Lasenai 99 - Ngudradreadrekadhane Ka Sisiu 魯凱語聖經Abebeelengenga ka talialalai ka Twaumase 1 Ku Tamatama magagemegeme ku puku, la manugiligili sanaka umawmase, wanene ikai ki taetalane ki Kirubime, la lingilingi kai kadaengane. 2 Matisalru ku Tamatama ikai Ziyungu; walribate kawmasane sanaka kuni. 3 Sanaka umawmase lri drengedrengere ku saniange matiwsakene ka naganeini; ku Twaumase saniange matisalru! 4 Maadrau ku puku ka talialalai, madalamesu ki aparamaramavane; yakaisu ki daane ki swa Iseraylri cegecege ku aparamaramavane; pwasakaisu ki dringelresane, si paulrudru ki paramaramavane. 5 Drengedrengera ki Tamatama ka Twaumaseta! Icucubunga ki taetalaneini sukubu! Ku Twaumase saniange matisalru! 6 Ku Musi si Arungu yai barakalaini; ku Samuile yai tarakitubitubi iniane; kwi lalasu kiatubi ki Tamatama, la tubalre ku Tamatama. 7 Twalai ki ulrudru ka ememe papia liniane kawriva; kwi lalasu la pasalaladha ku patarumaraini ku hulrice ka padradrekase. 8 Tamatama ka Twaumase nai, palraingisu ki kawkawlusu; adravane kalri pathavungusu ki tapasalrivane lini, ai peaelaelasu liniane, ka amanisu ku pacepe ka Twaumase. 9 Drengedrengera ki Tamatama ka Twaumaseta; ikaiya ki saniange ka lregelregeini sukubu iniane. Ku Tamatama ka Twaumaseta saniange matisalru! |