Lrivi 15 - Ngudradreadrekadhane Ka Sisiu 魯凱語聖經

Kakudhane ki ngwakai ki sawvalai

¹ Ku Tamatama wacunu ki Musi si Arungu,

^2-3 papia ki swa Iseraylri pelaela kikai lebe kai kakudhane. Ku sawvalai la kacaeme ku ngwakai ki sawvaladhane, adravane ka maulai ka nipangitutulukane, kwidra nipakatwasane ku la acilai kaika mabula.

⁴ Ku taapecanengaini si kudra taneneanengaini ku lamaneemanenga mialri ka kaika mabula.

^5-6 Ku wasulrape ki tapeapecaneini ku wanene ku taneneaneini ku umawmase lri tara sinau ku laimai, sikelre, ai lrika kaika mabula pakela kwini ki miauawbu ki vaivai.

⁷ Sanaka aneane ku wasulrape kwini ki kiapucaemane ki ngwakai ki sawvalai, kwini lri tara sinau ku laimai, sikelre, ai kwini lasu lri kaika mabula pakela ki miauawbu kwini ki vaivai.

⁸ Ku kiapucaemane ki ngwakai ki sawvalai alaiyasi sungalrai pakai ki mabula ka umawmase, kwini kiasungalrai lri tara sinau ku laimai, sikelre, ai kwini lasu lrika kaika mabula pakela ki miauawbu kwini ki vaivai.

⁹ Kwidra sasisesekane lu ngukai ki lamanemane ki kiapucaemane, ku tasakaiyaneini nene mialri ka kaika mabula.

¹⁰ Sanaka aneanenga ku wasulrape ku taneneaneini, kwini lasu kaika mabulanga pakela ki miauawbu.

¹¹ Ku kiapucaemane lu kaiyana tawlrima ala kirecenge ki aneane, kwini lasu lri tara sinau ku laimaini, sikelre, ai kwini lasu lrika kaika mabula pakela ki miauawbu.

¹² Ku kiapucaemane lu sulrape ki ladilrungu lri tara cacwake, kwini laangatu ka lawbubulu lri tara arakai ku acilai sinau.

¹³ Ku macaeme ki sawvaladhane lu mudringainga, lri tara mukalava makapitulu, ala lri sinau ku laimai, arakai ku alrivilrivi ka acilai sikelre, lu pia kikai lri kitumabula.

¹⁴ Luka samakavalrulu, lri iluku ku drusa ku tavagu si penai mwa ki lrawlrawdru ki Alrivilrivi ka balrawbau ki Tamatama, baai ki barakalai.

¹⁵ Ku barakalai lri malra nguvaeva tu Balrithane ki pasalrivane ka lrisi, si patarumara, la lri malra ku vaeva tu Lama ka lrisi si patarumara. Ku barakalai lri arakai kikai tapangimiane icucubungu ki Tamatama pasikai kai ki lasu marasikai ku kiapakabula ka lrisi.

¹⁶ Ku umawmase lwiyasi pakatwase ku buluini, kwini lasu lri tara sikelre, ai kwini lasu kaika mabulanga pakela ki miauawbu kwini ki vaivai.

¹⁷ Kwini bulu lu mucilri makakai ki laimai ki lalrangici ka lawbubulu, lri tara sinau pakabula, ai kikai lawbubulu kaiyana ka mabula pakela ki miauawbu kwini ki vaivai.

¹⁸ Ku sawvalai si ababai lu makakirimu lri tara sikelre, ai kwini tadrusa lri kaika mabula pakela ki miauawbu kwini ki vaivai.

Kakudhane lu sierai ku labaibai

¹⁹ Ku labaibai lu sierai, lri makapitulu kaika mabula. Ku kiarecenge iniane kaika mabula pakela ki miauawbu kwini ki vaivai.

²⁰ Kwi alisu lu icengecenge sierai ku taneneane ku tapecaneini ku lamanemane mialri ka kaika mabula.

^21-23 Ku kiarecenge ki tapeapecaneini ku wanene ku taneneaneini ku umawmase lri tara sinau ku laimai, sikelre, ai kwini umawmase lri kaika mabula pakela ki miauawbu kwini ki vaivai.

²⁴ Ku sawvalai alaiyasi makakirimu kwini yacengecenge sierai ka ababai, kwini lasu kiasaelanga kwini kaikamabulane ki ababai, lri makapitulu kaika mabula; ku tapeapecaneini mialri ka kaika mabula.

²⁵ Ku ababai lu kaika siaerai la tuerairai maka piale, si lu kai kasulivate ku tasieradhane, si pacungucungulu tuerairai, la tuerairai si lu sierai mararaamau, kwini alisu kaika mabula.

²⁶ Ikai kwini ki vai ku taapecanengaini, ku taneneanengaini ku lamanemane mialri ka kaika mabula.

²⁷ Ku kiarecenge kwini ki lamanemane ku umawmase kaika mabula; lri tara sinau ku laimai, sikelre, ai lrika kaika mabula pakela ki miauawbu kwini ki vaivai.

²⁸ Lu idrengerenga kwini eraini lri tara makapitulwana ala lri kitumabula.

²⁹ Luka samakavalrulu, kwini alisu lri iluku ku drusa ku tavagu ku penai mwa ki lrawlrawdru ki Alrivilrivi ka balrawbau, si baai ki barakalai.

³⁰ Ku barakalai lri malra nguvaeva tu Balrithane ki pasalrivane ka lrisi, si patarumara, lai lri malra ku vaeva tu Lama ka lrisi patarumara. Ku barakalai lri arakai kikai tu Lama ka lrisi patarumara. Ku barakalai lri arakai ku ngimiyaiya kikai icucubungu ki Tamatama pasikai iniane pia ku pakabula ka lrisi.

³¹ Ku Tamatama wacunu ki Musi arakaiyanga kikai ki swa Iseraylri ani kai pasalriu ki kakudhane ki kaika mabula, amani lu kudrulru kwini ki yakai ki tasuladhane lini ka Alrivilrivi ka balrawbau. Kwini lalasu lu kudrulru ki Alrivilrivi ka balrawbau lri tara paacai.

³² Kikai belenge ka kakudhane amani ku ngwakai ki kiapucaemane ku sawvalai si pakatwase ku bulu,

³³ lu sierai icengecenge ku ababai, si ku sawvalai lu makakirimu ki kaika mabula ka ababai, kikai makaelaela ka kakudhane.