Lrivi 17 - Ngudradreadrekadhane Ka Sisiu 魯凱語聖經

Saniangane ki erai

¹ Ku Tamatama wacunu ki Musi,

² badha pelaela ki Arungu si lalalakeini si mapapangale ki swa Iseraylri makanaelre kikai lebe kai lakakudhane.

^3-4 Kai swa Iseraylri kathane kai lrawlrawdru ki Alrivilrivi ka balrawbau ku tapikaiyane culu ku sawvalai ka lwange, nikiubawbalane ka kiu, balase ka kiu ku sapatarumarane ki Tamatama, lwiyasi capange ikai talidrumane culu ku sapatarumarane amaninga ku pasalriu ki takelretane ki kakudhane. Lu pawaludru ku erai, lri tara kimwalra patwalai ki kawkawlu ki Twaumase.

⁵ Ku makuciacingalrenga ku patharevane kai ki kakudhane ani iluku ku lanilapulapwane si patarumara ki Tamatama amia ki swa Iseraylri. Ku paswalala waculu ki waudriwdripi ikai ubulane, kaiasasanenga lri iluku kwini aculwane mwa ki lrawlrawdru ki Alrivilrivi ka balrawbau si baai ki barakalai tu Sulivatane ka lrisi si patarumara.

⁶ Ku barakalai lri malra ku erai ki niculwane ubu pangithalringulu kwini ki tapatarumaramarane ka yalrawlrawdru ki Alrivilrivi ka balrawbau, si lama ku lamace, pasangulreme ku kiragai ki Tamatama ka sangwalreme.

⁷ Ku swa Iseraylri kai lri maka baebalre ki Tamatama, ikai ubulane culu ku nilapulapwane si patarumara ki galrale ka kiu. Ku swa Iseraylri lri tara ka palralrawthu pasusu kikai kakudhane.

^8-9 Ku swa Iseraylri si yakaikai liniane ku singibadhane ku umawmase kathane ku lrawlrawdru ki Alrivilrivi ka balrawbau ku tapikaikaiyane patarumara ku Lama ka lrisi ku drumane ku sapatarumarane ki Tamatama ka lrisi, lu capange pikai talidrumane patarumara, lri tara kimwalra patwalai ki kawkawlu ki Twaumase.

¹⁰ Lwiyasi ikai ku swa Iseraylri ku yakaikai liniane ku singibadhane ku umawmase la kane ku takwaerai ku beate, ku Tamatama lri kiecebe iniane, lri malra iniane mwalra patwalai ki kawkawluini.

¹¹ Ku niake ki lawaudriwdripi yakai ki erai, la kamani ku Tamatama wadrekase sanaka erai gugwa pubelenge ki tapatarumaramarane, pasikai ki mapapangale kitawbalrithi ku pasalrivane. Kai erai niake, wadulru mupasalriu.

¹² Lakamani kwidra, ku Tamatama kai palraingi ki swa Iseraylri si yakaikai liniane ku singibadhane ku umawmase ku akaneane ku takwaerai ku beate.

¹³ Lwiyasi ikai ku swa Iseraylri ku yakaikai liniane ku singibadhane ku umawmase la pana ku tinumabulane ka bulabulai si adhadhame, lri tara pakatwase ku eraini demedeme, si arakai ku dae dralreke.

¹⁴ Ku niake ki lawaudriwdripi yakai ki erai, lakamani ku Twaumase kai palraingi ki swa Iseraylri kane ku takwaerai ku beate; ku aneanenga ku kai pangiamia, ku aneane lri tara patwalai ki kawkawlu ki Twaumase kimwalra.

¹⁵ Ku swa Iseraylri si singibadhane ku umawmase, adravane ka aneane, la kane ku ngiakakamaani pacai ku waudriwdripi ku kiathuriace ki bulabulai ku waudriwdripi, lri tara paswala sinau ku laimai, sikelre, ai lri mukalava pakela ki miauawbu kwini ki vaivai ala lri kitumabula.

¹⁶ Lwiyasi kwini umawmase la kai sinau ku laimai, sikelre, lri tara ngisasiamece ku pasalrivaneini.