Lasenai 96 - Ngudradreadrekadhane Ka Sisiu 魯凱語聖經Abebeelengenga ka talialalai ka Twaumase ( 1 Lacaili 16.23-33 ) 1 Papia ki Tamatama senai ku bavane ka senai! Sanaka kiacaebe ki belenge drengedrengera ki Tamatama makanaelre! 2 Papia ki Tamatama senai, drengedrengera iniane! Pivaiya pelaela ku tapalribulaneini ka mathariri ka vaga! 3 Papia ki sanaka kuni pelaela pasalraelre ku lriguini! Papia ki sanaka umawmase pelaela ku saniangane ku tapianeini! 4 Abebeelengenga ka Tamatama, swadalepe kidrengedrengere; naika makiwsaesakenenga ka makimukukuludrunga ki sanaka twaumase. 5 Ku twaumase ki lakuni samiamiange sikakathane; ai ku Tamatama ka Twaumase wabekace kai subelebelenge. 6 Ku lrigu, ku matisalrwane ngiathalringulu iniane; ku maadrau ka puku, ku tharirane swaete ki Alrivilrivi ka taikaikaiyaneini. 7 Kai kawmasane kai umawmase swadalepe drengedrengere ki Tamatama makanaelre; drengedrengera ku lriguini si maadrau ka pukuini! 8 Drengedrengera ku lrigu ka nagane ki Tamatama; iluka ku sapatarumarane, si mudaane ki daaneini. 9 Lu adrelane ku Tamatama gwaruthungane madu si sukubu; sanaka yakawmaasane ikaiya cucubungu iniane manugiligili! 10 Papia ki sanaka kuni pelaela: Ku Tamatama magagemegeme ku puku! Kai kadaengane kiacegecege pakakeecenge, kai lri ngivelevele! Ku Twaumase lri arakai ku dringelresane rathudu ki sanaka umawmase. 11 Kiraragadha itituku, ka kadaengane si subelebelenge! Tawtava, ka laveke si yakai adringi ka lapanianianiake! 12 Kiraragadha, ka laangangade si yakai angangade ka lataleke! Lukamaninga kwidra ku laangatu ikai angatungatu lri makakawkau kiraragai, 13 asi lwiyane ku Tamatama lri kela si rathudu kai ki kiacaebe ki belenge. Lri arakai ku dringelresane rathudu kawmasane; lri arakai ku patengatengane marasikai ki sanaka umawmase. |