Lrivi 27 - Ngudradreadrekadhane Ka Sisiu 魯凱語聖經

Kakudhane ki patarwamara

¹ Ku Tamatama wacunu ki Musi,

² Papia ki swa Iseraylri baai pelaela kikai lebe kai kakudhane. Ku umawmase lulri sawlri kwidra nipawkalrivilane ku puvagaini papia ki Tamatama, lri singikai kikai lebe kai kakudhane sawlri kwini puvagaini.

^3-7 Singikai ku takelretane ku hiuzenge ki Alrivilrivi ki taikaikaiyane: Ku pwacacuganenga—twalai ki taramapusale ku caili pakela ki taramanemele ku caili: Ku sawvalai lri pakamalrimale ku gingi ka paisu. Ku ababai lri pakamatulrulu ku gingi ka paisu. Ku yacengecenge—twalai ki taralrima ku caili pakela ki taramapusale ku caili: Ku sawvalai lri pakamapusale ku gingi ka paisu. Ku ababai lri pakamangeale ku gingi ka paisu. Ku lavavalake—taralrima ku caili papulelebe: Ku sawvalai lri pakalrima ku gingi ka paisu. Ku ababai lri pakatulru ku gingi ka paisu. Ku tarudrawdrange—taramanemele ku caili papubebelenge: Ku sawvalai lri paka 15 ku gingi ka paisu. Ku ababai lri pakamangeale ku gingi ka paisu.

⁸ Kwini lri sawlri ku umawmase alaiyasi ngwalai ki matikurwane la kai dulru singikai kwini ki takelretane sawlri, lri iluku mwa ki barakalai, la lri ka amani ku barakalai ku wakelrete ku adulrwane ki pukuini kelrete ku apakathainwane.

⁹ Lwiyasi kwini puvagaini laka ngwakai ki sapatarumarane ka nilapulapwane si baai ki Tamatama, kikai saceacebe lrika papia ki Tamatama ka saniange.

¹⁰ Kwini lri sawlri ku puvagaini ka umawmase kai lri maka pabalrithi ku drumane ku nilapulapwane—ku mathariri balrithi ku malisi, ku malisi balrithi ku mathariri, lwiyasi ikai ku wabalrithi, kwini drusa kwini nilapulapwane lrika Tamatamanenga.

¹¹ Lwiyasi kwini nipuvagane laka ngwakai ki kaika mabula ka waudriwdripi, amani ku kaika apatarumarane ki Tamatama tusapatarumarane, kwini lri sawlri ka umawmase lri iluku kwini nilapulapwane mwa ki barakalai.

¹² Ku barakalai lri singikai kwini ki nilapulapwane ku takatharirane ku takalisiane tuthaininu ku nidange, thaininu sana iya lri ka thaininu.

¹³ Lwiyasi nau sawlri kwini nilapulapwane iyaiya, lri tara baai ku natakathane ku salangadhane, si lai drimana paka taingeane ki nipau lrimane.

¹⁴ Ku umawmase la patarumara ku daane ki Tamatama, lri ka amani ku barakalai ku singikai ku takathane ki daane ku mathariri ku malisi, luka thainu ku kelreteini lri pakathainu baai.

¹⁵ Kwini wabaai patarumara ka umawmase lwiyasi nau sawlri iya kwini ki daane, lri tara baai ku natakathane ku salangadhane kwini ki daane, si padrimana ku taingeane ki nipau lrimane, ala lri kisawlri ku daane.

¹⁶ Lwiyasi ikai ku mucunguluini ku kadaengane lri kivala patarumara ki Tamatama, lri ka amani ku barakalai ku wakelrete ku tapakathathane lu paivai si kelrete, lwiyasi ka wasabulu madu ku mapusale ki kukingi ku sapaivai ki mugi ka kadaengane, lrika mangeale ku paisu ka gingi.

¹⁷ Lwiyasi ka pabilrili ki Takipangilralraingane ka caili ala makakai patarumara, lri singikai ku nikelretane baai.

¹⁸ Lwiyasi ka patarwamara sangilribatenga ku Takipangilralraingane ka caili, ku barakalai lri singikai twalai kwini pakela ki bibiilrili ki Takipangilralraingane ka caili kwini tedrane ka caili si kelrete apakivalavala ku takathainwane.

¹⁹ Kwini umawmase nau sawlri la iyaiya kwini kadaengane, lri tara baai ku natakathainuane, si padrimana paka taingeane ki nipau lrimane.

²⁰ Lwiyasi kai paswala sawlri patwalai ki Tamatama kwini kadaengane, la malra kwini kadaengane kilangai ki druma, kwini lasu kadrwanga ku pukuini nau sawlri iya kwini kadaengane.

²¹ Lu kelanga ki bibiilrili ki Takipangilralraingane ka caili, kwini kadaengane lrika palralrawthunga ka kadaengane ki Tamatama, ka barakaladhanenga.

²² Lwiyasi ikai ku umawmase ku langaini ku kadaengane la baai patarumara ki Tamatama,

²³ lri ka amani ku barakalai ku singiakai twalai kwini pakela ki bibiilrili ki Takipangilralraingane ka caili ku tedrane ku caili kelrete ku takathainwane; kwini lasu lri tara ivaivaai baai kwini salangadhane, kwini paisu lrika Tamatamane.

²⁴ Pakela ki Takipangilralraingane ka caili, kwini kadaengane lri sawlri baai ki napikadaenganane ki mwabaibalrithi iniane.

²⁵ Patuelre ku takathanane ku paisu lri singikai ku takelretane ku kakudhane ki Alrivilrivi ka taikaikaiyane.

²⁶ Kwini aswalaalanga kitulalake ka nilapulapwane, adravane ka lwange ka kiu, Tamatamanenga, lakamani kwidra ku umawmase kai lri maka malranga kwini tungilralraingini si patarumara ki Tamatama.

²⁷ Lwiyasi kwini aswalaalanga kitulalake laka kaika mabula ka nilapulapwane, kwini lasu lri maka singikai kwini natakathane padrima ku taingeane ki nipau lrimane; lwiyasi kai maka sawlri, lri maka singikai ku nikelretane ku takathainwane kilangai ki palrapalra.

²⁸ Kwini kadrwa ku tamasuswane la patarumara ki Tamatama kwini lamanemane, adravane ka umawmase, ka nilapulapwane, ka nimucungulane ka kadaengane, kai lri maka kilangai ki palrapalra, la mialri kai dulru sawlri, lri ka palralrawthunga ka Tamatamane.

²⁹ Adravane ka kadrwa ku tamasuswane patarumara ki Tamatama mialri kai lri dulru sawlri langai, lri tara kipapacai.

³⁰ Kwini wacebe ki kadaengane, adravane ka lataleke ka lamadru, kwini taingeane ki nipau mangealane Tamatamane; kikai nitusaniangane si baai ki Tamatama.

³¹ Lwiyasi ikai ku nau sawlri langai amia ku umawmase, lri tara singikai ku nikelretane ku takathainwane padrimana ku taingeane ki nipau lrimane si baai.

³² Kwini ki mangeale ku nilapulapwane yakai ku vaeva ku Tamatamane. Lu asipi pakela ki sakamangeale, kwini vaeva amani ku Tamatamane.

³³ Ku tawki kai lri maka balrithi, malra kwini malisi si patarumara la mialri kai lri maka arakai ku drumane ku nilapulapwane pawbalrithi. Lwiyasi la arakai ku drumane ku vaeva pawbalrithi, kwini drusa kai lri maka sawlri, kwini Tamatamanenga.

³⁴ Kikai lakakudhane amani ku Tamatama ka yakai lregelrege ka Sinai si baai ki Musi si papia ki swa Iseraylri pelaela liniane.