Luka 24 - Ngudradreadrekadhane Ka Sisiu 魯凱語聖經

Siaela ku Yesu

¹ Kudra saka niciwbi, sa pathagili ledra ka mialrealre, kwini lamaliali wailuku kudra padulru lini ku sapasangulrelremane si mwa tadralredralrekane.

² Kai lalisu la drele kwini lrenege ka ngiabalrutainga twalai ki lrawlrawdru ki balriu,

³ la katwase mwadringi ki balriu, ai kai wadrele ku kinawmasane ki Tamatama ka Yesu.

⁴ Sa icengecenge thekelrane ku kidremedremedreme yai, la kirimu ikai ku tadrusa ku waleedra ku laimai ku umawmase acegecege ithili liniane;

⁵ kwini lalisu la ngituluku mukuludru turamuru, la pidruru guruthungane ikai daedae. Kwini tadrusa ka umawmase la iya kai liniane, “Anu ikai ki wapacai ki umawmase silasilape ku panianiake ka umawmase?

⁶ Kwi lasu kai yakainga kai; siaelanga panianiake! Ngulringava kudra sa ikai Galrilri kudra pelaelaini numiane ku vaga; amia kai,

⁷ ‘Kai Lalake ki Umawmase lri tara kibaai patarumara pikai ki alrima ki pasalrisalriu ka umawmase, si kikedrekedre piziwzika, luka samakatulrulu lai lri sielane.’ ”

⁸ Kikai lalisu ala ngulringau ku vaga ki Yesu,

⁹ la twalai kwini ki tadralredralrekane katwase, si kudra drele lini patuelre la pelaela kwini ki ta 11 ka situ si drumane ka umawmase.

¹⁰ Kudra papia ki lanisikawlane pelaela kilakikai patuelre ka lalabaibai, yakai ku swa Magedaleni ka Malria, Yuana, tina ki Yakubu ka Malria, si kudra drumane ka labaibai.

¹¹ Ai kwini lanisikawlane lau pakeakeakelrau kikai lalisu kawriva la iya, kai kipawtenga kwini vaga lini.

¹² Ai ku Pitiru ngiadrakale, si katwase lailai mwa tadralredralrekane, la pangu lukwane lili kwini ki balriu, la drele ku lalasare ka kaimadhane sikakathane, kadrwa ku drumane. Ala katwase kwini lasu siwlri, la kasamali turamuru kwini tangimiane.

Yakai Imause kadadalranane

¹³ Ivaivaai kwini, yakai ku tadrusa kwini ki lasitu ku lri mwa ki vaeva ka cekele. Kikai cekele sia Imause, ku adailane Yerusalrime lri ikai kau 11 ka kunlri.

¹⁴ Kai lamalala tarakadalranane mapapelaelaela kikai tangimiamiane patuelre.

¹⁵ Sa icengecenge makakawrivariva, ku Yesu la mwa deethe liniane, si karedededele liniane katwase.

¹⁶ Kai lamalala la drele iniane, ai kai wathingale iniane.

¹⁷ Ku Yesu la kivaga liniane, “Kai takudadadavace numi, si takumapapelaelaela patharwakai ki manemane?” La idrengere acegecege kwini lamalala, si kwaalri kudra kidremedreme lini.

¹⁸ Kudra tangea ka sia Keliwpa, la kivaga ki Yesu, “Bekacesu ikai ki swa Yerusalrime ka umawmase, ka kathaanenga ku kai wathingale kai ki minakapialane ku takipadradresengane ikai kwini lukamanemane?”

¹⁹ Ku Yesu la iya kai, “Lakamanemane?” La tubalre kwini lalasu, “Amani kudra patharwakai ki swa Nazarethe ka Yesu! Yuginsia kwini lasu, ikai cucubungu ki Twaumase si umawmase, lu kawriva lu twatumane sapukwane turamuru;

²⁰ kudra marudrange ki barakalai nai si latabebelenge la malra iniane tu lri kipapacai, si malra iniane pakedrekedre pwa ki ziwzika.

²¹ Kunai nasiadrama nai iniane, ka amani kai lasu kudra lri kela si palribulu ki swa Iseraylri iya! La kai ngimiya kikai sikakathane, kikai ku tangimiane makatulrulunga.

²² Ikai naiane yakai ku tapia ku lalabaibai ku pakasamaimali naiane, kikai lalisu ngwalalakese mutadralredralrekane,

²³ lakai drele ku kinawmasaneini. Kikai lalisu la kela pelaela iya kai, wadrele nai ki sasiakawlu ki Twaumase, ku sasiakawlu ki Twaumase la pelaela liniane, ku Yesu siaelanga panianiake iya.

²⁴ Kunai la ikai ku wamwa tadralredralrekane drele, ku tadrelane lini la mararaamau ku taiyane kikai ki lalisu patuelre, ai kai nai wadrele iniane.”

²⁵ Ala kirimu ku Yesu pelaela liniane iya kai, “Kunumi ala makulrungu numi! Patharukai ku tapuvagane ki yuginsia ku vaga, anu ngithaanga mia kikai pakakucingalre turamuru kasalru?

²⁶ Ku Kirisitu kaika lri tara ngilribate kikai patuelre ala lri dulru mwa ki kalrigwane?”

²⁷ Ala kirimu, kwi lasu la patwalai kudra ki pacase ki Musi si yuginsia, pathagili papia liniane palalrwai kai Sisiu sanaka pinatharukaiyane iniane patuelre ku nipacasane.

²⁸ Kikai lalasu la ka wadethenga kudra amwane lini ku cekele, ai ku Yesu miakau kiasanu pacuungulwana ku kadalrananeini,

²⁹ ai kikai lalasu la ruthuku iniane si iya kai, “Walriwgunga ka vai, la lri kadradrimitinga kai subelebelenge, ala taelreanga naiane sulai!” Ku Yesu la mudaane, si lri taelre liniane sulai.

³⁰ Sa nenenga kikai lalasu si lri kane ku aga, ku Yesu wamalra kudra pange, si kiaseasene ki Twaumase, ala apapipithingi kwini pange, si baai liniane.

³¹ Kudra maca lini ala kirimu ledra, si ala tau patakulringau thingale iniane, ai ku Yesu kiarimu kawlrau kakadrwa.

³² La maiya kai kikai lamalala, “Sa ikadadalrananeta si kawrivariva mitane kikai lasu palalrwalrwai ku Sisiu, kudra kidremedremeta kaika mararaamau ki apwi kudaladalai?”

³³ Kwini lamalala la makakaai ngidrakale, si katwase siwlri mu Yerusalrime. Ikai kwini, kikai lamalala la drele kwini ki ta 11 ka situ si kudra drumane ka laumawmase yakai taelre irurubu,

³⁴ si icengeecenge iya kai, “Ku Tamatama patengatengane ka siaelanenga panianiake; si kidrelenga ki Simune!”

³⁵ Kwini tadrusa kudra tamadredrelane lini ikai kadadalranane, si kudra tangimiane sa apapipipithingi ku Tamatama ku pange, kikai lamalala kudra takirimwane patakulringau thingale iniane, peaelaelanga liniane makanaelre.

Ku Yesu adrelane ki lasitu

³⁶ Ala kudra sa icengecenge makawriariariva kilakikai, ala kirimu, ku Tamatama ngiakakamani acegecege ikai liniane, si iya kai liniane, “Kunumi kasulivalivata!”

³⁷ Kwini lalasu la kathathiburu si manugiligili, lau wadrele nai ku galrale la iya.

³⁸ Ku Yesu la iya kai liniane, “Anu kavangavange? Anu kalrikilriki?

³⁹ Drela kai alrimali kai drapaleli! Amaniaku, kaika palrapalra! Bwala sulrapaili, lri thingale numi; kai galrale kadrwa ku beate, kadrwa ku culrale, kunumi drela, kunaku yakai.”

⁴⁰ La iya kwini pelaela, si padrele liniane kwini alrima si drapaleini.

⁴¹ Kikai lalasu la kaiyana masalru, ai ngiatuluku turamuru ki sakiararagai. Ku Yesu la kivaga liniane, “Kunumi ikai kai yakai ku manemane ku akaneane?”

⁴² Kai lalasu la malra ku niakamane ku kange si baai iniane.

⁴³ La alra tarumara, si kane icucubungu liniane kikai lasu.

⁴⁴ Ala iya kai liniane ku Yesu, “Kikai sanaka maneemanenga patuelre amani kudra sa taelreaku numiane ku pelaelaelali numiane: Kudra hulrice ki Musi, hungu ki yuginsia, si Lasenai kudra pelaelaela patharukai nakwane sanaka manemane lri tara ngimia.”

⁴⁵ Ala muelebe ki lrigilane ki kidremedreme lini, si ala pulringalringau ku vaga ki Twaumase kikai lalasu,

⁴⁶ la iyanga kai liniane, “Nipacasane ikai ki Sisiu: Lri kipamatikuru ku Kirisitu, luka samakatulrulu ku vai lai sielane panianiake twalai ki wapacai.

⁴⁷ Kunumi lri pangukai numi ku naganeini, si pelaelaela paswadrau kudra angitatupelane si akipacepane ku pasalrivane ka vaga ki Twaumase, twalai Yerusalrime pelaela si pasalraelre ki sanaka kuni.

⁴⁸ Kunumi amani numi kudra lri akasi pasikai kilakikai.

⁴⁹ Lri ngikakamaniaku malra ku palraingi ki Ama patarumara numiane; kunumi lri ikai numi ki cekele mukalavalava, pakela kudra takelane ku puku twalai subelebelenge mulebe mwa numiane.”

Ku Yesu kiamalramalra pusubelebelenge

⁵⁰ La pacungulu, ku Yesu mailuku liniane mulatadre ki cekele, katwase mwa Bithani. Saikai kwini, ku Yesu la ciliki ku alrima si subulrubulru liniane.

⁵¹ Sa icengecenge subulrubulrubulru liniane ku Yesu matwasenga kidaili liniane, kiamalramalra katwase musubelebelenge.

⁵² Kwini lalasu la sukubu iniane, si sueteane kudra sialribate ku sakiararagai ki kidremedreme si siwlri mu Yerusalrime,

⁵³ laka taikaikaiyane ki daane ki Twaumase senasenai drengedrengere ki Twaumase.