Lrivi 5 - Ngudradreadrekadhane Ka Sisiu 魯凱語聖經

La ngwakai ki Balrithane ki pasalrivane ka lrisi ka awngane

¹ Kilakikai tangimiamiane amani ku ngwakai ki Balrithane ki pasalrivane ka lrisi. Lwiyasi ikai ku kiadawlu pwa ki takisaibaibangane ku apelaelane ku dreleini la kai mubangalre pelaela kwini dreleini, ku thingaleini, kwini lasu yakai ku pasalrivane, lri tara siamece ku tapasalrivane.

² Lwiyasi ikai ku kaika waranau la kiraisi takela kwidra kaika nitumabulane ki kakudhane ka lamanemane, ku wapacainga ka waudriwdripi, nilapulapwane, lawagulagulai, kwini lasu kai mabulanga; sana pulringau ku tapianeini ala ka pasalriu, kia tupasalriunga.

³ Lwiyasi ikai ku kaika waranau la kiraisi ku kaika mabula ka lamanemanenga ka singikai ki kinawmasane ki umawmase, adravane ka manemane, kwini lasu kaika mabulanga; sana pulringau ka pasalriu ku tapianeini, kia tupasalrivanenga.

⁴ Lwiyasi ikai ku kaika waranau la capange kiketekete, adravane ka mathariri ka malisi, sana pulringau ala ka pasalriu kia tupasalriunga.

⁵ Ku umawmase lu ikai ku pasalrivane lri tara ngipapelaela ku pasalrivaneini.

⁶ Lri tara thavungu pakai kwini ki pasalrivane iluku ku vaeva ku tina ka nikiubawbalane ka kiu ku tina ka kiu, si patarumara ki Tamatama tu Balrithane ki pasalrivane ka lrisi. Ku barakalai lri pasikai ki pasalrivaneini pangimia ku lrisi ki samupasalrivanane.

⁷ Lwiyasi ikai ku umawmase ku kai maka walangai ku vaeva ka kiu, kwini lasu lri tara thavungu pasikai kwini ki lapasalriuini iluku ku drusa ku penai ku tavagu mucucubungu ki Tamatama, ku vaeva lri tu Balrithane ki pasalrivane ka lrisi, ku vaeva lri tu Lama ka lrisi.

⁸ Kwini lasu lri iluku ku adhadhame mwa ki barakalai; ku barakalai lri paswala patarumara ku Balrithane ki pasalrivane ka lrisi. Lri celra ku lre ki adhadhame, ai madha pakisalrusalru ngetele ku awlruini,

⁹ ala lri malra ku erai paralikiliki pithili ki tapatarumaramarane, ku tedrane lri gugu pikai ki taikaiyane ki tapatarumaramarane. Kikai yai amani ku Balrithane ki pasalrivane ka lrisi.

¹⁰ Ala lri pacungulu, kwini lasu pasusu ku kakudhane patarumara ku vaevanga ku adhadhame tu Lama ka lrisi. Ku barakalai lri pasikai ku pasalrivane kai ki umawmase patarumara ku Balrithane ki pasalrivane ka lrisi, kwini lasu lai lri kipacepe.

¹¹ Lwiyasi ikai ku kai wadulru langai ku drusa ka penai ka tavagu, lri maka ngipapasikai ki pasalrivaneini patarumara ku vaeva ka kukingi ku malaelamenge ka milrikinku tu Balrithane ki pasalrivane ka lrisi, ai madha drimadrima ku lawlau ki ulrive si sangwalreme, asi lwiyane kikai yai Balrithane ki pasalrivane ka lrisi, kaika Taleke ka lrisi.

¹² Lri iluku ku milrikinku mwa ki barakalai; ku barakalai la lri malra pasuete ki alrima ku milrikinku, tusapakiramavane ki patarwamaranga pakanaelre, pubelenge ki tapatarumaramarane si lama, tu Apwi ka lrisi patarumara baai ki Tamatama. Kikai yai amani kudra Balrithane ki pasalrivane ka lrisi.

¹³ Ku barakalai lri pasikai ku pasalrivane kai ki umawmase patarumara ku Balrithane ki pasalrivane ka lrisi, kwini lasu lri kipacepe. Ku tedrane ku milrikinku la lri tuthadalrane ku kakudhane ki Taleke ka lrisi baainga ki barakalai.

Kakudhane ki Samupasalrivanane ka lrisi

¹⁴ Ku Tamatama wabaai pelaela ki Musi kilakikai kakudhane.

¹⁵ Lwiyasi la ikai ku umawmase ku kaika waranau si kai baai ku naika apatarumarane ki Tamatama ku mabula niyane patarumara, kwini lasu lri tara thavungu ki pasalrivaneini si iluku ku vaeva ku mwadringadringai ku balase ka nikiubawbalane ka kiu, si patarumara ki Tamatama tu Samupasalrivanane ka lrisi. Ku luludane ki kiu lri singikai ku takelretane ki Alrivilrivi ka taikaikaiyane.

¹⁶ Kwini lasu lri tara thavungu kudra naika abadhaneini, ku drumane ala lri padrimana ku luka idai lrika mapusale. Lri malra kilakikai si baai ki barakalai; ku barakalai lai lri pasikai ki pasalrivaneini patarumara ku balase ka nikiubawbalane ka kiu tu Samupasalrivanane ka lrisi, kwini lasu lai lri kipacepe.

¹⁷ Lwiyasi la ikai ku umawmase ku kaika waranau pasalriu, pasalriu ku kaika palraingi ki Tamatama, yakai ku pasalrivaneini, lri tara siamece ku pasalrivaneini.

¹⁸ Lri tara iluku ku vaeva ku mwadringadringai ku balase ka nikiubawbalane ka kiu tu Samupasalrivanane ka lrisi patarumara. Ku luludane ki kiu lri singikai ku takelretane ki Alrivilrivi ka taikaikaiyane. Ku barakalai lri pasikai iniane pia ku Samupasalrivanane ka lrisi, kwini lasu lai lri kipacepe.

¹⁹ Kikai yai pasiakai ku tapasalrivane thaele ki Tamatama si patarumara ku Samupasalrivanane ka lrisi.