Lrivi 18 - Ngudradreadrekadhane Ka Sisiu 魯凱語聖經

Saruthukane ngukai ki wacapange ki sawvalai si ababai

¹ Ku Tamatama wacunu ki Musi,

² pelaela ki swa Iseraylri, “Kunaku Tamatamaku ka Twaumase numi.

³ Nayakai numi Izipiti, ai kunumi madha tupapapalra ku kakudhane ki swakai kwini. Lri sangilukaku numiane mudaane Kanange.

⁴ Kunumi pasuswa ki hulriceli, si pangimia ku drekaseli. Kunaku Tamatamaku ka Twaumase numi.

⁵ Kunumi pasuswa ku baaili pelaela numiane ku hulrice si drekase; luka miyaiya kai, lri maka panianiake numi. Tamatamaku.

⁶ “Sanaka aneane madha tadrusadrusa ki padethaneana turamuru ka retesane. Tamatamaku.

⁷ “Madha maelrelre ki tinasu, si tusinalreme ki tamasu; madha tusinalremelreme ki tinasu.

⁸ “Madha pasalrisalriu ki drumane ka taelrelre ki tamasu, si tusinalreme ki tamasu.

⁹ “Madha pasalrisalriu ki betakanesu ka ababai, si makaela ku tina ku makaela ku tama ka labetakanesu ka ababai; kai susu ku taelre numi ku kai numi ka taelre ikai ki daane kadrau, maadha ikaikai ku ngimiyaiya kai ku pasalrivane.

¹⁰ “Madha pasalrisalriu ki lagaganesu ka labaibai, kikai ngiatatusinalremesu.

¹¹ “Madha pasalrisalriu ki makaela ku tina numi ka betakanesu ka labaibai, asi lwiyane kwini alisu mialri ka betakanesu.

^12-13 “Madha pasalrisalriu kwini ki latinasu ka betakane ki tamasu si betakane ki tinasu.

¹⁴ “Madha pasalrisalriu ki latinasu ka taelrelre ki taka ki tamasu si agi ki tinasu, asi lwiyane kwini yai latinasu.

¹⁵ “Madha pasalrisalriu ki labaibai ki lalakesu,

¹⁶ ki lasakadadanesu.

¹⁷ “Madha pasalrisalriu kwidra ki lalake si agane ki pasalriungasu ka ababai. Asi lwiyane alau yakai ku tamacacapilane ku eraisu; lu piasu kikai pasalriungasu ki ngwakai ki sawvalai si ababai.

¹⁸ “Lu panianianiakeana ku labaibaisu, madha karudrarudrange mwa ki agini si kiecebe iniane, si tusinalreme iniane.

¹⁹ “Madha tadrusadrusa kwidra ki yacengecenge sieraerai ka ababai, asi lwiyane kwini alisu kaika mabula.

²⁰ “Madha padralradralra ki labaibai ki palrapalra, si ngikakudrulru ngitatusinalreme.

²¹ “Madha malramalra ki lalakesu si lama tusapatarumaramarane ka lrisi patarumara ki ngialisiane ka twaumase ka Muleke, la ngwalai kwini si tusinalreme ki Twaumasesu. Tamatamaku.

²² “Ku tara sawvalai madha tadrusadrusa, kikai amani ku kavalracevace ki Twaumase.

²³ “Adravane ka sawvalai ka ababai madha maelrelre ki waudriwdripi; asi lwiyane kikai yai wabaebalre ki kakudhane ki maelre niyane, ka ngiakakudrulru ngiatatusinalreme.

²⁴ “Kunumi madha pasalrisalriu kikai belenge kai ki nimatikaiyane ka kakwakudhane si ngikakudrulru, asi lwiyane kudra apatwaladhaneli ki cucubungu numi pakatwase ka maelane ka zuku ala ngwalai ku tapiane kikai si ngikakudrulru.

²⁵ Kwini ngilisianane lini wakudrulrunga kwini ki kadaengane, lakamani ku pathavunguli kwini ki kadaengane. Kwini kadaengane la kalrase kwini ki laumawmase.

^26-27 Kwini lalasu pangiamia kikai sanaka manemane ka ngialisiane, si kudrulru ki kadaengane, ai kunumi madha pasalrisalriu ku thadalrane ka pasalrivane. Kunumi, adravane ka swa Iseraylri ku yakaikai kwini ku singibadhane ka umawmase, tara pasuswa ku hulrice si drekase ki Tamatama.

²⁸ Lumia kikai, kikai kadaengane kai lri kalrase numiane, mia sa kalraase kwini ki laumawmase ka sakwaikai kwini.

²⁹ Wathingale numi, adravane ka aneane ku paiya kilakikai matiavalracevace ka awngane, lrika aneane ku lri kimwalra patwalai ki kawkawlu ki Twaumase.”

³⁰ Ku Tamatama kawariva, “Kunumi pasalaladha ku baaili pelaela ku drekase, madha tupapapalra ku ngialisiane ku kakudhane ki sakwaikai kwini ka laumawmase, si pia ku matiavalracevace ku awngane si ngikakudrulru. Tamatamaku ka Twaumase numi.”