Luka 1 - Ngudradreadrekadhane Ka Sisiu 魯凱語聖經

Sapathagilane ka vaga

¹ Mabelenge ka Thiwpilu: Yakainga ku laumawmase ku kiapuawngane ki apapacasane si tuhungu, pelaelaela ku la ngiamianga ikai mitane ku laawngane.

² Ku tapelaelane lini laka singikai kwidra ki wadrelenga sakapathagilane patakamacamaca ku tangimiane kilakikai, si kudra tapelaelane kwidra ki napasalraelrenga kai ki matiakiragai ka vaga.

³ Kikai patuelre singiapathagilinga naku ngutatiki drele tupudriadringai, lakamani ku kidremedremeli nau singikai ku tamasakaikaiyane papia muswane pelaela,

⁴ ku pacugane lani thingale amiaku muswane kwini kibulrubulrusu ku vaga ala ka patengatengane.

Wayugingi ku akitulalakane ki tarapabanau ka Yuhani

⁵ Ku Hirudi ka talialalai sa icengecenge magagemegeme ki swa Yuda, yakai ku tangea ku barakalai, ka sia Zakaria, ka papapalra ki Abiya ka barakalai; ku labaibaini sia Ilrisabethe, mialri ka mwabaibalrithi ki tai Arungu.

⁶ Lu drele ku Twaumase, mararamau kwini tadrusa ka taramadringelrese ku takaumawmasane, ka kiapapawlringalringau pangimia ku padradrekase si kakwakudhane ki Tamatama patuelre.

⁷ Laka kadrwa ku lalake lini, asi lwiyane ku Ilrisabethe kai maka twalalake, laka tarudrawdrangenga mararamau.

⁸ Yakai saka minakavalane, ku Zakaria la icengecenge ka awnganeini, ikai cucubungu ki Twaumase kipuawngane ku awngane ki barakalai.

⁹ Singikai ku tapiapiane ki barakalai ku takuzibikane lini, kai lasu amani ku lri mudaane ki daane ki Tamatama si patarumara ku sapasangulrelremane ka apwi.

¹⁰ Kai lasu sapatarumaramara ku sapasangulrelremane, ku mapapangale la ilatadre inulrinulri.

¹¹ Ala kirimu, ikai ku sasiakawlu ki Tamatama utaluvaivai acegecege ikai tali vanale ki tapatarumaramarane;

¹² ku Zakaria sadrele, la kathathiburu si mukuludru.

¹³ Ai kwidra sasiakawlu belenge amia kai iniane, “Zakaria, madha mukuludru! Ku Twaumase kialalranga ku inulrisu; ku labaibaisu ka Ilrisabethe lri pasikai muswane tulalake ku sawvalai, lri sunaganesu iniane pasi Yuhani.

¹⁴ Lri kiraragaisu; si lai takaalra ku umawmase ku ngwalai ki takitulalakaneini si kiraragai.

¹⁵ Lu drele ku Tamatama, kwi lasu lrika saniange ka umawmase. Sanaka baava, lri kai maka ungulu; ikai ki barange ki tinaini, kiasuetenga ki Siri.

¹⁶ Lrika amanini ku lri sangiluku ki takaalra ki swa Iseraylri pasiwlriwlri mwa ki Tamatama ka Twaumase lini.

¹⁷ Lrika amani ku aswala ki Tamatama, ka makeecenge si sapukwane, mia ki yuginsia ka Ilria. Lrika amani ku twapela pakakadalru ki marudrawdrange si lalalake, si pasiwlriwlri ki wabaebaebalre ka umawmase, si pangukakai ki kadalranane ki madringelrese si malrigili; lri paralubu ki umawmase pakidredresenge ki Tamatama.”

¹⁸ La iya kai ku Zakaria ki sasiakawlu belenge, “Lri satalwaku ki manemane si thingale ki kikai? Kai tarudrawdrangenga naku; la mialri ka tarudrawdrangenga ka labaibaili.”

¹⁹ Ku sasiakawlu belenge la iya kai, “Amaniaku ku acegecege icucubungu ki Twaumase ka sia Gaberaile; kiasikawlaku pelaela muswane, kai matiakiragai ka vaga.

²⁰ Ai, ngwalai kwi kaika takasalrwanesu kai tapelaelaneli, sakaiyana kela ku angimiane kwini lavaga, lri kamenenesu, pakela ku lungimianga ku vai ku kiketeketeli ala lri dulrusu avavaga.”

²¹ Kikwidra, la mukalavalava ku mapapangale ki Zakaria, si kaithingale lukamanemane ku kawlaini idaane ki daane ki Twaumase.

²² Ala samulatadrenga, kai maka kawariva liniane, kai mapapangale ala thingale, kai lasu sa idaane ki daane ki Twaumase ala ka wadrele ku maburusi. Kai lasu kai maka avavaga, la pangua pakilriwnga ku alrima pathingale ku tangimiamiane.

²³ Sa palikai ku takipuawngananeini ikai ki daane ki Twaumase, kai Zakaria la katwase mutavanane.

²⁴ La kai tarathainu, kwini labaibaini ka Ilrisabethe la ngimia katawbaliri, si taralrima ka dramare kai mulatalatadre.

²⁵ Kwini alisu la iya kai, “Ku Tamatama marasiakai nakwane, mwalra ku kaininuli icucubungu ki mapapangale.”

Peaelaela pakanaswala ku akitulalakane ki Yesu

²⁶ Sa taraenemenga ka dramare ku takatawbalirane ki Ilrisabethe, ku Twaumase siakawlu ki sasiakawlu belenge ka Gaberaile pamwa tali Galrilri ki vaeva ka cekele ka sia Nazarethe,

²⁷ lri pelaela ku vaga ki tangea ka tawvailekete ka sia Malria; kikai tawvailekete kiatusiasilanganenga ki tai Davidi ka sia Yusepe.

²⁸ Ku sasiakawlu ki Twaumase mwa cucubungu iniane, iya kai, “Ani ikai ku sulivatane muswane! Kiasubulrubulrusu, ku Tamatama ani tapalra muswane!”

²⁹ Ku Malria ngwalai kwini vaga ki sasiakawlu, la kathathiburu turamuru si kai kaliapai ku kidremedremeini, la apapelaelaela kidremedremedreme ku pacugane kwini ki vaga.

³⁰ Ku sasiakawlu belenge la iya kai iniane, “Malria, madha mukuludru, asi lwiyane ku Twaumase swabulrubulru muswane.

³¹ Lri katawbalirisu si tulalake ku vaeva ku sawvalai, sunagananga pasi Yesu.

³² Lri kamani ku sanianiangenga ku takaumawmasaneini, la lri kipasudalepe ka Lalake ki Abebeelengenga ka Twaumase. Ku Tamatama ka Twaumase lri paacegecege iniane si pawcungulu ku taetalane ki cucungulaneini ka talialalai ka Davidi.

³³ Lrika palralrawthu atalialalai ki tai Yakubu, ku lrika pukuini atalialalai kadrwa ku apalikaiyane pakela lumamilringi!”

³⁴ Ku Malria la iya kai ki sasiakawlu belenge, “Kunaku tawvaileketeana naku ka kaina marudrange, watumane si ikai ku ngimiyaiya kwini?”

³⁵ Ku sasiakawlu belenge la tubalre iya kai, “Ku Siri lri mulebe mwa ki kinawmasanesu; ku puku ki Abebeelengenga ka Twaumase lri lakebe muswane. Lakamani, kwini lri kitulalake ka saniange ka daini Lalake ki Twaumase lri kiiya.

³⁶ Drela ki retesanesu ka Ilrisabethe, unu tarudrawdrangenga, kai lri maka tulalakenga la iya iniane ku palrapalra, ai kikai taraenemenga ka dramare ku takatawbaliraneini.

³⁷ Asi lwiyane ikai ki Twaumase, kadrwa ku navaevanga ku kaika amakadulrwaneini tumane.”

³⁸ Ku Malria la iya kai, “Sasiakawlaku ki Tamatama; aningimia kai vagasu ikai ki kinawmasaneli.” Ala katwase ku sasiakawlu belenge kidaili iniane.

Ku Malria walrikape ki Ilrisabethe

³⁹ La kai tarathainu, ku Malria la katwase, kiraririimu papia tali lregelrege, sa darurunga kwidra ki taluvaale ka cekele Yuda.

⁴⁰ La mudaane ki daane ki tai Zakaria, si kikawriva ki Ilrisabethe.

⁴¹ Ku Ilrisabethe sa kilalra ku vaga ki Malria, kudra yabarangane ku lalake la itituku ngivelevele. Ku Ilrisabethe la kisuete ki Siri,

⁴² si tawtau akwadrau iya kai, “Kusu ikai ki laababai makisubulrubulrubuulrungasu; kwini yabarangane muswane kwini lalake maiyalri kisubulrubulru!

⁴³ Kusu ka tina ki Tamatamali kai kelasu lrikape nakwane, manemane si sudalepaku?

⁴⁴ Sa kilalraku ku lingau ki sakikawrivanesu, kai yabarangane nakwane kai lalake la itituku ki sakiararagai.

⁴⁵ Ku masalru ku takiyaneini ki Tamatama, ka lri tara ngimia kwini ababai lri kaesai turamuru!”

Sadrengedrengerane ki Tamatama ka senai ki Malria

⁴⁶ Amia kai ku Malria: Kai kidremedremeli wadrengedrengere ku takasanianganane ki Tamatama;

⁴⁷ kai abakeli kiararagai ki Takipalribulribulaneli ka Twaumase;

⁴⁸ asi lwiyane ku Twaumase ngwalringalringau ki makukulrungu ka sasiakawluini ka ababai. Twalai kaikameane, sanaka umawmase ala kiasubulrubuulru lri iyaiyanga nakwane,

⁴⁹ asi lwiyane kai sapupukwanenga ka Twaumase pasiakai nakwane pangimia kudra maadrau ka awngane. Ku naganeini sanianiyangenga;

⁵⁰ papia kwidra ki mwasakene iniane ka umawmase wabaai ku thalradhane, pakela lumamilringi.

⁵¹ Wasege ku sapukwane ka tabalanganeini, si mwalra kudra kidredredreme patuelre ki ngiakamiane ka umawmase.

⁵² Wamalra kwidra ki sapukwane ka talialalai twalai ki taetalaneini lrudrulu pulebe; la alra parwabelenge ki alelebe ka umawmase.

⁵³ Wamalra kwidra ki mwabaisi ka umawmase pakane pakabucuku ku malimeme ka akaneane, kwidra ki maesaesaesai ka umawmase la pamaliwnawnai pakatwase.

^54-55 Kwini lasu pangiamia ku kiketeketeini ki cucungulaneta, paralubu ki sasiakawluini ka Iseraylri. Makalithi ki Aberahame si kathalrai iniane, si padaruru ki mwabaibalrithi ka lagagane, pakeela lumamilringi!

⁵⁶ Ku Malria la ikai ki tai Ilrisabethe taratulru ka dramare, ala mutavanane.

Takitulalakane ki tarapabanau ka Yuhani

⁵⁷ Ku Ilrisabethe kudra atulalakaneini ka vai wadarurunga, la tulalake ku vaeva ka sawvalai.

⁵⁸ Ku pasiagiagisi si retesaneini sa kilalranga ku baai ki Tamatama iniane ku maadrau ka takikakurwane, twapapalra iniane kiraragai makanaelre.

⁵⁹ Sangilribatenga ku nimakapitulane ka vai ku takitulalakane kwini ki lalake, kwini lalasu la kela gelregelre tulrisi iniane, si kidremedreme ku arakai ku nagane ki tamaini pasi Zakaria iniane.

⁶⁰ Ai kwini tinaini amia kai, “Ini! Lri pasi Yuhanita.”

⁶¹ Ku laretesane la iya kai iniane, “Kudra ki laretetesanesu yai, kadrwa ku sia nagane ku miyaiya kai ku nagane.”

⁶² Kwini lalasu la papia ki tamaini pangwapakilriu ara alrima kivaga, lri pasi aneaneta kai ki lalake iya.

⁶³ Kai Zakaria la pamalra ku vaeva ku tapacapacasane ka baali, la pacase pibelenge iya kai, “Ku naganeini sia Yuhani.” La makitu kasamali makanaelre.

⁶⁴ Twalai kwini, kai Zakaria ala dulrunga kawriva, kai lasu la avavaga drengedrengere ki Twaumase.

⁶⁵ Ku lapasiagiagisi la kasamali turamuru. Kikai matiakiragai la mapelaelaela pasalraelre tali Yuda ki ngwalralregelrege;

⁶⁶ kudra kialalra ku laumawmase la makitu kidremedremedreme, “Kikai lalake lai lrika ngitwatumane ku takaumawmasaneini?” Asi lwiyane athingalane ka yakai ku puku ki Tamatama tapalra iniane.

Yugingi ki Zakaria

⁶⁷ Ku tama ki Yuhani ka Zakaria kiasuete ki Siri, la pelaelaela ku vaga ki Twaumase iya kai:

⁶⁸ Ala tadrengedrengere ki Tamatama ka Twaumase ki swa Iseraylri! Siaraparapale ki laumawmaseini, si pangukerenganenga liniane.

⁶⁹ Patwalai ki daane ki Davidi ka sasiakawluini, pasiakai mitane pacegecege ku tangea ka wadulru ki manemanenga ka Takipalribulribulane.

⁷⁰ Twalai kunadruma, pangwakainga ki layuginsia pelaela:

⁷¹ Kwi lasu lri palribulu mitane pakidaili ki badhata, lalri kalrabuthuta ku puku ki sanaka magirimurimucu mitane ka umawmase.

⁷² Lri papia ki cucungulaneta baai ku kalithane, si pulringalringau ku sanianiangenga ka samakaketeketane.

^73-75 Palraingi ki cucungulaneta ka Aberahame, si kiketekete ku pacegecege ku samakaketeketane ku apalribulane mitane pakidaili ki badhata, si kikai tapanianianiakaneta ikawmasane, lri dulrungata masasigarangane icucubungu iniane, arakai ku bulane si mulecegane pasikaikai iniane.

⁷⁶ Lalakeli, lri kipakamanisu ku lrika yuginsia ki Abebeelengenga ka Twaumase. Lrika amanisu ku aswalala kudra ki lrika Tamatama, pasikai iniane padulru ku kadalranane;

⁷⁷ lri pelaelasu ki mapapangaleini: Ngwalai ku takipacepane ku pasalrivane lini, kwini lalasu lri tarumara ku akipalribulane.

⁷⁸ Kai Twaumaseta mathalrai kasulrapele; la alra kwidra thelare ki sapalribulane paledra mitane,

⁷⁹ la patwalai subelebelenge paledra kwidra ki sanaka panianianiake itailebe ki alalingu ki apacadhane ka umawmase, si arake naiane dadavace ikai ki masulivate ka kadalranane.

⁸⁰ La adiadili kadradrau kwini lalake, karakace ku kinawmasane si kidremedreme. La ikaikai ubulane kwini lasu, pakeela kudra takirimwaneini utaluvaivai adrelane ikai ki swa Iseraylri.