Lrivi 25 - Ngudradreadrekadhane Ka Sisiu 魯凱語聖經

Taisadrasadrane ka caili

¹ Ku Tamatama yakai lregelrege Sinai kawriva ki Musi, cunu iniane,

² la baai ki swa Iseraylri pelaela kikai lebe kai kakudhane, “Lu mudaanenga numi ki baai ki Tamatama numiane ka kadaengane, sanaka sakapitu ka caili lri paisadra ki takaungane, sapelaelane ka mwasakene ki Tamatama.

³ Ikai kwini ki nitaraenemane ka caili, lri kaungu numi tuangangade, si demele ki babudwane, la sekete ku nikitalekane.

⁴ Ai ki sakapitu ka caili tara pudriadringadha paisadra ki kadaengane; kikai ki nitara cailane amani ku sapatarumarane baai ki Tamatama. La madha kauawngu tuangangade, la mialri madha dememele ki babudwane.

⁵ Adravane kwini ngiacacebe pumadru ka taleke madha kitaletaleke; adravane kwini kaika nidemelane la pumadru ku budu la mialri madha kimadrumadru. Kikai nitara cailane, ku kadaengane ani kitulrepenge isadra kai kikaungu.

⁶ Kikai nitara cailane, kwini kadaengane adravane ka kaika kituangangade, ai kwidra ngiakakamani cebe ku lataleke lrika amani ku akaneane numi. Ku duri numi, mwalrawlrau, yakaikai numiane ka singibadhane,

⁷ nilapulapwane, si yaubulane ka waudriwdripi yakaai ku akaneane. Kwini ngiakakamani cebe ka lataleke, lri makakane numi patuelre.”

Takipangilralraingane ka caili

⁸ “Kunumi asipa ku nisangupitulane ka tarapitu ka caili, lu elrelreane tara 49 ka caili.

⁹ Ki kwini ki caili ki samakamangeale ka vai ki sakapitu ka dramare, amani ku tamupasalrivanane ka vai, kunumi lri sikawlu numi ku umawmase mwa alraelre ki kuni ngirapa.

¹⁰ Lu mia kai, kunumi lri malra numi kwini saka taramalrimale ka caili pakitukudha, la papia ki mapapangale pelaela kikai caili kikai ka tangilralraingane ka caili, ka amani kwidra Takipangilralraingane ka caili. Ikai kikai ki caili, sanaka nilangadhane ka latacekecekelane lri sawlri baai ki napimanemanane ki mwabaibalrithi ki pimanemanane; kwidra nakia kilangai si aduri lri kipangilralrainginga, si siwlri mwa ki daneini.

¹¹ Kwini ki saka taramalrimale ka caili amani ku Takipangilralraingane ka caili numi. Kunumi madha kauawngu tuangangade, madha malramalra kwini ngiakakamani cebe ku taleke, la mialri madha kimadrumadru kwini kaika nidemelane ka babudwane.

¹² Kikai caili kikai amani ku Takipangilralraingane ka caili, amani ku saniange ka caili numi; lri kane numi si kathane ku singikai ki kadaengane ngikakamani cebe ku taleke.

¹³ “Kikai Takipangilralraingane ka caili, sanaka nikilangadhane ka tacekecekelane lri sawlri baai ki napimanemanane.

¹⁴ Lakamani, kunumi lu malalangai numi ki sakacekele numi ka swa Iseraylri ku kadaengane, tara pangimia ku kakwakudhane.

¹⁵ Kwini salangadhane ku atuthane ku paisu tutangadrana kelrete ku takathanane twalai saka tamalangalangadhane pakela kwini ki bibiilrili ki takipangilralraingane ku anguthane ki taleke ku caili;

¹⁶ Luka maulainga ku caili, lri abelenge ku tatuthanane, luka padaalrwana ku caili, lri alebe ku tatuthanane; asi lwiyane ku nikilangadhane amani kwini ki tasangu pialane ki taleke kwini ki kadaengane.

¹⁷ Kunumi madha nau ngipapakaesai iya patwalai ki sakacekelesu ka swa Iseraylri; tara mwakuludru musakene ki Twaumase, asi lwiyane Tamatamaku ka Twaumase numi.”

Lamundai ikai ki Taisadrane ka caili

¹⁸ “Kunumi pasuswa ku hulrice si padradrekase ki Tamatama, lanu maka ikai kikai ki kadaengane mudringadringai si ngulwalwalwadhane ku tapanianiakane.

¹⁹ Kai kadaengane lri edhale ku lataleke, lri makakelrete numi ku akaneane; la lri sutelrai numi si ngiesaesai ku tacekecekelane ku awngane.

²⁰ “Ikai numiane alau lri ikai ku kiavaga, luka samakapitulu ka caili la isadra kai kaungu tuangangade, laka kadrwa ku nikitalekane, la lri kane ku manemane?

²¹ Ku Tamatama lri subulrubulru numiane, luka saka taraeneme ki caili lri cebe ku amakakelretane numi taratulru ka caili ku taleke.

²² Luka saka taravalru ka caili, lri kaungu numi tuangangade, ai lri kaaneana numi ku tedrane ku taleke, pakeela ki saka tarabangate ka caili ki akitalekane.”

Kakudhane ki wasawlri langai ku kadaengane

²³ “Kunumi madha malramalra kwini kadaengane ka palralrawthunga malra langai, asi lwiyane kai kadaengane nakwane; kunumi mararaamau numi ki singibadhane ka arakaikaiyana kai kadaengane si kathane.

²⁴ “Lu malalangai ku kadaengane, kunumi tara thingala ka yakai ku kingiri ki napikadaenganane langai.

²⁵ Lwiyasi ikai ku retesanesu ku ngwalai ki matikurwane la kai pikakwa kai kilangai kwini kadaengane, kwini padethaneana ka retesaneini naika wamalra sawlri kwini kadaengane.

²⁶ Kwini kadrwa ku retesane ku lri dulru sawlri kwini kadaengane ka umawmase lukabibilrili lau lri kamani ku maesaesai, lri makakelretenga ku paisu sawlri kwini kadaengane,

²⁷ ikai ki miyaiya kikai, lri tara asipi ku taarakaiyane ku caili, la malra kwini twalai sa kilangai pakela ki bibiilrili ka Takipangilralraingane ka caili kwini tedrane ka caili ku naika tatuthane sawlri kwini ki walangai, lu mia kai kwini lasu lri maka dulru sawlri si mucungulu kwini kadaengane.

²⁸ Lwiyasi kai makakelrete ku sasawlrianeini ki kadaengane, kwini kadaengane lri arakaiyana kwini walangai pakela ki bibiilrili ka Takipangilralraingane ka caili. Lu kelanga kwini ki caili, kwini kadaengane lri sawlri kwini ki napikadaengane.

²⁹ “Alaiyasi ikai ku umawmase ku kialangai ku yakai kacekelane ku daane, yakai ku pukuini ikai kwini ki nitaracailane malra sawlri kwini daane.

³⁰ Lwiyasi kai ikai kwini ki caili sawlri, kwini lasu kadrwanga ku kingirini, kwini daane lrika amanianenga kwini walangai si lri ka tacekecekelane kwini ki mwabaibalrithi iniane apalralrawthu; ikai ki Takipangilralraingane ka caili, kwini daane mialri kai lri sawlringa ki napidaanane.

³¹ Ai, kwini yakai latadre ki kacekelane ka daane lri singikai ku kakwakudhane ki swa lrilringulu ka kadaengane marasikai; kwini napidaanane yakai ku kingiri sawlri, lu kelanga ki Takipangilralraingane ka caili, kwini daane lri sawlri ki napidaanane.

³² Ai kwini swa Lrivi, lri dulru ngisasingikaai ku nau sawlri iya lini ku vai si sawlri kudra yakai ki cekele ki swa Lrivi ka daane.

³³ Ku swa Lrivi alaiyasi kilangai ku yakai ki cekele ki swa Lrivi ku daane, la kai sawlri, lu kelanga ki Takipangilralraingane ka caili, kwini daaneini lri tara sawlri baai iniane, asi lwiyane kudra daane ki swa Lrivi ikai ki cekele ki swa Lrivi yai tacekecekelane lini ikai ki swa Iseraylri apalralrawthu.

³⁴ Ai ku cekele ki swa Lrivi kwini ngiathalringulu ka tapagwagwane kai lri maka kilangai; kwini yai tacekecekelane lini apalralrawthunga.”

Kakudhane ki pakiasalru ku paisu ki matiakukuru

³⁵ “Lwiyasi ikai ku sakacekelesu ku matikurwaneini laka kadruanga ku apangimiane pasikai ki tacekecekelane, kusu tara baadha iniane, tuthadalrane lu baai ki drumane si la yakaikai ka singibadhane ka umawmase, lani pacungulu ikai kwini.

³⁶ Kusu madha malramalra papia ki laretesane ku lalake ki paisu; musakena ukuludru ki Twaumase, lani pacungulu ka pasiagisisu.

³⁷ Lu pakisalrusu iniane ku paisu, madha malramalra ku lalake ki paisu, lu kilangaisu ku taleke iniane, madha murikai ku amuesadhane.

³⁸ Kikai yai, amaniaku ka Tamatama, ka Twaumase numi ka peaelaela ku padradrekase. Nawailukaku numiane katwase Izipiti, pakai ku abaadhaneli numiane kavai Kanange, si a Twaumase numiane.”

Kakudhane ki pangilralraingi ki aduri

³⁹ “Lwiyasi la ikai ku sakacekelesu ku matikurwane la ngikakilangai si aduri muswane, kusu madha malramalra iniane tuduri drele.

⁴⁰ Malra iniane mia ki mwalrawlrau ikaikai muswane, si marasikai muswane pakela ki Takipangilralraingane ka caili.

⁴¹ Lu kelanga ki Takipangilralraingane ka caili, kwini lasu si lalakeini lri makitu katwase muswane, siwlri mwa ki lawacekecekele lini, si mwa ki kadaengane ki cucungulaneini.

⁴² Kai swa Iseraylri sasiakawluli. Patwaladhaku Izipiti sangiluku liniane; kwini lalasu kai lri pelanga kikilangai aduri.

⁴³ Kusu madha sidrekadrekase liniane, musakena ukuludru ki Twaumase.

⁴⁴ Lwiyasi murikaisu ku duri ku sawvalai ku ababai, kai matumane mwa ki pasiagisi ka drumane ka kuni langai.

⁴⁵ Kunumi mialri lri dulru numi langai kwini yakaikai numiane kwini singibadhane ka umawmase kwini ki lalake lini si kwini yakai ki kadaengane numi kitulalake ka wacekecekele lini. Kikai laumawmase lri maka atacekecekelane numiane;

⁴⁶ Kunumi lri maka malra numi liniane si baai ki lagagane, lani makalautu marasikai ki lagagane numi. Ai kunumi madha sidrekadrekase ki sakacekele numi ka swa Iseraylri.

⁴⁷ “Alaiyasi kwini yakaikai numiane kwini singibadhane ka umawmase la aru satacekecekelane ngiesadhane, kwini sakacekele ka swa Iseraylri la aru matikuru, si ngikakilangai baai ki singibadhane ka umawmase ki la wacekecekeleini,

⁴⁸ lu ngikakilangainga, yakaiyana ku kingirini kisawlri langai. Ku betakaneini ka lasawvalai,

⁴⁹ tamaini ka betakane ki tamaini, lakadralraini, ku drumane ku padethaneana ka retesane lri dulru langai iniane. Lwiyasi ikainga makakelrete ku paisuini, mialri lri dulru ngilalangai ngisasawlri.

⁵⁰ Lri mapapelaela kwini ki alangadhaneini ku atuthane ku paisu. Kwini lalasu lri patwalai ku takilangadhaneini aduri pathagili asipi, pakela ki Takipangilralraingane ka caili, si singikai ku sakipawlrawlravane ki mwalrawlrau kelrete ku sasawlriane langai,

^51-52 Kwini lasu lri singikai kwini tedranenga ku caili ku takathane sawlri pangilangai.

⁵³ Kwini walangai ki caicaili lri malra iniane tuthadalrane ki mwalrawlrau ka umawmase lu drele iniane, madha tudreadrekase iniane.

⁵⁴ Lwiyasi la kai maka arakai ku miyaiya kikai ku kakudhane si kipangilralraingi, lu darurunga ki Takipangilralraingane ka caili, kwini lasu si lalakeini lri makitu kipangilralraingi, si siwlri amani kwidra ngialralrainginga ka umawmase.

⁵⁵ Asi lwiyane kai swa Iseraylri sasiakawluli; wasangilukaku liniane mulatadre Izipiti. Tamatamaku ka Twaumase numi.”