Lrivi 22 - Ngudradreadrekadhane Ka Sisiu 魯凱語聖經

Bulane ki la sapatarumarane

¹ Ku Tamatama wacunu ki Musi pelaela

² ki Arungu si lalalakeini, “Kunumi madha kudrukudrulru ki saniange ka naganeli, dradrela tukucingalre marasikai kwini sapatarumarane nakwane ki swa Iseraylri. Kunaku Tamatamaku.

³ Ikai ki mwabaibalrithi numiane, sanaka aneanenga la ikai ki kakudhane ka kaika mabula si adeethe ki sapatarumarane nakwane ki swa Iseraylri, kwini lasu kai lri maka peelanga ikai ki tapatarumaramaraneli marasikai nakwane. Ku mwabaibalrithi numiane lrika palralrawthu pasusu kikai kakudhane. Tamatamaku.

⁴ “Ikai ki mwabaibalrithi ki Arungu, sanaka aneane ku maraibiu ku pakatwase ku bulu lu apece ku umawmase lri pakela ku taka bulane ala lri maka kane kwini tinusaniange ka sapatarumarane. Ku barakalai alaiyasi ka amanini ku pakatwase ku bulu lu apece, ku wasulrape ki kiaelrenga ki wapacai si kaika mabulanga ka lamanemane, la kielre ki pakatwase ku bulu saapece,

⁵ si drumane ka kaika mabula ka waudriwdripi si umawmase, amani ku kaika mabulanga.

⁶ Ku barakalai sana kaika mabulanga lri pakela ki miauawbu ka kaika mabula. Kwini lasu lri tara sikelre ala lri maka kane ku saniange ka sapatarumarane.

⁷ Sana lriwgunga ku vai, kwi lasu mabulanga, lri dulru kane ku kitudrulruini ku saniange ka sapatarumarane; kwini amani ku akaneaneini.

⁸ Kai lri maka kane ku ngiakakamani pacai, ku kiakace si pacai ka waudriwdripi. Amani lu kisaela ki makudrulru. Tamatamaku.

⁹ “Sanaka barakalai lri tara pasusu makanaelre sanaka baaili pelaela ku kakudhane. Lu kai pia kwini, kwi lalasu yakai ku pasalrivane, lri tara paacai, asi lwiyane kwi lalasu twadreadrekase si kai pasusu ku saniange ka tukakudhaneli. Amaniaku ka pakasaniange liniane ka Tamatama.

¹⁰ “Kathane ku wacekecekele ki barakalai ku lri maka kane ku saniange ka sapatarumarane; ku drumane kai lri maka kane, adravane ka yakai ki daane ki barakalai ku umawmase ku mwalrawlrau mialri kai lri maka kane.

¹¹ Ai ku duri ki barakalai, adravane ka nilangadhane ara paisu ku kiatulalake ikai ki daaneini, lri maka kane ku kitudrulru ki barakalai.

¹² Ku lalake ki barakalai ku labaibai alaiyasi karudrange mwa ki kaika barakalai ka lakawkawlu kai lri maka kane ku saniange ku sapatarumarane.

¹³ Ai ku labaibai ka lalake ki barakalai alaiyasi ka walibakane lu makakatwase ki tawaneini, laka kadrwa ku lalalake si siwlri mutavanane, lri maka kane kwini kitudrulru ki tamaini kwini akaneane. Kathane ku wacekecekele ki barakalai kulri maka kane ku sapatarumarane.

¹⁴ “Ku langumawmawmase alaiyasi kaika pwalringalringau la kane ku saniange ku sapatarumarane, lri singikai ku naika taingeane ki nipau lrimane si sawlri baai ki barakalai.

^15-16 Ku barakalai madha pakane ki mapapangale capange ku saniange ku sapatarumarane si kudrulru ki sapatarumarane; kikai lri papasalriu kwini ki umawmase, si kipathavungu. Amaniaku ka pakasaniange kwini ki sapatarumarane ka Tamatama.”

¹⁷ Ku Tamatama wacunu ki Musi,

¹⁸ papia ki Arungu, ki lalalakeini, si mapapangale ki swa Iseraylri iya kai, “Ku swa Iseraylri si yakai liniane ku singibadhane, sanaka patarwamara ku Lama ka lrisi, adravane ka pangiamia ku kiketeketeini ku ngikakamanini, lri tara patarumara ku mwadringadringai ku niculwane.

¹⁹ Kunumi patarumara ku mwadringadringai ku sawvalai ku lwange, balase ka nikiubawbalane ka kiu ku balase ka kiu lri kikiragai kitarumara.

²⁰ Lu patarumara numi ku kaika mwadringadringai ku satulrisiane ka nilapulapwane, ku Tamatama kai lri kiragai tarumara.

²¹ Adravane ka aneane, kulri pangimia ku kiketeketeini ku ngiakakamani patarumara ku Sulivatane ka lrisi baai ki Tamatama, lri tara patarumara ku mwadringadringai ku niculwane ala lri kikiragai kitarumara.

²² Madha malra ku mamukici, mapiapilai, kai kiatulrepenge ku kinawmasane, madula ku lrangici, ku mwabalrake, ku makuvingi ku satulrisiane ka nilapulapwane si patarumara ki Tamatama. Madha patarumara ku miyaiya kai ku satulrisiane ka nilapulapwane si ikai ki tapatarumaramarane tu Apwi ka lrisi baai ki Tamatama.

²³ Lri maka patarumara numi ku kaika kiatulrepenge ku tacebeane ku kaika mathariri ku tangimiane ku sawvalai ka lwange ku lrulai ka nikiubawbalane ka kiu tungiakakamaniane tulrisi, ai kikai miyaiya kai ku satulrisiane ka nilapulapwane madha tusapangimiane ku takiketeketane patarumara.

²⁴ Madha malra kwidra duladula ku karithiri, ku kiadrepete si kaburau, yakai ku bakici, ku kiagelregelre ku satulrisiane ka nilapulapwane si patarumara baai ki Tamatama. Ikai ki cekele numi kaika nipalraingane ikai ku miyaiya kikai.

²⁵ “Ku nikibaadhane twalai ki maelane ka kuni ku waudriwdripi, kunumi madha tuakaneane si patarumara baai ki Twaumase, ku miyaiya kai ku waudriwdripi kia tu kaimwadringadringai, kai lri kikiragai kitarumara ki Tamatama.”

²⁶ Ku Tamatama wacunu ki Musi iya kai,

²⁷ “Ku tau kitulalake ku lrulai ka sawvalai ka lwange, lrulai ka nikiubawbalane ka kiu, ku lrulai ka kiu, ikai kwini ki nimakapitulane madha pakidaidaili ki tina ka lwange ki tina ka kiu, lu makavalrulunga, lri dulru tu Apwi ka lrisi si patarumara ki Tamatama.

²⁸ Madha apasilasilange ivaivai malra kwini tina ka lwange si lrulai ka lwange, tina ka nikiubawbalane ka kiu si lrulai ka nikiubawbalane ka kiu, tina ka kiu si lrulai ka kiu tusapatarumarane.

²⁹ Lu patarumara ku sakiaseasenane ki Tamatama, si singikai ku kakudhane lri kikiragai kitarumara.

³⁰ Kunumi ikaiya kwini ki vaivai kane eleme kwini satulrisiane ka beate, madha pukaiyaiyane pakela ki mialrealre. Amaniaku ku Tamatama.

³¹ “Kunumi pudriadringadha pasusu ku padradrekaseli; Tamatamaku.

³² Kunumi madha tusinalremelreme ku saniange ka naganeli; ku mapapangale ki swa Iseraylri lri tara musakene nakwane tumabula. Amaniaku ka twasaniange numiane ka Tamatama;

³³ kunaku nawasangilukaku numiane katwase ka Izipiti, lri a Twaumasaku numiane. Tamatamaku.”