Lrivi 11 - Ngudradreadrekadhane Ka Sisiu 魯凱語聖經

Kakudhane ki laakaneane

¹ Ku Tamatama wadrekase ki Musi si Arungu,

^2-3 si papia ki swa Iseraylri baai pelaela kilakikai kakudhane. Sanaka mauavagai ku lrubungu si tubathai ka waudriwdripi, lri dulru numi kane patuelre.

^4-6 Ai kunumi madha kanekane ki lrakeda, sehuange si lrutuku, malra kilakikai tu kaika mabula ka waudriwdripi; asi lwiyane adravane ka twabathai kai mauvagai ku lrubungu.

⁷ Madha kanekane ki beke, malra tu kaika mabula ka waudriwdripi; mauavagai ku lrubungu, ai kai twabathai.

⁸ Kilakikai waudriwdripi ku beate lini madha kanekane, adravane ka aecengane ki wapacainga kai mwadringai; kilakikai kaika mabula ka waudriwdripi.

⁹ Ku twapari twakaralabe ku kange, lri kane numi patuelre;

¹⁰ ai ku kadrwa ku pari si karalabe ku kange, kai numi lri kane.

¹¹ Kunumi malra tumakudrulru liniane, la madha kanekane ku beate lini, adravane ka aecengane ku wapacai ka kinawmasane lini kai mwadringai.

¹² Kunumi madha kanekane ku kadrwa ku pari, kadrwa ku karalabe ka kange.

^13-19 Kikai lebe ka laadhadhame amani kudra kaimabula, kunumi madha kanekane: Takanga, kwici, tingielaela, kwau, adrisi, segese, talralreba, tuniau, si ngwakai ki aciacilai ki laveke ka laadhadhame, amani kai haiu, kwange, canlu, tange, luce, taisenge, ababirau.

^20-21 Sanaka twaparidi ka lubalubai, kathane ku wapipidiki, ku drumane kaika mabula patuelre.

²² Kunumi kanea ki acaculiki, tikilrilri, apapawku.

²³ Ai ku drumane ku twaparidi, wakapakapa ka tatiitiki ka lubalubai, kunumi tu kaika mabula liniane.

^24-28 Ku aneane ku wasulrape kikai lebe kai wapacainga ka waudriwdripi, ku aneane lri kitu kaika mabula pakela ki miauawbu: Patuelre ku yakai ku lrubungu, ku kai mauavagai ku lrubungu, kai wabaithi, si twakapalre ka supate ku drapale ku waudriwdripi. Sanaka wavelevele ki wapacai ka kinawmasane lini, lri tara sinau bula ku laimai, ai lri ka thadalrane kai kabula pakela ki miauawbu.

^29-30 Ku thalikabukai, tila, kulrabau si tabulrikange tu kaika mabula patuelre.

³¹ Ku aneane ku wasulrape ku wapacai, ku aneane lri kaimabula pakela ki miauawbu.

³² Kwini kinawmasane lu mucilri makakai belenge ki lamanemane, adravane ka angatu, ka makalrilau, ka lrangici ku lrekelreke ka lumase, adravane ka satumatumanane, lri kitu kaika mabula. Malra kilakikai si thebece pikai ki acilai; lri kaimabula pakela ki miauawbu.

³³ Ku kinawmasane lini la mucilri makakai ki dumulu ka palungu, kwini yapalungane kaika mabulanga; kunumi cwaka kwini palungu.

³⁴ Kwini kanekane madu ku lamanemane la kimwa kwini ki yapalungane ka acilai, kaika mabulanga kudra ungungulu madu ku acilai, alaiyasi pikai ki palungu, mialri kaika mabulanga.

³⁵ Kudra wapacai ku kinawmasane lini adravane mucilri makakai ki lamanemane, ki kwini lamanemane kaika mabulanga, adravane ka niara dumulane ka talabwane ka takakamane ka talabwane pwacacwake.

³⁶ Kwini lamanemane sana takela ki wapacai ka kinawmasane kaika mabulanga, ai ku tuturu ki acilai si baiyu thadalrane ka mabula.

³⁷ Kikai kinawmasane ki waudriwdripi lu mucilri makakai ki sapaivai, kwini sapaivai thadalrane ka mabula.

³⁸ Ai kwini sapaivai alaiyasi ka nilebelebane pikai ki acilai, kwini wapacai ka kinawmasane la mucilri makakai adringi, kikai sapaivai kaika mabulanga.

³⁹ Ku kanekane madu ku waudriwdripi lwiyasi pacai, ku aneane ku wasulrape iniane kaika mabula pakela ki miauawbu.

⁴⁰ Ku umawmase la kane ku beateini, lri tara sinau ku laimai pakabula, ai kwini lasu thadalrane kaika mabula pakela ki miauawbu. Sanaka wavelevele ku kinawmasane ki wapacainga, lri sinau ku laimai, ai kwini lasu thadalrane kaika mabula pakela ki miauawbu.

^41-42 Ku tatitiki ka lawagulagulai, adravane ka arabarange kapa, arasupate ku drapale dadavace, ku arakai ku makakalra ku drapale dadavace madha kanekane patuelre.

⁴³ Kunumi madha kanekane kikai lawagulagulai si ngikakudrulru.

⁴⁴ Kunaku Tamatamaku ka Twaumase numi; kunumi ngipapakabula, si alrivilrivi, kunaku lri ngitatusaniangaku, si kabula. Asi lwiyane alrivilrivaku turamuru. Kunumi la madha kanekane kilakikai lawagulagulai si ngikakudrulru.

⁴⁵ Kunaku Tamatamaku; wasangilukaku numiane katwase Izipiti, pakai ku a Twaumasananeli numiane. Kunumi kabula alrivilrivi, asi lwiyane kunaku alrivilrivaku.

⁴⁶ Kikai belenge amani ku ngwakai ki waudriwdripi, laadhadhame, lakange si lawagulagulai ka kakudhane.

⁴⁷ Kunumi tara pathathingala patatukudha ku mabula si kaika mabula, akanekaneane si kaika akanekaneane ka waudriwdripi.