Lrivi 20 - Ngudradreadrekadhane Ka Sisiu 魯凱語聖經

Kakudhane ki papacai pathavungu

¹ Ku Tamatama wacunu ki Musi,

² Papia ki mapapangale ki swa Iseraylri pelaela, “Ikai numiane, adravane ka swa Iseraylri ka singibadhane, lwiyasi la malra kwini ki lalakeini ka ababai si patarumara ki ngialisiane ka twaumase ka Muleke, lri tara kipapacai kipathavungu; ku mapapangale lri arakai ku lrenege cabiri papacai iniane.

³ Adravane ka aneane ku wabaai ki lalakeini ki Muleke, wakudrulru ki Alrivilrivi ka taikaikaiyaneli, tusinalreme sidrekase ki saniange ka naganeli, lri kiecebaku iniane, patwalai ki kawkawluli mwalra iniane.

⁴ Ai, ku mapapangale lu ngikaiyane kai drele, kai papacai pathavungu kai ki umawmase,

⁵ lri ngikakamaniaku kiecebe iniane si wacekecekeleini makanaelre; mialriaku kiecebe kwidra ki latwapapalra iniane baebalre nakwane si mwa sukubu ki Muleke. Lri patwaladhaku ki kawkawluli mwalra liniane.

⁶ “Lwiyasi ikai ku padawlu ki abake ki wapacai ku kiavaga ki taraivigi, lri kiecebaku iniane, si patwalai ki kawkawluli mwalra iniane.

⁷ Lakamani, ngitatusanianga, si kabula, asi lwiyane Tamatamaku ka Twaumase numi.

⁸ Kunumi tara pasuswa ku hulriceli, asi lwiyane amaniaku kwidra pakabula numiane ka Tamatama.

⁹ “Sanaka aneanenga ku wapusu kaelaela ki tama si tina, kwini umawmase lri tara kipapacai kipathavungu; kwi pasalrivaneini naika akipiane kwini.

¹⁰ “Alaiyasi ikai ku umawmase ku padralra ki labaibai ki palrapalra, kwini pasalriu ka sawvalai si manganga ka ababai lri tara kipapacai kipathavungu.

¹¹ Alaiyasi ikai ku umawmase ku pasalriu ki drumane ka taelrelre ki tamaini, kwini tadrusa lri tara kipapacai kipathavungu; kwi pasalrivane lini naika akipiane kwini.

¹² Alaiyasi ikai ku pasalriu ki labaibai ki lalakeini, kwini tadrusa lri tara kipapacai kipathavungu; kwini pasamali ki kakudhane ki tacekecekelane, kwi pasalrivane lini naika akipiane kwini.

¹³ Alaiyasi ikai ku sawvalai ka pasalriu ki mialri ka sawvalai, kwini tadrusa paiyanga ku matiadingeselre ka kakudhane, kwini tadrusa lri tara kipapacai kipathavungu; kwi pasalrivane lini naika akipiane kwini.

¹⁴ Alaiyasi ikai ku umawmase ku marudrangenga ki labaibaini, ala mwanga ki tina ki labaibaini, kwini tatulru lri tara ki arakai ku apwi lama, asi lwiyane kwini amani lini ka paiya kwini matiadingeselre ka kakudhane; ikai numiane kaika nipalraingane ku miyaiya kai.

¹⁵ Alaiyasi ikai ku umawmase ku pasalriu ki waudriwdripi, kwini umawmase si waudriwdripi lri tara kipapacai.

¹⁶ Alaiyasi ikai ku ababai ku ngwadadeethe ki waudriwdripi, si pasalriu ki waudriwdripi, kwini alisu si waudriwdripi lri tara kipapacai; kwi pasalrivane lini naika akipiane kwini.

¹⁷ “Alaiyasi ikai ku mamamwa ki betakaneini ka ababai, makaela ku tina ku makaela ku tama lini ka betakane ka ababai, kwini lalasu lri tara pikai ki laumawmase kitusinalrelreme, kipakatwase mulatadre ki cekele; kwini lasu si betakaneini pasamali ku kakudhane, kwi pasalrivane lini naika akipiane kwini.

¹⁸ Alaiyasi ikai ku umawmase ku wamwa tadrusa ki siaerai ka ababai, kwini tadrusa lri kipakatwase pulatadre ki cekele, asi lwiyane kwini amani lini ka pasalriu kwini ki ngwakai ki kakudhane ki kaika mabula.

¹⁹ “Alaiyasi ikai ku umawmase ku pasalriu ki tinaini ka betakane ki tamaini ki tinaini ka betakane ki tinaini, kwini amani ku pasamalinga ku kakudhane ka pasalrivane; kwi pasalrivane lini naika akipiane kwini.

²⁰ Alaiyasi ikai ku umawmase ku pasalriu ki tinaini ka labaibai ki taka ki tamaini ki tinaini ka labaibai ki agi ki tamaini, amani ku twasinalreme ki taka ki tamaini, agi ki tamaini; kwini tadrusa lri ngisasiamece ku pasalrivane, lri kapulathe si pacai.

²¹ Alaiyasi ikai ku umawmase ku siataelrelre ki lasakadaneini, amani ku twasinalreme ki betakaneini, amani ku kaimabula; kwini tadrusa lrika kadrwa ku lalake si pacai.

²² “Kunumi tara pudriadringadha pasusu patueelre ku hulrice si tukakudhaneli, amani lu ikainga numi kwini ki ailukaneli numiane mudaane ka Kanange si kicilri.

²³ Kunumi madha tupapalra ki kakudhane ki sakwaikai kwini ka umawmase. Lri pakatwasaku kikai ki sakamaelanane ka zuku, lanu maka mudaane. Kwini kakwakudhane lini malrasaku.

²⁴ Napwakawnungaku ku abadhane numiane kikai mwalwalwaludru ku mireke si valu ka karawmane ka kadaengane tucungulu numiane; lri baadhaku numiane. Tamatamaku ka Twaumase numi; wamalraku numiane apatatukudha ki lakuni.

²⁵ Lakamani, kunumi tara thingala apapapilri kwini mabula si kaika mabula ka laadhadhame si waudriwdripi, kunumi madha kanekane kwini kaika mabula ka waudriwdripi si adhadhame. Peaelaelangaku kilakikai kaika mabula iya, lu kane numi lri kai numi ka mabula.

²⁶ Kunumi kabula, la aswakainga nakwane; asi lwiyane Tamatamaku, ka mabula. Wamalraku numiane patatukudha ki lakuni, pakai ku akakawkawlane numi nakwane.

²⁷ “Sanaka padawlu ki abake ki wapacai si tulrisi kivaga ku sawvalai ku ababai lri tara kipapacai. Ku mapapangale lri arakai ku lrenege cabiri papacai liniane; ku miyaiya kai ku umawmase ku pasalrivane lini naika akipiane kwini.”