Luka 18 - Ngudradreadrekadhane Ka Sisiu 魯凱語聖經

Patharukai ki walibakane si tarasaibaibange ka pathalrilriku

¹ Ku Yesu peaelaela liniane ku drumane ku pathalrilriku, ku lrika tainulrinulriane lini, si kai kasulrisulri.

² Kwi lasu amia kai, “Yakai kudra cekele la ikai ku tangea ku tarasaibaibange, kwini lasu laka kai mwakuludru ki Twaumase, kai mwasakene ki naumawmasenga.

³ Ikai kwini cekele la ikai ku tangea ku walibakane la wamwamwamua kikawriva iniane, si kitubi iniane ku aparamaramavane, si pathavungu ki ecebaneini.

⁴ Kwini tarasaibaibange la pukaiyaiyaiyane ngiabababalai, ai sakabilrilanenga la kidremedreme iya kai: Unu kunaku nakainaku mwakuludru ki Twaumase, la kai musakene ki umawmase,

⁵ ai kikai walibakane kai yasadrasadra kela upungu nakwane, maesaesai pasikai iniane putaluvaivai ku vinuthane, amani lu keakeakela, si kataruthukane kai isadrasadra.”

⁶ Ku Tamatama la pacuungulu iya kai, “Kunumi kilalalra kai takawrivane kai ki kaimadringelrese ka tarasaibaibange!

⁷ Bekace ku Twaumase kai pasikai putaluvaivai ku vinuthane kudra ki la piavaiyane pimaungu kitubitubi iniane ku akiparalubane kudra laumawmaseini? Ku taiyane, lri ngiabababalai ku apalribulane liniane?

⁸ Nau pelaela numiane, Lri tara kisamwamula pasikai putaluvaivai ku vinuthane lini. Ai, lu kela ku Lalake ki Umawmase, lri maka kidringadhaini ku ngimiyaiya kai ku salrwane?”

Patharwakai ki swa Palrisai si tarakikaziluzilu ka pathalrilriku

⁹ Ku Yesu la pelaelanga ku vaeva ku pathalrilriku, ka papia kwidra ki ngiatatumadringelrese si sidrekase ki palrapalra ka laumawmase. La iya kai,

¹⁰ “Yakai ku tadrusa ku umawmase ku wamwa ki daane ki Twaumase inulri: Ku tangea swa Palrisai, ku tangea tarakikaziluzilu ka umawmase.

¹¹ Kudra swa Palrisai la acegecege si paswabelenge, la inulri iya kai, ‘Twaumase, kiaseasenaku muswane, asi lwiyane kainaku ngiamia ki palrapalra karau, kaimakalecege, kanganga ki sawvalai si ababai, si la kainaku mia kavai ki tarakikaziluzilu.

¹² Ki minakapitulane ku vai la kingipusalaku laisi, si ku malramalrali patuelre la pawmangealaku si patarumara ku taingeane.’

¹³ Ai kwidra tarakikaziluzilu ka umawmase la yadaaili acegecege, adravane ka apaswabeleengane drele kai wathuru, wabakebake ki tukuini sikakathane si iya kai, ‘Twaumase, kakuruaili ka mapasaisaalriwnga ka umawmase!’

¹⁴ Nau pelaela numiane, kikai tadrusa lu katwasenga yai, ikai ki tadrelane ki Twaumase ku madringelrese ka umawmase amani ki kwini tarakikaziluzilu ka umawmase, kaika amani kwini swa Palrisai. Asi lwiyane ku Twaumase lri parwabelenge kudra ki ngiatatwalebe ku umawmase, kudra ngiatatwabelenge ku umawmase lai alra pulebe.”

Ku Yesu swabulrubulru ki lavavalake

¹⁵ Yakai ku laumawmase ku waililuku ki lalake lini ka daini kainganai mwa ki Yesu, pakai ku lrika answane ki Yesu pasikai liniane. Ku lasitu sadrele, la kaelaelathe liniane.

¹⁶ Ai ku Yesu wadawlu kwini ki lavavalake picucubungu iniane, si iya kai, “Bwala pakainganadha ki lavavalake pwakai nakwane, madha teletelenge liniane, asi lwiyane ku kawkawlu ki kuni ki Twaumase ala ngimiyaiya liniane.

¹⁷ Kunumi pulringava: Sanaka kaika paramia ki lavavalake ngialrau tarumara ku puku ki Twaumase ku umawmase, kai lri maka dulru mudaane ki kuni ki Twaumase.”

Pakakucingalre ki satacekecekelane

¹⁸ Yakai kudra taramasasangililuku ki swa Yuda wakela kivaga ki Yesu iya kai, “Makalecege ka sinsi, lri tumanaku si ala dulru tarumara ku apalralrawthane ka niake?”

¹⁹ Ku Yesu la kivaga iniane, “Asu makalecege iya nakwane? Kai paelre ki Twaumase, kadrwanga ku tharirane.

²⁰ Kusu lri tara ka wathingalesu ku nitukakudhanane ki padradrekase ‘Madha sudringai madha pasudringai; madha papacapacai ki umawmase; madha kupawpa; madha draedraedrangelre kawriva; musakena ki marudrawdrangesu.’ ”

²¹ Kwini umawmase la tubalre, “Kikai padradrekase patuelre singika lavavalakaku pangiamianga naku paluludu.”

²² Ku Yesu sakilalra kikai vaga, la tupela kawriva iniane, “Yakai kwini kaiyana ka pangimiasu ku taingeane. Lu kilangadha ku tacekecekelanesu patuelre, si apavalavala baai ki matiakukuru, lri tara ikai ku tacekecekelanesu ikai subelebelenge; si la kainganadha tupapalra nakwane.”

²³ Kwini lasu sa kilalra kikai vaga, la kasalivaalrau kasuulringa, asi lwiyane kwi lasu satacekecekelane turamuru.

²⁴ Kai Yesu la drele iniane, la iya kai, “Ku sapaiswane ku umawmase nau akawkawlu ki kuni ki Twaumase lu iya ala makucingalre!

²⁵ Ku sapaiswane ku umawmase nau akawkawlu ki kuni ki Twaumase lu iya makuciacingalreana ki lrakeda lu ngulratuku ki maca ki inamai!”

²⁶ Kudra kialalra kikai vaga ku laumawmase la kivaga, “Lwiyane kai, laika aneane ku lri maka dulru kipalribulu?”

²⁷ Ku Yesu la iya kai, “Ku kaika dulru ki umawmase, ku Twaumase wadulru patuelre.”

²⁸ Ki kikai, ku Pitiru la iya kai, “Drela, wacilringa nai ki tacekecekelane nai si kainganai tupapalranga muswane.”

²⁹ Ku Yesu la iya kai, “Unu, nau pudriadriingai pelaela numiane, sanaka pasiakai ki kuni ki Twaumase si cilri ki daaneini, labaibaini, labetakaneini ka sawvalai si labaibai, marudrawdrangeini, si lalalakeini,

³⁰ lri tara ikai kai zidai kaikameane tarumara ku makaakalra, si ikai ki mwabalrithi ka kawmasane kisupisupilri ku palralrawthu ka niake.”

Saka kingitulrulu ki Yesu pakanaswala pelaela ku apacadhaneini

³¹ Ku Yesu la iluku puthili ki ta 12 ka lasitu, si iya kai liniane, “Kaiasasane lri katwaseta mudradha mu Yerusalrime; ku lapacase ki layuginsia ku patharukai ki Lalake ki Umawmase lri ngimia patuelre.

³² Lri alra iniane baai patarumara pikai ki alrima ki sakamaelanane ka umawmase; kwini lalasu lai lri tusinalrelreme sivavangane iniane, tusinalreme iniane, si sungangalrai iniane,

³³ la lri lrumai iniane, si papacai iniane; ai luka samakatulrulu ku vai, kwi lasu lri siela panianiake.”

³⁴ Kai lasituini pangukai kikai kadrwa ku pulringalringau lini, kikai pelaela ki Yesu kadrwa ku thingale lini, asi lwiyane kudra pacugane kwini vaga kaiyana mwataluvaivai athingalane.

Ku Yesu pawadringai ki mamukici ka kiciacia

³⁵ Ku Yesu la kela mwa kwini adeethe talikai Yeriku, yakai ku tangea ku mamukici wanene ikai babiabila ki kadadalranane si abababange ku akaneane.

³⁶ Kwini lasu sa kilalra ki laumawmase lribalribate yai, la kivaga watumatumane kikai.

³⁷ La ikai ku umawmase ku peaelaela iniane, “Kudra swa Nazarethe ka Yesu walribalribate kikai.”

³⁸ Kikai lasu la tawtau iya kai, “Lalake ki Davidi ka Yesu, kakuruuaili!”

³⁹ Kudra yacucubungu iniane dadadavace ku umawmase la kaelaelathe iniane, si madha avavagavaga iya iniane. Ai kwi lasu arwakwadrawlringa tawtau iya kai, “Lalake ki Davidi, kakuruaili!”

⁴⁰ Lakamani kwidra ku Yesu idrengere, si padawlu alra iluku kwini ki mukimukici pucucubungu iniane. Sakela mucucubungu kwini lasu, la kivaga ku Yesu iniane,

⁴¹ “Anitumane amiasu nakwane pasikai muswane?” La tubalre kwini lasu, “Tamatama, nau dulru drele amiaku!”

⁴² Ku Yesu la iya kai iniane, “Kusu ala drela! Kwini salrwanesu pawadringainga muswane.”

⁴³ Kwini mamukici la makakaai dulru drele, la katwasenga tupapalra ki Yesu, tarakadalranane drengedrengere ki Twaumase. Ku lamapapangale sadrele ki kikai, la makitu drengedrengere ki Twaumase.