Luka 5 - Ngudradreadrekadhane Ka Sisiu 魯凱語聖經

Ku Yesu wadawlu ku lrika situini

¹ Yakai saka kiningivalane, ku Yesu acegecege ikai babiabila ki baiyu Genisarete, kudra laumawmase la kela kalrungulrungu papia iniane, lri kilalalra iniane ku apelaelane ku vaga ki Twaumase.

² Kai lasu la drele ku drusa ku varukuru ku nipaisadrane ibabiabila ki baiyu, kudra taratukakange matwasenga ki varukuru, si ikai kameamealane sinasinau ku arai.

³ Ku Yesu la mubelenge ki varukuru ki Simune, si pelaela ki Simune drurudrura kai varukuru, maipadaidaidaili ki babiabila iya. Ku Yesu la nene, si sakai ki varukuru bulrubulru ki mapapangale.

⁴ Samaka bulrunga, la iya kai ki Simune, “Iluka kai varukuru, mwa ki takadravane ki acilai, kusu si papalrasu la aradha tukange.”

⁵ Ku Simune la iya kai, “Sinsi, paiyanga nai taleare tukange, la kakadrua ku malra nai ku navaevanga; ai kudra amiasu kikai, nau singikai ku taiyanesu!”

⁶ La arai kwini lalasu, la malra ku thathatha ku kange, kudra arai pasanu kapuricinga.

⁷ La kilriu dawlu kudra ki ngwakai ki vaeva ka varukuru ka papalra lini bwala paraluba naiane iya. Sa kelanga kwini lalasu, la pasuete ku kange kwini ki drusa ka varukuru, si pasanu muthenetheenenenga kwini varukuru.

⁸ Ku Simune Pitiru sadrelenga kai tangimiamiane, la pidruru icucubungu ki Yesu, si iya kai, “Tamatama, kidaila nakwane, kunaku yakai ku pasalrivaneli!”

⁹ Kai Pitiru si papalraini kikai tamalrane lini pasuete ki arai ku kange yai masamali turamuru.

¹⁰ Kai papalraini lalalake ki Zibidi ka Yakubu si Yuhani mialri kasamali turamuru. Ku Yesu la iya kai ki Simune, “Madha mukuludru, twalainga kaikameane, lri kamaningasu ku wamalranga ki umawmase.”

¹¹ Kwi lalasu la pakela babiabila kwini varukuru, la pisadra sanaka maneemanenga si katwase tupapalranga ki Yesu.

Ku Yesu pawadringai ki kiapucaemane ki raibiu ka umawmase

¹² Yakai saka kiningivalane, ku Yesu la ikai kudra ki vaeva ka cekele, ikai kwini yakai ku tangeea ku kiapucaemane ki raibiu palraelre ki kinawmasaneini. Kwini lasu sadrele ki Yesu, la pidruru guruthungane icucubungu iniane, si kitubi iya kai, “Tamatama, sana palraingisu, lri dulrusu pakabula nakwane!”

¹³ Ku Yesu la taale ku alrima sulrape iniane, la iya kai, “Palraingaku, kusu kabula!” Kudra raibiu kwini ki lasu la makakaai kawlrau si ngwalrane.

¹⁴ Ku Yesu la cunu iniane iya kai, “Madha pelaelaela sanaka aneeanenga ki kikai, malradalrua mwa kidrele ki barakalai, lani kamani ku wadrele muswane; ala singikai kudra tukakudhane ki Musi si patarumara ku sapatarumarane, si cubungu papia ki mapapangale pathingale ala ka mabulangasu.”

¹⁵ Ku nagane ki Yesu la aru kimatikai paswadrau. La kela ku tapaangale ku umawmase irubu, lri kilalra iniane lu bulru, si urikai ku akipawdringadhane ku lacaemane lini.

¹⁶ Ai ku Yesu matwase kisalrili liniane mwa takababitingane si inulrinulri.

Ku Yesu pawadringai ki malrunai ka umawmase

¹⁷ Yakai saka minakavalane, ku Yesu saicengecenge bulrubulru ki umawmase, yakai kudra la twalai tali Galrilri ki cacekele si twalai Yuda, Yerusalrime kela ka la swa Palrisai si tarabulrubulru ki hulrice mialri nene ikai thili. Ku puku ki Tamatama yakai tapalra ki Yesu, kai lasu ala dulru pawdringai ki macaeme.

¹⁸ Yakai ku tapia ka umawmase ku wakela mabulribulri ki waapece ikai ki tapeapecane ku tangea ka macaeme kalrunai, kiadremedreme ku apudaanane iniane, si picucubungu ki Yesu.

¹⁹ Ai, amani sa takalra turamuru ku umawmase, kwini lalasu la kai maka dulru mabulribulri iniane pudaane, ala bulri iniane pucavalri, si mwalibi, la patala tapeapecane surusuru pulebe, pakakai cucubungu ki Yesu.

²⁰ Ku Yesu la drele kudra salrwane lini, la kawriva kudra ki malrunai kacaeme ka umawmase iya kai, “Talragi, kwi pasalrivanesu kiapacepenga.”

²¹ Kwidra latarabulrubulru ki Sisiu si swa Palrisai la kangariangi makawrivariva iya kai, “Kikai umawmase kai aneane? Si kirimu puvaga ku ngikarakacanane ku vaga! Kathane ku Twaumase, aneane ku yakai ku puku dulru pacepe ki pasalrivane?”

²² Ku Yesu la thingale ku takidremedremane lini, la iya kai liniane, “Kwi kidremedreme numi anu iya kai kidremedreme?

²³ Saininu ku madwadwai lu kawrivane ki macaeme pelaela ‘Kiapacepenga kwi pasalrivanesu’ si ku ‘Ngidrakala dadavace’ iya?

²⁴ Lri pathingalaku numiane, kai Lalake ki Umawmase yakai ku puku pacepe ki pasalrivane.” La kawriva kwini ki malrunai iya kai, “Lri drekasaku muswane, ngidrakala, si malra kwini tapeapecanesu, la katwase mutavanane!”

²⁵ Kwini lasu la makakaai icucubungu ki laumawmase si ngidrakale, la malra kudra tapeapecaneini si katwase mutavanane, si drengedrengere ki Twaumase.

²⁶ La makitu kasamali makanaelre, suete ku usakenane si drengedrengere ki Twaumase iya kai, “Kaikameane wadrele nai kai matiasamali turamuru ku tangimiane!”

Ku Yesu wadawlu ki Lrivi

²⁷ Sangilribatenga kikai, ku Yesu la katwase mulatadre, la drele ku tangea ku tarakikaziluzilu ka umawmase ka sia Lrivi, wanene ikai ki takikaziluzilwane. Ku Yesu la iya kai iniane, “Bwala tupapalraili!”

²⁸ Ku Lrivi la ngidrakale, si sarare sanaka manemanenga, si tupapalranga ki Yesu.

²⁹ Ku Lrivi la ikai ki daaneini pasikai ki Yesu twaadrau pangiakaneane; la takaalra kudra latarakikaziluzilu si drumane ka laumawmase makitu kela kipaelre kikai ki tangiakanekaneanane.

³⁰ La ikai kudra la swa Palrisai si kwidra talikaikai lini ka tarabulrubulru ki Sisiu la kalisi ki situ ki Yesu iya kai, “Anu kirimu taelre kai ki latarakikaziluzilu si latangangangace ka umawmase kanekane si ungungulu?”

³¹ Ku Yesu la iya kai liniane, “Ku mwadringadringai ku umawmase kai lri murikai ki tarasulrasulrau, luka yakaai ku caemane ka umawmase lri murikaai.

³² Ku takelaneli ku pacugane kainaku pakai ku adawlane ki makalecege ka umawmase, pakai ku adawlane ki manganga ka umawmase ku angitatupelane.”

Patharukai ki walaisi

³³ Yakai ku umawmase ku amia kai ki Yesu, “Kai lasitu ki Yuhani talailaisane inulrinulri, kai lasitu ki swa Palrisai la mialri lini, kathane kai lasitusu ka wakane waungulu.”

³⁴ Ku Yesu la iya kai, “Kudra marudrarudrange ku sawvalai lu ikaiyana ki ngiakanekaneane, lri dulrusu laisa iya kwidra ki wakela kiraragai ka labadhabadha? Kaidu lri maka piya!

³⁵ Ai lri kela kwini vai, kwini marudrarudrange ka sawvalai lri twalai liniane kiiluku, ala kikwidra kwini lalasu ala lri makitu laisinga.”

³⁶ Ku Yesu la kawrivanga ku taingeane ku pathalrilriku, “Kadrwa ku umawmase ku wapurici ku bavane ku laimai, si malra kwini puricini ka makalrilau si cakupu pwa ki supilri ka laimai; alaiyasi pia kwini, kwini bavane ka laimai mapuricinga, kwini nipuricane ka bavane ka laimai lai kai maka dulru mamwamwa kwini ki supilri ka laimai.

³⁷ Laka kadrwa ku umawmase ku wamalra ku bavane ka bava; si pasaela pwa ki supilri ka lrangici ka tabavane, lu pia kikai, kwini bavane ka bava lri pakabulrutu kwini ki supilri ka lrangici ka tabavane, ku bava lai lri mucale, adravane kwini tabavane ka lrangici lai kalisi.

³⁸ Kudra bavane ka bava tara pasaela madu pwa ki bavane ka lrangici ka tabavane.

³⁹ Kadrwa ku umawmase ku lu maka ungulunga ku nawladhane ka bava, la apiungulwana ku bavane ka bava, lri tara kawriva mathaithariringa ku nawladhane ka bava.”