Luka 21 - Ngudradreadrekadhane Ka Sisiu 魯凱語聖經

Patarumara ki walibakane ka ababai

¹ Ku Yesu la paswabelenge drele, la drele kudra ki lasapaiswane ka umawmase ku tamalrane lini ku paisu pwa ki tapatarumaramarane ka langiane ikai ki daane ki Twaumase.

² La drele ku tangea ku matiakukuru ka walibakane ka ababai ku patarwamara ku drusa ka tangupia ku paisu.

³ La iya kai ku Yesu, “Nau pudriadriingai pelaela numiane, kikai matiakukuru ka walibakane ka ababai ku patarumaraini makakalra turaamuru ki drumane ka laumawmase.

⁴ Asi lwiyane kai palrapalra patwalai ki tedratedrane ki tacekecekelane lini si patarumara; ai kai alisu sakwa matikuruunga turamuru, la maalrana patuelre ku sangilalapwaneini pakaelre baai patarumara.”

Wayugingi ku akamudane ki daane ki Twaumase

⁵ Yakai ku laumawmase ku matiakaikai ki daane ki Twaumase, peaelaelaela kudra tapangimiane pangiragelane arakai ku mathariri ka lrenege si kudra la sarakaiyane kiketekete ki laumawmase ka lasaceacebe. Ku Yesu amia kai,

⁶ “Wadrele numi kikai patuelre? Lri darurunga kudra vai, lu kamani kwidra, kadrwa ku navaevanga ku lrenege ku lri asuru ikai ki taraedrane, kai lalrenege lri kiburuku patuelre.”

Amatikurwane si hakegai

⁷ Kwini lalasu la kivaga, “Sinsi, lai lri ngimia lwigane kilakikai? Kai patuelre lu lri ngimianga lri ikai ku manemane ku sasakaladhane?”

⁸ Ku Yesu la iya kai, “Kunumi kipapawlringava, madha kipamamama; asi lwiyane lri takaalra ku umawmase ku lri draedrangelre sinagane ku naganeli, si iya kai, ‘Amaniaku kudra Kirisitu’ iya! Lai iyana kai, ‘Mabeanga si mutakelanenga kai vai!’ Ai madha tupapapalra liniane.

⁹ Lu kilalra numi kudra makarururuburu si ku lawabaebaebalre amia, madha mukuludru. Kilakikai yai lri tara ka angimiane paswala; ai kikai kaika sapelaelane ka wadarurunga kudra alikaiyane ku vai.”

¹⁰ Ku Yesu la pacuungulu iya kai, “Kudra taingeane ka minzuku lri makakaruburu ki maelane ka minzuku, ku taingeane ka kuni la lri makakaruburu ki maelane ka kuni.

¹¹ Ikai kidruanga lri ikai ku pakialringau ku lingilingi, silravane, si swalrubu, la ikaiyana ku matiasamali matiaukuludru ku tangimiamiane utaluvaivai ikai subelebelenge.

¹² Ai paswala ki angimiane kilakikai, lri kipwalra numi si kihakegai; ku umawmase lri malra iluku numiane baai purarubwane ki swa Yuda pakisaibange, lai lri pakiemenge numiane. Ngwalai nakwane, lri kililuku numi pucucubungu ki talialalai si tararathudu.

¹³ Kikai amaninga ku kiniswadhane ku apasikaiyane numi ki hukuingi akasi.

¹⁴ Lakamani, kalrithetha ku kidremedreme numi, madha paswalala kidredredreme ku angipapasikaiyane ngipapalribulu kidrikisi kawrivariva;

¹⁵ asi lwiyane lri baadhaku numiane ku lrigilane avavaga si thingalane, si kudra badha numi lai lri kai maka kiecebe si baebalre ku takawrivane numi.

¹⁶ Adravane ku marudrawdrange numi, betakane numi, retetesane numi, talrailragi numi lri kilangai numiane; ikai numiane yakai kai laumawmase ka lri kipapacai liniane.

¹⁷ La lri ngwalai nakwane, ku laumawmase lri kalisi numiane,

¹⁸ ai adravane ka vaeva ka isiu numi kai lri mururu.

¹⁹ Kunumi kakecenga kiadili lri maka dulru numi ngipapalakebe ku niake numi.”

Wayugingi ku akamudane Yerusalrime

²⁰ “Lu drele numi Yerusalrime lu kingithalringulu ki badha yai, lri thingale numi ka lri padalrunga si kipakamudu.

²¹ Lukamaninga kwidra, ku yakai Yuda, lri mubere mwa lregelrege; ku yakai ki cekele, lri mulatadra; ku yakai ki tatitiki ka cekele, la madha mwamwa mucekele.

²² Asi lwiyane kikai yai, ‘Tapathavuthavungane ka vai’, lri pangimianga kudra vaga ki Sisiu patuelre.

²³ Ikai kwini ki lavai, ku tawbaliri si pathuthuthwana ki lrulai ka tina lri kwalri! Kudra pakialringau ku amatikurwane lri mulebe mwa kikai, ku elathane twalai ki dringelresane ki Twaumase lri mulebe mwa kikai ki laumawmase.

²⁴ Kwini lalasu lri kiara lrabu pacai, lri kiravase mwa sanaka kuni. Kudra maelane ku takisuswane lai lri dradredre Yerusalrime, pakeela kudra lu alikai ku vai lini.”

Akelane kudra ki Lalake ki Umawmase

²⁵ “Lukamani kwidra, ku vai, ku dramare, ku tariau lri makitu paathingalane ku maburusi. Kai lakuni kawmasane lri makitu ngwalai ki bikabiki ki laveke si mukuludru kai thingale ku atumanane.

²⁶ Sanaka umawmase mwakalavalava kwini lrika angimiane kela kawmasane, la manugiligiligili ki sawkukuludru, pakeela ki waretese, asi lwiyane kai subelebelenge ku tangidarepane patuelre lri ngivelevele.

²⁷ Lukamani kwidra, ku Lalake ki Umawmase lri mutaluvaivai, si kisuete ku puku si lrigu ngukakai ki ememe kela mulebe.

²⁸ Kilakikai lu ngimianga, lri tangeraranenga numi si bicakane ku tuku, asi lwiyane kudra akipalribulane numi kudra vai lri kelanga!”

Sabulrwane patharukai ki icizike ka angatu

²⁹ Ku Yesu la pelaelanga ku vaeva ku pathalrilriku liniane, “Kunumi dredrela kikai icizike ka angatu si drumane ka laangatu.

³⁰ Kikai laangatu sana rigarigi, wathiingale numi ala ka padethenga ki kaladralrangedrangane.

³¹ Laka thadaalrane, lu drele numi kikai tangimiyaiyane patuelre lri thingale numi kudra puku ki Twaumase lri padalrunga si utaluvaivai.

³² “Kunumi pulringalringava: Kai zidai kai ku laumawmase lu kaiyana pacai makanaelre, lri ngimia kikai patueelre.

³³ Kai subelebelenge kai kawmasane lri kamudu kawlrau, ai kai vagali kai lri kamudu palralrawthu.”

Kasimeameaca

³⁴ “Kunumi kasimeameaca! Kwi kidremedreme numi madha kimalramalra ki bava, si laakaneane si thekelrane ngukai ki sapanianiakane, amani lu pangitutuluku kela numiane kwini vai. Asi lwiyane kwini vai

³⁵ lri mia ki lravathe, ka lri mulebe mukawmasane makakai sanaka umawmasenga.

³⁶ Kunumi kasimeameaca, kai reteretege ku ainulriane, lanu maka sapukwane kiadili kudra lrika angimiane patuelre, si dulru acegecege icucubungu ki Lalake ki Umawmase.”

³⁷ Ku Yesu lukavaiyane yakai ki daane ki Twaumase si bulrubulru ki umawmase, lukamaungu la mulatadre ki cekele, si ikai Ulrive lregelrege sulai;

³⁸ ku laumawmase la ngulalakese mwa ki daane ki Twaumase, lri kilalalra ku abulrwane ki Yesu.