Luka 17 - Ngudradreadrekadhane Ka Sisiu 魯凱語聖經

Patharwakai ki pasalrivane

¹ Ku Yesu amia kai ki lasituini, “Kudra papasalriu ki umawmase ka maneemanenga yai lri tara ikai, ai kudra amani ku pangiamia kikai ku umawmase yai lri matikuru!

² Maesaesai arakai ku madrau ka tapasilribulribwane ka lrenege si pakerenge ki lreini, la pawrenere pwa ki laveke; lu piane kai, maesaesai kwidra ki lu papasalriu kudra ki kaika sapatumatumane ka umawmase.

³ Kunumi kipapawlringava! “Lwiyasi kwini retesanesu la pasalriu, wabulru madu pakipapawlringau iniane; alaiyasi ngitatupela, la pacepe madu iniane.

⁴ Kudra minakavavaalane la kingipitulu pasalriu muswane, lu pasalriu kingivaale la ngibangulu iya kai muswane, ‘Ngiatatusikaelangaku’, lri paacepesu iniane.”

Patharwakai ki salrwane

⁵ Kudra lanisikawlane amia kai ki Tamatama, “Ala drima ku salrwane nai!”

⁶ Ku Tamatama la iya kai, “Alaiyasi pikai numi ku paramia ki berathe ka masetarade ku takathane ku salrwane, adravane kawriva numi kwini ki taliwdru iya kai, ‘Kaakuca patala balace, si mwa ki laveke!’ Lri mialri dulru kilalra numiane.”

Awngane ki sasiakawlu

⁷ “Alaiyasi ikai numiane, kudra yakai ku tangea ku sasiakawluini ka tarakawaungu ki umawma, ka taraagwagu ki kiu, kwini sasiakawlu lu twalai umawma kela, lri maka iyasu iniane, ‘Kirarimwa nene si la kane kai aga’ iya?

⁸ Kaisu lri pia kwini! Lri iyalringasu kai iniane, ‘Pasikaiyanaili padulru ku kwaubu, la situpia, si marasikai nakwane, ala lu makakaanengaku kaneea.’

⁹ Ku sasiakawlu lu pangimia ku tapadrekadrekasane ki tawkini twatumane, ku tawki lai lri kiaseasene iniane?

¹⁰ Kunumi la mialri numi. Kudra lu tulrepenge numi ku pia kwini iya ki Twaumase numiane, amia madu kai, ‘Kunai amani nai kudra kadrwa ku paluludane ka sasiakawlu; kikai tapangimiane nai naika apiane nai ka awngane nai.’ ”

Pawadringai ki tamangeale ka macaeme karaibiu

¹¹ Ku Yesu sa papiapia Yerusalrime kadadalranane, ngwakakai Samaria si talikai Galrilri.

¹² Sa mudaane kudra ki vaeva ka cekele, yakai ku tamangeale ku kiapucaemane ki raibiu, wakela kidresenge papia iniane. La sadaili acegecege,

¹³ si tawtau iya kai, “Yesu, sinsi, kakurua naiane!”

¹⁴ Ku Yesu sadrele, la iya kai liniane, “Kunumi lu katwasa, lani drele numiane ku barakalai!” Kwini lalasu sakatwase la makitu kabulanga.

¹⁵ Kwini la ikai ku tangea ku ngiadradrele sa mudringainga, la makakaai siwlriwlri, si akwadrau drengedrengere ki Twaumase,

¹⁶ la pidruru icucubungu ki drapale ki Yesu si kiaseasene iniane. Kikai umawmase laka swa Samaria.

¹⁷ Ku Yesu la iya kai, “Kudra kiapawdringai kaika tamangeale, mwainu ku tabangate?

¹⁸ Anika kathane kikai maelane ka zuku ka umawmase ku siawlri kela kiaseasene ki Twaumase?”

¹⁹ Ala kirimu ku Yesu iya kai iniane, “Ngidrakala si katwase! Kwini salrwanesu pawadringainga muswane.”

Autaluvaivadhane ku puku ki Twaumase

²⁰ Yakai kudra la swa Palrisai ku wakela kivaga ki Yesu, pakai ku athingalane lukamani lwigane ku autaluvaivadhane athingalane ku puku ki Twaumase. Ku Yesu la tubalre, “Kudra autaluvaivadhane athingalane ku puku ki Twaumase kaika amaka dulrwane drele arakai kai maca.

²¹ Kadrwa ku umawmase ku lri iya kai, ‘Drela kawvai yakai kai!’ si ‘Kawvai yakai kavai!’ Asi lwiyane ku puku ki Twaumase yai yakai ki kidremedreme numi!”

²² La pacungulu iya kai ki lasituini: “Lri darurunga kwini vai, mwarikai numi ku adulrwane drele ku akelane ku amagagemegemane ku puku kwini Lalake ki Umawmase ka vai, ai kai numi lri maka drele.

²³ Yakai ku umawmase ku lri iya kai numiane, ‘Drela yakai kavai!’ si ‘Drela yakai kai!’ Kunumi madha katwatwase mulatadre si drele, si la madha tupapapalra liniane.

²⁴ Lri mia ki lrikace salraelre kai subelebelenge, twalai talikai kai palrikace pakela talikai kavai, lu kela ku vai ki Lalake ki Umawmase lrika ngimiyaiya kikai.

²⁵ Ai kwi lasu lri pakanaswalana tarumara ku makaalra ku akipakwalriane, si kicilri kai ki zidai ki umawmase.

²⁶ Mia saka zidai ki Nua, ku akelane ki Lalake ki Umawmase ku vai lrika ngimiyaiya.

²⁷ Kudra zidai kwini ku umawmase paiya ku tapiapiane kanekane ungungulu pakarudrarudrange, pakela kudra sa mudaane ki varukuru ku Nua ku vai, la kela ku telebe, si ala amudu liniane.

²⁸ Kudra vai ku akelane ki Lalake ki Umawmase, maiyalri mia ki zidai ki Lute; kudra zidai kwini ku laumawmase paiya ku tapiapiane lini kanekane, ungungulu, tusiwbawbai, la tuumawmawma si tudadaane.

²⁹ Ala kudra sa daruru ku vai ku takatwasane ki Lute kwini ki Sudume ka cekele, kudra thilaru ka apwi twalai subelebelenge mulebe, si alra amudu liniane makanaelre.

³⁰ Kudra lrika autaluvaivadhane athingalane ki Lalake ki Umawmase kwini vai lai lrika miyaiya kikai.

³¹ “Luka vai kwini, ku yakai ki cavalri, madha mulebelebe si mudaane malra ku lamanemaneini; thadaalrane, ku yakai umawma kawaungu, la mialri madha mubalribalriu.

³² Ngwalringau madu ku takipadradresengane ku taelrelre ki Lute!

³³ Kudra apia palakebe ku niakeini, lri pawciilrilringa ki niakeini; ala kudra pawacilri ku niakeini, lri palakebe ki niakeini.

³⁴ Nau pelaela numiane, kwini vai lukamaungu, ku tadrusa ku umawmase wapece taelre itapeapecane, lri kiluku ku tangea, lai asuru ku tangea;

³⁵ ku tadrusa ku ababai taelre pasilribulribu, ku tangea lai kiluku, ku tangea lai asuru.”

³⁷ Ku lasitu la kivaga, “Tamatama, kilakikai lri ikai inu ngimia?” Ku Yesu la tubalre, “Luka taikaiyane ki wapacai ka kinawmasane, ku kwau lri ikaai kwini irurubu.”