Luka 3 - Ngudradreadrekadhane Ka Sisiu 魯凱語聖經

Tadindwane ki tarapabanau ka Yuhani

¹ Ku tinuhika ki swa Ruma ka Tibiriu saka tara 15 ka caili ku takicapilane, ku Puntiu Pilatu laka mabelenge ki swa Yuda, ku Hirudi laka talialalai ki swa Galrilri, ku betakaneini ka Pilripi laka talialalai ki swa Ituria si Turakuniti, ku Lisania laka talialalai ki swa Abilene,

² ku Anase si Kayapa laka abebeelengenga ki barakalai. Ki kwidra, ku Twaumase peaelaela ku vaga ki yakai ubulane ka Yuhani ka lalake ki Zakaria.

³ Ku Yuhani la dadavace salraelrelre talikai kadravane Yuredange pelaelaela iya kai, “Kunumi ngitatupela, si tarumara kipabanau, ku Twaumase lri pacepe ki pasalrivane numi.”

⁴ Maru amaninga ku pinacasane pikai ki hungu ki yuginsia ka Isaiya iya kai: Ikai ubulane yakai ku umawmase ku watawtawtau iya kai: Pasikaiya ki Tamatama padulru tupudriadringai ku kadalrananeini, tupudriadringadha dringelrese ku angukakaiyaneini dadavace ku kadalranane.

⁵ Ku sanaka lregelrege si valrwalru aselrepane; ku maadrau si tikiane ka lregelrege aparamaramavane sadrarate parwalebe. Ku kakilrukilrungane ka kadalranane apakadringelresane; ku kai maramaramau ka kadadalranane alrane pakadratatane.

⁶ Sanaka umawmase lri drele ku sapalribulane ki Twaumase.

⁷ Ku laumawmase madrikidrikidrikisi, kainganai lri tarumara ku akipabanavane ki Yuhani. Ku Yuhani amia kai liniane, “Kunumi ka lasiduduku ka sulrau! Ku asaibangane ki Twaumase lri padaalrunga si kela, kunumi yai lri dulru nai ubere amiamia numi?

⁸ Arakaiya ku kakwakudhane numi patuthingale ala ka ngiatatupelanga numi. Madha kirimurimu cucungulane nai ki Aberahame lri dulru nai ubere ki akisaibangane iyaiya. Nau pelaela numiane, ku Twaumase lri dulru malra kikai lalrenege si pasikai ki Aberahame bekace tulagagane!

⁹ Ku kumugu nisararanenga pikai ki tangadrane ki angatu, sana kai pumadru ku mathariri ka madru ku angatu lri kikumugu patueelre, si cilri pwa ki apwi.”

¹⁰ Ku mapapangale la kivaga iniane, “Lumia kikai, kunai lai tumane nai?”

¹¹ Ku Yuhani la tubalre iya kai, “Ku sadrusa ku sapakadriadringane ka laimai, vala pakavaeva kwidra ki pakakadrwa; ku satalekane, mialria pia kikai.”

¹² La ikai kwidra latarakikaziluzilu mialri kela kipabanau; kwini lalasu la kivaga ki Yuhani iya kai, “Sinsi, kunai lri tumane nai?”

¹³ Kai lasu la pelaela liniane, “Madha malramalra palribate kwidra ki nikelretanenga ku kazilu.”

¹⁴ La ikai kudra lakwapingi mialri kela kivaga iniane, “Kunai yai lai lri tumane nai?” Kwi lasu la iya kai liniane, “Madha malramalra ku paisu panguvuutha pangulrulrucuku; tukelreta ku tarumaramara numi ku taleke si paisu.”

¹⁵ Ku laumawmase la aru kadrau ku sasiadradrama lini, si makitu kidremedreme iya kai, kai Yuhani yai alasi kamaani kudra Kirisitu iya.

¹⁶ Lakamani ku pelaela ki Yuhani liniane, “Arakaiyaku ku acilai pabanau numiane; ai, yakai ku tangea ku sapupukwane nakwane ku lri kela, adravane nau pasikai iniane mukece iyaku, kainaku swadalepe. Lri arakai ku Siri si apwi pasikai numiane pabanau.

¹⁷ Kwi lasu waecenge ku balraku, si lri tapusu ki taleke, si pudrawsulane ku mugi; kudra lrapi, lai lri arakai ku kai maedredrepe ku apwi si lama.”

¹⁸ Ku Yuhani papia ki mapapangale pelaelaela ku hukuingi, arakai ku taikalrane si ka makaelaela ku sapasapukwanane liniane.

¹⁹ Ai ku Yuhani maelaelathe ki Hirudi ka talialalai, asi lwiyane ku Hirudi siataelrelre ki Hirudia ka labaibai ki agini, si la pia ku makaalra ku malisi ka kakudhane.

²⁰ Sakabilrilane la pia ku taingeane ku pakilrialringau ku tangilisianane, amani kudra waemenge ki Yuhani putaememengane.

Ku Yesu kiapabanau

²¹ Kudra laumawmase makitwa kipabanawnga, ku Yesu la mialri kela kipabanau. Sa inulrinulri, la nguelebane subelebelenge,

²² ku Siri la mulebe makakai ki kinawmasaneini, mia ki tavagu. La ikai ku lingau ku mwalebe iya kai, “Kusu yai amanisu ku kathalraili ka Lalake, madalamaku muswane.”

Tamasakaikaiyane ki cucungulane ki Yesu

²³ Ku Yesu sapathagili dindu yai, taramatulrulunga ku cailini. Ku tadrelane ki umawmase, kai lasu lalake ki Yusepe, kai Yusepe lalake ki Hili,

²⁴ kai Hili lalake ki Mathate, kai Mathate lalake ki Lrivi, kai Lrivi lalake ki Meleki, kai Meleki lalake ki Yanai, kai Yanai lalake ki Yusepe,

²⁵ kai Yusepe lalake ki Matathia, kai Matathia lalake ki Amuse, kai Amuse lalake ki Nahumu, kai Nahumu lalake ki Iseli, kai Iseli lalake ki Nagai,

²⁶ kai Nagai lalake ki Mathe, kai Mathe lalake ki Matathia, kai Matathia lalake ki Simine, kai Simine lalake ki Yuseke, kai Yuseke lalake ki Yeda,

²⁷ kai Yeda lalake ki Yuanane. Kai Yuanane lalake ki Risa, kai Risa lalake ki Zerubabele, kai Zerubabele lalake ki Saletile, kai Saletile lalake ki Niri.

²⁸ Kai Niri lalake ki Meleki, kai Meleki lalake ki Adi, kai Adi lalake ki Kusame, kai Kusame lalake ki Ilemadame, kai Ilemadame lalake ki Ire,

²⁹ kai Ire lalake ki Yesua. Kai Yesua lalake ki Ilriezere, kai Ilriezere lalake ki Yurime, kai Yurime lalake ki Mathate, kai Mathate lalake ki Lrivi.

³⁰ Kai Lrivi lalake ki Simiune, kai Simiune lalake ki Yuda, kai Yuda lalake ki Yusepe, kai Yusepe lalake ki Yuname, kai Yuname lalake ki Iliakime.

³¹ Kai Iliakime lalake ki Milia, kai Milia lalake ki Mena, kai Mena lalake ki Matatha, kai Matatha lalake ki Nathange, kai Nathange lalake ki Davidi.

³² Kai Davidi lalake ki Yesi, kai Yesi lalake ki Ubide, kai Ubide lalake ki Buaze, kai Buaze lalake ki Salemuni, kai Salemuni lalake ki Nahasunge.

³³ Kai Nahasunge lalake ki Aminadabe, kai Aminadabe lalake ki Ademini, kai Ademini lalake ki Aruni, kai Aruni lalake ki Hezerunge, kai Hezerunge lalake ki Pereze, kai Pereze lalake ki Yuda,

³⁴ kai Yuda lalake ki Yakubu, kai Yakubu lalake ki Isake, kai Isake lalake ki Aberahame, kai Aberahame lalake ki Tera, kai Tera lalake ki Nahure,

³⁵ kai Nahure lalake ki Seruge, kai Seruge lalake ki Riu, kai Riu lalake ki Pelege, kai Pelege lalake ki Ibere, kai Ibere lalake ki Sala,

³⁶ kai Sala lalake ki Kenane, kai Kenane lalake ki Arepakesade, kai Arepakesade lalake ki Seme, kai Seme lalake ki Nua, kai Nua lalake ki Lameke,

³⁷ kai Lameke lalake ki Methusela, kai Methusela lalake ki Inuke, kai Inuke lalake ki Yarede, kai Yarede lalake ki Mahalalile, kai Mahalalile lalake ki Kenane,

³⁸ kai Kenane lalake ki Inuse, kai Inuse lalake ki Sethe, kai Sethe lalake ki Adame, kai Adame lalake ki Twaumase.