Maruku 1 - Ngudradreadrekadhane Ka Sisiu 魯凱語聖經

Tadindwane ki tarapabanau ka Yuhani

¹ Yesu Kirisitu ka Lalake ki Twaumase, ku hukuingini ku sapelaelane sapalribulane miyaiya kikai.

² Ku yuginsia ka Isaiya wapacase pikai ki hunguini iya kai: Ku Twaumase kawariva: Drela, lri sikawlaku ki sasiakawluli; lri aswalaala muswane si sudalradalrane ku kadalrananesu.

³ Ikai ubulane yakai ku watawtawtau ku umawmase: Padulrwa ku kadalranane ki Tamatama, la pudriadringai dringelrese ku angukaiyaneini!

⁴ Ku Yuhani la utaluvaivai ikai calragulragu, pabanabanau ki laumawmase, si pelaelaela, “Kunumi ngitatupela, si tarumara kipabanau, ku Twaumase lri pacepe ki pasalrivane numi.”

⁵ Ku laumawmase la twalai kidruanga Yuda si Yerusalrime kela mwa ki Yuhani. Kwi lalasu makitu ngipapelaela ku pasalrivane lini; ku Yuhani la ikai kadravane Yuredange pabanabanau liniane.

⁶ Ku Yuhani la siebele ku ubawbalane ku lrangici ki lrakeda, ku takilrisaisane la silakete ku lrangici; la kanekane ku apapawku si valu.

⁷ Kai lasu peaelaela, “Kwini bibibilrili nakwane kela sanianiange nakwane turamuru, adravane lu pidruraku si mukece iniane kadrwa ku tasudalepaneli.

⁸ Arakaiyaku kai acilai pabanau numiane, ai kwini lasu lri arakai ku Siri pabanau numiane.”

Takipabanavane si takikituthiathingalane ki Yesu

⁹ La kai tarathainu, la kela ku Yesu twalai Galrilri ka Nazarethe, ku Yuhani la ikai kwini kadravane Yuredange pabanau iniane.

¹⁰ Ku Yesu sa twalai ki aciacilai ki takipabanavane, la drele sa nguelebane ka subelebelenge, ku Siri la mia ki tavagu mulebe makakai ki kinawmasaneini.

¹¹ La twalai belenge ku lingau pulebe iya kai, “Amanisu ku kathalraili ka Lalakeli, madalamaku muswane.”

¹² Ku Siri la makakaai pakisamula ki Yesu mwa ubulane.

¹³ La ikai kwini maka masupatele ku vai, si kikituthiathingale ki Satange; la taelre ki lawaudriwdripi, ai yakai ku sasiakawlu belenge marasikai iniane.

Wadawlu ki tasupate ka taratukakange ku Yesu

¹⁴ Ku Yuhani sa kiemenge ikai takiememenganenga, ku Yesu la mwa Galrilri, pelaelaela ku hukuingi ki Twaumase.

¹⁵ La iya kai, “Mwatakelanenga ku vai, lri padalrunga si kela ku kuni ki Twaumase! Kunumi ngitatupela, si kipawtenga ki hukuingi.”

¹⁶ Ku Yesu la dadadavace tarababiabiabila ki baiyu Galrilri, la drele ku tadrusa ka taratukakange ka Simune si agini ka Anederiu yacengecenge ikai ki baiyu ararai tukakange.

¹⁷ Ku Yesu la iya kai liniane, “Bwala tupapalraili! Lanu kamaninga ku taratukakange ki umawmase.”

¹⁸ Kwi lalasu la makakaai cilri ku arai lini, si katwase tupapalranga ki Yesu.

¹⁹ La katwase kai mukuthainwane ku tadadavacane ki Yesu, la drele ku lalalake ki Zibidi ka Yakubu si agini ka Yuhani, kwi lalasu yabelenge ki varukuru pudriadriadringai ku arai.

²⁰ Ku Yesu sadawlu liniane, kwi lalasu la surunga ki tama lini si kudra mwalrawlrawlrau liniane pibelenge ki varukuru, si tupapalranga ki Yesu.

Tangea ka kiaikai ki Aidridringane

²¹ Kwini lalasu la kela cekele Kaperenawme; sa daruru ki Taisadrasadrane ka vai, la mwa rarubwane ki swa Yuda si bulru ki laumawmase.

²² Ku kialalra ku tabulrwane ki Yesu ku laumawmase makitwa kasamali turamuru, asi lwiyane ku tabulrwaneini mailuku ku puku, makakaela ki latarabulrubulru ki Sisiu.

²³ Kikai kwidra, ikai ki rarubwane ki swa Yuda yakai ku tangeea ku kiaikai ki aidridringane ku umawmase, kwi lasu la karaleale iya kai,

²⁴ “Swa Nazarethe ka Yesu, asu keela vangavangavange naiane? Wakelasu amudu naiane? Wathingalaku ala ka aneanesu; amanisu ku sanianiyangenga ka sasiakawlu ki Twaumase!”

²⁵ Ku Yesu la drekase ki aidridringane, “Icelreba, twaladha kai ki kinawmasane ki lasu katwase!”

²⁶ Kwini aidridringane la pakilringau paamama kwini ki lasu, la karaleale akwadrau, ala katwasenga kwini ki lasu.

²⁷ La makitu kasamali turamuru, si matetetenge iya kai, “Kikai aningimia kikai? Kaika kilalrananata kaika dreleananata ku ngimiyaiya kai! Kwi lasu kirimu ikai ku kingidri dulru drekase kwini ki aidridringane, si kilaalra iniane kwini aidridringane!”

²⁸ Lakamani, ku nagane ki Yesu la padaalru si kimapelaela salraelre ki ngwakakai ki swa tali Galrilri.

Wasulrau pawdringai ki lamacaeme ku Yesu

²⁹ Kwini lalasu sa katwasenga rarubwane ki swa Yuda, la mwa ki tai Simune si Anederiu ki daane lini; ku Yakubu si Yuhani la karedele mwa.

³⁰ Ku tina ki labaibai ki Simune la icengecenge kacaeme ki culwane, si apece itapeapecane; sakela ku Yesu, kwidra wacekecekeleini la pelaela ki Yesu ku tangimiane kwini caemaneini.

³¹ Ku Yesu la mwa drele kwini ki alisu, la taalrima iniane, si drakale iniane. Kwini culwane ki alisu la ngwalrane, si ngidrakale si pasudalru liniane.

³² Saka miauawbu, sa lriwlriwgu ku vai, la kela ku laumawmase maililuku kwidra la makaelaela ku caemane si lakiaikai ki aidridringane mwa ki Yesu;

³³ makanaelre ku sakatucekelane irubu icucubungu ki lrawlrawdru.

³⁴ La pawdringai ku Yesu kwidra ki lamacaeme si pakatwase kwidra ki laaidridringane. Kai palraingi pakawriva ki aidridringane, asi lwiyane ku aidridringane wathingale iniane ala ka aneane.

Yakai Galrilri dindu

³⁵ Sakakaiyane ki mialrealre, sa kaina kaliare, la ngidrakale ku Yesu, la mulatadre katwase ki daane, si mwa kwidra ki takakadrwane ki umawmase, la ikai kwini inulrinulri.

³⁶ Ku Simune si kwidra palraini la katwase silape iniane,

³⁷ sa kidringainga, la iya kai, “Makitwa silasilape nai muswane makanaelre.”

³⁸ Ku Yesu la kawriva, “Ila tamwa ki adeethe kikai ku cekele, kunaku mialri ka itara ka amwane kikwini dindu, asi lwiyane kikai ala amanilringa ku kelali ku pacugane.”

³⁹ Lakamani, ku Yesu la dadavace salraelre ki swa Galrilri sanaka ceekele, ikai ki lararubwane ki swa Yuda dindindu, si pakatwase ki laaidridringane.

Pawadringai ki maraibiu ka umawmase ku Yesu

⁴⁰ Yakai ku tangeea ku kiapucaemane ki raibiu kaiyanganai mucucubungu ki Yesu, la pidruru si kitubi iya kikai, “Sana palraingisu, lri dulrusu pakabula nakwane.”

⁴¹ La tukurwane ku Yesu, si taale ku alrima sulrape iniane, la iya kai, “Palraingaku, kusu kabulanga.”

⁴² Ku caemaneini la iyasasane katwase iniane, si kabulanga.

⁴³ Ku Yesu la makakaai pakatwase iniane, si pudriadriingai cunu, iya kai,

⁴⁴ “Madha pelaela ki naaneanenga; malradalrua mwa kidrele ki barakalai, lani kamani ka wadrele, ala singikai kudra tukakudhane ki Musi si patarumara ku sapatarumarane, tusapelaelane ki laumawmase ala ka mabulangasu.”

⁴⁵ Ai kikai lasu sa katwasenga, peaelaelalringa ki laumawmase, ku Yesu la kai pathingalenga lu mucekele, la ikaainga lrialringulu ki cekele; ai ku laumawmase sakamiya twalai kidruanga kainganai silape iniane.