Lasenai 97 - Ngudradreadrekadhane Ka Sisiu 魯凱語聖經

Abebeelengenga ka warathudu ka Twaumase

¹ Ku Tamatama lu magagemegeme ku puku, kai kadaengane lri kiraragai! Sanaka yakaai kabicelrakane ki laveke ka kadaengane, kiraragadha!

² Ku makecege ka ememe, ku dradrimitane yakai ngithalringulu iniane; ku dringelresane, ku aparamaramavane yai karwalai ki kunini.

³ Yakai ku apwi cucubungu iniane, si lamalama ki ngiathalringulu ka labadha.

⁴ Ku lrikaceini paledra kawmasane; kai kadaengane sadrele manwagiligili.

⁵ Kai lalregelrege yakai cucubungu ki Tamatama, ikai cucubungu ki Tamatama kai kadaengane mia ki rusuku ngiderenau makanaelre.

⁶ Kai subelebelenge peaelaelaela pasalraelre ku dringelresaneini; sanaka umawmase wadrele ku lriguini.

⁷ Ku wasukusukubu ki samiamiange ku umawmase lri kitusinalreme makanaelre; ku walrigulrigu ki ngialisiane ka twaumase lri kiarubwane makanaelre; sanaka twaumase lri ikai cucubungu ki Tamatama guruthungane makanaelre.

⁸ Tamatama, amani sapikaisu ku aparamaramavane saibange, ku laumawmase Ziyungu kiararagai; ku lacekele ki Yuda kiararagai.

⁹ Tamatama, warathudusu kai kiacaebe belenge; sabebeelengengasu ki sanaka twaumase.

¹⁰ Ku Tamatama madalame kudra ki umawmase ku magirimucu ki ngialisiane; ku Tamatama palakebe ku niake ki kawkawluini, la palribulu liniane pakidaili ki alrima ki manganga ka umawmase.

¹¹ Ku ledra paledra ki madringelrese ka umawmase; ku sakiaragai swaete ki kidremedreme ki madringelrese ka umawmase.

¹² Madringelrese ka umawmase, lri ngwaladhaku ku tapiane ki Tamatama si kiraragai! Kunumi drengedrengera ku saniange ka naganeini!