Lrivi 14 - Ngudradreadrekadhane Ka Sisiu 魯凱語聖經

Kakudhane ki lukabulanga ku maraibiu kacaeme

^1-2 Ku Tamatama wabaai ki Musi kikai kakudhane ki lukabulanga ku maraibiu kacaeme. Twalai kwini takipelaelane mabulanga iya ki macaeme, ku umawmase lri iluku iniane mwa ki barakalai.

³ Ku barakalai lri iluku iniane mulatadre ki tasuladhane, lwiyasi la drele kwini caemaneini ka mwadringainga,

⁴ lri cunu iniane iluku ku drusa ka adhadhame ku mabula iya ikai ki lrisi, ku vaeva ka cedare ka angatu, vaeva ku duduli ka calrisi, si vaeva ka lredelrede ka ricingi ki buraburu.

⁵ Ku barakalai lri cunu ki umawmase culwa iya nguvaeva ku adhadhame kwini yakai ki dumulu ka thalange ka nipasueteane ku acilai,

⁶ si lalri pasilange kwini malraini pialrimane ku adhadhame, paelre kwini adhadhame si cedare ka angatu, duduli ka calrisi si buraburu dapenge kwini yathalangane ka erai.

⁷ Ku barakalai lai lri ikai kwini ki lri kitumabula ka macaeme paralikiliki kingipitulu, ala lri pelaela, ala lri kitumabula ikai ki lrisi. Kwini lasu ka mabulanga. La lri pakatwase kwini adhadhame, pangipalai iniane papia ubulane.

⁸ Kwini umawmase lri sinau ku laimai, nguelre kiriti ku isiu, sikelre, ala lri kitu mabulanga ikai ki lrisi. La lri maka mudaane ki tasuladhane, ai lri tara paswala ikai ki latadre ki balrawbauini makapitulu ku vai.

⁹ Luka samakapitulu, lri peelana kikiriti ku isiu, kungisingisi, si mwalra ku sakelrepe si ubale ki kinawmasaneini demedeme, ala lri sinau ku laimai, sikelre, ala lri kitumabulanga ikai ki lrisi.

¹⁰ Luka samakavalrulu, lri iluku ku drusa ku mwadringadringai ka lrulai ka balase ka kiu, vaeva ku taracailinga, ka mwadringadringai ka lrulai ka tina ka kiu, tulru ka kukingi ku nithalreane ki ulrive ku milrikinku, si vaeva ki tulru ku yakai ki kunsenge ku lawlau ki ulrive.

¹¹ Ku barakalai lri iluku iniane si sapatarumarane mwa ki lrawlrawdru ki Alrivilrivi ka balrawbau ki Tamatama,

¹² lalri patarumara kwini vaeva ka lrulai ka balase ka kiu si vaeva ki tulru ki kunsenge ka lawlau ki ulrive tu Samupasalrivanane ka lrisi, la malra kikai si patarumara ki Tamatama tunipawkalrivilane ka acebe.

¹³ Kwini lasu lri ikai kwini ki tapatarumarane culu ku Balrithane ki pasalrivane ka lrisi, si Lama ka lrisi ka taculuculwane culu kikai lrulai ka kiu. Lri tara pangimia kikai, asi lwiyane kwini Samupasalrivanane ka lrisi si Balrithane ki pasalrivane ka lrisi, thadalrane ka abadhane ki barakalai, ka sanianiiangenga.

¹⁴ Ku barakalai lri malra kikai erai ki Samupasalrivanane ka lrisi, sakidri pwa ki vanale ki calringa, dradrangalrane ki vanale ki alrima si dradrangalrane ki vanale ki drapale kwini ki kiatubi kitumabulanga ka umawmase.

¹⁵ Ku barakalai lri gugu ku lawlau ki ulrive pwa ki satapai ki virini,

¹⁶ la arakai ku alrima ki vanale depe kwini lawlau, si icucubungu ki Tamatama paralikiliki kingipitulu.

¹⁷ Kwini lasu lri mialri malra kwini yasatapadhane iniane ku lawlau si erai ki Samupasalrivanane ka lrisi sakidri pwa ki calringa, vanale ki dradrangalrane si dradrangalrane ki vanale ki drapale kwini ki kiatubi ku akitumabulane ka umawmase, ka amani kwidra tadrisisane ku erai ki Samupasalrivanane ka lrisi.

¹⁸ Kwini lasu la mialri malra kwini yasatapadhane iniane ku tedrane ku lawlau gugu pwa ki awlru kwini ki umawmase. Ku barakalai lri arakai ku miyaiya kai icucubungu ki Tamatama pasikai kwini ki umawmase pangimia ku lrisi ki kiapakabula.

¹⁹ Lalri pacungulu ku barakalai patarumara ku Balrithane ki pasalrivane ka lrisi, si pasikai kwini ki umawmase marasikai ku kiapakabula ka lrisi, ala lri culu ku Lama ka lrisi,

²⁰ la malra kwini niculwane si Taleke ka lrisi pwa ki tapatarumaramarane patarumara. Ku barakalai lri arakai kikai si pasikai kwini ki umawmase tulrisi la lri kabulanga kwini lasu.

²¹ Lwiyasi kwini umawmase laka matiakukuru, kai maka langai ku makalra ku sapatarumarane, kwini lasu lri dulru arakai ku lrulai ka balase ka kiu tu Samupasalrivanane ka lrisi, la malra kwini tunipawkalrivilane patarumara ki Tamatama ka saceacebe. Lri ka vaeva ki tintingi ku nithalreane ku lawlau ki ulrive ka milrikinku tu Taleke ka lrisi, la padrima ku vaeva ki tulru ki kunsenge ku lawlau ki ulrive.

²² La lri ilukwana ku drusa ku tavagu ku penai, ku vaeva tu Balrithane ki pasalrivane ka lrisi, ku vaeva tu Lama ka lrisi.

²³ Luka samakavalrulu, kwini lrika akipelaelaneini ka mabulanga ka vai, lri malra kikai sapatarumarane mucucubungu ki lrawlrawdru ki Alrivilrivi ka balrawbau, si icucubungu ki Tamatama baai ki barakalai.

²⁴ Ku barakalai lri malra kwini Samupasalrivanane ka lrisi ka lrulai ka balase ka kiu si lawlau ki ulrive tunipawkalrivilane patarumara ki Tamatama ka saceacebe.

²⁵ La lri culu kwini kiu, si malra ku erai, sakidri pwa ki calringa, ki dradrangalrane ki alrima si dradrangalrane ki vanale ki drapale.

²⁶ Ku barakalai lri malra ku lawlau si gugu pwa ki satapai ki viri ki alrima.

²⁷ Lai arakai ku vanale dapenge ku lawlau, si sangupitulu paralikiliki icucubungu ki Tamatama.

²⁸ Lri arakai ku lawlau sakidri ki vanale ki calringa, dradrangalrane ki vanale ki alrima, si dradrangalrane ki vanale ki drapale, kwini ki tasakidranenga ku erai ki Samupasalrivanane ka lrisi.

²⁹ La lri malra kwini tedrane ku yakai ki satapaini ku lawlau gugu pwa ki awlru kwini ki umawmase. Lri arakai kikai icucubungu ki Tamatama pasikai kwini ki umawmase marasikai ku pakabula ka lrisi.

³⁰ Ala, lri patarumara ku vaeva ku tavagu ku penai,

³¹ tu Balrithane ki pasalrivane ka lrisi, ku vaeva tu Lama ka lrisi, si paelre ki Taleke ka lrisi pakaredele patarumara. Ku barakalai lri arakai kikai tapangimiane icucubungu ki Tamatama pasikai kwini ki umawmase si pia ku pakabula ka lrisi.

³² Kikai yai atara pasusuane ka kakudhane kwidra ki maraibiu kacaeme, ai kai maka walangai ku sapatarumarane ki kiapakabula.

Kakudhane ki maubilringi ka daane

³³ Ku Tamatama papia ki Musi si Arungu,

³⁴ baai pelaela kikai kakudhane ku maubilringi ka daane. Kikai kakudhane arakaiyane ki swa Iseraylri sa mudaanenga kwini ki baai ki Tamatama liniane ka tacekecekelane kavai Kanange.

³⁵ Sanaka aneanenga ku maubilringi ku daaneini, lri tara pelaela ki barakalai.

³⁶ Kwini barakalai lri cunu kwini ki lasu salria iya kwini lawbubulu lini pulatadre, amani kwini lalawbubulu lri kitu kaika mabulanga. Lu salringa pulatadre, ku barakalai lri mudaane,

³⁷ si drele singibila kwini tamubilringane. Lwiyasi drele ku masalese ku maduli ku balingibingi,

³⁸ lri mulatadre, si lri makapitulu drukuru kwini ki daane.

³⁹ Luka samakapitulu, lri siwlri mwa drele ku tangimiane, lwiyasi ka arwaswadrau kwini ubilringi,

⁴⁰ lri cunu ki umawmase mwalra kwini maubilringane ka lrenege, si cilri pulatadre ki cekele kwini ki kaika mabula ka tapikaiyane.

⁴¹ Ala, lri cunu ki umawmase mwalra kusukusu kwini takaubilringane, la malra cilri pwa latadre ki cekele ka taikaiyane ki kaika mabula.

⁴² Kwini tamwalrane ku lrenege la malra ku drumane ku lrenege si cakupu, kwini balingibingi arakai ku abu tupela paderau.

⁴³ Lu maka salringa ku lrenege, kusukusu ku abu, pela dumingi, lwiyasi kwini daane la peelanga ubilringane,

⁴⁴ ku barakalai lri ngusela mwa drele, ku ubilringi lu aru sarau, kikai daane kaika mabula.

⁴⁵ Lri suburu kwini daane, si malra kwini lrenege, la satudadaane ka angatu, abu salri pulatadre ki cekele si cilri pwa ki kaika mabula ka tapikaiyane.

⁴⁶ Luka takidrukurane kwini daane, adravane ka aneane ku mwadaane, lri kai kitumabula pakela ki miawawbu.

⁴⁷ Sanaka aneanenga ku yakai kwini ki daane apece ku wakane waungulu lri tara sinau ku laimai.

⁴⁸ Lu pelanga paderau kwini ki daane, ku barakalai lri kela drele, lwiyasi kwini balingibingi kai ubilringinga, lri pelaela kwini daane ka mabulanga, amani saka kadrwanga ku ubilringi.

⁴⁹ Lri iluku ngudrusa ku adhadhame, vaeva ku cedare ka angatu, si lredelrede ka ricingi ki buraburu, duduli ka calrisi si vaeva ka panianianiake ka adhadhame, pasikai ki daane pia ku pakabula ka kakudhane.

⁵⁰ La lri ikai kwini ki nipasueteane ku acilai ka dumulu ka thalange papacai kwini ki adhadhame, pasikai kwini ki daane marasikai ku kiapakabula ka lrisi.

⁵¹ Ala lri malra ku cedare ka angatu, buraburu, duduli ka calrisi si vaeva ka adhadhame arakai liniane dapenge ku yathalangane ku erai, si paralikiliki kingipitulu ki daane.

⁵² Lri arakai ku erai ki adhadhame, acilai, panianianiake ka adhadhame, cedare ka angatu, buraburu si duduli ka calrisi marasikai ki daane pakabula ka lrisi.

⁵³ Ala, lri malra kwini panianianiake ka adhadhame pangipalai, pasiwlri mwa ubulane. Lri arakai kikai kakudhane si marasikai ki daane ku kiapakabula ka lrisi, kwini daane laka mabulanga.

⁵⁴ Kikai belenge amani ku kakudhane ki macaeme ki raibiu,

^55-56 twanana, makuvingi, ngiaracuku ku lrangici ki kinawmasane, si ngwakai ki laimai si maubilringane ka daane.

⁵⁷ Kikai kakudhane amani ku tasingikaiyane ka mabula si kaika mabula niyanenga.