Lrivi 26 - Ngudradreadrekadhane Ka Sisiu 魯凱語聖經

Ku pasusu kai padradrekase lri kisubulrubulru

¹ Ku Tamatama amia kai, “Kunumi madha daredarepe tusamiamiange; kunumi madha cegecegecege ku nituumawmasane, sadrengedrenge, ku nipapacasane ku lrenege tuasukubane. Tamatamaku ka Twaumase numi.

² Kunumi pasuswa ki Taisadrasadrane ka vai, musakene ki Alrivilrivi ka taikaikaiyane. Tamatamaku.

³ “Alaiyasi paluludu numi ku hulriceli, si paluludu ku padradrekaseli,

⁴ lri singikaiyaku ku kalamanemanane si pawdale baai numiane, lani cebe ku lataleke kwini kadaengane numi, si pumadru ku laivai.

⁵ Kunumi kai lri karetege ku akitalekane numi ku lataleke, pakela luka kalalremane ki budu; kunumi kai lri karetege ku akibuduane numi, pakela ki kalasabulane. Kunumi lri makakelrete ku akaneane, si lri ikai numi ki kadaengane numi sutelrai si ngiesaesaesai.

⁶ “Lri pakasulivataku ki cekele numi, lri kasipelrenge numi pudriadringai ka kadrwa ku thekelrane. Lri mwalraku kwini yakai ki cekele numi ku la sapapacai ka waudriwdripi; lrika kadrwanga ku makaruruburu ikai ki cekele.

⁷ Lri sabelenge numi ki badha.

⁸ Lu talrima numi lri pamalebe numi ki taidai ku umawmase, lu taidai lri pamalebe ki takudrai; lri makitu tubakebake pacai ikai ki dramu numi.

⁹ Lri subulrubulrwaku numiane, lani takalra ku lagagane numi. Lri pasuswaku kwini kiketeketeli numiane.

¹⁰ Lri ikai ku thathatha ku taleke numi, si tara caili kai kaurame, pakela ku wacilri kwini nauladhane si sekete kwini siasanane ku taleke.

¹¹ Lri ikaiyaku ki Alrivilrivi ka balrawbau numiane, si lutuumane kai cilri kidaili numiane.

¹² Lri tapalraku numiane, a Twaumase numiane; lri amapapangale numi nakwane.

¹³ Kunaku Tamatamaku ka Twaumase numi. Nawasangilukaku numiane mulatadre Izipiti, la kai numi aduringa. Watithiraku kwini puku ki wadredrepete numiane, la dulru numi tangerarane dringelresane katwase dadavace.”

Pathavungu ki pasalriu ki padradrekase

¹⁴ Ku Tamatama amia kai, “Lwiyasi kunumi la kai numi kilalra nakwane, si baebalre ki padradrekaseli, lri kipathavungu numi.

¹⁵ Lwiyasi kai numi pasusu ku tinukakudhanane si kakudhaneli, baebalre ki takiketeketaneli,

¹⁶ lri pathavungaku numiane. Lri pulebeaku ku amatikurwane numi, la lrika caemane numi ku gange, kacaeme ku culwane, kadrarumadrimi ku maca, ka kadrwa ku puku. Lri paivai numi, ai kadrwa ku akaesadhane numi, asi lwiyane ku badha lri malra kane kwini paivai numi.

¹⁷ Lri kiecebaku numiane; lri pamalebe ku badha numiane. Ku magirimucu numiane ku umawmase lri kela rathudu numiane, si kukuludru numiane, adravane ka kadrwa ku wasaladhaladha lri mubebere numi.

¹⁸ “Lwiyasi la kilringaunga numi kikai matikurwane la kai numi kilalraana nakwane, lri ngwaladhaku ki pasalrivane numi si padrimana ku taipituanenga ka sapathavungane numiane.

¹⁹ Lri lrumadhaku ki kelrathane si dhawmane numi. Kainaku lri pawdale, ku kadaengane numi lri kameale, mia ki lriwlu ki adreme ku kaulukulane.

²⁰ Adravane kipakwalri numi kaungu kai numi lri kitaleke, asi lwiyane kwini kadaengane kai wacebe, ku ivai kai maka pwa madru.

²¹ “Lwiyasi pacungulu numi kakudrusulru si kiecebe nakwane, la kai kilalra nakwane, lri padrimana naku paka taipitwane pathavungu numiane.

²² Kwidra sapapacai ka waudriwdripi lri pamwaku numiane kwini; la lri kane ki lataleke numi, si thamukulu ki lalapulapu numi, la kaika thaininunga ku tedrane, ku kadalranane lri kaubulunga.

²³ “Lu ngilribatenga kikai la sapathavungane, lwiyasi kai numi kilalrana nakwane, si pacungulu kiecebe kalrase nakwane,

²⁴ lri kiecebaku numiane, lri padrimaku ku sapathavungane paka taipitwane ka silrialribate ki siaswalanane.

²⁵ Lri arakaiyaku ku makaruruburu pathavungu kwini ki tabalreane numi ki tamakaketeketane ka pasalrivane. Lwiyasi la kalrungulrungu numi mwa kacekelane nau kipawdripi iya, lri pulebeaku ku swalrubu pwa numiane; lai lri kivutha numi asalebe ki badha numi.

²⁶ Lri retegaku ku tatwaladhane ki taleke numi, ku tamangeale ku ababai lri maelrelre ku vaeva ku talabwane. Kwini lalisu lri kekekelrete ku pange baai numiane, adravane kanekane numi kai numi lri kabucuku.

²⁷ “Lu ngilribatenga kai ki lasapathavungane, laka thadalraneana numi kiecebe nakwane, kai kilalra nakwane,

²⁸ lri ikaiyaku ki elathaneli kiecebe numiane, lri arakaiyaku ku taipitwane ku sapathavungane ka silrialribate ki siaswalanane pathavungu numiane.

²⁹ Kunumi lri kasilrau numi si malra kane ku beate ki lalake numi.

³⁰ Lri burukaku kwini tasamiamiangane numi lregelrege, si suburu mwalra ku tatulrisiane numi, malra kwini kinawmasane numi cilri pubelenge ki mwakadrulu ka samiamiange. Ikai kwini ki girimucane.

³¹ Lri pulebeaku kwini ki cekele numi; lri kabebetethaku ki tasukusukubane numi, kai tarumara ku pasangulreme numi ku sapatarumarane.

³² Lri paacinilrianaku ku kadaengane numi, adravane ka mwa cekele numiane ka badha lri makitu kasamali!

³³ Lri pakipadradresengaku ku amakaruruburane numiane, malra numiane pasarau mwa sakamaelanane ka kuni. Ku kadaengane numi lri acinilriane, ku cekele numi atawlrakavane.

^34-35 Lu mia kikai, ku kadaengane lri kitulrepenge isadra, kisupilri kwini kaika paisadra numi sa ikai numi kavai. Lu acaicalinga numi mwa kavai maelanane ka kuni, kwini kadaengane lri ngwalai ku takicilriane si isadra kai kituangangade.

³⁶ “Lri pakasamaliaku turamuru kwini ki acaicali ikai badhanane ka laumawmase, adravane ka lingau ki takuvaivalrigane ki laubulu lri asasamaliane numi si katwase mubere. Lri mia numi ki yakai ki tamakaruruburane kisaladhaladha katwase mubere, adravane ka kadrwa ku wasaladhaladha numiane lri tubakebake numi.

³⁷ Adravane ka kadrwa ku wasaladha si lrumai lri mialri numi mapungupungupungu; ka kadrwa ku puku numi kiecebe ki sanaka baadha.

³⁸ Lri ikai numi ki taacaicaliane pacai, kithamukulu ki kadaengane ki badha.

³⁹ Kwini tedranenga ka yakai ki kadaengane ki badha ka umawmase lri ngwalai ki pasalrivaneini si cucungulaneini, mia ki cucungulane ki pakamudu.

⁴⁰ “Ai, kwini mwabaibalrithi numiane lri ngipapapelaela ku pasalrivaneini, lai lri mialri ngipapelaela ku pasalrivane ki cucungulane lini, asi lwiyane kwi lalasu kiaecebe nakwane, wabalre nakwane,

⁴¹ pakariciu nakwane ku akiecebaneli liniane, si malra liniane pakatwase mwa ki kadaengane ki badha. Ai kwini mwabaibalrithi numiane luka bilrilinga lri thingalenga ngitatu alebe, ngwalai ki pasalrivaneini si tabaebalreane tarumara ku sakipathavunganane.

⁴² Kikwini, lri ngulringavaku ku tamakaketeketaneli ki Yakubu, Isake si Aberahame, lri tupelaku puvaga baai kwini kadaengane ki kawkawluli.

⁴³ Ai, kwini kadaengane lri paswalana mwalra kwini ki yakai kwini ka laumawmase, lani kitulrepenge isadra ku kadaengane; kwini lalasu lri ngwalai ku tabaebalreane ki hulriceli si padradrekaseli si tarumara ku akipathavungane.

⁴⁴ Adravane ka miyaiya kikai, lu ikaiyana ki kadaengane ki badha, kainaku lri pakisalrulringa cilri liniane, ku waamudaku liniane, ngwalai kwini si cilringa ku takiketeketaneli liniane. Tamatamaku ka Twaumase lini.

⁴⁵ Lri tupelaku cegecege ku natakiketeketaneli ki cucungulane lini. Ikai kwini kwidra, papiaku ki lakuni pathingalane ku maadrau ku pukuli, la patwalai Izipiti sangiluku ki kawkawluli, la nau a Twaumase liniane. Tamatamaku.”

⁴⁶ Kikai yabelenge ka tinukakudhanane si padradrekase amani ku Tamatama ka yakai lregelrege Sinai si baai ki Musi, papia ki swa Iseraylri pelaela.