Luka 4 - Ngudradreadrekadhane Ka Sisiu 魯凱語聖經

Kiakikituthiathingale ku Yesu

¹ Ku Yesu twalai kadravane Yuredange kainganai, la kisuete ki Siri. Ku Siri la arake iniane mwa ubulane,

² la ikai kwini maka masupatele ku vai, si kikituthiathingale ki Akema. Ikai kwini ki vai kwidra, kai lasu kadrwa ku manemanemane ku kaneini, sa tarathanga kwini ku vai, la kasilrawnga kai lasu.

³ Ku Akema la iya kai iniane, “Alaiyasi ka amanisu ku Lalake ki Twaumase, drekasa kai ki lrenege lani apange!”

⁴ Ku Yesu la tubalre iya kai, “Ku Sisiu amia kai, ‘Ku panianianiaketa ka umawmase kaika asatalwane lakakathane ki akaneane.’ ”

⁵ Ku Akema la iluku iniane mwa kudra ki abeelenge ku taikaiyane, la yasasaane padrele kai kawmasane sanaka kuni, si iya kai iniane,

^6-7 “Sana sukubusu nakwane, lri alraku kai sanaka puku si akaesadhane baai muswane patuelre; asi lwiyane kikai sanaka maneemane wabaainga nakwane, nau baai ki aneane lu iyaku, lri baadhaku ki aneane.”

⁸ Ku Yesu la iya kai, “Ku Sisiu amia kai, ‘Sukuba ki Tamatama, ka Twaumasesu, savaeva musakene pasikai iniane!’ ”

⁹ Ku Akema la iilukunga ki Yesu mwa Yerusalrime, si paacegecege iniane ikai talrugulrugane ki abebeelengenga ka daane ki Twaumase, si iya kai iniane, “Alaiyasi ka Lalakesu ki Twaumase, twaladha kai ituku mulebe;

¹⁰ asi lwiyane ku Sisiu amia kai, ‘Ku Twaumase lri pelaela ki sasiakawluini belenge lai palakebe muswane’;

¹¹ la iyanga kai, ‘Lalri arakai ku alrima lini tapai muswane, ku kaika aupungupungane ki lrenege kwi drapalesu si kadula.’ ”

¹² Ku Yesu la tubalre iya kai, “Ku Sisiu amia kai, ‘Madha kituthiathiathingale ki Tamatama, ka Twaumasesu.’ ”

¹³ Ku Akema la arakainga patuelre ku makaelaela ku sakituthiathingalane, la katwaseana padalru kidaili ki Yesu.

Pathagili ku Yesu ikai Galrilri dindu

¹⁴ Ku Yesu la siwlri mwa Galrilri; ku puku ki Siri yakai iniane tapalra. Ku naganeini la kimapelaelaela pasalraelrelre ikai talikai kwini.

¹⁵ Kai lasu la ikai ki lararubwane ki swa Yuda bulrubulru ki laumawmase, ku laumawmase la makitu drengedrengere iniane.

Saikai Nazarethe ku Yesu kiakalrase

¹⁶ Ku Yesu wakela mu Nazarethe ka taikaiyaneini kadrau. Saka Taisadrasadrane ka vai, la katwase mwa ki rarubwane ki swa Yuda. La acegecege kai lasu lri silrigu ku Sisiu,

¹⁷ la ikai ku wamalra ku Isaiya ka hungu ki yuginsia si baai iniane. La paipai kai lasu kwini hungu, la kidringai kudra taluvale ku amia kikai ku tapacasane:

¹⁸ Ku Ri ki Tamatama mwalebe mwa nakwane, asi lwiyane wapilri nakwane, ku lrika apapianeli ki matiakukuru ka umawmase pelaela ku mathariri ka vaga. Siakawlu nakwane ku apelaelane: Ku kiaravase, lri kimukerenge; ku mabuti, lri tarumara ku ledra; ku kiatusinalremelreme, lri kipangilralraingi;

¹⁹ si pelaela kudra caili ku akelane ki Tamatama palribulu ki laumawmaseini.

²⁰ Ku Yesu la balrulu kwini hungu, si sawlri baai kwidra ki taraparaluralubu ikai rarubwane ki swa Yuda, ala nene. Kudra yakai rarubwane ki swa Yuda makanaelre sanaka umawmase la leengethe iniane,

²¹ kwini lasu la iya kai liniane, “Kaikameane, kikai kilalra numi kikai pacase ngiamianga.”

²² Ku mapapangale wathingale iniane turamuru, ku taiyaneini kawriva si velevele ki umawmase la kasamali turamuru. Kwi lalasu la iya kai, “Kikai lasu kaika amani kudra lalake ki Yusepe?”

²³ Ku Yesu la pelaela liniane, “Ngiamialringa, kunumi lri arakai numi kikai vaga kawriva nakwane, ‘Tarasulrasulrau, ngipapawdringadha kamani!’ Lai lri iyana numi kai nakwane, ‘Ku takilalrane nai ku tapianesu ikai Kaperenawme, nai mialrisu pia ikai ki cekelesu!’ ”

²⁴ Ku Yesu la iyana kai, “Nau pelaela pudriadriingai numiane, ku yuginsia ikai ki cekeleini yai kadrwana ku kiakiraragai.

²⁵ Ani kilalra, kudra saka zidai ki yuginsia ka Ilria, ikai ki swa Iseraylri tengane ka takaalra ku walibakane. Kwidra, taratulru ka caili si apararamau kai udawdale, salraelre kai kawmasane ka kalasilravane.

²⁶ Ai ku Ilria kai kiasikawlu katwase silape ki natangeanga, matwase kamani mu Sidune, mwa Zarepathe kwidra ki tangea ka walibakane.

²⁷ Saka zidai ki yuginsia ka Ilrisa, ikai ki swa Iseraylri takalra ku kiapucaemane ki raibiu, ai kathane ku swa Siria ka Naimange, kadrwa ku natangeanga ku kiapakabula.”

²⁸ Sa kilalra kikai vaga, kudra yakai rarubwane ki swa Yuda ku laumawmase swaete ki tuku ku girimucane.

²⁹ La ngidrakale makanaelre, si alra bilibili iniane pwa latadre ki cekele, iluku iniane mwa ki tukadrane (kwi lalasu twacekele ikai lregelrege), la lri lrudrulu iniane pulebe.

³⁰ Ai ku Yesu la pakaduai twalai kwini ki laumawmase katwase mulatadre.

Tangea ka kiaikai ki aidridringane ka umawmase

³¹ Ku Yesu la mwa tali Galrilri kudra ki Kaperenawme ka cekele. Saka Taisadrasadrane ka vai, la ikai kwini bulrubulru ki umawmase.

³² Ku kialalra ku tabulrwaneini ku laumawmase makitwa kasamali turamuru, asi lwiyane ku vagaini kiasuteane ku puku.

³³ Ikai rarubwane ki swa Yuda, yakai ku tangeea ku kiaikai ki aidridringane ku umawmase, la akwadradrau karaleale,

³⁴ “Swa Nazarethe ka Yesu, asu keela vangavangavange naiane? Wakelasu amudu naiane? Wathingalaku ala ka aneanesu; amanisu ku sanianiyangenga ka sasiakawlu ki Twaumase!”

³⁵ Ku Yesu la drekase kwini ki aidridringane iya kai, “Icelreba, twaladha kai ki kinawmasane ki lasu katwase!” Kwini aidridringane la picucubungu ki laumawmase patubakebake kwini ki lasu, ala twalai kwini ki lasu katwase, si kadrwa ku takabebetethane kwini ki lasu.

³⁶ La makitu kasamali turamuru, si matetetenge iya kai, “Kikai laka manemane ku pacugane? Kikai umawmase kirimu ikai ku kingidri si puku drekase kwini ki aidridringane, si kirimu katwase kwini aidridringane!”

³⁷ Lakamani ku nagane ki Yesu kimapelaela salraelre ki swa talikai kwini.

Ku Yesu pawadringai ki takalra ku macaeme ka laumawmase

³⁸ Ku Yesu sa katwasenga rarubwane ki swa Yuda ki swa Yuda, mwa ki daane ki Simune. Ku tina ki labaibai ki Simune laka macaeme, kaculu turamuru; kwini lalasu la kitubi ki Yesu ku apawdringadhane.

³⁹ Ku Yesu la mwa drele kwini ki alisu, si acegecege ikai thili iniane, la kaelaelathe kwini ki culwane ka caemane, kwini culwane la ngwalrane. Kwi alisu la makakaai ngidrakale, si pasudalru liniane.

⁴⁰ Sa lriwlriwgu ku vai, la takaalra kudra la makaelaela ku caemane ka laumawmase kiaililuku ki laretesane kela padrele ki Yesu; ku Yesu la nguvavaeva pasikai liniane ansu, si pawdringai liniane.

⁴¹ La ikaiyana ku aidridringane ku twalai ki laumawmase katwase, si tawtau iya kai, “Kusu Lalakesu ki Twaumase!” Ku Yesu la kaelaelathe liniane, kai palraingi pakawriva liniane, asi lwiyane kikai lalasu wathingale iniane ala ka Kirisitu.

Ku Yesu yakai rarubwane ki swa Yuda dindindu

⁴² Sa kalialiare, ku Yesu la mulatadre ki cekele si mwa kwidra ki takakadrwane ki umawmase. Ku laumawmase la mwa kidruanga silape iniane, sa kidringainga, la kidremedreme ku waruthuku iniane, ku kaika akatwasaneini.

⁴³ Ai ku Yesu kawriva liniane, “Kunaku mialri ka itara ka amwaneli ki drumane ka cekele si pelaelaela ku patharukai ku puku ki Twaumase ka hukuingi, asi lwiyane kikai ala amanilringa ku kisikawluli kela pasikai kikai awngane.”

⁴⁴ Lakamani, ku Yesu salraelre Yuda, ikai ki lararubwane ki swa Yuda dindindu.