Luka 19 - Ngudradreadrekadhane Ka Sisiu 魯凱語聖經

Yesu si Zakai

¹ Ku Yesu mwa daane cekele Yeriku, ka lri ngukai kwini ki cekele lribate.

² Kudra swakai kwini la ikai ku tangea ku kiacapili ki tarakikaziluzilu, ka sia Zakai, si ka satacekecekelane ka umawmase.

³ Kai Zakai la apidrele ki Yesu luka ngitwatumane ku takaumawmasane, ai tikiane ku tacebeaneini, ikai kwini ki laumawmase la kai maka drele ki Yesu.

⁴ Kikai lasu la katwase lailai aswala ki laumawmase, si ubelenge ki taliwdru ka angatu, pakai ku adrelane ki Yesu, asi lwiyane ku Yesu lri ngukakai kwini ki kadalranane lribate.

⁵ Ku Yesu sadaruru kwini, la paswabelenge drele ki Zakai, si iya kai iniane, “Zakai, kirarimwa mulebe! Kaikameane lri ikaiyaku ki daanesu sulai.”

⁶ Ku Zakai la kisamula mulebe, si kiraragai turamuru pasudalru ki Yesu.

⁷ Ku laumawmase sadrele la makitu akuiya si iya kai, “Kikai umawmase kai, ani mwa kitubadhabadha kwini ki daane ki pasalrisalriu ka umawmase!”

⁸ Ku Zakai la acegecege si iya kai ki Tamatama, “Tamatama, lri malraku kai tacekecekelaneli ku apararamau si pavalavala ki matiakukuru; alaiyasi ikai ku lrilrigilingali ki aneane, lri sawlriaku si drima ku taisupatane baai iniane.”

⁹ Ku Yesu la iya kai iniane, “Kaikameane ku sapalribulane wadaruru kai ki daane, asi lwiyane kikai umawmase kai, maiyalri ka mwabaibalrithi ki Aberahame.

¹⁰ Ku kela ki Lalake ki Umawmase paakai ku akipasilapane si palribulu ki sakawlrawlrau ka umawmase.”

Pathalrilriku patharukai ki sasiakawlu si kingi ka paisu

¹¹ Sa makitu kilalalalra kikai vaga makanaelre, ku Yesu peaelaelanga liniane ku taingeane ku pathalrilriku. Ki kikai, ku Yesu lri padaalrunga si daruru Yerusalrime, kwini lalasu lri mutaluvaivainga ku puku ki Twaumase la iyaiya.

¹² Ku Yesu la iya kai, “Yakai kudra tangea ka mabelenge ka umawmase ka lri katwase mubabadhane muadaili, lri kipaatalialalai, ala lri kela siwlri.

¹³ Sakaiyana katwase, kwini lasu la dawlu kwini ki tamangeale ka lasasiakawlu, si pakavavaeva ku kingi ka paisu baai ki tangangea, si iya kai, ‘Kai lrika akakadrwaneli, kunumi malra kikai paisu si katwase siwbai, dredrele lulri maka patulalake numi ku thaininu.’

¹⁴ Kwini sakacekeleini laka malrase iniane, la sikawlu ku tangea kabibilrili iniane si mwa iya kai, ‘Malrase nai kai ki lasu lu atalialalai naiane.’

¹⁵ “Kwini lasu sa kipaatalialalainga si la kelanga, la makakaai drekase kwini ki la wamalra ku kingi ka paisu ka lasasiakawlu si pucucubungu iniane, pakai ku athingalane ku tasiwbadhane lini makanaelre luka thaininu ku patulalake lini.

¹⁶ Kudra aswalaalanga la kela si iya kai, ‘Tawki, arakaiyaku ku baaisu ku kingi ka paisu si patulalakenga ku mangeale ku kingi ka paisu.’

¹⁷ Kwini tawki la iya kai, ‘Ala mathariri turamuru! Amanisu ku mathariri ka sasiakawlu; kudra maka pangiamiasu ikai ki tikiane ka awngane, lri sudralrwaku pamarasikai muswane ku taimangealane ka lacekele.’

¹⁸ Kwini sakadrusa ka sasiakawlu la kela si iya kai, ‘Tawki, arakaiyaku kudra baaisu ku kingi ka paisu si patulalake kai lrima ka kingi ka paisu.’

¹⁹ Kwini tawki la iya kai iniane, ‘Maiyalrisu lri marasikaisu ku lrima ku cekele.’

²⁰ La kela ku tangeanga ku sasiakawlu si iya kai, ‘Tawki, kawvai kai kingi ka paisusu; arakaiyaku kai hankaci cabu.

²¹ Sakwa ukuludraku muswane, asi lwiyane maelathesu turamuru. Ku kaika pudringaisu, kiasanu malranasu; ku kaika nilredrekane, kiasanu kitalekesu.’

²² Kwini tawki la iya kai iniane, ‘Kusu ka manganga ka sasiakawlu, lri arakaiyaku kwini vagasu si tupasalrivane muswane! Kudra wathingalesu ka maelathaku turamuru, wamalraku ku kaika nakwane, kiatalekaku kudra kaika sabululi,

²³ luka miyaiya kwini, asu kai malra kwini paisuli si cukingi pwa ki ginku, ala kudra lu kelanga naku, lri dulru madu malra kwini tina si lalake ka paisu?’

²⁴ Lakamani kwi lasu la kawriva ki yavanale si yaviri acegecege ka tarakadrekadrenge, ‘Malra kwini kingi ka paisuini, si baai kwidra piakai ku mangeale ku kingi ka paisu ka sasiakawlu.’

²⁵ Kwi lalasu amia kai iniane, ‘Tawki, kwi lasu ku yakainga ku mangeale ku kingi ka paisu.’

²⁶ Kwini tawki la iya kai, ‘Nau pelaela numiane, kudra yakainga, lri baaiyana iniane pakakaakalra; kudra pakakadrwa, adravane ka pikaini patuelre lri kimalrana patuelre.

²⁷ Ala kudra kai lri paatalialalai nakwane liniane kudra labadha, mailuka liniane mwakai, si picucubungu nakwane papacai!’ ”

Masasialrigu mudaane Yerusalrime

²⁸ Samaka kawriva kilakikai vaga, ku Yesu matwase aswala dadavace, katwase mwa Yerusalrime.

²⁹ Salri padalrunga si daruru Bithepagi si Bithani, si papiapia kavai Ulrive ka lregelrege, ku Yesu la sikawlu ki tadrusa ka situ katwase aswalaala,

³⁰ si pelaela liniane iya kai, “Lu katwasa mwa kavai cucubungu ka cekele, lu mudaane numi, lri drele numi ku vaeva ku lrulai ka ruba ku kaiyana kiangurigi ka nipakerengane ikai kwini. Kunumi malranga mukerenge inane, si iluku mwa kikai.

³¹ Alaiyasi ikai ku kiavaga anu mukerenge kai lrulai ka ruba iya numiane, kunumi pelaelaanga iya kai, ‘Ku Tamatama lri arakai iniane.’ ”

³² Kwini lalasu samwanga, ku tadrelane lini ngiamia mararaamau ku taiyane ki Yesu.

³³ Kwini lalasu sa mukerekerenge kwini ki lrulai ka ruba, kwini tawki ki ruba kiavaga liniane, “Anu mukerekerenge kwini ki lrulai ka ruba?”

³⁴ Kwi lalasu la tubalre, “Ku Tamatama lri arakai iniane.”

³⁵ Kwini lalasu ala iluku kwini ki lrulai ka ruba si pucucubungu ki Yesu, la malra ku laimai lini si sapa pikai ki drelreke ki ruba, ala arake ki Yesu paubelenge.

³⁶ Ku Yesu sakatwatwase arwacucubungu, kudra laumawmase la malra ku laimai lini si sapa pikadadalranane.

³⁷ Sa arwadeethenga Yerusalrime ku Yesu, sa icengecenge mulrawlrawdru Ulrive lregelrege, kwini twapapapalra ki Yesu ku laumawmase la ngwalai kikai drele lini kai matiasamali ka puku si kiaseasene ki Twaumase, la akwadrau putariri,

³⁸ “Ani subulrubulru ku Twaumase kikai ki pinangukaiyane ki nagane ki Tamatama si kela ka talialalai! Kavai subelebelenge yakai ku rathudane, ku lrigu lani papia ki Abebeelengenga ka Twaumase!”

³⁹ Kudra ki laumawmase la ikai ku luka tapia ku swa Palrisai, ku amia kai ki Yesu, “Sinsi, paisaselebana kai ki lasitusu!”

⁴⁰ Ku Yesu la tubalre, “Nau pelaela numiane, kai lalasu sana kai karariau, kikai lalrenege lri dulru makitu akwadrau tawtau.”

Pasiakai ki Yerusalrime tubi

⁴¹ Ku Yesu salri darurunga Yerusalrime, wadrele kwini ki cekele, la tubi kwini ki cekele,

⁴² si iya kai, “Ana tuumane la thingalesu kaikameane ku ngwakai ku rathudane, ai kaiasasane ngiamiasu kikai kai maka cege.

⁴³ Lri darurunga kudra vai, kudra labadhasu lri alradre thalringulu muswane, twalai ki inu ki druanga lringulu muswane.

⁴⁴ Kwini lalasu yai, lri pademeedeme amudu muswane si yakai ki cekelesu ka laumawmase, kai lri asuru ku navaevanga ku lrenege ikai ki taraedrane, asi lwiyane kaisu maka wathingale ku sapalribulane ki Twaumase ku vai.”

Wabula ki daane ki Twaumase

⁴⁵ Ku Yesu sa mudaane ki daane ki Twaumase, pakatwase kudra ki wasiwbawbai ka laumawmase,

⁴⁶ si iya kikai liniane, “Ikai ki Sisiu wapacase ku vaga ki Twaumase iya kai, ‘Kai daaneli lrika tainulrinulriane ka daane.’ Ai kunumi la maalralringa numi tudaane ki saadre!”

⁴⁷ Ku Yesu lukavaivai yakai ki daane ki Twaumase si bulrubulru ki laumawmase. Ku marudrange ki barakalai si tarabulrubulru ki Sisiu, si kudra taramasasangililuku ki mapapangale kiasanu papacapacai iniane,

⁴⁸ ai kai wathingale lu lri pangitumane pwalrima; asi lwiyane madalame kilalra iniane ku mapapangale, si kirarakete kilalra ku taiyaneini patuelre ku vaga.