Lrivi 9 - Ngudradreadrekadhane Ka Sisiu 魯凱語聖經

Ku Arungu patarwamara

¹ Sa darurunga ki samakavalrulu, sakakaiyane ki tatulrepengane ki tapacegecegane, ku Musi la dawlu sarubu ki Arungu si lalalakeini, si lamarudrange ki swa Iseraylri.

² La pelaela ki Arungu, “Kusu iluka ku vaeva ku mwadringadringai ku lrulai ka sawvalai ka lwange tu Balrithane ki pasalrivane ka lrisi, laka vaeva ka mwadringadringai ka balase ka nikiubawbalane ka kiu tu Lama ka lrisi si patarumara ki Tamatama.

³ Iluka la iya ki swa Iseraylri ku vaeva ka mwadringadringai ka balase ka kakiuane Balrithane ki pasalrivane ka lrisi, la ilukana ku taracailinga, ku mwadringadringai ka lrulai ka lwange si vaeva ka lrulai ka nikiubawbalane ka kiu tu Lama ka lrisi,

⁴ vaeva ku lrulai ka sawvalai ka lwange si vaeva ka balase ka nikiubawbalane ka kiu tu Sulivatane ka lrisi. Kwi lalasu lri malra kilakikai nipaibwane ku lawlau ki ulrive ka Taleke ka lrisi patarumara ki Tamatama. Kwini lalasu lri tara pangimia kikai patueelre, asi lwiyane kaikameane ku Tamatama lri adrelane ikai liniane.”

⁵ Kwini lalasu la iluku kwini cunu ki Musi liniane patuelre mwa cucubungu ki Alrivilrivi ka balrawbau; ku mapapangale makanaelre yasarubu ikai kwini sukusukubu ki Tamatama.

⁶ Ku Musi la iya kai, “Ku Tamatama wadrekase numiane pia kilakikai, pakai ku apathingalane numiane ku lriguini.”

⁷ La pacungulu, kawriva ki Arungu, “Kusu pangimia ku drekase ki Tamatama, mucucubungu ki tapatarumaramarane patarumara ku Balrithane ki pasalrivane ka lrisi si Lama ka lrisi, ngipapasikai si pasikaai ki mapapangale kimupasalriu; la patarumara ku sapatarumarane, pasikai ki mapapangale mupasalriu.”

⁸ Ku Arungu la mucucubungu ki tapatarumaramarane, si culu ku lrulai ka sawvalai ka lwange ngipapasikai tu Balrithane ki pasalrivane ka lrisi.

⁹ Ku lalalakeini la iluku ku erai mucucubungu iniane, la arakai ku galawgau depe ku erai, si sakidri ku erai pwa ki nitulawngane ki tapatarumaramarane, ku tedrane la gugu pwa ki taikaiyane ki tapatarumaramarane.

¹⁰ La pacungulu, singikai ku tapangukaiyane ki Musi ki Tamatama si drekase malra ku lamace ki Balrithane ki pasalrivane ka lrisi, drusa ka pede, si takatharirane ki athai patuelre pubelenge ki tapatarumaramarane si patarumara.

¹¹ La malra ku lrangici ki lwange si beate iluku mulatadre ki tasuladhane si lama.

¹² La mialrini culu ku sapatarumarane ngipapasikai tu Lama ka lrisi. Ku lalalakeini la iluku ku erai mucucubungu iniane, la malra ku erai gugu thalringulu ki tapatarumaramarane.

¹³ Ala, malra ku awlru si labeate baai iniane, la malra kilakikai pubelenge ki tapatarumaramarane lama.

¹⁴ La pacungulu, sinau ku tali adringane si vagisi, la pikai belenge ki Lama ka lrisi lama patarumara.

¹⁵ Ku Arungu ala pasikai ki mapapangale patarumara. Wamalra ku sapasikaiyane langai ki pasalrivane ki mapapangale ku balase ku kiu, la culu, la singikai ku tapangimianeini ngipapasikai patarumara ku Balrithane ki pasalrivane ka lrisi, patarumara kwini sawvalai ka kiu.

¹⁶ La kela iluku ku Lama ka lrisi, si singikai ku kakudhane patarumara.

¹⁷ Kwi lasu la mialri patarumara ku Taleke ka lrisi, wamalra ku milrikinku pubelenge ki tapatarumaramarane si lama patarumara. (Ki vaivai ki mialrealre patarwamara ku Lama ka lrisi, la padrima patarumara kikai ki lrisi.)

¹⁸ La culu ku sawvalai ku lwange si balase ka nikiubawbalane ka kiu, pasikai ki mapapangale patarumara ku Sulivatane ka lrisi. Ku lalalakeini la malra ku erai mucucubungu iniane, la malra kwini erai gugu thalringulu ki tapatarumaramarane.

¹⁹ Ku Arungu la malra ku lamace ki sawvalai ka lwange si balase ka nikiubawbalane ka kiu patuelre,

²⁰ pubelenge ki tuku ki sapatarumarane, ku Arungu la lama ku lamace pibelenge ki tapatarumaramarane,

²¹ si singikai ku drekase ki Musi malra ku talikai ki tuku ku beate si vagisi tunipawkalrivilane ka acebe si patarumara ki Tamatama.

²² Ku Arungu sa maka patarumaranga ku Balrithane ki pasalrivane ka lrisi, Lama ka lrisi, Sulivatane ka lrisi, la ciliki ku alrima si subulrubulru ki mapapangale, ala mulebe twalai ki tapatarumaramarane.

²³ Ku Musi si Arungu la mudaane ki Alrivilrivi ka balrawbau, ala twalai kwini mulatadre, si subulrubulru ki mapapangale. Ikai kwini, ku draredrare ki Tamatama la utaluvaivai papia ki mapapangale.

²⁴ La pangitutuluku, ku Tamatama pulebe ku apwi si lama kwini ki Lama ka lrisi si lamace ka yabelenge ki tapatarumaramarane. Ku mapapangale sa drele ku tangimiane kikai la makitu karaleale kiraragai, si guruthungane ikai cakena.