Lrivi 3 - Ngudradreadrekadhane Ka Sisiu 魯凱語聖經

Kakudhane ki Sulivatane ka lrisi

¹ Lwiyasi la ikai ku umawmase ku lri patarumara ku Sulivatane ka lrisi, lri tara pilri ku kadrwa ku takatumanane ku sawvalai ka lwange ku tina ka lwange, la iluku pucucubungu ki Tamatama.

² Ku alrima ki lasu lri pubelenge ki awlru ki sapatarumarane, ikai ki lrawlrawdru ki Alrivilrivi ka balrawbau culu kwini ki lwange, ku ngwakai ki Arungugu ka barakalai lri malra ku erai ki sapatarumarane paralikiliki thalringulu ki tapatarumaramarane;

^3-4 kwi lasu lri malra kilakikai, amani kwini yatali adringi si yatali belenge ka lamace, drusa ka pede si lamace ki pede si takatharirane ki athai gelregelre, si lama patarumara ki Tamatama tu Sulivatane ka lrisi.

⁵ Ku barakalai lri malra kikai pubelenge ki tapatarumaramarane, paelre ki Lama ka lrisi patarumara. Kikai tasangulremane ki Apwi ka lrisi amani ku kiragai ki Tamatama.

⁶ Lwiyasi ikai ku lri patarumara ku nikiubawbalane ka kiu ku kakiuane baai ki Tamatama tu Sulivatane ka lrisi, lri tara pilri ku mwadringadringai ku balase ka kiu si tina ka kiu.

⁷ Lwiyasi patarumara ku lrulai ka nikiubawbalane ka kiu, lri iluku pucucubungu ki Tamatama,

⁸ ku alrimaini lri pubelenge ki awlru ki sapatarumarane, ikai kwini ki cucubungu ki Alrivilrivi ka balrawbau culu, ku barakalai lri malra ku erai ki niculwane paralikiliki thalringulu ki tapatarumaramarane;

^9-10 kwi lasu lri malra kilakikai, amani kwini lamace, si twalai ki bukulu gelregelre ka maricuru ka tawthu, paelre ki tali adringi si lamace ki tali adringi, drusa ka pede si lamace ki pede, si takatharirane ki athai malra gelregelre, la lama patarumara ki Tamatama tu Sulivatane ka lrisi.

¹¹ Ku barakalai lri malra kilakikai pubelenge ki tapatarumaramarane lama, tu Apwi ka lrisi patarumara ki Tamatama.

¹² Lwiyasi la patarumara ku kiu, lri tara iluku mucucubungu ki Tamatama.

¹³ La arakai ku alrima drepete ki awlru ki sapatarumarane, icucubungu ki Alrivilrivi ka balrawbau culu, ku barakalai lri malra ku erai ki niculwane paralikiliki thalringulu ki tapatarumaramarane;

^14-15 kwi lasu lri malra kilakikai, amani kwini yatali adringi si yatali belenge ka lamace, drusa ka pede si lamace ki pede, si takatharirane ki athai gelregelre, la arakai ku apwi lama patarumara ki Tamatama tu Sulivatane ka lrisi.

¹⁶ Ku barakalai lri malra kilakikai pubelenge ki tapatarumaramarane si lama, tusangwalreme ka Apwi ka lrisi. Tamatamane patuelre ku lamace.

¹⁷ Kunumi ka swa Iseraylri, adravane ka yakai inu, madha kanekane ki lamace si erai. Kikai lrika palralrawthu ka apasuswane numi ka kaika nipalraingane ka padradrekase.