Maruku 10 - Ngudradreadrekadhane Ka Sisiu 魯凱語聖經

Sabulrwane patharukai ki piasadra ki taelrelre

¹ Ku Yesu la katwase kwini si mwa talikai ki swa Yuda, si talubalre kadravane Yuredange. Ku mapapangale la irubunga mwa iniane, la pangimia ku tapiapianeini bulru liniane.

² Yakai ku la swa Palrisai ku kaiyanganai mwa ki Yesu, kiasanu tulisilisi iniane, la kivaga iniane, “Ala pelaela naiane, kai hulriceta pinalraingane ki taelrelre ka sawvalai ku piasadra ki taelrelreini ka ababai?”

³ Ku Yesu la baalrelringa kivaga, “Ku drekase ki Musi tumana amia?”

⁴ Kwi lalasu la tubalre, “Ku Musi palraingi ki sawvalai lu pacase ku sapaisadrane, si la pisadra iniane.”

⁵ Ku Yesu la iya kai liniane, “Ku pacase ki Musi si baai numiane kikai taingeane ka padradrekase, amani sakakawlukulu kwi kidremedreme numi turamuru.

⁶ Ai satawpathagili, sa bekace kai kawmasane, ku Twaumase twaumawmase, yakai ku sawvalai, la ikai ku ababai;

⁷ lakamani ku umawmase lri kitukudha ki marudrawdrangeini, si maelre ki taelrelreini,

⁸ ku tadrusa ku umawmase avaevanga ka kinawmasane. Kudra ladrusa kaika tadrusanga ka umawmase, vaevanga ka kinawmasane.

⁹ Lakamani, ku pasudalepe paelre ki Twaumase, ku umawmase kai lri maka apawvagai.”

¹⁰ Kwi lalasu sa siwlringa mudaane, ku situini la kivaaganga patharukai kikai.

¹¹ Ku Yesu la pelaela liniane, “Sanaka sawvalai ku piasadra ki taelrelre, si la patiela, amani ku paswadringainga, pakasalivalrau ki taelrelreini;

¹² ku ababai lu katwase ki taelrelreini, si patiela, mialri ka swadringai.”

Ku Yesu swabulrubulru ki lavavalake

¹³ Yakai ku laumawmase ku waililuku ki lavavalake kainganai mwa ki Yesu, si kitubi ki Yesu ku asulrapaneini; ai ku lasitu maelaela kwini ki laumawmase.

¹⁴ Ku Yesu sadreele la kaliisi, si iya kai ki lasitu, “Bwala pakainganadha ki lavavalake mwakai nakwane, madha teletelenge liniane, asi lwiyane ku kawkawlu ki kuni ki Twaumase ala ngimiyaiya liniane.

¹⁵ Kunumi pulringava, sana kaika kiaparu lavavalake tarumara ku sarathudane ku puku ki Twaumase ku umawmase, lutuumane kai lri maka dulru akawkawlu iniane.”

¹⁶ Samia kwini kwi lasu la malra kebere ki lalavavalake, la nguvavaeva sulrape liniane, si subulrubulru liniane.

Pakakucingacingalre ki satacekecekelanane

¹⁷ Ku Yesu satau ikadadalranane, yakai ku tangea ku umawmase walailai kainganai, si pidruru icucubungu iniane, si kivaga iniane, “Makalecege ka sinsi, manemane ku apianeli ala dulru malra ku palralrawthu ka niake?”

¹⁸ Ku Yesu la kivaga iniane, “Asu makalecege iya nakwane? Kai paelre ki Twaumase, kadrwanga ku makalecege.

¹⁹ Lri tara ka wathingalesu kilakikai padradrekase, ‘Madha papacapacai ki umawmase; madha sudringai madha pasudringai; madha kupawpa; madha draedraedrangelre kawriva; madha lrilrilrigili; musakena ki marudrawdrangesu.’ ”

²⁰ Kwini lasu la tubalre, “Sinsi, kikai padradrekase patuelre singika lavavalakaku pangimianga paluludu.”

²¹ Ku Yesu la drele iniane, pasingikidremedreme kathalrai iniane, la iya kai, “Yakai kwini kaiyana ka pangimiasu ku taingeane, lu kilangadha ku tacekecekelanesu patueelre, la apavalavala baai ki matiakukuru, lri tara ikai ku tacekecekelanesu ikai subelebelenge; ala kainganadha tupapalra nakwane.”

²² Kwini lasu sa kilalra kikai vaga, la akabaalrithinga ku lringau, si kasalivaalrau kasuulringa katwase, asi lwiyane kwi lasu satacekecekelane turamuru.

²³ Ku Yesu la pangithalringulu drele ki lasitu, si iya kai liniane, “Ku sapaiswane ku umawmase nau akawkawlu ki kuni ki Twaumase lu iya ala makucingalre!”

²⁴ Ku lasitu la kasamali kikwini vagaini; ai ku Yesu la iyana kai, “Lavalake, nau akawkawlu ki kuni ki Twaumase lu iya ala makuciingalre!

²⁵ Ku sapaiswane ku umawmase nau akawkawlu ki kuni ki Twaumase lu iya, makuciacingalreana ki lrakeda lu ngulratuku ki maca ki inamai!”

²⁶ Kikai kwidra, ku lasitu la aru kasamali turamuru, si makitu makivagavaga, “Lwiyane kai, laika aneane ku lri maka dulru kipalribulu?”

²⁷ Ku Yesu la drele liniane, si iya kai, “Kai umawmase kai lri dulru, ai ku Twaumase kai lrika ngimiyaiya kwini; asi lwiyane ikai ki Twaumase, sanaka manemane wadulru patuelre.”

²⁸ Ku Pitiru la tarumara kawriva, “Drela, wacilringa nai patuelre si kainganai tupapalranga muswane.”

²⁹ Ku Yesu la iya kai liniane, “Unu, nau pudriadriingai pelaela numiane, sanaka pasiakai nakwane si ki hukuingi cilri ki daane, labetakane ka sawvalai, labetakane ka labaibai, tama si tina, lalalake, si laumawma,

³⁰ kai taikawmasananeini lri tara tarumaara ku makaakalra. Kwi lasu lri malra ku silrialribate ku daane, ku betakane, ku marudrawdrange, ku lalalake, si umawma, si lai lri kipadradresenge ku hakegai; ai ikai ki mwabalrithi ka kawmasane, kwi lasu lri malra ku palralrawthu ka niake.

³¹ Ai, kudra athamadalane, lri abiilrilinga; ala ku naabilrili, lai lri athamadalanenga.”

Saka kingitulrulu ki Yesu pakanaswala pelaela ku apacadhaneini

³² Kwini lalasu sa mudradha mu Yerusalrime ikadalranane kwidra, ku Yesu aswalala liniane. Ku kidremedreme ki lasitu la mukuludru; ku ladrumane ku papalra lini la mialri makitu mukulukuludru. Ku Yesu la peelanga malra puthili ki ta 12 ka lasitu, si pelaela liniane kwidra angimiane ikai ki kinawmasaneini lubibilrili.

³³ Amia kai, “Drela, kaiasasane lri katwaseta mudradha mu Yerusalrime. Kai Lalake ki Umawmase lai lri kikilangai baai ki marudrange ki barakalai si tarabulrubulru ki Sisiu; kwi lalasu lri tupasalrivane ku apapacadhane iniane, ala lri malra iniane baai patarumara ki sakamaelanane ka umawmase.

³⁴ Kwi lalasu lai lri tusinalrelreme sivavangane iniane, sungangalrai iniane, lrumai iniane, si papacai iniane; luka samakatulrulu ku vai, kwi lasu lri siela panianiake.”

Kitubi ki Yakubu si Yuhani

³⁵ Ku lalalake ki Zibidi ka Yakubu si Yuhani kainganai mwa ki Yesu si iya kai, “Sinsi, yakai ku vaeva ku akitubiane nai, ani tara palraaingi amia nai muswane.”

³⁶ Ku Yesu la kivaga, “Anitumane naiane amia numi nakwane?”

³⁷ Kwini lalasu la tubalre, “Lu nenengasu ikai ki lrigu ka taetalane, pataelreanga naiane muswane, ku tangea ani ikai ki tali vanalesu, ku tangea ani ikai ki tali virisu.”

³⁸ Ku Yesu la iya kai liniane, “Kainu wathingale lukamanemane ku kitubitubi numi. Ku lrika awngulaneli ku mapalili ku yakupwane, lri dulru numi ungulu? Ku lrika akipabanavaneli, lri dulru numi kipabanau?”

³⁹ Kwi lalasu la tubalre iya kai, “Lri dulru nai!”. Ku Yesu la iya kai, “Kudra lrika awngulaneli ku yakupwane, adravane maka ungulu numi, si ku akipabanavaneli, la maka kipabanau numi;

⁴⁰ ai aneane ku lri nene ikai ki virili si vanaleli iya, kainaku lri kamani ka wakelrete. Kikai la taneneane, ku pinasikaiyane ki Twaumase, lrika amani ku kiabaai patarumara.”

⁴¹ Kwini drumane ka tamangeale ka lasitu sa kilalra kikai, la kagirimucu ki Yakubu si Yuhani.

⁴² Lakamani, ku Yesu sarubu liniane pucucubungu iniane, si iya kai liniane, “Wathingale numi, kai kawmasane kwidra la magagemegeme niyane yakai ku puku lini marasikai kadrenge ki laumawmase, si kudra taramasasangililuku lamialri ikai ku puku lini kadrenge apadrekadrekase ki laumawmase.

⁴³ Ai, kai numi ka ngimiyaiya kikai. Ikai numiane ku nau ka sanianiangenga amia, lrika amaani kudra lri asasiakawlu numiane;

⁴⁴ lukaaneane ku nau atamatama amia, lri kamani kudra lrika sasiakawlu ki mapapangale.

⁴⁵ Asi lwiyane ku Lalake ki Umawmase kaika wakela kipasikai ki umawmase, pakai ku apasikaiyane ki umawmase kamani, si pakai ku apalribulane ki laumawmase la patarumara ku niakeini.”

Pawadringai ki mamukici ka Baretimause

⁴⁶ Kwini lalasu la kelanga Yeriku. Sa katwatwasenga Yeriku ku Yesu si lasituini si lamapapangale kikwidra, yakai ku tangea ku mamukici ka lalake ki Timause ka sia Baretimause, wanene ikai babiabila ki kadadalranane abababange ku akaneane.

⁴⁷ Kwini lasu sa kilalra ala ka swa Nazarethe ka Yesu, la tawtau iya kai, “Lalake ki Davidi ka Yesu, kakuruuaili!”

⁴⁸ Takaalra ku laumawmase ku maelaela iniane, si madha avavagavaga iya iniane. Ai kwini lasu la aru akwadrawlringa tawtau, “Lalake ki Davidi, kakuruuaili!”

⁴⁹ Ku Yesu la idrengere, si iya kai, “Bwala iya iniane.” Kwini lalasu la iya kai kwini ki mukimukici, “Kusu madha kidremedreme, ngidrakala, wadawdawlu muswane ka Yesu.”

⁵⁰ Kwini mamukici la makakaai cilri ku sapakabelengane ku laimai, si ituku, dadavace mucucubungu ki Yesu.

⁵¹ Ku Yesu la kivaga iniane, “Anitumane amiasu nakwane pasikai muswane?” Kwini lasu la tubalre, “Sinsi, nau dulru drele amiaku!”

⁵² Ku Yesu la iya kai, “Lu katwasanga, kwini salrwanesu pawadringainga muswane.” Kwini mamukici la makakaai dulru drele, la katwasenga tupapalra ki Yesu.