Luka 22 - Ngudradreadrekadhane Ka Sisiu 魯凱語聖經

Nimadrekadrekasane ku papacai ki Yesu

¹ Salri padalrunga si daruru kudra ki tatulrisisisiane ki Tamwalrane ku sapawsemakane ka lrisi (Takilragavane ka lrisi).

² Kudra marudrange ki barakalai si tarabulrubulru ki Sisiu ngwalai sa mukuludru ki mapapangale, la kidremedreme ku akibubuliane papacai ki Yesu.

Palraingi ku Yuda kilangai ki Yesu

³ Kikwini kwidra, ku Satange mwadringi ki kidremedreme ki swa Isekaliwte ka Yuda. (Kai Yuda ikai ki ta 12 ka lasitu ki Yesu ka tangea.)

⁴ Kai Yuda matwase kidrekase ki marudrange ki barakalai si mabelenge ki tarakadrekadrenge ki daane ki Twaumase, ku lrika apangimiane malra ki Yesu si baai liniane.

⁵ Kwini lalasu la kiraragai, si palraingi ku wabaai ku paisu iniane.

⁶ Ku Yuda la palraingi, si pathagili silapenga ku apikaiyane, kudra lu kai thingathingale ku mapapangale ku alrane ki Yesu si baai kikwini ki lalasu.

Padulru ku kwaubu ki Takilragavane ka lrisi

⁷ Ikai kwini ki tatulrisisisiane ki Tamwalrane ku sapawsemakane ka lrisi, si darurunga ku taculuculwane ku lrulai ka kiu ki Takilragavane ka lrisi ka vai.

⁸ Ku Yesu siakawlu pakatwase ki Pitiru si Yuhani, la cunu liniane iya kai, “Kunumi lu pasikaiya mitane padulru ku kwaubu ki Takilragavane ka lrisi.”

⁹ La kivaga kwini lamalala, “Ani ikai inu amiasu naiane padulru?”

¹⁰ Ku Yesu la iya kai, “Lu mucekela, lri kipadradresenge numi ku tangea ka umawmase, ku wailuku ku yadilrungane ku acilai, kunumi la tupapalra iniane, mwa kudra ki tawdaananeini kudra daane.

¹¹ Si kivaga kudra ki tawki ki daane iya kai, ‘Ku Sinsi kiavaga, yakai inu kudra taikaiyane ku ataelreaneli ki lasituli kane ku kwaubu ki Takilragavane ka lrisi?’

¹² Kwini lasu lri ililuku numiane mwa ki nikai ki daane padrele ku pinadulrwanenga ku taluvaale kudra ki swaadrau ka taikaikaiyane; lai lri ikai numi kwini padulru.”

¹³ Kwini lalasu la katwasenga, ku kipadradresenge lini mararaamau ku taiyane ki Yesu, kwini lalasu la padulru ku kwaubu ki Takilragavane ka lrisi.

Kwaubu ki Tamatama

¹⁴ La darurunga ki satukwauawbu, ku Yesu la nene; ku lasitu la mwa kilringulu iniane.

¹⁵ Ku Yesu la iya kai liniane, “Siadramadraamaku ku apaswalane kai ki akipakwalrianeli ku ataelreaneli numiane kane kai kwaubu ki Takilragavane ka lrisi.

¹⁶ Nau pelaela numiane, lu kai ikai ki kuni ki Twaumase si ikai ku patengatengane ku pacugane kikai kwaubu, kainaku lri kanenga inane tupela.”

¹⁷ Ku Yesu la malra kudra kupu, si kiaseasene ki Twaumase, iya kai, “Kunumi malra kikai yakupwane, si mavalavala ungulu.

¹⁸ Nau pelaela numiane, twalai kaikameane pakeela lubibilrili, lu kai keela kudra kuni ki Twaumase, lutuumane kainaku lri ungulunga kikai budu ka bava.”

¹⁹ Ala malra kudra pange, si kiaseasene ki Twaumase, la apapithipithingi, si apavalavala baai liniane, la iya kai, “Kikai kinawmasaneli, ka pasiakai numiane cilri. Kunumi piapianga kai si ngulringalringau nakwane.”

²⁰ Sa maka kanenga, la pangialrau malra kudra kupu si iya kai, “Kikai kupu yai bavane ka sakiketeketane ki Twaumase, ka niarakaiyane ku tapasikaiyaneli numiane tueraerai ka erai si paacegecege.

²¹ “Kunumi drela, kwini lri kilangai nakwane ka umawmase yakai kai taelre nakwane ki cukui!

²² Ku Lalake ki Umawmase unu lri singikai ku takelretane ki Twaumase si tarumara ku apacadhane, ai kwidra kialangai iniane ku umawmase yakai ku amatikurwane!”

²³ Kwini lalasu la makivagavaga, “Kudra lri pia kikai aneane?”

Ku lasitu makaririvu lukaaneane ku sanianiangenga

²⁴ Kwi lasitu yakai ku tamakaririvwane lini, ikai liniane lukaaneane ku sanianiangenga.

²⁵ Ku Yesu la iya kai liniane, “Kai latalialalai kai kawmasane yakai ku puku lini kadrenge ki laumawmase, si ku magagemegeme niyane la kimusakene kipasudalepe ka amani ku tarapalribulu;

²⁶ ai kai numi ka ngimiyaiya kikai. Ikai numiane kudra sanianiangenga naingibalre ngimia kamani ki lavavalake; kudra tamatama ka taramasasangililuku, lri ngimia ki sasiakawlu.

²⁷ Madradrau kwini wanene si kanekane ungungulu, madradrau kwini kiasikawkawlu iniane? Itara ka madraadrau kwini wanene. Ai, kunaku lu ikaiyaku numiane yai amaniaku kudra tarakisikawkawlu marasikaikai ki umawmase.

²⁸ “Ikai ki takipakwalrialianeli, kunumi tataelreane numi nakwane.

²⁹ Kikai lri malraku kudra patarumara ki Ama nakwane kudra puku ki talialalai si baai numiane.

³⁰ Kunumi lri ikai numi ki kunili si kibalrubalrulu nakwane kanekane ungungulu, si lai nene numi ikai ki taetalane si saibange ki swa Iseraylri kudra ki tai 12 ka zuku.”

Pakanaswala pelaela ku kaika athingalane ki Pitiru iniane

³¹ Ku Yesu la iyana kai, “Simune, Simune! Ku Satange kiapalrainginga ku akelane kituthiathingale numiane, lri pavalri numiane mia ki tarakawaungu lu pavalri ki mugi.

³² Ai pasiakainga naku muswane kitutubi, ku kaika asakacilrianesu kwi salrwanesu. Lu ngibangulungasu papia nakwane, lri kamanisu ku tarapasapukupukwane ki laretesanesu.”

³³ Ku Pitiru la iya kai, “Tamatama, palraingaku tupapalra muswane kiemenge, taelre pacai!”

³⁴ Ku Yesu la iya kai, “Pitiru, nau pelaela muswane: Kaikameane lu kaina kuka, lri kingitulrulusu kainaku wathingale iya nakwane.”

Tapaiswane, kadrai, lrabu

³⁵ Ku Yesu la iyana kai liniane, “Ku paswalala sa sikawlaku numiane pakatwase, amiaku kai numiane madha ililuku ku tapaiswane, madha ililuku ku kadrai, ku kece, kunumi la ikaiyana ku kawrame numi?” Kwini lalasu la tubalre, “Kadrwa.”

³⁶ Ku Yesu la iya kai, “Ai kikai ku yakai ku tapaiswane si kadrai yai, iluka; ku kadrwa ku lrabu, kilangadha ku laimai numi si langai nguvaeva.

³⁷ Nau pelaela numiane, ku taiyane ki Sisiu, ‘Kwini lasu kiapakililuku ikai ki pasalrivane’, kwini vaga lri tara ngimiya ikai ki kinawmasaneli. Ku patengatengane, kudra nipacasane pangukai nakwane patuelre yai ngiamiamianga kikai.”

³⁸ Ku lasitu la iya kai, “Tamatama, drele, kawvai drusa kai lrabu.” Ku Yesu la iya kai, “Makakelrete!”

Ku Yesu yakai Ulrive lregelrege inulri

³⁹ Ku Yesu samwa latadre ki cekele, paiya ku tapiapianeini papia Ulrive lregelrege; ku lasitu la tupalra iniane.

⁴⁰ Sakelanga kwini, ku Yesu la iya kai liniane, “Kunumi inulrinulria, amani lu kilrilrigili numi.”

⁴¹ Ala katwase kidaili ku Yesu liniane, lri ikai ku lu dukulrane ku lrenege ku adailane, la pidruru ikai kwini inulri,

⁴² si iya kai, “Ama, alaiyasi palraingisu, kikai mapalili ka kupu alra mwalra! Ai, madha singikaikai ki kidremedremeli, pangimia kamani ki takidremedremanesu.” [

⁴³ Yakai ku tangea ku sasiakawlu belenge ku twalai subelebelenge papia iniane adrelane, padrima iniane ku puku.

⁴⁴ Ikai kudra ki takiangeangane turamuru, kai Yesu arwa ka parawramuru inulri, kudra igipini mia ki erai adidi mucakena.]

⁴⁵ Samaka inulri, la ngidrakale ku Yesu, si siwlri mwa kwidra ki lasituini, la drele liniane ngwalai ku sakwalrialri ki kidremedreme lini la kasipelrenge ereke.

⁴⁶ Ku Yesu la iya kai liniane, “Kunumi anu sakaereke? Ngidrakala, la inulria, amani lu ulrabuku numi ki salrilrigilane.”

Ku Yesu kiapwalra

⁴⁷ Ku Yesu sa kawrivariivana, yakai kudra sakaturedele ku wakela. Ikai kwini ki ta 12 ka situ kudra tangea ka sia Yuda amani ku waililuku liniane, la arwacucubungu si lri uma ki Yesu.

⁴⁸ Ku Yesu la iya kai iniane, “Yuda, ara umasu si kilangai ki Lalake ki Umawmase?”

⁴⁹ Kwini taelre ki Yesu kwini lasitu sa drele kai tangimiamiane, la iya kai, “Tamatama, lri dulru nai ara lrabu vathale?”

⁵⁰ Ikai liniane ku tangea la musudru ku lrabu si pwa vathale papia kwini ki sasiakawlu ki abebeelengenga ki barakalai, si lradipi pavanale ki calringaini.

⁵¹ Ku Yesu la iya kai, “Madha pwalrimanga!” La seege ku Yesu ku alrimaini si ecenge kwini ki calringa, si pawdringai iniane.

⁵² Lakamani, ku Yesu kawriva kwini ki wakela ruthuku iniane kwini ki marudrange ki labarakalai, si mabelenge ki tarakadrekadrenge ki daane ki Twaumase, si laciwru iya kai, “Kikai iluku numi kai lrabu si angatu kainganai pwalra nakwane, wamalra numi nakwane tusadre?

⁵³ Lukakaiya taelreaku numiane ikai ki daane ki Twaumase, la kai numi pwalrimalrima; ai kikainga tangilralrailraingane numi, magagemegemenga kai dradrimitane.”

Ku Pitiru kai wathingale ki Yesu

⁵⁴ Kikai kwidra, kwini lalasu la pwalra ruthuku ki Yesu, si iluku pwa ki daane ki abebeelengenga ki barakalai; ku Pitiru la sadaili kabibibilrili.

⁵⁵ Kwini lalasu la twapwapui ikai kalatadrane, si ngithalringulu ki apwi nene, ku Pitiru maiyalri ikai kiibu liniane.

⁵⁶ La ikai ku tangea ku ababai ka tuvange la drele ki Pitiru sa nene idididiu, la lengethe drele iniane, si iya kai, “Kikai umawmase kai, papapalra kavai ki lasu!”.

⁵⁷ Ku Pitiru la kithungu si iya kai, “Kusu ka ababai, kainaku wathingale iniane!”

⁵⁸ La kai tarathainu, la ikaainga ku umawmase ku kiararaakete iniane, si iya kai, “Kusu maiyalrisu ka papapalra liniane!” Kai Pitiru la iya kai, “Kusu yai, kainaku kaamani!”

⁵⁹ Sa ngilribatenga lri ikai kau ngwavaeva ki tuki, la ikai ku tangea ku malritheethe iya kai, “Kai pasamali, kikai umawmase kai, papapalra kavai ki lasu, asi lwiyane kai lasu maiyalri ka swa Galrilri ka umawmase!”

⁶⁰ Ai ku Pitiru amia kai, “Kusu ka amiamia kwini, kainaku wathingale lukamanemane kai kawrivarivasu!” La kaina tulrepenge ku vagaini, ala kuka.

⁶¹ Ku Tamatama la ngibangulu, si dreele ki Pitiru; kai Pitiru la ngulringau ku taiyane ki Tamatama iniane ku vaga iya kai, “Kaikameane lu kaiyana kuka, lri kingitulrulusu ngikawlrawlravane nakwane.”

⁶² Ku Pitiru la katwase mulatadre, la kai beserenga si tubi tungawngau.

Ku Yesu kiasivavangane kitusinalreme

⁶³ Kudra wakadrekadrenge ki Yesu ku laumawmase la tumeameamelrace iniane, si lrumai iniane.

⁶⁴ Kwini lalasu la tamenge ki macaini, si kivaga iniane, “Ala pelaelaa, laka aneane kai walrumai muswane?”

⁶⁵ Kwini lalasu la iyana ku makaalra ku satusinalrelremeane iniane ka vaga.

Yakai ki takaigigiane kisaibange

⁶⁶ Sakaliarenga, ku laciwru ki swa Yuda, si lamarudrange ki barakalai, si latarabulrubulru ki Sisiu yaelrelrenga makanaelre, si malra iluku ki Yesu mwa ki takaigigiane lini.

⁶⁷ Kwini lalasu la kivaga iniane, “Ala pelaela naiane, amanisu kwidra Kirisitu?” La tubalre ku Yesu, “Adravane pelaelaku numiane, kunumi kainu lri kipawtenga;

⁶⁸ alaiyasi kivagaku numiane ku manemane, lri mialri numi kai maka tubalre.

⁶⁹ Ai twalainga kaikameane, kai Lalake ki Umawmase lri takaenenenga ikai vanale ki sapupukuanenga ka Twaumase.”

⁷⁰ Kwini lalasu la makitu iya kai, “Lu mia kikai, amanisu kwidra Lalake ki Twaumase?” Ku Yesu la tubalre, “Amani numi ka amani iya nakwane!”

⁷¹ Lakamani ku iya kai kwini ki lalasu, “Kaita mwarikainga ku manemane ku wasiwmi! Kialalrangata makanaelre ku tapuvaganeini kawriva!”