.

²² Asi lwiyane kudra kaika patengane ka Kirisitu si kaika patengane ka yuginsia lri mutaluvaivai; kwini lalasu lai lri pia ku matiasamali ka awngane, si pakaelre ku dulru lini lrilrigili ki nipilriane ki Twaumase ka lakawkawlu.

²³ Kunumi dradreela! Paswalanga naku pelaela numiane patueelre ku lrika angimiane kilakikai.”

Akelane kwidra ki Lalake ki Umawmase

²⁴ “Kwini la amatikurwane ka lavai lu ngilribatenga kwidra, ku vai lri kadradrimiti, ku dramare lai kai ledranga,

²⁵ ku tariau lri twalai belenge mucilri, kai subelebelenge ku tangidarepane lai lri ngivelevele.

²⁶ Lu kelanga ku vai, ku Lalake ki Umawmase lri adrelane, si kisuete ku puku si lrigu lalri ngukai ki ememe mulebe.

²⁷ Kwini lasu lri sikawlu ki sasiakawlu belenge pamwa sanaka ininunga, lri patwalai ki talrawane kai kawmasane pakela ki talriwgane kai kawmasane, si sarubu ku pilrini ka laumawmase.”

Sabulrwane patwalai ki icizike ka angatu

²⁸ “Kunumi patwaladha ki icizike ka angatu kibulru ku sabulrwane. Lu rigarigi si puvasawnga ku ricingi, wathingale numi ala ka padethenga ki kaladralrangedrangane.

²⁹ Laka thadaalrane, lu drele numi kikai tangimiyaiyane patuelre lri thingale numi ala ka lri kelanga ku vai, yakainga ki lrawlrawdru.

³⁰ Kunumi pulringalringava, kai zidai kai ku laumawmase lu kaiyana pacai makanaelre, lri ngimia kikai patueelre.

³¹ Kai subelebelenge kai kawmasane lri kamudu kawlrau, ai kai vagali kai lri kamudu palralrawthu.”

Kudra vai kudra zikange kadrwa ku umawmase ku wathingale

³² “Ala kudra akelane ki vai si zikange, kadrwa ku umawmase ku wathingale; adravane ku sasiakawlu belenge kai wathingale, kai Lalake la mialri kai thingale, kathane ku Tama ka wathingale.

³³ Kunumi kipapawlringava, si kasimeameace, asi lwiyane kai numi wathingale kudra lu lrika amani lwigane ku akelane ku zikange.

³⁴ La mia kudra ki tangea ka umawmase ku lri mubabadhane, la baai sudralru ki lasasiakawlu ku tacekecekelane, la pavavala ki tangangea ku awngane, la pelaela ki tarakadrenge ki lrawlrawdru ku adradrelane ki lrawlrawdru.

³⁵ Lakamani kwidra, kunumi kasimeameaca kipapawlringalringau, asi lwiyane kainu wathingale lukamani ki inu ku zikange ku akelane ki tawki, alau miawaubu, alau kabiceacelrake, alau kaiyana ka malialiare, alau maka walrawnga.

³⁶ Alaiyasi pangitutuluku kela, ani kai drele lu apeceana numi.

³⁷ Kikai taiyaneli kawriva numiane la ka mialri ka taiyaneli ki laumawmase: Kunumi kipapawlringava!”