Lrivi 13 - Ngudradreadrekadhane Ka Sisiu 魯凱語聖經

Kakudhane ki raibiu ka caemane

¹ Ku Tamatama papia ki Musi si Arungu baai pelaela kikai lebe kai la kakudhane.

² Lu ikai ku pakai ki lrangici ngithabucu beaberathe, kakuvingi, kalraceacenge, kikai tangimiane kacaeme yakai lu ngililisi kacaeme ki raibiu, iluka mwa ki ngwakai ki Arungu ka barakalai.

³ Ku barakalai lri drele kwini caemaneini; lwiyasi kwini tapakaiyane ku ubale la akabalrithi kapuli, ku tapakaiyane la mwadringinga ki lrangici, kikai tangimiane ki raibiu ka caemane, ku barakalai lri pelaela kwini umawmase ka kaika mabulanga ikai ki lalrisi.

⁴ Ai, adravane kikai umawmase ku tapakaiyane kainganainga kapuli, la kai mwadringi ki lrangicini, ku ubale la kai akabalrithi kapuli, ku barakalai lri pakitukudha iniane makapitulu.

⁵ Luka samakapitulu, ku barakalai lri peelanga drele iniane, lwiyasi kai aru kipakilringau ku takacaemane, la kai katwase sarau, lri pakitukudha iniane makapitulu.

⁶ Luka samakapitulu, ku barakalai lri peelanga drele iniane; kwini takakuvingane alaiyasi kawlrawnga, la kai parwakai sarau, lri pelaela kikai umawmase kai, ka mabulanga; kwini tangimianeini makuvingi sikakathane. Kikai umawmase lri sinau ku laimaini, lu ngimianga kwini, ikai ki lrisi mabulanga.

⁷ Ai, ku barakalai lri drele iniane, si pelaela ka mabulanga ikai ki lrisi, lwiyasi la tupela si sarau, lri siwlri mwa ki barakalai.

⁸ Ku barakalai lri pelanga drele iniane; lwiyasi kwini tapakaiyaneini la sarau, lri pelaela iniane ka kaika mabula ikai ki kakudhane. Kikai yai, raibiu ka caemane.

⁹ Lwiyasi ikai ku kiaturaibiu ka caemane, lri iluku mwa ki barakalai;

¹⁰ ku barakalai lri drele iniane. Lwiyasi kwini lrangicini la akabalrithi kapuli, ku ubale la kapuli, si tunana,

¹¹ kikai amani ku tangimiamiane ki kiasaelanga ki raibiu ka caemane. Ku barakalai lri pelaela iniane ka kaika mabulanga, ai kai lri pakitukudha iniane, asi lwiyane kwini athingalanenga, kwini umawmase ka kaika mabulanga.

¹² Kwini raibiu ka caemane alaiyasi saraunga mwa ki la lrangici, si saraunga alraelre ki kinawmasane, twalai ki awlru pakela ki drapale,

¹³ ku barakalai lri drele iniane; lwiyasi la drele la salraelrenga ki kinawmasane ku raibiu, lri pelaela kikai lasu ka mabula ikai ki lrisi; lwiyasi kapuli palraelre ki kinawmasane, ikai ki lrisi kai lasu mialri ka mabula.

¹⁴ Ai, sana drele kwini dula la ngibatelra, twalainga kwini, kwini umawmase amani ku kaika mabulanga.

¹⁵ Ku barakalai lri peela drele iniane; ku tapakaiyane ku dula la ngibatelra, lri pelaela iniane ka kaika mabulanga. Kikwini yai tangimiamiane ki raibiu; kikai lasu kaimabula.

¹⁶ Ku dula lu mudringainga, si kapuli, lri siwlri mwa ki barakalai;

¹⁷ ku barakalai lri peela drele iniane. Lwiyasi kwini tapakaiyane laka mapulinga, ikai ki lrisi kiatumabulanga; ku barakalai lri pelaela ka mabulanga kwini umawmase.

¹⁸ Lwiyasi la ikai ku mapu, la mudringainga,

¹⁹ ala tupela kwini tapakaiyane ngithabucu, si kapuli, maibu ku duduli si pupuli si udiudingane, lri mwa kidrele ki barakalai;

²⁰ ku barakalai lri drele iniane. Lwiyasi kwini dula la mwadringinga ki lrangici, ku yakai ki dula ku ubale la kapuli, ku barakalai lri pelaela iniane ka kaika mabula; kikai pu akabalrithi araibiu ka caemane.

²¹ Lu drele ku barakalai la kai kapuli kwini ubale ki dula, kwini tapakaiyane la kai mwadringi ki lrangici, ka kathane ku kulau ka tikiane ku takabalrithane, ku barakalai lri pakitukudha iniane makapitulu.

²² Lwiyasi kwini tapakaiyane la sarau, ku barakalai lri pelaela iniane ka kaika mabula; kikai yai, caemanenga ki raibiu.

²³ Lwiyasi kwini tapakaiyane la kai aru pakilringau, la kai sarau, ka pu sikakathane, ku barakalai lri pelaela iniane ikai ki lrisi ka mabula.

²⁴ Lu ikai ku kwaculu, ku dula la kapuli si beaberathe,

²⁵ ku barakalai lri drele iniane. Lwiyasi ku ubale ki dula la kapuli, ku dula la mwadringi ki lrangici, kikai yai, raibiu ka twalai ki takuculwane athingalane, ku barakalai lri pelaela iniane ka kaika mabula.

²⁶ Lwiyasi ku ubale ki dula la kapuli, ku dula la kai mwadringi ki dula, ku kulau la kaika akabalrithi turamuru, ku barakalai lri pakitukudha iniane makapitulu.

²⁷ Luka samakapitulu, ku barakalai lri drele iniane. Lwiyasi ku dula la sarau, kikai tangimiamiane yai, raibiu ka caemane ku barakalai lri pelaela iniane ka kaika mabula.

²⁸ Lwiyasi kwini dula la kai aru ngilisi, la kai sarau, la ka kathane ku kulau ka tikiane ku taakabalrithane, kikai sapelaela ka kaika raibiu ka caemane. Ku barakalai lri pelaela iniane ikai ki lrisi kaika mabula, asi lwiyane kwini ngwakai ki bakici ki takuculwane si kathane.

²⁹ Adravane ka sawvalai ka ababai, ku takatumanane laka pakai ki awlru ki bibiane,

³⁰ ku barakalai lri drele iniane. Lwiyasi ku tapakaiyane la mwadringi ki lrangici, ku tapakaiyane ki isiu si ngisingisi la abwaburavane, si aru kalreva, kikai yai, raibiunga ka caemane, ku barakalai lri pelaela kikai umawmase kaika mabula.

³¹ Ku barakalai lri drele iniane; lwiyasi drele kwini tapakaiyane la kai mwadringi ki lrangici, ai la ikaiyana ku takalrikilrikane madu ki isiu ki ngisingisi, ku barakalai lri pakitukudha iniane makapitulu.

³² Luka samakapitulu, ku barakalai lri drele kwini ki tapakaiyane; lwiyasi kwini tapakaiyane la kai sarau, ku tapakaiyane ku isiu si ngisingisi la kai akabalrithi tubwaburavane, ku tapakaiyane la kai mwadringi ki lrangici,

³³ kikai umawmase lri mwalra kwini ngwapapalra ku isiu si ngisingisi. Ku barakalai lri pakitukudha iniane makapitulu ku vai.

³⁴ Luka samakapitulu, ku barakalai lri peela drele iniane; lwiyasi ku tapakaiyane la kai sarau, la kai mwadringi ki lrangici, ku barakalai lri pelaela iniane ikai ki lrisi ka mabula. Lri sinau ku laimaini, ala lri kabula.

³⁵ Ai, lukabulanga, ku tapakaiyane lwiyasi la saarawnga,

³⁶ ku barakalai lri peela drele iniane. Lwiyasi ku tapakaiyane la saraunga, kai lri silapenga kwidra akabalrithi abwaburavane ku isiu si ngisingisi, kwini umawmase athingalanenga ka kaika mabula.

³⁷ Lwiyasi ku tadrelane kwini tapakaiyane la kaika wasarau, ku ngisingisi la cebenga, kwini tapakaiyane laka kiatumabulanga; ku barakalai lri pelaela iniane ikai ki lrisi ka mabula.

³⁸ Adravane ka sawvalai ka ababai, lwiyasi ikai ki lrangici la ikai ku lrawlrapungu ka udiudingane,

³⁹ ku barakalai lri drele iniane. Lwiyasi kwini takaudiudingane la kadradrimiti ku takalrawlrapungane, kikai sapathingalane ka kathane ku lrangici ka kainganai ku twabeaberathane; kikai umawmase ikai ki lrisi mabula.

^40-41 Lwiyasi la mururu ku isiu ki umawmase, adravane ka pacucubungu ka palrilrikudru, kwini umawmase mabula.

⁴² Ai, ku takapulukane alaiyasi kwini takalrawlrapungane la ikai ku maduli kiibu, kikai yai, raibiu ka caemane.

⁴³ Ku barakalai lri drele iniane; lwiyasi kwini takapulukane laka tengane ka yakai ku kiaibu ku maduli ki takapuliane,

⁴⁴ ku barakalai lri pelaela iniane ka kaika mabula, asi lwiyane kwini awlruini maraibiu kacaeme.

⁴⁵ Ku kiaturaibiu kacaeme ku umawmase lri tara silaimai ku nipuricane ku laimai, lai pangipurugucu ku isiuini, si paidringi tali lebe ki lringauini, si lalri tawtautau, “Kai ka mabula, kaika mabula!”

⁴⁶ Lu kaina mudringai kwini raibiu kacaeme, kwini lasu kaika mabula; kwini lasu lri tara ikai latadre ki tasuladhane, kitukudha ki palrapalra.

Kakudhane ki maubilringi

^47-48 Adravane ka ubale ki kiu si gialrane ka kaimadhane, ku nipapulrawlrawdrane ku nipapubabaratane ka lalasare ka kaimadhane, ka lrangici ka nitumanemanane ka lrangici, lwiyasi ubilringane,

⁴⁹ kwini ubilringi la tusalesese tududuli, amani ku lri sarau ka mubilringi, lri tara baai ki barakalai padrele.

⁵⁰ Ku barakalai lri drele kwini ki manemane, si pakitukudha makapitulu ku vai.

⁵¹ Luka samakapitulu, lri drele kwini ki manemane. Lwiyasi kwini ubilringi la saraunga, kikai manemane kaika mabulanga.

⁵² Ku barakalai lri pwa lama iniane, amani saka lri sarau ka ubilringi, lri tara arakai ku apwi lama.

⁵³ Ai, ku barakalai la drele kikai ubilringi la kai sarau,

⁵⁴ lri pasinau kwini ki lasu kwi lamanemane; lai malra pela pakitukudha makapitulu.

⁵⁵ Ku barakalai ala lri pelana drele kwini ki lamanemane; lwiyasi kwini ubilringane la kai sarau, la kai akabalrithi ku kulau, kikai lamanemane kaika mabulana. Adravane kwini ubilringi ka patali cubungu ka patali lrikudru, kwini lamanemane lri tara arakai ku apwi lama.

⁵⁶ Ai, ku barakalai lu pela drele kwini ki lamanemane, lwiyasi la drele kwini ubilringi la kawlrawnga, lri malra kwini tapakaiyane thuriace.

⁵⁷ Kwini ubilringi la tupelanga, si tupela sarau, kwini pimanemanane lri arakai ku apwi lama kwini ki lamanemane.

⁵⁸ Lwiyasi la sinau kwini ki lamanemane, ku ubilringi la kawlrawnga, lri peelanga sanguvale sinau, lu mia kikai kwini lamanemane ikai ki lrisi mabulanga.

⁵⁹ Kikai belenge amani ku kakudhane ki ubilringi. Adravane ka laimai ka ubale ki kiu ka lalasare ka kaimadhane, ka nipapulrawlrawdrane ku nipapubabaratane ka lalasare ka kaimadhane, ka nitumanemanane ka lrangici, sanaka maubilringi, lri singikai kikai ki kakudhane tumabula tu kaika mabula.